Sambai Long Gutnius Long Rot Bilong Kot

LONG bipo yet, taim ol man i kirap nupela long wokim ol taun, ol i bin wokim ol banis bilong banisim taun. Long bipo, ol dispela bikpela strongpela banis ol i bilong lukautim taun. Ol man bilong was long taun ol i save sanap antap long ol dispela banis na taim ol birua i kam, ol i save pait long ol bilong lukautim banis na bai ol dispela birua i no ken brukim hap banis o rausim graun aninit long en na go insait. Dispela strongpela banis i save lukautim ol manmeri bilong taun, na tu, ol lain i sindaun long ol taun klostu long en ol inap i go hait insait long dispela banis long taim bilong pait samting.​—⁠2 Samuel 11:​20-​24; Aisaia 25:12.

Na i wankain tu long ol Witnes Bilong Jehova; ol i bin wokim wanpela kain banis​—⁠long rot bilong kot​—⁠bilong lukautim ol. Ol i no bin sanapim bilong banisim ol Witnes na bai ol yet i stap na ol i no ken bung wantaim ol narapela lain, nogat; long wanem, ol man i save long pasin bilong ol Witnes Bilong Jehova, olsem ol i save laik tru long i stap namel long ol narapela man na toktok wantaim ol. Tasol dispela banis i save strongim ol tok i stap long lo bilong kantri, olsem olgeta man i ken i stap fri long mekim ol samting i stret ol i mekim. Na tu, em i save lukautim ol Witnes bambai ol i ken i stap fri long mekim lotu bilong ol, olsem lo bilong gavman i tok. (Skelim wantaim Matyu 5:​14-​16.) Dispela banis i save lukautim pasin bilong ol bilong mekim lotu na long autim gutnius bilong Kingdom bilong God, em wanpela samting i stret ol i ken mekim. Dispela banis em i wanem samting? Na ol i bin wokim olsem wanem?

Wokim Banis Long Rot Bilong Kot

Tru, long planti kantri ol Witnes Bilong Jehova i stap fri long mekim lotu bilong ol, tasol long sampela kantri ol man i mekim pasin birua long ol Witnes, tasol i no gat as na ol i mekim olsem. Orait taim ol i laik pasim ol Witnes long i stap fri long mekim lotu bilong ol, olsem long bung wantaim o long autim tok long haus bilong ol man, ol Witnes i wok strong long stretim dispela samting long rot bilong kot. Long olgeta hap bilong graun, inap planti tausen taim ol i bin go long kot.a I no olgeta taim ol i bin winim kot. Tasol taim ol i lus long kot, ol i bin i go long nambawan kot. Wanem samting i bin kamap long dispela?

Inap planti yia long taim bilong yumi, ol kot em ol Witnes Bilong Jehova i bin winim long planti kantri, dispela i olsem as bilong strongim tok bilong ol Witnes long ol narapela kot ol i bin mekim bihain long en. Olsem ol brik o ston bilong banis, ol dispela kot ol i winim long rot bilong ol lo bilong kantri, em i olsem wanpela banis bilong lukautim ol, na em i givim rot long ol na ol i wok yet long mekim pait long rot bilong kot bambai ol i ken i stap fri long mekim lotu bilong ol.

Yumi ken tingim wanpela kot i bin kamap (Murdock wantaim Komonwel Bilong Pensilvenia) long Sprim-Kot Bilong Amerika long Me 3, 1943. Bikpela askim i kamap long dispela kot i olsem: Ol Witnes i mas kisim laisens bilong tilim ol buk na nius bilong lotu bilong ol, olsem man i save kisim laisens bilong mekim wanpela wok bisnis? Ol Witnes Bilong Jehova i tok ol i no gat wok long mekim olsem. Wok bilong ol long autim tok em i no wanpela wok bisnis. Ol i no mekim dispela wok bilong kisim mani​—⁠ol i mekim bambai ol i ken autim gutnius. (Matyu 10:8; 2 Korin 2:​17) Long tok ol i pasim long kot bilong Murdock, Kot i wanbel wantaim ol Witnes, olsem dispela tok long ol i mas baim laisens bambai ol i ken tilim ol buk na nius bilong lotu, em i no stret wantaim lo konstitusen bilong gavman.b Dispela tok em kot i pasim, em i bikpela samting, long wanem, long planti kot ol Witnes i bin mekim bihain long en, ol i kamapim dispela tok bilong kot na dispela i helpim ol long winim kot. Tok em kot i pasim long dispela kot bilong Murdock, em i kain olsem wanpela strongpela brik long banis bilong lukautim wok bilong yumi.

Ol dispela kot ol Witnes i bin winim, em i bin mekim bikpela wok bilong helpim olgeta man bambai ol i ken i stap fri long mekim lotu bilong ol. Wanpela nius (University of Cincinnati Law Review) i stori long wok ol Witnes i bin mekim bilong helpim ol man bilong Amerika bambai ol inap mekim ol samting i stret ol i ken mekim, na dispela nius i tok: ‘Ol Witnes Bilong Jehova i bin helpim tru wok bilong stretim stretim lo konstitusen, na bikpela wok ol i bin mekim insait long dispela, em ol i wok long surikim mak bilong i stap fri long mekim ol tok na long mekim lotu.’

Wok Bilong Strongim Banis

Olgeta wan wan kot ol i winim, em i save strongim moa yet dispela banis. Yumi ken tingim sampela tok em kot i bin pasim bihain long 1990 na em i bin helpim gut ol Witnes Bilong Jehova na ol narapela man long olgeta hap, em ol i save laikim tru pasin bilong i stap fri.

Kantri Grik. Long Me 25, 1993, Yuropian Kot ov Human Raits i tokaut olsem i stret wanpela man bilong kantri Grik i ken skulim ol man long ol bilip bilong lotu bilong em. Dispela em kot bilong Minos Kokkinakis, long dispela taim em i gat 84 krismas. Em i wanpela Witnes Bilong Jehova, na kirap long 1938 ol polis i bin holim em inap 60 taim samting, na em i bin sanap long ol kot bilong kantri Grik inap 18 taim, na em i kalabus inap 6-pela yia samting. Em i bin kot long wanpela lo bilong kantri Grik i bilong 1930 samting, na i tambuim man long autim bilip bilong em​—⁠em dispela lo i mekim na ol polis i bin holim klostu 20,000 Witnes Bilong Jehova, kirap long 1938 i kam inap long 1992. Yuropian Kot i tokaut olsem gavman Grik i bin kalapim lo i larim Kokkinakis i stap fri long mekim lotu, na kot i makim bikpela mani, inap olsem $14,400, em gavman Grik i mas givim long em. Long tok em Kot i pasim, em i tokaut olsem ol Witnes Bilong Jehova ol i wanpela “lotu ol man i save long en.”​—⁠Lukim Wastaua bilong Septemba 1, 1993, pes 27-​31.

Meksiko. Long Julai 16, 1992, wanpela bikpela samting i kamap long Meksiko bilong sambai long pasin bilong i stap fri long mekim lotu. Long dispela taim ol i kamapim wanpela lo bilong ol samting bilong lotu (Law of Religious Associations and Public Worship). Long rot bilong dispela lo, sapos wanpela lain bilong lotu i rejistaim nem bilong ol, orait gavman i ken makim ol olsem wanpela oganaisesen bilong lotu, na lo bilong gavman bai orait long ol. Bipo, ol Witnes Bilong Jehova i wankain olsem ol narapela lotu long dispela kantri​—⁠ol i stap, tasol ol i no inap rejista long gavman olsem wanpela lotu em gavman i orait long en. Orait long Epril 13, 1993, ol Witnes i wokim pepa bambai ol i ken rejista long gavman. Gutpela tru, long Me 7, 1993, gavman i rejistaim nem bilong ol olsem La Torre del Vigía, A. R., na Los Testigos de Jehová en México, A. R., em tupela wantaim em ol asosiesen bilong lotu.​—⁠Lukim Kirap! (tok Inglis), Julai 22, 1994, pes 12-​14.

Brasil. Long Novemba 1990, wanpela lain bilong gavman long Brasil (National Institute of Social Security) i salim toksave long brens-ofis bilong Sosaiti Was Taua olsem ol volantia i mekim wok lotu long Betel (em nem bilong ol haus brens bilong ol Witnes Bilong Jehova), em gavman i no ken tingim ol moa olsem ol man bilong mekim wok lotu, olsem na nau ol bai stap aninit long ol lo bilong Brasil ol wokman i stap aninit long en. Ol Witnes i go long kot bilong stretim dispela samting. Long Jun 7, 1996, wanpela lain bilong kot long Brasilia (Judicial Advisory of the Office of the Attorney General) i tokaut olsem ol lain i wok long Betel ol i wanpela lain bilong mekim wok lotu, na ol i no olsem ol wokman i mekim wok mani long wanpela kampani samting.

Japan. Long Mas 8, 1996, Sprim-Kot Bilong Japan i pasim tok long wanpela bikpela tok i bin kamap long ol samting bilong skul na pasin bilong i stap fri long mekim lotu​—⁠dispela i helpim olgeta manmeri bilong Japan. Olgeta long lain bilong kot i wanbel long tokaut olsem wanpela bikpela skul koles long Kobe (Kobe Municipal Industrial Technical College) i kalapim lo taim ol i rausim Kunihito Kobayashi, long wanem, em i no laik lain long wanpela kain spot olsem judo na kendo. Dispela em i namba wan taim bilong dispela Sprim-Kot long skelim lo konstitusen bilong Japan i tok ol man i ken i stap fri long mekim lotu, na ol i pasim tok i stret wantaim dispela lo. Dispela yangpela Witnes i bihainim maus bilong bel em Baibel i skulim pinis, na em i pilim olsem dispela spot ol i mas lain long mekim, i no stret wantaim ol lo bilong Baibel olsem wanpela lo i stap long Aisaia 2:​4, em i tok: “Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.” Ol tok Kot i pasim em inap helpim ol narapela sumatin sapos bihain dispela kain hevi i painim ol.​—⁠Lukim Wastaua, Novemba 1, 1996, pes 19-​21.

Long Februeri 9, 1998, Nambawan Kot Bilong Tokyo i pasim wanpela bikpela tok na i tokaut olsem Misae Takeda, em wanpela Witnes, em i mekim samting i stret em i ken mekim taim em i no laik kisim samting dokta i laik givim long em, long wanem, em i no stret wantaim tok bilong Baibel olsem yumi mas abrusim blut. (Aposel 15:​28, 29) Ol i kisim dispela tok i go long Sprim-Kot, na yumi mas wet na lukim olsem dispela kot bai wanbel wantaim tok bilong Nambawan Kot o nogat.

Filipin. Long Mas 1, 1993, Sprim-Kot Bilong Filipin i pasim wanpela tok i helpim ol Witnes Bilong Jehova na ol i winim wanpela kot i bin kamap taim skul i rausim sampela yangpela Witnes, long wanem, long pasin daun ol i tok ol i no laik salut long plak.

Em nau, olgeta wan wan kot ol Witnes i winim, em i olsem wanpela ston o brik moa ol i putim bilong strongim banis, olsem em i strongim lo i bilong lukautim olgeta man​—⁠i no ol Witnes Bilong Jehova tasol​—⁠na bai ol i gat rot long mekim ol samting i stret ol i ken mekim.

Lukautim Gut Banis

Ol Witnes Bilong Jehova ol i rejista long gavman long 153 kantri, na ol i stap fri long mekim planti samting i stret ol i ken mekim, wankain olsem ol narapela lotu. Inap planti planti yia i gat tambu long wok bilong ol long Isten Yurop na ol kantri bipo Rasia i bosim, na ol i bin mekim nogut long ol Witnes long ol dispela hap. Tasol nau long ol kantri olsem Albenia, Belarus, Hangari, Jojia, Kasakstan, Kirgistan, Ripablik Sek, Romenia, Slovakia, gavman i orait long wok bilong ol Witnes Bilong Jehova. Tasol long sampela kantri long nau ol i laik pasim ol Witnes Bilong Jehova long mekim ol samting i stret ol i ken mekim, o ol i no orait long ol i mekim, na sampela kantri olsem, em ol i stap long hap bilong Westen Yurop na ol i gat ol lo na kot i bin i stap longtaim. Ol lain i birua long ol Witnes ol i wok strong long ‘putim lo i orait long ol man i mekim pasin nogut’ long ol Witnes. (Song 94:20) Ol Witnes i save mekim wanem long dispela?c

Ol Witnes Bilong Jehova i laik wok gut wantaim olgeta gavman, tasol ol i laik tu bai lo bilong gavman i ken larim ol i stap fri long mekim lotu bilong ol. Ol i bilip strong olsem ol lo, o ol tok bilong kot, i tambuim ol long bihainim ol tok bilong God​—⁠wanpela i olsem ol i mas autim gutnius​—⁠ol dispela lo i no stret na i no gat as bilong en. (Mak 13:10) Sapos ol i no inap stretim dispela samting long rot bilong toktok gut wantaim, orait ol Witnes Bilong Jehova bai bringim dispela hevi bilong ol i go long kot, na bai ol i mekim olgeta samting bilong painim rot bilong apil long narapela kot bambai ol i ken kisim tok orait long gavman long mekim lotu bilong ol, em God yet i tok long ol i mas mekim. Ol Witnes Bilong Jehova i bilip tru long tok promis bilong God olsem: “I no gat wanpela bilong ol dispela samting bilong pait inap bagarapim yu.”​—⁠Aisaia 54:⁠17.

[Ol Futnot]

[Blok long pes 21]

Sambai Long Ol Samting i Stret Ol Witnes i Ken Mekim

Ol man i bin mekim nogut long ol Witnes Bilong Jehova, olsem na long olgeta hap bilong graun ol Witnes i mas i go sanap long ai bilong ol jas na ol bikman bilong gavman. (Luk 21:​12, 13) Long rot bilong kot ol Witnes Bilong Jehova i bin wok strong long sambai long ol samting i stret ol i ken mekim. Long planti kantri ol i bin winim kot na dispela i helpim ol Witnes Bilong Jehova long i stap fri olsem lo i makim, na ol inap mekim ol samting i stret ol i ken mekim, olsem:

◻ autim tok long haus bilong ol man na i no gat sampela tambu long dispela wok olsem i stap long ol man i save raun long ol haus bambai ol man i ken baim ol samting bilong ol​—⁠Murdock wantaim Komonwel Bilong Pensilvenia, Sprim-Kot Bilong Amerika (1943); Kokkinakis wantaim kantri Grik, Yuropian Kot ov Human Raits (ECHR) (1993).

◻ i stap fri long bung wantaim bilong mekim lotu​—⁠Manoussakis na Ol Narapela wantaim kantri Grik, ECHR (1996).

◻ tingting long olsem wanem ol i ken bihainim maus bilong bel na daun long plak o mak bilong kantri​—⁠West Virginia State Board of Education wantaim Barnette, Sprim-Kot Bilong Amerika (1943); Sprim-Kot Bilong Filipin (1993); Sprim-Kot Bilong India (1986).

◻ sakim ol wok bilong ami em bel bilong ol i gat tok long en, long wanem, ol i Kristen​—⁠Georgiadis wantaim kantri Grik, ECHR (1997).

◻ ol yet i ken makim ol samting dokta i ken mekim o marasin ol inap kisim, em bel bilong ol i no gat tok long en​—⁠Malette wantaim Shulman, Kot Bilong Apil, Onterio, Kanada (1990); Was Taua wantaim E.L.A., Nambawan Kot, San Juan, Pueto Riko (1995); Fosmire wantaim Nicoleau, Nu Yok, Amerika, Kot Bilong Apil (1990).

◻ mekim bikpela long ol pikinini long pasin i stret wantaim ol bilip bilong ol em Baibel i as bilong en, maski sampela kot i daunim ol dispela bilip long taim papa na mama i tok pait long kot long husat bai kisim ol pikinini​—⁠St-Laurent wantaim Soucy, Sprim-Kot Bilong Kanada (1997); Hoffmann wantaim Ostria, ECHR (1993).

◻ mekim wok long sampela sosaiti em gavman i orait long en na ol i no gat wok long tromoi takis, wankain olsem ol sosaiti em ol narapela lotu i mekim wok long en na gavman i orait long ol dispela lotu​—⁠Ol Manmeri wantaim Haring, Kot Bilong Apil, Nu Yok, Amerika (1960).

◻ gavman i ken mekim wankain pasin long ol man i save mekim wok lotu oltaim olsem em i mekim long ol man bilong ol narapela lotu i save mekim wok lotu oltaim na em i no singaut long ol i mas tromoi takis​—⁠National Institute of Social Security bilong Brasil, Brasilia, (1996).

[Piksa long pes 20]

Minos Kokkinakis wantaim meri bilong em

[Piksa long pes 20]

Kunihito Kobayashi

[Piksa Kredit Lain long pes 19]

The Complete Encyclopedia of Illustration/J. G. Heck