“Dispela Pait Em i Pait Bilong Jehova Yet”

Dispela hevi i kirap long 1999 taim gavman bilong Frans i tok olsem brens ofis long Frans i mas baim ol takis long ol donesen ol i kisim namel long yia 1993 na 1996. Mipela i bringim dispela keis i go long kot bilong Frans, tasol ol i mekim wansait pasin na mipela i lus long kot keis. Bihain mipela i go long wanpela apil kot, tasol mipela i kisim wankain bekim na gavman i kisim moa long 4 na hap milion yuro long benk akaun bilong brens. Laspela rot bilong kisim helpim em long kisim dispela keis i go long ECHR. Tasol paslain long ol i harim dispela keis na wokim disisen, ECHR i tok mipela i mas bung wantaim ol loya bilong gavman na wanpela rejistra bilong Kot—em ol ofisa i save mekim ol pepa wok bilong Kot—bilong lukim sapos mipela inap wanbel long wanpela tingting.

Mipela i save pinis olsem rejistra bai presaim mipela long baim sampela hap bilong mani em gavman i askim long en bilong mipela i ken kamap wanbel. Tasol mipela i save sapos mipela i baim wanpela yuro tasol, orait dispela i no stret wantaim ol stiatok bilong Baibel. Ol bratasista i givim ol donesen bilong sapotim wok bilong Kingdom, so ol donesen ol i givim i no bilong gavman. (Mat. 22:21) Maski i olsem, mipela i go long dispela bung bilong soim rispek long ol lo bilong Kot.

Dispela bung i kamap long wanpela naispela konferens rum bilong dispela Kot haus. Kirap bilong miting i no go orait tumas. Taim rejistra i kirapim tok bilong em, em i tok olsem em i ekspektim ol Witnes Bilong Jehova long Frans long baim sampela takis em gavman i askim long en. So mipela i askim em olsem, “Yu save tu olsem gavman i kisim pinis moa long 4 na hap milion yuro long benk akaun bilong mipela?”

Rejistra i kirap nogut tru long harim dispela. Taim ol loya bilong gavman i tokaut olsem ol i bin mekim olsem, tingting bilong em long dispela keis i senis olgeta. Em i krosim ol na hariap tru em i pinisim dispela miting. Long dispela taim, mi luksave olsem Jehova i senisim olgeta samting na bai mipela inap winim dispela keis, em samting mipela i no bin ting bai kamap. Long pinis bilong miting, mipela i amamas tru na mipela i hatwok long bilip long samting i bin kamap.

Long Jun 30, 2011, ECHR i wokim disisen olsem mipela i winim kot keis. Ol i kenselim takis mipela i mas baim na ol i odaim gavman long bekim bek mani ol i bin kisim wantaim intres! Dispela bikpela kot disisen i lukautim lotu i tru long Frans i kam inap long nau. Dispela wanpela askim em mipela i no bin ting long en i olsem ston em Devit i sutim i go insait long het bilong Goliat; long dispela taim ol samting i senis olgeta. Wai na mipela i winim dispela keis? Bikos olsem Devit i bin tokim Goliat: “Dispela pait em i pait bilong Jehova yet.”—1 Sml. 17:​45-47.

I gat planti moa kot keis em yumi bin winim. I kam inap long nau, maski ol strongpela gavman na ol lotu i birua long yumi, ol bikpela kot bilong 70 kantri na sampela intenesenel kot em ol jas bilong ol narapela narapela kantri i insait long en i bin mekim 1,225 disisen i sapotim raits bilong ol Witnes Bilong Jehova. Disisen bilong ol i lukautim raits bilong yumi, olsem raits bilong yumi long stap olsem wanpela lotu em gavman i luksave long en, long autim tok, long no ken insait long ol bikpela bung bilong kantri, na sakim blut.

Wai na mi insait long wanpela kot keis long Yurop taim mi wok long Wol Hetkota Bilong Ol Witnes Bilong Jehova long New York, Amerika?

MI KISIM LAIK BILONG MEKIM WOK MISINERI LONG PAPAMAMA

Papamama bilong mi, George na Lucille, i bin grediuet long namba 12 klas bilong Skul Gileat na ol i mekim wok misineri long Itiopia taim mi bon long 1956. Ol i givim mi nem Filip, em nem bilong wanpela evanselis long taim bilong ol aposel. (Apo. 21:8) Long yia bihain, gavman i putim tambu long lotu bilong yumi. Mi liklik boi long dispela taim, tasol mi inap tingim yet olsem famili bilong mipela i save hait na lotu. Mi liklik pikinini so mi amamas long mekim olsem! Sori tru, ol ofisa bilong gavman i tokim mipela long lusim kantri long 1960.

Taim mipela i muv i go stap long Wichita, Kansas, long Amerika, papamama i kisim wanpela samting i spesel tru i kam wantaim ol, em laik bilong ol long mekim wok misineri. Ol i laikim tru tok i tru, na ol i skulim mi na bikpela susa bilong mi Judy na liklik brata bilong mi Leslie long laikim Jehova na mekim wok bilong em; Judy na Leslie tu i bin bon long Itiopia wankain olsem mi. Mi kisim baptais taim mi gat 13 krismas. Tripela yia bihain, mipela i muv i go long hap i sot long ol pablisa em long Arequipa, Peru.

Long 1974 taim mi gat 18 krismas tasol, Peru brens i makim mi na 4-pela narapela brata long kamap ol painia salim. Mipela i mas go autim tok antap tru long ol maunten bilong Central Andes, em ples we ol pablisa i no autim tok yet long en. Mipela i autim tok tu long ol komiuniti bilong ol asples lain em ol i mekim tokples Kesua na Aimara. Trak mipela i save raun long en em olsem haus bilong mipela tu, na mipela i kolim olsem Sip Bilong Noa bikos em i luk olsem bikpela boks. Mi gat ol gutpela memori we mi yusim Baibel long skulim ol asples lain olsem klostu nau Jehova bai pinisim pasin bilong i stap rabis na sik na dai. (Rev. 21:​3, 4) Planti manmeri long hap i kirap lotuim Jehova.

MI KIRAP WOK LONG WOL HETKOTA

Long 1977, Albert Schroeder em wanpela brata bilong Gavening Bodi Bilong Ol Witnes Bilong Jehova i kam visitim mipela long Peru, na em i kirapim mi long aplai long wok long Betel long wol hetkota. So mi mekim olsem. Bihain liklik, long Jun 17, 1977, mi kirap wok long Brooklyn Betel. Insait long 4-pela yia, mi wok long ol dipatmen bilong Klining na Meintenens.

Long Jun 1978, mi bungim Elizabeth Avallone long wanpela intenesenel kibung long New Orleans, Louisiana. Papamama bilong em tu i givim bel tru long mekim wok bilong Jehova wankain olsem papamama bilong mi. Elizabeth i mekim wok painia oltaim inap 4-pela yia pinis na em i laikim tru fultaim sevis na em i laik mekim dispela wok long laip olgeta bilong em. Mitupela i wok long kontekim narapela narapela. I no longtaim na mipela i stat long laikim narapela narapela. Mipela i marit long Oktoba 20, 1979, na mitupela wantaim i wok long Betel.

Fes kongrigesen mipela i go long en em Brooklyn Spanish Kongrigesen na ol bratasista long hap i laikim tru mipela. Insait long ol yia i go pinis, tripela narapela kongrigesen i welkamim mipela na sapotim mipela taim mipela i wok long Betel. Mipela i tenkyu tru long ol i helpim mipela na long sapot bilong ol pren na ol wanfamili em ol i lukautim lapun papamama bilong mipela.

MI HELPIM OGANAISESEN LONG SAIT BILONG OL KOT KEIS

Mi kirap nogut olsem long Janueri 1982, ol i asainim mi long wok long Ligol Dipatmen long Betel. Tripela yia bihain, ol i askim mi long go long skul bilong lo bilong kamap loya. Long skul bilong lo, mi amamas tru long lainim olsem ol manmeri long Amerika na ol narapela kantri i gat fridom long mekim planti samting bikos long planti kot keis em ol Witnes Bilong Jehova i bin winim. Planti taim mipela i save stori long ol dispela bikpela kot keis long klas.

Long 1986 taim mi gat 30 krismas, ol i makim mi long kamap ovasia bilong Ligol Dipatmen. Mi amamas olsem ol brata i trastim mi long mekim dispela wok maski mi yangpela man, tasol mi no kliagut long planti samting so mi pilim tu bikpela presa bilong dispela wok.

Mi kamap loya long 1988, tasol mi no kliagut long hevi inap kamap taim mi larim dispela skul i daunim pasin pren bilong mi wantaim Jehova. Bikpela skul inap mekim wanpela i pilim olsem em i antap moa long ol narapela, na em inap ting olsem bikpela save em i gat i mekim na em i winim ol man i no gat wankain save olsem em. Elisabet i helpim mi long kisim stretpela tingting long dispela. Em i helpim mi long strongim gen pasin pren bilong mi wantaim Jehova olsem mi bin mekim paslain long mi go long skul bilong lo. Sampela haptaim i lus, tasol isi isi mi pas gut gen wantaim Jehova. Tru tumas, maski yumi gat bikpela save long mekim wanpela wok, dispela em i no nambawan bikpela samting long laip. Bikpela samting em long pas gut wantaim Jehova na laikim em tru na laikim tu lain bilong em.

STRONGIM SAIT BILONG GUTNIUS LONG ROT BILONG KOT

Mi pinis long skul bilong lo, so nau mi putim tingting olgeta long helpim Ligol Dipatmen long lukautim ol ligol samting long Betel na long difendim raits bilong yumi long kot. Mi amamas long dispela asainmen, tasol i gat ol hatwok bilong en tu bikos ol samting long oganaisesen i wok long senis hariap hariap. Olsem, pastaim yumi save askim ol man long donesen taim ol i kisim ol litresa, tasol kirap long 1991 ol i askim Ligol Dipatmen long go pas long mekim senis long dispela. Bihain long dispela, ol Witnes Bilong Jehova i no kisim mani moa long ol litresa ol i tilim. Dispela i mekim na wok long Betel na long fil i simpol, na i kam inap long nau dispela senis i lukautim yumi na ol gavman i no sasim nating bikpela takis long yumi. Sampela i ting dispela senis inap pinisim mani bilong baim ol litresa bilong tilim long ol manmeri na bai i no gat rot long planti manmeri moa i kisim save long Jehova. Tasol ol samting i no kamap olsem. Kirap long 1990 na i kam, namba bilong ol manmeri i lotuim Jehova i dabol, na long nau planti inap kisim ol pablikesen bilong Baibel i no gat pe long en. Mi luksave olsem long rot bilong strong bilong Jehova na daireksen em i givim long gutpela wokboi, dispela senis na planti narapela senis em oganaisesen i mekim i kamap gut.—Kis. 15:2; Mat. 24:45.

I no olsem yumi winim ol kot keis bikos yumi gat ol gutpela loya na em tasol, nogat. Planti taim em gutpela pasin bilong lain bilong Jehova i kirapim ol jas na ol gavman ofisa long helpim yumi. Mi lukim dispela i kamap long 1998 taim 3-pela brata insait long Gavening Bodi na ol meri bilong ol i go long ol spesel kibung long Kuba. Gutpela pasin na pasin rispek bilong ol i helpim ol gavman ofisa long luksave olsem yumi no save insait long wok politik, na dispela i winim ol tok mipela i mekim long ol miting wantaim ol.

Sampela taim mipela i no inap long toktok na stretim ol hevi, so mipela i mas “strongim sait bilong gutnius long rot bilong kot.” (Fili. 1:7) Olsem, inap planti yia gavman bilong Yurop na Saut Korea i no luksave long raits bilong yumi long mekim ol wok bilong helpim kantri na yumi no ken insait long ami. Em as na inap olsem 18,000 brata long Yurop na winim 19,000 brata long Saut Korea i go long kalabus bikos maus bilong bel bilong ol i no larim ol i insait long ami.

Long Julai 7, 2011, ECHR i mekim wanpela bikpela disisen tru long keis bilong Bayatyan v. Armenia we ol i tokaut olsem ol Kristen brata long Yurop i ken mekim ol wok bilong helpim kantri na ol i no ken insait long ami bikos long bilip bilong ol. Na long Jun 28, 2018, Constitutional Court bilong Saut Korea i mekim wankain disisen olsem. Sapos sampela yangpela brata bilong yumi i lusim bilip na ol i insait long ami, dispela bai pasim yumi long winim dispela tupela bikpela kot keis wantaim.

Ol ligol dipatmen long wol hetkota na long ol narapela brens i givim bel tru long wok long difendim raits bilong yumi long lotuim Jehova na autim gutnius bilong Kingdom. Mipela i amamas tru long makim maus bilong ol wanbilip em ol gavman i birua na mekim nogut long ol. Maski mipela i winim ol kot keis o nogat, ol tok mipela i mekim i opim rot long mipela inap autim tok long ol gavana, ol king, na ol kantri. (Mat. 10:18) Ol jas, ol gavman ofisa, ol niuslain, na olgeta manmeri i save skelim ol skripsa em mipela i putim long ol dokiumen, na tu, ol i harim ol tok mipela i mekim long kot. Ol man i gat gutpela bel i kisim save long ol Witnes Bilong Jehova ol i husat na wanem as bilong ol bilip bilong yumi. Sampela bilong ol dispela manmeri i kamap ol wanbilip bilong yumi.

TENKYU JEHOVA!

Winim 40 yia pinis, mi bin wok wantaim ol narapela brens ofis long graun olgeta long ol ligol samting na long sanap long ai bilong ol bikpela kot na ol bikman tu. Mi laikim tru ol wanwok bilong mi long Ligol Dipatmen long wol hetkota na long ol ligol dipatmen long olgeta hap bilong graun. Mi amamas tru long yusim laip bilong mi long mekim dispela wok na mi kisim planti blesing.

Elizabeth i laikim mi na em i sapotim mi insait long 45 yia long ol gutpela taim na ol taim nogut. Mi laikim em long dispela pasin bilong em bikos em i mekim olsem maski em i gat wanpela bikpela sik we i save pinisim strong bilong em.

Mipela i luksave olsem strong mipela i kisim long mekim wok na ol kot keis mipela i winim em i no strong na save bilong mipela yet. Olsem Devit i bin tok: “Jehova i save helpim ol manmeri bilong em.” (Sng. 28:8) Tru tumas, “dispela pait em i pait bilong Jehova yet.”