Kot i Tok Ol Witnes Bilong Jehova Long Grik i No Gat Rong

WANPELA MAN I RAITIM DISPELA STORI BILONG KIRAP!

PRIS Otodoks long liklik ples Gasi long Krit, em i bin autim tok long haus lotu na em i tok: “Ol Witnes Bilong Jehova i gat haus lotu hia long ples bilong yumi. Yupela i mas helpim mi long rausim ol.” Sampela de bihain long apinun, sampela man i brukim ol windo bilong Haus Kingdom na sutim sampela katres i go long en. Em nau, dispela tok pait long i stap fri long mekim lotu long Grik, em i kamap gen.

Ol dispela samting i mekim na 4-pela Witnes bilong dispela ples, em Kyriakos Baxevanis, na Vassilis Hatzakis, na Kostas Makridakis, na Titos Manoussakis, ol i bin go long wanpela minista bilong gavman (Minister of Education and Religious Affairs) bilong kisim pas bilong tok orait long ol i ken wokim ol miting bilong lotu. Ol dispela Witnes i ting sapos ol i kisim pas, ol i gat rot long kisim helpim long polis sapos hevi i kamap. Tasol ol i hatwok long kisim dispela samting.

Pris i salim pas i go long hetkota bilong sekyuriti-polis long Heraklion, na tokim ol long Haus Kingdom bilong ol Witnes Bilong Jehova i stap long ples em i save lukautim. Em i laik polis i mekim sampela samting bilong pasim ol Witnes na tambuim ol miting bilong ol. Em nau, polis i kirap na skelim ol Witnes na sutim sutim ol askim long ol. Bihain man bilong wokim kot em i kotim ol Witnes na kot i kamap.

Long Oktoba 6, 1987, Kot long Heraklion i mekim dai kot bilong dispela 4-pela Witnes na i tok, “ol i no bin mekim dispela samting man bilong wokim kot i tok ol i bin mekim, long wanem, ol man bilong wanpela lotu i stap fri long mekim ol miting . . . , i no olsem ol i mas kisim orait bilong mekim olsem.” Tasol maski kot i tok olsem, tupela de bihain man bilong wokim kot em i apil, na tok i go long wanpela bikpela kot. Long Februeri 15, 1990, dispela kot i tok 4-pela Witnes i mas kalabus inap 2-pela mun na baim kot long 100 dola. Olsem na ol Witnes ol i apil long Sprim-Kot Bilong Grik.

Long Mas 19, 1991, Sprim-Kot i wanbel long tok bilong bikpela kot na sakim apil bilong ol Witnes. Tupela yia samting bihain, long Septemba 20, 1993 taim ol i tokaut long tok bilong Sprim-Kot, polis i kam na pasim Haus Kingdom. Olsem wanpela pepa bilong polis i kamapim, Lotu Otodoks Bilong Krit i as na dispela samting i bin kamap.

Dispela hevi i kamap, long wanem, sampela lo em gavman i bin kamapim long 1938 bilong tambuim sampela samting bilong lotu ol man inap mekim, ol i strong yet long Grik. Ol lo i tok, sapos wanpela man i laik kamapim wanpela haus lotu, em i mas kisim orait long wanpela dipatmen bilong gavman (Ministry of Education and Religious Affairs) na tu, long bisop bilong Lotu Otodoks bilong ples. Inap planti yia ol dispela olpela lo i bin mekim na ol Witnes Bilong Jehova i bin kisim planti hevi.

Stap Fri Long Mekim Lotu, na Ol Samting i Stret Man i Mekim

Taim 4-pela Witnes i save Sprim-Kot i sakim apil bilong ol, long Ogas 7, 1991, ol i salim pas i go long wanpela kot long Strasbek, Frans, em kot European Commission of Human Rights. Long pas ol Witnes i tok, ol kot bilong Grik i sakim Lo Namba 9 bilong Kibung Bilong Yurop, em wanpela lo i tok olgeta man i mas i stap fri long tingting, na long bihainim maus bilong bel, na long bihainim wanem lotu ol i laikim; na man i mas i stap fri bilong kamapim bilip bilong em maski em wanpela i mekim o em i bung wantaim ol narapela na mekim long ai bilong ol man o insait long haus samting.

Long Me 25, 1995, inap 25 memba bilong dispela kot long Frans ol i wanbel long tok olsem, long dispela samting kantri Grik i bin brukim Lo Namba 9 bilong Kibung Bilong Yurop. Ol i tok, pasin bilong ol kot long Grik long kotim ol Witnes, em i no stret wantaim pasin bilong i stap fri long mekim lotu, na i no stret long ol lain i gat gavman demokratik. Na sampela tok moa bilong dispela kot i olsem: “Ol man i gat kot . . . ol i insait long wanpela lain em pasin bilong en long mekim lotu, olgeta man i save long en na planti kantri long Yurop i orait long en.” Bihain, dispela kot i kisim tok i go long Kot Bilong Yurop Bilong Yuman Raits.

No Inap Pasim Ol Witnes Bilong Jehova

Kot i tok long harim tok long Me 20, 1996. Winim 200 man i sindaun long haus kot, na sampela em ol sumatin na profesa bilong wanpela yunivesiti klostu, ol niusman, na sampela Witnes Bilong Jehova bilong Grik, Jemani, Beljam, na Frans.

Mista Phédon Vegleris, bipo em i wanpela profesa long Yunivesiti Bilong Atens, na em i loya bilong ol Witnes, em i bin tok olsem, ol samting gavman Grik i bin mekim na pasim tok long en, em i bin brukim lo bilong Kibung Bilong Yurop, na Konstitusen bilong Grik. “Olsem na Kot i tok pait long lo bilong wanpela gavman na ol samting dispela gavman i save mekim bilong bihainim dispela lo.”

Loya bilong Gavman Grik em i wanpela jas bilong Kaunsil Bilong Stet, tasol em i no stori long as tru na dispela kot i kamap, em i stori long wok bilong Lotu Grik Otodoks long Grik, em i stap gut wantaim Gavman na ol manmeri, na ol i mas pasim wok bilong ol narapela lotu. Na em i tok, kirap long 1960 i kam inap long nau, wok bilong ol Witnes Bilong Jehova i kamap gutpela na lain bilong ol i go bikpela moa. Em nau, ol i daunim strong bilong Lotu Otodoks long i stap nambawan!

Ol Inap i Stap Fri Long Mekim Lotu

Kot i tok long kamapim tok bilong en long Septemba 26. Ol man i wet​—⁠ol Witnes Bilong Jehova tu​—⁠long save wanem samting bai kamap. Presiden bilong Kot, em Mista Rudolf Bernhardt, em i bin kaunim tok bilong kot: Dispela Kot​—⁠em 9-pela jas​—⁠olgeta i wanbel long tok olsem, Grik i bin brukim Lo Namba 9 bilong Kibung Bilong Yurop. Na kot i makim 17,000 dola gavman Grik i mas givim long ol Witnes, long wanem, ol i bin tromoi mani bilong kamap long kot. Tasol bikpela samting: Tok bilong kot i bin kamapim planti gutpela tok bilong makim olsem i stret ol man i stap fri long mekim lotu.

Kot i tok, lo bilong Grik i larim ‘tumas gavman na lotu long pasim ol man long bihainim wanem lotu ol yet i laikim.’ Na kot i tok moa, dispela samting ol lotu i mas mekim bilong kisim pas bilong tok orait bilong ol i ken mekim lotu, Gavman i bin mekim wok long en ‘bilong bosim strong o tambuim ol lotu i narapela kain long Otodoks​—⁠na ol i bin mekim moa yet long ol Witnes Bilong Jehova.’ Ol samting nogut Lotu Otodoks i bin mekim inap planti yia, dispela kot i bin kamapim.

Kot i strong long tok, ‘olgeta manmeri i stap fri long mekim lotu olsem Kibung Bilong Yurop i tok, na i no stret Gavman i tokaut wanem wanem bilip bilong wanpela lotu o ol samting lotu i mekim bilong kamapim ol dispela bilip i stret o i no stret.’ Na Kot i tok: ‘Lo bilong Grik i orait long ol lotu planti man i save long en, na ol Witnes Bilong Jehova i wanpela “lotu planti man i save long en.” Gavman i save long dispela samting.’

Em i No Samting Nating

Sampela de bihain, planti bikpela niuspepa bilong Grik i stori long ol samting i bin kamap long kot. Long Septemba 29, 1996, nius Kathimerini, em nius bilong Sande, i tok: “Maski Gavman Grik i laik mekim olsem dispela tok bilong kot ‘em i samting nating,’ Kot Bilong Yurop Bilong Yuman Raits long Strasbek, em i ‘daunim tru’ Gavman Grik, na em wanpela samting planti man long ol narapela kantri i save long en. Kot i bin tokaut gen long Grik olsem, ol i no ken lusim tingting long Lo Namba 9 bilong Kibung Bilong Yuman Raits na kot i wanbel long tok, ol i nolaik tru long lo bilong Grik.”

Long Septemba 28, 1996, niuspepa Ethnos bilong Atens i stori olsem, Kot Bilong Yurop i “no orait long pasin bilong gavman Grik na kot i tok, gavman i mas givim mani long ol dispela man Grik​—⁠em ol i bin kisim hevi, long wanem, ol i Witnes Bilong Jehova.”

Wanpela redio-stesin i bin givim sampela askim long Mista Panos Bitsaxis, em loya bilong wanpela Witnes i bin kot, na em i bin tok: “Yumi stap long yia 1996, em klostu long yia 2000, olsem na yumi save, i stret man i ken bihainim wanem wanem lotu em yet i laikim, na i no stret sapos wanpela gavman i daunim dispela lotu, o mekim nogut long en, o bagarapim wok bilong en. . . . Olsem na nau em i gutpela taim bilong gavman i ken tingim gen lo bilong en na pasim dispela longlong pasin long daunim narapela lotu, em wanpela pasin i no gat as long taim bilong yumi.”

Tok kot i pasim long kot bilong Manoussakis na Ol Narapela Wantaim Kantri Grik i mekim na yumi laik bai gavman Grik i senisim lo bilong en na dispela lo i ken stret wantaim tok bilong Kot Bilong Yurop, inap long ol Witnes Bilong Jehova long Grik ol i ken amamas long i stap fri long mekim lotu bilong ol, na gavman, polis, o wanpela lotu i no ken mekim wanpela samting bilong pasim ol long mekim olsem. Na tu, dispela i namba 2 taim Kot Bilong Yurop i bin kotim Grik long em i no larim ol man i stap fri long mekim lotu.a

Planti man i save, ol Witnes Bilong Jehova i bihainim tok bilong “ol gavman” long ol samting i no save pait wantaim Tok Bilong God. (Rom 13:​1, 7) Ol i no inap bagarapim sindaun bilong ol man. Nogat. Ol nius na buk bilong ol, na wok bilong ol long autim tok, i save helpim ol man long bihainim lo bilong gavman na long i stap isi wantaim ol man. Lotu bilong ol i gutpela na em i bin stap longtaim, na ol man i insait long lotu bilong ol Witnes, ol i bin mekim planti samting bilong helpim ples bilong ol. Ol i strong long bihainim ol stretpela lo bilong Baibel, na ol i laikim ol man; dispela i save kamap ples klia long gutpela wok bilong ol long skulim ol man long tok bilong Baibel long 200 kantri ol i stap long en.

Mipela i laik, ol tok Kot Bilong Yurop i bin pasim tok long en bai helpim ol Witnes Bilong Jehova na ol narapela liklik lotu long Grik long i stap fri moa long mekim lotu bilong ol.

[Futnot]

[Piksa long pes 19]

Em Haus Kingdom bilong bipo polis i pasim long Septemba 20, 1993

[Piksa long pes 19]

Kot Bilong Yurop Bilong Yuman Raits, Strasbek

[Piksa long pes 20]

Ol Witnes i bin kot: T. Manoussakis, V. Hatzakis, K. Makridakis, K. Baxevanis