Winim Kot Long Yuropian Kot Ov Human Raits
OL WITNES BILONG JEHOVA long Rasia i kot wantaim Federesen Bilong Rasia, na long Janueri 11, 2007, Yuropian Kot ov Human Raits long Strasbourg, Frans, i tokaut olsem ol Witnes i winim kot. Disisen bilong kot i sambai long raits bilong ol Witnes Bilong Jehova long i stap fri long makim lotu ol i laik bihainim na bilong kisim stretpela kot. Yumi laik skelim ol samting i bin kamap na ol i mas kot.
Long taun Chelyabinsk, Rasia, i gat wanpela kongrigesen bilong ol Witnes Bilong Jehova i stap, na klostu olgeta insait long kongrigesen i yaupas. Ol i save bung long wanpela rum ol i rentim long wanpela vokesenel trening kolis. Long Sande, Epril 16, 2000, Komisina bilong Human Raits Komisin long dispela hap, wantaim tupela plisman i gat namba, na wanpela CID plisman i kam stopim miting. Ol i no laikim ol Witnes, na moa yet Komisina i no laikim ol, olsem na ol i pasim miting na ol i giaman na sasim ol olsem ol i mekim wanpela miting em lo i no orait long en. Kirap long Me 1, 2000, ol i pinisim kontrak bilong ol long rentim dispela ples bung.
Ol Witnes Bilong Jehova i tokim ofisa bilong kot bilong taun Chelyabinsk long ol dispela samting, tasol i no gat wanpela samting i kamap long dispela. Konstitiusen Bilong Rasia na Konvensen Bilong Lukautim Human Raits na Ol Fandamental Fridom i tok, ol man i stap fri long makim lotu ol i laik bihainim na bilong makim husat ol i laik bung wantaim. Olsem na ol i wokim kotpepa long wanpela distrik kot na bihain ol i apil long wanpela nesenel kot. Pastaim, long Julai 30, 1999, suprim kot i bin tok “lo bilong Rasia i larim man i bihainim tingting bilong em yet na em i stap fri long makim lotu em i laik bihainim; na dispela lo i tok ‘no ken pasim,’ dispela i makim olsem ol man i no gat wok long kisim tok orait long ol gavman dipatmen paslain long ol i mekim lotu long wanpela haus samting ol i kisim bilong mekim lotu long en.” Tasol maski suprim kot i bin tok olsem, distrik na nesenel kot i no laik harim kot.
Long Disemba 17, 2001, ol i bringim dispela kot i go long Yuropian Kot ov Human Raits. Kot i kamap long Septemba 9, 2004. Mipela i kamapim hia sampela tok Kot i pasim:
“Kot i painimaut olsem long Epril 16, 2000, ol wokman bilong Gavman i bin pasim bung bilong lotu na ol i no larim ol Witnes long mekim lotu olsem ol i gat rait long mekim.”
“I no gat wanpela lo i givim rait long ol long pasim ol Witnes long mekim miting bilong ol long haus ol i bin rentim bilong mekim lotu long en.”
“Kot i luksave olsem lo em Suprim Kot Bilong Rasia i kamapim i tok ol lain i laik mekim bung bilong lotu i no gat wok long kisim tok orait long gavman o toksave long gavman olsem ol bai bung.”
“Komisina na ol helpim bilong em ol i bin brukim Lo namba 9 [ol man i stap fri long makim lotu ol i laik bihainim] bilong Konvensen, taim ol i pasim bung bilong lotu bilong ol Witnes long Epril 16, 2000.”
“Kot i tokaut olsem ol distrik na nesenel kot bilong Rasia i no bin mekim gut wok bilong ol . . . taim ol i no harim gut kot bilong ol Witnes. Ol dispela kot . . . i bin brukim Lo namba 6 bilong Konvensen [ol man i gat rait long kisim stretpela kot].”
Ol Witnes Bilong Jehova i tok tenkyu long God i bin helpim ol long winim kot long Yuropian Kot ov Human Raits. (Song 98:1) Disisen bilong dispela Kot bai mekim wanem long ol narapela hap? Joseph K. Grieboski, presiden bilong wanpela lain (Institute on Religion and Public Policy), i tok: “Dispela em i wanpela bikpela disisen long fridom bilong ol man long mekim lotu long Yurop, long wanem, dispela disisen bai mekim bikpela samting long raits bilong ol man long mekim lotu long ol kantri em Yuropian Kot ov Human Raits i bosim.”