Kot i Helpim Lain i Kisim Bagarap Long Han Bilong Ol Man

LONG Me 3, 2007, Yuropian Kot ov Human Raits long Strasbourg, Frans, i tokaut olsem ol Witnes Bilong Jehova long Ripablik Bilong Jojia i winim kot. Kot i painimaut olsem ol man i bin mekim nogut tru long ol Witnes long dispela hap na ol i no larim ol i mekim lotu olsem ol i gat rait long mekim. Kot i givim strongpela tok long olpela gavman bilong Jojia long ol i no bin mekim wanpela samting bilong kotim ol man i mekim ol dispela pasin nogut tru. Wanem samting i mekim na kot i kamapim dispela disisen?

Long Oktoba 17, 1999, inap olsem 120 Witnes Bilong Jehova bilong Kongrigesen Gldani, long biktaun Tbilisi, ol i bin bung bilong mekim lotu. Wantu tasol, wanpela bikpela lain bikhetman na gopas bilong ol Vasili Mkalavishvili​—em wanpela pris bilong Misin Otodoks em ol i bin rausim long wok pris bilong em​—ol i kam insait long ples bilong miting. Ol dispela man i gat ol strongpela stik na ol kruse ain, ol i paitim nogut tru ol man i stap long miting, na ol i kamapim ol bikpela bagarap tru long skin bilong planti. Ol i paitim wanpela meri na em i kisim bikpela bagarap long ai bilong em. Inap 16 manmeri i mas kisim helpim long dokta. Taim sampela Witnes i go long polis stesin bilong kisim helpim, bikman bilong polis i bungim ol na i tokim ol olsem sapos em i bin stap long dispela miting, em bai i mekim nogut moa yet long ol. Wanpela man bilong dispela bikhetlain i rekodim long vidio pasin nogut ol dispela lain bilong em i bin mekim na bihain em i soim long televisen, na piksa i soim klia tru husat ol dispela man i bin mekim pasin nogut tru.a

Ol Witnes husat i bin kisim bagarap, ol i putim ripot long polis, tasol polis i no mekim wanpela samting long ol dispela bikhetman. Wanpela polis ol i bin makim bilong mekim wok painimaut long dispela samting, em i tok em i bilong Lotu Otodoks na em bai wansait long lain bilong em. Ol polis na gavman i no mekim wanpela samting na dispela i strongim ol bikhetman bilong lotu long mekim wankain pasin bikhet winim wan handet taim.

Olsem na long Jun 29, 2001, ol Witnes Bilong Jehova i putim ripot long Yuropian Kot ov Human Raits.b Kot i kamapim laspela disisen bilong en long Me 3, 2007, na Kot i stori gut long dispela pasin birua ol man i bin mekim, na tu, Kot i krosim ol bikman bilong gavman long ol i no bin mekim wanpela samting bilong pasim ol dispela man. Kot i tok: “Ol polis na gavman . . . i gat wok long kamapim klia wanem samting tru i bin kamap” long dispela taim. Kot i tok: “Ol polis na gavman i no bin mekim wanpela samting bilong pasim ol man long mekim dispela pasin nogut, olsem na ol manmeri i no gat bilip moa long lo i strongim stretpela pasin na pasin bilong Gavman long bihainim ol tok bilong lo.”

Kot i tok: “Dispela pasin birua em ol i bin putim ripot long en long Oktoba 17, 1999, em namba wan taim ol man i bin mekim kain bikpela pasin birua olsem long ol Witnes Bilong Jehova. Ol polis na gavman i no mekim wanpela samting na dispela i givim rot long ol dispela bikhetman long mekim nogut long planti lain bilong lotu long planti hap bilong Jojia.”

Olsem na Kot i helpim lain i kisim bagarap long han bilong ol man, na i tokim gavman bilong Jojia long baim olgeta samting ol i bin bagarapim na baim kot na ol loya samting bilong ol Witnes Bilong Jehova bilong Kongrigesen Gldani. Ol Witnes Bilong Jehova long Jojia i amamas tru olsem dispela pasin birua na pasin bilong ol man long paitim ol nogut tru i pinis long klostu olgeta hap bilong Jojia. Ol i amamas long Kot i wokim disisen olsem ol i gat rait long bung na mekim lotu. Ol i tenkyu tru long Papa bilong ol long heven, em God Jehova, em ol i bin pilim pasin bilong em long stiaim na lukautim ol long taim ol i karim dispela hevi.​—Song 23:4.

[Ol Futnot]