Bilong Kamap Wanpela Pikinini Bilong God

INAP olsem 30 yia bihain long Pait Bilong Korea, lain Korean Broadcasting System i kamapim wanpela program bilong helpim ol manmeri long painim famili bilong ol, em ol i bin lus o ol i go stap long narapela hap long taim bilong pait. Wanem samting i kamap? Winim 11,000 manmeri i bin bung gen wantaim famili bilong ol​—aiwara i pundaun, ol i krai na holimpas narapela narapela. Nius Korea Times i tok: “I no gat wanpela taim bipo we ol manmeri bilong Korea i bin amamas na krai planti olsem.”

Long Brasil, taim Cézar i bebi yet mama bilong em i givim em i go long wanpela man bilong bekim dinau. Inap olsem 10-pela yia bihain, Cézar i amamas long painim mama tru bilong em, olsem na em i lusim waspapamama bilong em, em ol i maniman, na em i go stap wantaim mama tru bilong em.

Olgeta long famili i save amamas tru taim ol i painim pinis narapela long famili husat i bin i go stap longwe o i bin lus! Baibel i stori long olsem wanem ol man i stap longwe long famili bilong God. Baibel i stori tu long olsem wanem ol i amamas long stap wanbel nau. Dispela samting i kamap olsem wanem? Na olsem wanem yu tu i ken insait long dispela amamas?

Samting i Mekim na Famili Bilong God i Bin Bruk

Man bilong raitim Song i tok long Jehova, Man Bilong Wokim yumi olsem: “Yu as tru bilong laip bilong olgeta samting.” (Song 36:9) Jehova em i Papa bilong wanpela bikpela lain famili long heven na long graun. I gat tupela lain i insait long bikpela famili bilong Jehova, wanpela lain em ol pikinini spirit bilong em long heven, em ol ensel, na narapela em ol man husat bihain bai kamap ol pikinini bilong em long graun.

Taim namba wan pikinini man bilong God, Adam, i bin bikhet, olsem yumi bin stori pinis long en long stori i kamap paslain long dispela, dispela i mekim na ol man i stap longwe long gutpela Papa na Man Bilong Wokim ol. (Luk 3:38) Pasin bikhet bilong Adam i mekim na em na ol pikinini bilong em i kamap bihain, ol i lus long kisim dispela gutpela samting tru​—em long kamap pikinini bilong God. Long rot bilong wokman bilong em Moses, God i tokim ol long ol samting i kamap long pasin ol i bin mekim na i tok: “Yupela i manmeri bilong mekim sin tasol. Olsem na yupela i no inap i stap lain pikinini bilong God.” “Sin” i stap long skin bilong ol man i mekim na ol i stap longwe long God husat i stretpela na i holi. (Lo 32:​4, 5; Aisaia 6:3) Na dispela i mekim na i olsem ol man i no gat papa.​—Efesus 2:12.

Baibel i kolim ol lain i stap ausait long famili bilong God olsem “[ol] birua bilong God,” na dispela i makim olsem ol i stap longwe long God. (Rom 5:​8, 10) Ol manmeri i stap longwe long God olsem na ol i karim ol hevi aninit long hatpela wok bos bilong Satan na samting nogut em sin i kamapim. (Rom 5:12; 1 Jon 5:19) Yu ting ol sinman inap insait long famili bilong God? Yu ting ol sinman inap kamap ol pikinini bilong God i gutpela olgeta, wankain olsem Adam na Iv paslain long ol i mekim sin?

Bungim Ol Pikinini i Bin Lus

Jehova i tingim tru ol sinman husat i laikim em na em i mekim sampela samting bilong helpim ol. (1 Korin 2:9) Aposel Pol i tok: “God i bin i stap long Krais na i wok long mekim olgeta man i lusim pasin birua na i kamap wanbel wantaim em. Em i no tingting moa long olgeta rong ol i bin mekim.” (2 Korin 5:19) Olsem stori paslain long dispela i kamapim, Jehova God i givim Krais Jisas olsem ofa bilong baim bek yumi long sin. (Matyu 20:28; Jon 3:16) Aposel Jon i pilim tru dispela samting na i tok: “Olaman, Papa i bin laikim yumi na givim bel bilong em moa yet long yumi! Em i kolim yumi ol pikinini bilong God.” (1 Jon 3:1) Olsem na rot i op bilong ol manmeri i bihainim tok i ken insait gen long famili bilong Jehova.

Tru olgeta man i insait long famili bilong God bai stap wanbel wantaim aninit long Papa bilong ol i stap long heven, tasol lukim tok Baibel i mekim long ol olsem God i bungim ol long tupela lain. Em i tok: “Dispela tingting bilong [God] i bin i stap hait, na nau em i soim yumi pinis dispela tingting bilong en. Dispela samting em i laik mekim em i olsem. Em i laik stiaim olgeta samting i go i go, na long dispela taim em i makim pinis, em bai i bungim olgeta samting long Krais, ol samting bilong heven na bilong graun tu.” (Efesus 1:​9, 10) Bilong wanem God i mekim ol samting long dispela rot?

Pasin Jehova i bihainim bilong bungim ol pikinini bilong em long tupela lain i helpim famili bilong em long stap wanbel. I no hatwok long save wanem as na em i mekim olsem. Famili bilong God i bikpela tru na i kain olsem wanpela kantri. Long olgeta kantri, ol i save makim sampela lain tasol bilong kamapim wanpela gavman na bai olgeta manmeri i ken stap bel isi, na stap fri long ol pasin nogut na olgeta i ken bihainim na rispektim lo. I no gat wanpela gavman bilong ol man inap kamapim bel isi tru, tasol God i givim wanpela stretpela gavman i gutpela olgeta long famili bilong em. Nambawan lain, em “ol samting long heven,” olsem ol pikinini bilong God em Jehova i makim, ol bai insait long gavman, o Kingdom em God i kamapim long heven. “Bai ol i stap king na bosim ol manmeri bilong graun.”​—KTH 5:10.

Ol Pikinini Bilong God Long Graun

Jehova i wok tu long bungim “ol samting bilong graun,” em ol planti milion manmeri long olgeta hap bilong graun na bai ol i kamap pikinini bilong em long graun. Olsem wanpela gutpela Papa, em i save skulim ol long pasin bilong em long laikim ol arapela na maski ol i bilong planti kantri, ol i bung wantaim na stap wanbel. God i singautim tu ol man bilong pait, tingim ol yet, mekim pasin pamuk, na ol man bilong sakim tok bilong God long “kamap wanbel wantaim God.”​—2 Korin 5:20.

Olsem wanem long ol man i sakim singaut bilong God long kamap wanbel wantaim em na stap ol pikinini bilong em? Bilong bel isi na pasin wanbel i ken i stap insait long famili bilong em, Jehova bai mekim save long ol dispela kain man. Bai i gat wanpela “de bilong bikpela kot i kamap, na ol man i bin givim baksait long God, ol bai i bagarap olgeta.” (2 Pita 3:7) God bai pinisim olgeta man bilong bikhet long graun. Dispela bai mekim gut bel bilong ol manmeri i save bihainim tok!​—Song 37:​10, 11.

Bihain “long de bilong bikpela kot,” ol man bai i stap bel isi inap wan tausen yia, long dispela taim olgeta man husat i mekim sampela samting bilong soim olsem ol i pilim pasin laikim bilong Jehova bai kisim laip i gutpela olgeta em Adam i bin lusim. Na tu, ol manmeri i dai pinis bai kirap bek. (Jon 5:​28, 29; KTH 20:6; 21:​3, 4) God bai truim tok promis bilong em: “God bai i pinisim dispela kalabus bilong bagarap nau olgeta samting [ol man] i stap long en, na bai olgeta samting i stap gutpela tru wantaim yumi ol pikinini bilong God.”​—Rom 8:21.

Kamap Wanbel Wantaim Papa Bilong Yu

Cézar na planti tausen Korea em yumi bin stori long en long kirap bilong dispela stori, ol i bin mekim sampela samting bilong bung gen wantaim ol famili bilong ol. Ol manmeri long Korea i mas insait long dispela program bilong painim famili bilong ol, na Cézar i mas lusim waspapamama bilong em. Na olsem tasol, ating yu tu inap mekim sampela samting bilong kamap wanbel wantaim Papa bilong yu long heven, Jehova God, na amamas long stap insait long famili bilong em. Yu mas mekim wanem?

Bilong go klostu long God, em Papa bilong yu, yu mas stadi long Tok bilong em, em Baibel, na dispela bai helpim yu long bilip strong long God na ol tok promis bilong em. Bai yu lain long bilip olsem samting God i tokim yu long mekim em i bilong helpim yu yet. Na tu, yu mas larim God i stretim yu, long wanem, Baibel i tok long ol Kristen olsem: “God em i mekim pasin long yupela olsem papa i save mekim long pikinini bilong en. Wanem pikinini i stap na papa bilong en i no save stretim em? Nogat.”​—Hibru 12:7.

Taim yu mekim olsem, olgeta samting long sindaun bilong yu bai senis. Baibel i tok: “Tingting bilong yupela i mas kamap nupela. Yupela i mas kamap ol nupela manmeri, em ol manmeri God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru.” (Efesus 4:​23, 24) Na yu mas bihainim tok bilong aposel Pita, em i tok: “Yupela i mas i stap olsem ol pikinini i save harim tok. Bipo yupela i no gat save, na yupela i save bihainim ol kain kain laik nogut. Tasol nau yupela i no ken bihainim dispela pasin moa. Nogat.”​—1 Pita 1:14.

Painim Famili Tru Bilong Yu

Taim Cézar i painim pinis mama bilong em, em i amamas tru long kisim save olsem em i gat wanpela brata na wanpela susa. Na olsem tasol, taim yu go klostu long Papa bilong yu long heven, bai yu luksave olsem yu gat planti brata na sista insait long kongrigesen Kristen. Taim yu bung wantaim ol ating bai yu pilim olsem ol i stap klostu tru long yu winim ol wanblut bilong yu.​—Aposel 28:​14, 15; Hibru 10:​24, 25.

Olsem na rot i op long yu long bung wantaim Papa tru bilong yu na ol brata na sista tru bilong yu. Dispela amamas yu bai kisim bai i bikpela moa winim amamas Cézar na planti tausen Korea i bin kisim taim ol i bung gen wantaim ol famili bilong ol.

[Piksa long pes 8]

Cézar taim em i gat 19 krismas wantaim mama bilong em

[Ol Piksa long pes 10]

Mekim sampela samting bilong i go klostu long God