Sapta 24
Laik Bilong Jehova i Kamap Gut
JEHOVA i laik bai olgeta ensel na olgeta manmeri i mas wanbel long lotuim em wanpela tasol, em i God tru, na ol i ken i stap gutpela tumas olsem ol pikinini bilong Em. Em gutpela laik bilong Jehova. Na olgeta man i laikim tumas stretpela pasin, ol tu i gat dispela laik.
2 Taim Jehova i kirap long wokim ol samting, em i kirap long kamapim dispela laik bilong em. Namba wan samting em i wokim, em wanpela Pikinini Man bilong em, em i “wankain tru olsem God.” (Hi. 1:1-3) Dispela Pikinini em i narapela kain, long wanem em wanpela tasol God yet i bin wokim em. Long rot bilong em ol narapela pikinini i kamap—ol ensel long heven pastaim na bihain ol man long graun. (Jop 38:7; Luk 3:38) Olgeta dispela pikinini long heven na long graun ol i wanpela famili tasol. Jehova em i God bilong ol na ol i mas lotuim em wanpela tasol. Em i King bilong heven na graun, na em i Papa bilong ol. Em i laikim tumas ol. Olsem wanem? Em i Papa bilong yu tu? Yu wanpela pikinini bilong Em? Sapos yu stap pikinini bilong God em gutpela samting tru!
3 Tasol taim namba wan tumbuna papamama bilong yumi ol i bikhet na long laik bilong tupela yet ol i mekim rong, God i tok tupela i mas dai. Em i rausim ol long Iden. Em i no i stap Papa moa bilong ol. Ol i no insait moa long bikpela famili bilong Jehova. (Jen. 3:22-24; lukim tu Diuteronomi 32:4, 5.) Yumi olgeta yumi lain bilong sinman Adam, olsem na taim mama i karim yumi, sin na pasin kranki i stap long skin bilong yumi. God i bin rausim namba wan tumbuna papamama bilong yumi long famili bilong em, olsem na yumi no ken tok yumi pikinini bilong God. Tasol Jehova i save, sampela pikinini bilong Adam bai laikim tumas stretpela pasin. Olsem na long pasin sori em i wokim rot bambai ol inap kamap pikinini bilong em na i stap gutpela tumas.—Rom 8:20, 21.
God i Mekim Gut Long Ol Isrel
4 Jehova i wokim Adam na 2,500 samting yia bihain em i wokim rot na sampela man ol inap kamap pikinini bilong em. Em i tok promis pinis long Ebraham na nau em i kisim ol Isrel i stap lain bilong em. Em i tokim king bilong Isip, Isrel i “pikinini” bilong em. (Eks. 4:22, 23; Jen. 12:1, 2) Bihain em i givim lo bilong em long ol Isrel long Maunten Sainai na ol i kamap lain bilong em na long rot bilong dispela lain bai em i kamapim laik bilong em. Ol i stap “manmeri bilong God stret,” olsem na em i kolim dispela lain olsem “pikinini” bilong em. (Diu. 14:1, 2, NW; Ais. 43:1) Na tu Jehova i givim narapela kain wok long sampela Isrel, olsem na em i kolim ol olsem pikinini bilong em. (1 Kro. 22:9, 10) God i kontrak wantaim ol Isrel na long dispela as tasol em inap kolim ol olsem “pikinini” bilong em. Tasol yumi no ken ting ol i stap gutpela tumas olsem Adam taim em i stap pikinini bilong God. Nogat. Ol i kalabus yet long sin na i dai.
5 Tasol ol i pikinini bilong God na ol i stap gutpela long ai bilong em. Ol i mas harim tok bilong Papa bilong ol na bihainim laik bilong em. Jisas i tok em bikpela samting long ol i mas mekim olsem—ol i tok God em i Papa bilong ol, tasol ol i mas mekim ol samting bilong kamapim ples klia olsem ol i ‘stap pikinini bilong em.’ (Mt. 5:43-48; Mal. 1:6) Tasol lain Juda i no mekim olsem. Klostu long taim ol i laik kilim Jisas i dai, ol i tok: ‘God em i Papa bilong mipela.’ Tasol Jisas i tok tingting bilong ol na dispela samting ol i laik mekim i kamapim ples klia olsem God em i no Papa bilong ol. (Jon 8:41, 44, 47) Long 33 C.E. God i pinisim kontrak bilong Lo na ol Isrel i no i stap moa olsem lain bilong Em o ol pikinini bilong em. Tasol i no olsem God i no gat pikinini moa long graun. Nogat. Em i orait long sampela man na ol i stap olsem pikinini bilong em.
Jehova i Mekim Lain Bilong Em i Kamap Wanbel
6 Aposel Pol i raitim pas long ol Kristen long Efesas na em i stori long wok God i laik mekim bambai ol man i bilip ol i ken kam insait long lain bilong Em na i stap wanbel. Pol i tok: “Bipo God i tok pinis long dispela samting em i laik mekim long wok bilong Krais. . . . Dispela laik bilong em i olsem: Em i laik stiaim olgeta samting [olsem papa i stiaim famili] i go i go, na long dispela taim em i makim pinis, bai em i bungim olgeta samting long Krais, ol samting bilong heven na bilong graun tu.” (Ef. 1:9, 10) God bai mekim dispela “wok” long rot bilong Krais. Long rot bilong Krais bai ol manmeri inap kamap gutpela long ai bilong God—sampela inap kisim laip long heven, na sampela long graun—na bai ol i wok gut wantaim ol pikinini bilong God long heven, em ol ensel i bin i stap gut long Em.
7 Pastaim God i kirap long bungim “ol samting bilong heven.” Long Pentikos 33 C.E. em i kirap long bungim ol wanlain bilong Krais ol i bilong mekim wok king wantaim Krais long Kingdom bilong heven. Ol i bilip long ofa bilong Krais na long dispela as God i kolim ol stretpela man. (Rom 5:1, 2) Bihain ol i “kamap nupela gen,” spirit holi i mekim ol i kamap pikinini bilong God na ol i bilong kisim laip long heven. (Jon 3:3; 1:12, 13) God i wokim nupela kontrak wantaim dispela lain. Sampela Juda na bihain sampela manmeri bilong ol narapela lain, ol i insait long dispela lain namba bilong ol em inap olsem 144,000.—Ga. 3:26-29; Re. 14:1.
8 Dispela liklik hap lain bilong Kingdom ol i stap yet long graun, olsem lain remnan, ol i stap sinman yet long skin, tasol ol i stap pikinini bilong God. Pol i stori long dispela samting, olsem: “Nau yupela i stap pikinini bilong em. Olsem na God i salim Spirit bilong Pikinini bilong em i kam pinis long bel bilong yumi na i singaut olsem, ‘Papa, Papa!’ Olsem na yu no i stap wokboi moa. Nogat. Yu pikinini bilong em. Na sapos God i kisim yu, na yu stap pikinini bilong em, orait yu man bilong kisim samting bilong em.” (Ga. 4:6, 7) Ofa bilong Krais i winim tru ol ofa ol man i bin mekim aninit long Lo, dispela ofa wantaim marimari bilong God i helpim ol dispela Kristen, em spirit holi i bin makim ol, na ol i stap gut tru wantaim God; ol sinman i aninit long Lo ol i no inap i stap olsem. Tasol ol samting bai painim dispela liklik lain long bihain em i gutpela moa yet.
9 Sapos ol i stap gut i go inap long taim ol i dai, bai ol i kirap bek na kisim laip long heven na ol i no inap i dai moa. Long dispela rot bai ol i kamap pikinini tru bilong God. Bai ol i stap wanbel na mekim wok long pes bilong God Jehova yet. Liklik hap lain tasol bilong ol dispela pikinini bilong God ol i stap yet long graun.—Rom 8:14, 23; 1 Jon 3:1, 2.
Bungim ‘Ol Samting Bilong Graun’
10 God i bungim sampela man i kam insait long lain bilong em na ol i bilong kisim laip long heven, na em i bungim tu ‘ol samting bilong graun.’ Kirap long 1935 C.E. samting God i bin bungim ol manmeri i bilip long ofa bilong Krais, em ol inap kisim laip i stap oltaim long graun. Ol i wok gut wantaim lain remnan long litimapim nem bilong Jehova na lotu bilong Em. (Sef. 3:9; Ais. 2:2, 3) Ol i save daun tru long tok bilong Jehova na ol tu i kolim em “Papa,” long wanem ol i save em i As bilong laip na ol i wok strong long bihainim ol gutpela pasin em i laik bai ol pikinini bilong em i mas bihainim. Ol i stap gutpela long ai bilong Em na em i orait long ol, long wanem ol i bilip long blut bilong Jisas em i kapsaitim bilong baim bek ol. (Mt. 6:9; Re. 7:9, 14) Tasol ol i save bihain bai ol i amamas tru, long wanem God bai orait olgeta long ol na bai ol i kamap pikinini bilong em.
11 Olsem Rom 8:19-21 i tok, ol i wetim taim bilong ol pikinini bilong God “bai i kamap ples klia,” long wanem long dispela taim bai ol manmeri i tekewe “long dispela kalabus bilong bagarap nau ol i stap long en.” Ol pikinini bilong God “bai i kamap ples klia” taim ol manmeri hia long graun ol i lukim ol samting i kamap na ol i ken save ol dispela pikinini bilong God, em spirit holi i bin makim ol, ol i kisim pinis prais bilong ol long heven na ol i kirap pinis long mekim wok wantaim Bikpela bilong ol, em Krais Jisas. Dispela samting bai kamap ples klia taim bikpela bagarap i kamap na dispela pasin nogut bilong nau i pinis. Orait, bihain bai ol gutpela samting i kamap taim Krais i mekim wok king inap 1,000 yia. Ol dispela “pikinini bilong God” bai mekim wok pris na wok king wantaim Krais long dispela 1,000 yia.—Re. 2:26, 27; 20:6.
12 Taim bikpela hevi tru i pinis, ol pikinini bilong God em ol i stap pinis wantaim Krais long heven, bai ol i amamas tru na bai ol i singsing na litimapim nem bilong God. Bai ol i tok: “Bikpela, yu God I Gat Olgeta Strong. Olgeta wok yu mekim, em i bikpela, na mipela i lukim, na mipela i tingting planti! Yu king bilong olgeta lain man, na pasin bilong yu em i stret na i tru olgeta! Bikpela, yu wanpela tasol yu stap holi. Olsem na husat bai i no pret long yu? Husat bai i no litimapim nem bilong yu? Nogat. Olgeta lain man bai ol i kam na lotu long yu. Long wanem stretpela pasin bilong yu i kamap pinis long ples klia.” (Re. 15:3, 4) Yes, olgeta manmeri bipo ol i bruk bruk long narapela narapela lain, bai ol i wanbel wantaim long lotuim dispela God em i God tru. Na ol manmeri i dai pinis bai ol i kirap bek na bai ol tu inap litimapim nem bilong Jehova.
13 Bai Seten i no ken i stap moa olsem “god giaman bilong dispela graun.” Lain bilong Jehova long graun bai i no gat hatwok moa long sakim dispela man nogut. (2 Ko. 4:4; Re. 20:1-3) Lotu giaman i no ken bagarapim moa nem bilong God bilong yumi na brukim ol man i stap narapela narapela lain. Bai i no gat moa ol man i holim wok gavman na i mekim nogut long ol wokboi bilong trupela God. Gutpela samting tru bai painim ol manmeri i winim taim bilong bikpela hevi tru!
14 Krais Jisas, em ‘Pikinini Sipsip Bilong God i tekewe sin bilong olgeta manmeri,’ em bai mekim wok long ofa bilong em na tekewe olgeta rong ol man i bin mekim. (Jon 1:29) Taim Jisas i stap long graun na em i tok sin bilong wanpela man i tekewe, em i save oraitim tu sik bilong dispela man bambai ol man i ken save sin bilong em i tekewe. (Mt. 9:1-7) Nau em i stap long heven na bai em i mekim olsem tasol—bai em i wokim mirakel na opim ai bilong ol aipas na yau bilong ol yaupas na maus bilong ol mauspas. Bai em i oraitim ol man i lek nogut o bun krungut, na ol man i gat sik long tingting. Bai em i stretim ol narapela kain sik tu. Olgeta man bilong harim tok, bai ol i wok gut long bihainim ol stretpela pasin bilong God na isi isi bai “lo bilong sin” i tekewe olgeta long skin bilong ol. Olsem na olgeta samting ol i mekim na olgeta tingting bilong ol na olgeta laik bilong bel bilong ol bai kamap gutpela na bai ol yet na God tu i amamas long dispela. (Rom 7:21-23; lukim tu Aisaia 25:7, 8 na Revelesen 21:3, 4.) Taim dispela 1,000 yia i no pinis yet bai skin na tingting bilong ol i kamap gutpela olgeta. Bai ol i lusim tru kalabus bilong sin na olgeta hevi sin i bin kamapim. Bai ol i bihainim tru pasin bilong God na bai pasin bilong ol i kamap wankain olsem bilong God. Bai ol i stap long gutpela ples Paradais i kamap long olgeta hap bilong graun.—Jen. 1:26.
15 Krais i kisim namba bilong helpim ol manmeri long kamap gutpela olgeta; orait taim em i mekim pinis dispela wok, bai em i bekim dispela namba long Papa bilong em. Olsem 1 Korin 15:28 i tok: “Na bihain, olgeta samting i aninit pinis long Krais, orait bai Pikinini Bilong God yet i go aninit long God i bin putim olgeta samting aninit long em, bai God i ken i stap het tru bilong olgeta samting.”
16 Nau bai God i givim rot long ol dispela manmeri i kamap gutpela olgeta na ol i ken kamapim bel bilong ol, ol i laik mekim wok bilong dispela God em wanpela tasol i God tru na i gat laip, na ol i laik mekim wok bilong em inap oltaim oltaim o nogat? Olsem na paslain long taim God i kisim ol i stap pikinini bilong em long rot bilong Krais, bai em i traim ol. Dispela em laspela traim. Bai God i opim hul i no gat as na lusim Seten wantaim ol spirit nogut. Dispela samting i no ken bagarapim tru ol manmeri i givim bel olgeta long Jehova. Tasol ol manmeri i larim Seten i pulim ol na ol i bikhet long Jehova, bai ol i lus olgeta wantaim Seten na ol spirit nogut.—Re. 20:7-10.
17 Olgeta gutpela manmeri i winim dispela laspela traim, bai Jehova i kisim ol i stap pikinini bilong em. Bai em i mekim olsem long rot bilong Krais. Bai ol i “stap gut tumas,” long wanem ol i pikinini bilong God. (Rom 8:21) Em nau bai ol i insait tru long famili bilong God, em ol i stap wanbel, na bai Jehova tasol i stap God na King na Papa bilong ol inap oltaim oltaim. Long dispela taim, olgeta long heven na long graun bai wanbel long lotuim dispela wanpela God em i God tru.
Stori Gen Long Ol Dispela Tok
● Taim pasin bikhet i no kamap yet long Iden, husat ol i stap pikinini bilong God na olgeta i lotuim em?
● Ol pikinini bilong God i gat wanem wok?
● Husat long nau ol i stap pikinini bilong God? Husat bihain bai kamap pikinini bilong God? Olsem wanem long dispela samting na laik bilong Jehova long olgeta man na ensel i mas wanbel long lotuim em?
[Askim Bilong Stadi]
1, 2. (a) God i gat wanem laik long ol man na ol ensel? (b) Husat ol i insait long famili bilong God ol i wanbel long lotuim em? (c) Olsem na yumi olgeta wan wan i mas tingim wanem askim?
3. (a) Taim mama i karim yumi, olsem wanem na yumi no pikinini bilong God? (b) Tasol God i mekim wanem gutpela pasin sori bilong helpim ol lain bilong Adam?
4. (a) I gat wanem as na ol Isrel i stap “pikinini” bilong God? (b) Tasol yumi no ken ting olsem wanem?
5. Ol Isrel i mekim wanem na ol i no i stap moa olsem pikinini bilong God?
6. Pol i stori long wanem wok long Efesas 1:9, 10? Dispela wok em bilong mekim wanem?
7. Wanem ol dispela “samting bilong heven”? God i bungim ol na dispela i mekim wanem long ol?
8. Skelim dispela samting: Lain bilong Kingdom i stap olsem wanem wantaim Papa, na ol Juda i stap aninit long Lo bilong Moses ol i stap olsem wanem wantaim Papa?
9. Taim ol i kamap pikinini tru bilong God, wanem ol gutpela samting bai painim ol?
10. (a) Wanem ol dispela ‘samting bilong graun’? Kirap long wanem taim God i bungim ol na ol i stap wanbel long lotu? (b) Ol i stap olsem wanem long ai bilong Jehova?
11. (a) Rom 8:19-21 i mekim wanem tok promis long ol manmeri? (b) Wanem taim ol pikinini bilong God “bai i kamap ples klia” na ol manmeri i wetim dispela taim?
12. Taim bikpela hevi tru i pinis, ol pikinini bilong God em ol i stap pinis long heven bai ol i singsing na tok wanem? Dispela i makim wanem samting?
13. Ol manmeri i winim taim bilong bikpela hevi tru, wanem ol gutpela samting bai painim ol?
14. Long wanem rot bai ol i lusim kalabus bilong sin na ol hevi bilong en?
15. Taim dispela 1,000 yia i pinis, bai Krais i mekim wanem? Bilong wanem em bai mekim olsem?
16. Taim ol manmeri i kamap gutpela olgeta, bai God i mekim wanem long ol? Bilong wanem bai em i mekim olsem?
17. Taim laik bilong God i kamap, olgeta long heven na graun bai stap olsem wanem?