Ol i Wanbel Long Lotuim Dispela Wanpela God Tru
“O Jehova, . . . Yu wanpela tasol yu God tru.”—SAM 86:9, 10, NW.
1. (a) Jehova i kirapim wanem samting bilong helpim ol manmeri long i stap wanbel long lotu? (b) Dispela “wok” i mekim wanem?
WANBEL long lotu—em gutpela samting tru! Tasol ol manmeri i no save wanbel long lotu. Tasol ol inap wanbel na lotuim God na dispela samting i mas kamap tru, long wanem em i laik bilong God. Inap 19 handet yia bipo Jehova i kirapim wanpela “wok” bilong helpim ol manmeri long i stap wanbel—bai ol i pas gut wantaim olsem wanpela famili i pas gut wantaim. Dispela “wok” i helpim ol Kristen bilong pastaim, na ol Juda i kamap Kristen ol i lotu wantaim ol Sameria i kamap Kristen. Na taim ol man bilong ol narapela lain i kam insait long kongrigesen, ol i amamas long lotu wantaim ol tu. Olgeta i wanbel long lotu. Na bikpela samting em olsem: Olgeta i stap wanbel wantaim God Jehova, long wanem ol i bilip long ofa bilong Krais em i tekewe sin. Ol i kamap olsem ol pikinini bilong wanpela gutpela Papa.
2. (a) Wanem dispela “wok” God i mekim? Dispela “wok” i kirap long wanem taim? (b) Wanem insait bilong dispela tok ‘bungim ol samting bilong heven’?
2 Efesas 1:9, 10 i stori long dispela “wok” God i laik mekim na i tok: “Bipo God i tok pinis long dispela samting em i laik mekim long wok bilong Krais. Na em i bihainim dispela tingting tasol na i soim yumi dispela laik bilong en bipo i stap hait. Dispela laik bilong em i olsem: Em i laik stiaim olgeta samting [olsem papa i stiaim famili] i go i go, na long dispela taim em i makim pinis [kirap long Pentikos 33 C.E.], bai em i bungim olgeta samting long Krais, ol samting bilong heven na [bihain] bilong graun tu.” Em i bungim “ol samting bilong heven,” em ol manmeri ol bai stap king wantaim Krais long heven, bilong lain Juda pastaim na bihain bilong lain Sameria na bilong ol narapela lain.
3. God i bungim ‘ol samting bilong graun’ na wanem samting i kamap?
3 Long taim bilong yumi, kirap long yia 1935, God i bin bungim dispela ‘ol samting bilong graun,’ em ol manmeri ol inap kisim laip long Paradais long graun. Planti milion manmeri i kam bung. Ol i bilong olgeta lain na tok ples. Ol i lusim pinis tingting na pasin bipo ol i bihainim na ol i bung wantaim. Tasol i no dispela samting tasol i mekim na ol i stap wanbel. Nogat. Ol i stap wanbel, long wanem ol i lain long ol pasin bilong Jehova na “wokabaut long rot bilong em” olsem Aisaia 2:3 (NW) i tok.
4. (a) Bihain bai sampela tasol ol i stap wanbel long lotu o olsem wanem? Baibel i tok wanem long dispela samting? (b) Ol manmeri i kamap gutpela olgeta na ol i winim laspela traim, bai ol i kamap wanem samting bilong God?
4 Dispela pasin bilong i stap wanbel i mas i go bikpela. Bai olgeta ensel na olgeta manmeri i stap wanbel na lotuim dispela wanpela God em i God tru. Krais bai i stap king inap 1,000 yia na long pinis bilong dispela 1,000 yia olgeta bai stap wanbel olsem. Aposel Jon i stori long dispela samting long Revelesen 5:13. Em i tok: “Mi harim toktok bilong olgeta samting God i bin wokim, samting i stap long heven, na i stap long graun, na i stap aninit long graun, na i stap long solwara. Yes, olgeta samting i stap long olgeta hap, mi harim ol i tok olsem, ‘God i sindaun long sia bilong king, na Pikinini Sipsip [Krais Jisas] tu, tupela i ken kisim olgeta tenkyu na biknem na amamas na strong, inap long oltaim oltaim!”’ Jon i lukim olgeta ol i stap wanbel aninit long Krais Jisas na ol i lotuim God Jehova. Bihain, taim laspela traim i pinis na olgeta bikhetman i pinis, bai Jehova i kisim ol manmeri, em ol i kamap gutpela olgeta na ol i bin stap gut long wok bilong Em, na long rot bilong Krais bai ol i kamap pikinini bilong God. Bai ol i insait long famili bilong God, na inap long olgeta taim bai ol i lotu long em wanpela tasol, em i King bilong heven na graun na gutpela Papa bilong ol. Em gutpela samting tru yumi ken wetim i kamap! Yu laik insait long dispela lain ol i stap amamas na lotuim God Jehova wanpela tasol?—Rom 8:20, 21.
“Yu Wanpela Tasol Yu God Tru”
5, 6. Long Sam 86 Devit i tok wanem long dispela God yumi lotuim?
5 Sapos yumi skelim ol tok bilong Sam 86, dispela inap helpim yumi long save long ol samting yumi mas mekim bambai yumi inap insait long dispela lain na kisim blesing. Devit, man bilong raitim dispela sam, em i man bilong lotuim God tru, Jehova. Tasol em i save, oltaim em i mas wok strong bambai em inap i stap strong long spirit.
6 Long Sam 86 ves 8 i go inap 10 Devit i stori long dispela God em i lotu em na em i tok: “Bikpela [Jehova], i no gat wanpela god i olsem yu. Yu winim ol. Na i no gat wanpela man inap mekim wankain wok olsem yu save mekim. Olgeta lain manmeri yu bin wokim ol, bai ol i go brukim skru long yu, na bai ol i litimapim nem bilong yu. Long wanem, yu tasol i gat bikpela strong. Na yu tasol i save mekim kain kain gutpela gutpela samting. Yu wanpela tasol yu God tru.”
7. Bilong wanem i bikpela samting yumi save Jehova wanpela tasol em i God tru?
7 Long taim bilong Devit, na long nau tu, ol manmeri i lotuim planti god. Devit i tok, ‘Jehova wanpela tasol em i god tru.’ Krais Jisas tu i tok olsem. Paslain liklik long taim em i dai, em i beten long Papa bilong em na em i tok, “Yu wanpela tasol yu God tru.” (Jon 17:3) Tasol ol misin bilong Krisendom ol i save lotuim God Triwan, na planti milion manmeri i save brukim skru long ol god giaman, na sampela i save litimapim wanpela man o meri i stap olsem ‘god’ bilong ol, o ol i tingim tumas mani, o ol yet, o pasin bilong marit, na dispela samting i kamap olsem ‘god’ bilong ol. Orait, olsem wanem long yu? Yu bilip olsem ‘i no gat wanpela god i olsem Jehova’? Yu bilip olsem Jehova tasol em i “God tru”?
8. Olgeta man i laik lotu long Jehova ol i mas mekim wanem olsem Sam 86:11 i tok?
8 Devit i tok, bihain bai olgeta lain meri i lotuim Jehova. Em i save, i stret ol i mas mekim olsem. Na ating Devit i save, taim ol dispela manmeri i kam bilong lotuim Jehova i gat planti samting ol i mas kisim save long en. Na ol i mas stretim pasin bilong ol. Na Devit i save, em yet i mas lain na stretim pasin bilong em. Long Sam 86 ves 11 em i tok: “Bikpela [Jehova], yu mas skulim mi gut long pasin yu laik mi mekim, na bai mi bihainim laik bilong yu oltaim. Lainim mi gut bai mi tingting long yu wanpela tasol, na mi mekim wok bilong yu oltaim.” Yu gat wankain laik olsem Devit?
9. Olsem wanem na yumi stap wanbel? Olsem na yumi gat wanem wok?
9 Nau yumi ol Witnes Bilong Jehova i stap wanbel. Long wanem, olsem Devit yumi laik bai Jehova i skulim yumi na yumi bihainim laik bilong em. Yumi olgeta wan wan i mas laik long stretim tingting na pasin bilong yumi bambai yumi helpim lain bilong Jehova long i stap wanbel. Yumi gat wok long helpim yumi yet i stap wanbel na helpim ol nupela man bambai ol i ken pilim ol samting i mekim yumi stap wanbel.
Ol Strongpela Samting i Helpim Yumi long i Stap Wanbel
10. Wanem namba wan samting i helpim yumi long i stap wanbel?
10 Namba wan em olsem: Yumi olgeta yumi lotuim Jehova na yumi save i stret em i mas makim wanem pasin i gutpela na wanem pasin i nogut. (Revelesen 14:6, 7; Jenesis 2:16, 17) Dispela samting i helpim tru lain bilong Jehova long olgeta hap bilong graun! Baibel i tok, Jehova em i “Antap, na em i stap oltaim na nem bilong em i holi.” (Aisaia 57:15, NW) Taim yumi lotuim em na bihainim pasin bilong em, dispela samting i helpim yumi. Maski yumi stap we we long graun, yumi save bihainim ol lo bilong em na dispela samting i mekim yumi i stap wanbel.
11. Olsem wanem yumi ken helpim ol nupela man bambai ol tu i stap wanbel?
11 Tasol sampela long lain bilong yumi i pundaun na mekim bikpela rong. Bilong wanem? Ating ol i no bin tingim God em i stap tru na em i wanpela Man tru. Ol i no bilip tru long God. Olsem na ol i no tingim tumas ol lo bilong em. Olsem wanem? Yumi inap helpim ol manmeri yumi stadi wantaim ol na bai ol i bilip tru long Jehova? Yumi mas helpim ol long save, man i laik lotu tru long God, em i no ken kisim save tasol long sampela tok bilong God, na go long ol miting, na autim tok liklik. Nogat. Sapos em i laik mekim wok bilong Jehova, em i mas save gut long God na pas tru wantaim em. Em i mas lain long beten oltaim na askim God long stiaim tingting bilong em long olgeta samting em i mekim. (Filipai 4:6; Provep 3:5, 6) Olsem bai ol dispela nupela man inap i stap wanbel olsem yumi stap wanbel.
12, 13. (a) Olsem wanem namba tu samting i helpim yumi long i stap wanbel? (b) Yumi mas mekim wanem na bai dispela samting inap helpim tru yumi?
12 Namba tu samting em olsem: Maski yumi stap we we, yumi gat Baibel, em Tok bilong God, bilong soim rot long yumi. Yumi bilip olsem spirit bilong God i as bilong olgeta tok bilong Baibel. Na wanpela samting i pulim yumi i kam bung wantaim ol Witnes Bilong Jehova, em olsem: Ol i save bihainim ol tok bilong Baibel.—2 Timoti 3:16, 17.
13 Planti manmeri yumi stadi wantaim ol, ating ol i bilip olsem ol tok bilong Baibel em i tok bilong God, tasol ol i save kaunim Baibel? Yumi mas kirapim ol long kaunim olgeta tok bilong Baibel, na bai ol i save olsem wanem ol inap bihainim tok bilong Baibel na tingim gut ol samting ol i laik mekim. Jisas i save gut long laik bilong Papa bilong em; tok bilong Papa i stap long tingting na long bel bilong em. Olsem na em inap tok: “Oltaim mi save mekim ol samting em i laikim.” (Jon 8:29) Gutpela sapos olgeta manmeri i laik lotuim God tru ol i ken mekim olsem!
14. Bilong wanem namba tri samting i bikpela samting? Yumi ken mekim wanem bilong helpim ol nupela man long pilim dispela samting?
14 Namba tri samting, em olsem: Yumi olgeta yumi save kisim wankain kaikai bilong spirit. Yumi save, Jehova i givim wok long dispela lain ol i olsem ‘gutpela wok boi’ na ol i givim kaikai bilong spirit long yumi long taim stret bilong en. (Matyu 24:45-47) Yumi save, ol lain bilong kingdom bilong heven, em spirit holi i bin makim ol na ol i stap yet long graun long lain Witnes Bilong Jehova, ol i dispela ‘gutpela wokboi.’ Yumi pilim tru gutpela wok dispela ‘gutpela wokboi’ wantaim Lain Bilong Bosim Ol Witnes ol i mekim bilong lukautim yumi long ol samting bilong spirit. Yumi tok tenkyu long God long ol gutpela kaikai bilong spirit yumi kisim. (Aisaia 65:13, 14) Tasol olsem wanem? Yumi lainim ol nupela man long pilim dispela samting?
15, 16. (a) Husat i Hetman bilong yumi? (b) Sapos yumi pilim wok bilong Jisas long lotu bilong yumi, dispela bai helpim yumi long ting olsem wanem long ol brata bilong yumi?
15 Namba foa samting i helpim yumi long i stap wanbel, em olsem: Krais Jisas em i Hetman bilong yumi, i no wanpela man bilong graun, na yumi olgeta yumi save lotu long Jehova long rot bilong em. Klostu long taim Jisas i dai, em i tokaut long dispela samting. Long Matyu 23:8, 10 em i tok: “Ol man i no ken kolim yupela . . . ‘Hetman.’ Yupela i gat wanpela hetman tasol, em Krais.” Maski man i stap we we, tasol sapos em i tokim wanpela Witnes Bilong Jehova: ‘Husat i hetman bilong yupela?’ dispela Witnes bai tok: ‘Bikpela Krais Jisas em i hetman bilong mipela.’
16 Long rot bilong Krais tasol yumi inap go klostu long God na lotu long em. Long wanem yumi olgeta i gat pekato na i mas i dai. Olsem na i gat wanpela rot tasol bilong God i ken orait long yumi na yumi kamap wokboi bilong em, em olsem: Yumi mas bilip long ofa bilong Krais. Na Krais tasol em i rot bilong beten long God. Yumi mas save long dispela samting bambai yumi inap lotuim dispela God em i God tru.—Rom 3:23; Jon 14:6.
17. Yumi gat wanem tingting long Kingdom bilong God na yumi stap wanbel na yumi narapela kain long Krisendom?
17 Na namba faiv samting em olsem: Maski yumi stap we we, yumi save wetim Kingdom bilong God. Yumi save dispela Kingdom tasol inap stretim ol hevi. (Matyu 6:9, 10; Danyel 2:44) Ol pris pasto bilong Krisendom i no mekim olsem. Ol i save insait long ol wok politik bilong dispela graun na long ol pait. Tasol ol Witnes Bilong Jehova long olgeta hap ol i bihainim pasin bilong Jisas na ol aposel, em Jisas i tok “ol i no bilong dispela graun.” (Jon 17:15, 16) Yumi bihainim tok bilong God na yumi wokim bainat bilong yumi i kamap samting bilong wokim gaden na spia i kamap sisis bilong katim han bilong diwai. Yumi no mekim pait long ol bainat na spia samting. Yumi no lain moa long pait. (Maika 4:3) Yumi bilip tru olsem Kingdom bilong God tasol inap helpim ol man. Olsem na yumi olgeta Witnes long olgeta hap yumi stap wanbel olsem brata brata tru.
18. Ol gutpela pasin em spirit bilong God i kamapim long ol man, olsem wanem dispela i helpim yumi long i stap wanbel? Stori long dispela.
18 Namba sikis samting i helpim yumi long i stap wanbel, em olsem: Spirit holi i kamapim ol gutpela pasin long ol man i lotuim Jehova. Ol dispela pasin i gutpela tumas na i helpim yumi long sindaun gut wantaim! Yumi olgeta wan wan i gat sampela pasin yumi mas stretim, tasol Jisas i tok stret, olsem: “Sapos yupela i laikim tru ol brata, orait bambai olgeta man i save, yupela i disaipel bilong mi.”—Jon 13:35; Galesia 5:22, 23.
19. Taim yumi autim tok, yumi kamap wanbel wantaim husat?
19 Na namba seven samting i helpim yumi long i stap wanbel, em olsem: Yumi olgeta yumi gat wok long autim dispela gutpela tok bilong Kingdom bilong God. Em gutpela wok yumi mas mekim. Pol i tok, taim yumi mekim dispela wok yumi kamap wanwok bilong God. Narapela i planim, narapela i putim wara, na Jehova i mekim i kamap ol nupela disaipel.—Matyu 24:14; 1 Korin 3:6-9.
Givim Bel long Lotu i Tru
20. (a) Sampela i kam long Haus Kingdom, ating ol i no mekim wanem na ol i no kisim tru ol blesing bilong i stap wanbel long lotu? (b) Bilong wanem ol i mas kirap kwik na mekim ol samting bambai ol i ken i stap gutpela long ai bilong Jehova?
20 Ol dispela nupela man i bilipim ol dispela tok i tru i mekim yumi i stap wanbel na ol i bihainim. Ol i amamas long lotu wantaim yumi na lotuim dispela God em wanpela tasol em i God tru. Tasol sampela ol i kisim liklik save tasol long tok i tru. Ol i kisim save long ol dispela samting Kingdom bilong God bai mekim, tasol ol i no putim dispela tok i go daun long bel bilong ol. Ol i amamas long bung wantaim yumi, tasol ol i no laik tok promis long bihainim laik bilong Jehova long olgeta taim. Ol i kain olsem sampela manmeri i stap long taim bilong Ilaija, em Ilaija i tok strong long ol, olsem: “Wanem taim bai yupela i lusim tupela tingting? Sapos Jehova em i God tru, orait bihainim em; tasol sapos Bal em i God tru, orait bihainim em.” (1 King 18:21, NW) Jehova i makim taim bilong bagarapim dispela pasin nogut bilong nau na em i no ken surikim dispela taim o senisim lo bilong em bilong helpim ol manmeri i holimpas yet pasin bilong dispela graun, na ol i givim hap bel tasol long kisim save long laik bilong God na bihainim. Olgeta manmeri i laikim tok i tru, ol i mas kirap nau na mekim ol samting bambai ol i ken i stap gut long ai bilong Jehova long nau na inap long olgeta taim bihain!
21. Yumi mas helpim ol Baibel-stadi olsem wanem long kamap strong long spirit?
21 Taim yumi stadi wantaim wanpela man, yumi no laik lainim em long ol as tok tasol. Yumi laik helpim em long kisim baptais na kamap strongpela Kristen. Olsem na em i mas laik long kisim strongpela kaikai bilong spirit. Em i amamas long kisim dispela kaikai na strong long en. Em i mas skulim gut tingting bilong em bambai em inap skelim gutpela pasin na pasin nogut na tingim ol samting em i laik mekim.—Hibru 5:12-14.
22. Olsem wanem na wok bilong yumi bilong autim tok em i gutpela wok?
22 Yumi ken amamas, long wanem yumi inap insait long dispela wok Jehova i mekim bilong helpim ol manmeri bilong olgeta lain long kamap wanbel wantaim em long rot bilong Krais! Dispela wok i helpim yumi. Dispela God, em wanpela tasol em i God tru em i givim gutpela wok long yumi bilong autim tok long nem bilong Em, olsem ol witnes bilong em. Dispela Pikinini, em i laikim tumas em, em i stap King na em i makim ol gutpela pasin yumi mas mekim bambai yumi ken lotu long God na i stap wanbel wantaim Em na ol brata bilong yumi. Olsem na yumi mas insait tru long wok bilong litimapim nem bilong Jehova, na helpim ol narapela man long save olsem wanem i ken kisim ol blesing ol man i wanbel long lotuim God tru ol tasol i kisim.
Bilong Tingim Bek
□ Bihain bai sampela tasol i stap wanbel long lotu o olsem wanem? Orait, olsem wanem long yu?
□ Yumi mas mekim wanem na bai yumi soim olsem yumi gat wankain tingting olsem bilong Sam 86:11?
□ I gat wanem ol strongpela samting i helpim yumi long i stap wanbel?
□ Ol manmeri i lainim tok bilong Baibel, ol i mas lain long ol as tok bilong Baibel pastaim na bihain yumi mas helpim ol long kamap strong olsem wanem?
[Piksa long pes 18]
“O Jehova, . . . Yu wanpela tasol yu God tru.”