Sapta 1
Stap Wanbel Long Lotu Long Nau—Dispela i Makim Wanem Samting?
1, 2. (a) Planti man long nau i laik mekim wanem? (b) Ol man i gat gutpela bel ol inap wetim wanem gutpela samting i kamap?
LONG olgeta hap bilong graun bikpela lain man i laik i stap wanbel long lotu. Dispela i mekim na planti milion manmeri bilong olgeta kantri, na lain, na tok ples i kamap wanbel. Long olgeta yia planti manmeri moa i kam insait long dispela lain. Baibel i kolim ol dispela manmeri olsem ol “witnes” bilong Jehova na “planti manmeri tru.” Long ‘san na long nait ol i save mekim wok bilong God.’ (Aisaia 43:10-12; KTH 7:9-15) Bilong wanem ol i mekim olsem? Long wanem, ol i bin kisim save olsem Jehova wanpela tasol em i God tru. Dispela i kirapim ol long stretim sindaun bilong ol na bai em i stret wantaim ol stretpela lo bilong em. Na tu, ol i bin kisim save olsem yumi stap long “taim bilong las de” bilong pasin nogut bilong dispela graun, em klostu nau God bai pinisim na kamapim nupela taim i olsem wanpela paradais.—2 Timoti 3:1-5, 13; 2 Pita 3:10-13.
2 Baibel i tok promis olsem: “I no longtaim na bai ol man nogut i lus olgeta. . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Song 37:10, 11) “Ol stretpela man bai i kisim graun God i givim ol, na bai ol i stap oltaim long en.” (Song 37:29) “[God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:4.
3. Olsem wanem pasin bilong i stap wanbel tru long lotu i wok long kamap?
3 Ol manmeri i bung nau long lotu i tru ol i namba wan lain bilong i stap long nupela taim. Ol i bin kisim save long laik bilong God na ol i bihainim dispela laik inap tru long skel bilong ol. Jisas i kamapim klia olsem dispela em i bikpela samting, em i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” ( Jon 17:3) Aposel Jon i tok: “Dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.”—1 Jon 2:17.
Ol Samting Em i Makim
4. (a) Wok bilong bungim planti manmeri bilong i stap wanbel long lotu long nau i makim wanem samting tru? (b) Baibel i stori olsem wanem long dispela wok bilong bungim ol man?
4 Wok bilong bungim planti manmeri bilong i stap wanbel long lotu long nau i makim wanem samting tru? Yumi inap lukim klia tru olsem yumi stap klostu tru long pinis bilong pasin nogut bilong dispela graun, na nupela taim God bai kamapim bai kirap bihain stret long dispela. Long ai bilong yumi yet yumi lukim truim bilong ol tok profet bilong Baibel i tok long dispela bikpela wok bilong bungim ol man. Wanpela tok profet olsem i tok: “Wanpela taim bai i kamap bihain [dispela taim bilong las de] na dispela maunten, haus bilong Bikpela i sanap long en [lotu tru bilong em], bai i stap antap tru na i winim olgeta arapela maunten [winim olgeta narapela lotu]. Na planti lain manmeri bai i kam bung long en. Na bai ol i tok, ‘Kam, yumi go antap long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.’ ”—Maika 4:1, 2; Song 37:34.
5, 6. (a) Olsem wanem yumi ken tok ol lain man i wok long kam long Jehova? (b) Yumi mas givim wanem ol askim long yumi yet?
5 Tru, i no olsem olgeta manmeri bilong wanpela lain tasol i kam long haus spirit bilong Jehova bilong mekim lotu, nogat; planti milion man bilong olgeta lain i wok long mekim olsem. Ol i kisim save long ol gutpela samting God Jehova i laik mekim na ol gutpela pasin bilong em, na ol i pilim tru long bel bilong ol. Long pasin daun ol i wok long kisim save long ol samting God i laik bai ol i mas mekim. Ol i beten wankain olsem man bilong raitim song, em i tok: “Yu God bilong mi, mi laik yu skulim mi gut bai mi bihainim laik bilong yu.”—Song 143:10.
6 Olsem wanem? Long tingting yu inap lukim yu yet i stap namel long bikpela lain em Jehova i wok long bungim nau long mekim lotu? Ol samting yu mekim bilong bihainim tok yu kisim long Baibel i soim olsem yu pilim tru olsem Jehova em i As bilong en? Bai yu “wokabaut long rot em yet i makim” i go inap long wanem mak?
Rot Bilong Mekim
7. (a) Bihain husat ol bai i stap wanbel long lotu? (b) Bilong wanem nau yumi no ken lusim taim long kirap na lotuim Jehova? Olsem wanem yumi ken helpim ol narapela long mekim olsem?
7 Jehova i laik bai olgeta ensel na ol man i stap wanbel long lotu i tru. Yumi wetim tru dispela taim em olgeta lain i stap laip ol bai lotuim dispela wanpela God tru! (Song 103:19-22) Tasol pastaim Jehova i mas rausim ol man i no laik bihainim stretpela laik bilong em. Tasol em i save marimari long ol man, olsem na pastaim em i givim toksave long ol long samting em bai mekim, na bai ol manmeri long olgeta hap ol inap stretim pasin bilong ol. (Aisaia 55:6, 7) Olsem na nau long taim bilong yumi, ol i autim tok long “ol manmeri bilong olgeta lain man na bilong olgeta kantri na bilong olgeta tok ples na bilong olgeta kain sindaun,” na ol i tok: “Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.” (KTH 14:6, 7) Yu bihainim dispela tok? Sapos olsem, em wok bilong yu long singautim ol narapela man long save long trupela God na lotu long em.
8. Taim yumi kisim save pinis long ol as tok bilong Baibel, yumi mas wok strong long mekim wanem samting moa?
8 Ol man i save tok ol i bilip long Jehova, tasol ol i bihainim laik bilong ol yet, Jehova i no laik bai ol kain man olsem i lotuim em. God i laik bai ol manmeri i “save gut tru long laik bilong em” na bihainim dispela laik. (Kolosi 1:9, 10) Olsem na ol man i pilim dispela samting na i kisim save long ol as tok bilong Baibel, ol i laik kamap strongpela Kristen. Ol i laik save gut long Jehova na ol tok bilong em long Baibel, na ol i laik bihainim gut moa ol dispela tok long i stap bilong ol. Ol i laik bihainim ol pasin bilong Papa bilong ol long heven, na kisim wankain tingting olsem bilong em. Dispela i kirapim ol long painim rot bilong insait long wok bilong helpim ol man long kisim laip, em wok Jehova i kamapim nau long graun. Yu laik mekim olsem tu?—Mak 13:10; Hibru 5:12–6:3.
9. Olsem wanem yumi inap i stap wanbel tru long nau?
9 Baibel i soim olsem ol manmeri i lotuim Jehova ol i mas i stap wanbel. (Efesus 4:1-3) Dispela pasin wanbel i mas i stap long nau, maski yumi stap namel long ol lain man i bruk bruk na yumi hatwok long daunim ol pasin kranki bilong yumi yet. Jisas i beten long ol disaipel i ken i stap wanbel tru. Olsem wanem ol inap i stap wanbel? Namba wan samting, em ol i mas pas gut wantaim Jehova na Pikinini bilong em. Namba tu, ol yet i mas pas gut wantaim. ( Jon 17:20, 21) Bilong mekim olsem, kongrigesen Kristen i stap olsem lain Jehova i mekim wok long en bilong skulim lain bilong em.
Wanem Samting i Helpim Yumi Long i Stap Wanbel?
10. (a) Yumi kisim wanem samting taim yumi yet i mekim wok long Baibel bilong kisim bekim bilong ol bikpela askim? (b) Long rot bilong bekim ol askim i stap long dispela paragraf, skelim ol samting i save helpim yumi long kamapim pasin wanbel bilong ol Kristen.
10 Long daunbilo i gat 7-pela samting i helpim yumi long i stap wanbel. Taim yu bekim ol askim hia, tingting long olsem wanem ol dispela tok i helpim yu long pas gut wantaim Jehova na ol wanbilip Kristen. Taim yu tingim gut ol dispela tok na yu ritim ol skripsa ol i no kamapim tok bilong en, dispela bai helpim yu long kisim tingting na save bilong God, na pasin bilong skelim gut ol samting—em samting yumi olgeta i mas kisim. (Sindaun 5:1, 2; Filipai 1:9-11) Orait, nau skelim ol dispela tok.
(1) Yumi save i stret Jehova i mas makim wanem samting i gutpela na wanem samting i nogut. “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”—Sindaun 3:5, 6.
Bilong wanem yumi mas askim Jehova long helpim na stiaim yumi taim yumi mas makim ol samting yumi laik mekim? (Song 146:3-5; Aisaia 48:17)
(2) Yumi gat Tok Bilong God long stiaim yumi. “Taim yupela i kisim tok bilong God long maus bilong mipela, yupela i no kisim olsem tok bilong man. Nogat. Yupela i kisim olsem tok tru bilong God. Na dispela tok i wok strong long bel bilong yupela ol manmeri i bilip long Krais.”—1 Tesalonaika 2:13.
Wanem samting inap kamap sapos yumi mekim ol samting yumi “pilim” i stret long mekim? (Sindaun 14:12; Jeremaia 10:23, 24; 17:9)
Sapos yumi no save Baibel i tok wanem long wanpela samting, yumi mas mekim wanem? (Sindaun 2:3-5; 2 Timoti 3:16, 17)
(3) Yumi olgeta i save kisim wankain kaikai bilong spirit. “Bai mi yet mi skulim ol pikinini bilong yu.” (Aisaia 54:13) “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, olsem sampela man i save mekim. Nogat. Yupela i save, De bilong Krais [bilong bagarapim ol samting] em i kam klostu. Olsem na yumi wan wan i mas wok strong moa long strongim bel bilong ol arapela.”—Hibru 10:24, 25.
Wanem ol gutpela samting i painim ol man i kisim olgeta samting bilong spirit Jehova i save givim? (Aisaia 65:13, 14)
(4) Jisas Krais—no gat wanpela man— em i Hetman bilong yumi. “Ol man i no ken kolim yupela ‘Tisa.’ Nogat. Wanpela tasol em i tisa bilong yupela, na yupela olgeta i stap brata brata. Na long graun hia yupela i no ken kolim wanpela man em i papa bilong yupela. Wanpela tasol em i Papa bilong yupela, na em i stap long heven. Na ol i no ken kolim yupela ‘Hetman.’ Yupela i gat wanpela hetman tasol, em man God i makim bilong kisim bek ol manmeri bilong en.”—Matyu 23:8-10.
Yumi inap ting yumi winim ol narapela? (Rom 3:23, 24; 12:3)
(5) Yumi save wetim Kingdom bilong God, em tasol inap helpim ol man. “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.’ Wok pastaim long painim kingdom bilong God wantaim stretpela pasin bilong em.”—Matyu 6:9, 10, 33, Nupela Testamen na Ol Sam.
Olsem wanem pasin bilong ‘painim kingdom pastaim’ i lukautim pasin bilong yumi long i stap wanbel? (Maika 4:3; 1 Jon 3:10-12)
(6) Holi spirit i save kamapim ol gutpela pasin long ol man i lotuim Jehova, em ol pasin i helpim ol long i stap wanbel. ‘Holi spirit i save kirapim yumi long mekim ol gutpela pasin olsem, pasin bilong laikim tru ol arapela, amamas, stap bel isi, no ken belhat kwik, helpim ol man, mekim gutpela pasin long ol, bilip, stap isi, na daunim laik bilong olpela bel.’—Galesia 5:22, 23.
Yumi mas mekim wanem na bai spirit bilong God i ken kamapim ol gutpela pasin long yumi? (Aposel 5:32)
Taim yumi gat spirit bilong God, olsem wanem dispela i helpim yumi long i stap gut wantaim ol wanbilip Kristen? ( Jon 13:35; 1 Jon 4:8, 20, 21)
(7) Olgeta man i lotu tru long God ol i insait long wok bilong autim gutnius bilong Kingdom bilong em. “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Matyu 24:14.
Wanem samting i mas kirapim yumi long givim bel tru long mekim dispela wok bilong autim tok? (Matyu 22:37-39; Rom 10:10)
11. Taim yumi bihainim ol tok i tru bilong Baibel, dispela i mekim wanem long yumi?
11 Taim yumi wanbel long lotuim Jehova, dispela i pulim yumi i go klostu long em na yumi ken amamas long bung wantaim ol wanbilip. Song 133:1 i tok: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut.” Em i gutpela samting tru taim yumi lusim ol lain bilong dispela graun i save tingim ol yet tasol, na mekim pasin pamuk, na kros pait, na yumi bung wantaim ol man i laikim tru Jehova na i bihainim ol lo bilong em!
Klia Long Ol Samting i Laik Brukim Lain
12. Bilong wanem yumi mas sakim pasin bilong bosim wokabaut bilong yumi yet?
12 Bilong holimpas dispela gutpela pasin bilong yumi long i stap wanbel, yumi mas abrusim ol samting i laik brukim lain. Wanpela samting em pasin bilong bosim wokabaut bilong yumi yet na sakim God na ol lo bilong em. Bilong helpim yumi long abrusim dispela pasin, Jehova i kamapim long ples klia as bilong en, em Satan. (2 Korin 4:4; KTH 12:9) Satan yet i bin kirapim Adam tupela Iv long givim baksait long tok bilong God na mekim ol samting i no stret wantaim laik bilong God. Dispela i bagarapim tupela na yumi tu. (Stat 3:1-6, 17-19) Pasin bilong ol man em ol i strong long bosim wokabaut bilong ol yet na sakim God na ol lo bilong em, dispela pasin i pulap tru long graun. Olsem na yumi mas was gut, nogut yumi bihainim dispela pasin.
13. Wanem samting bai soim olsem yumi gat laik tru long i stap long nupela taim God bai kamapim?
13 Olsem: Tingim gutpela tok promis bilong Jehova long pinisim pasin nogut bilong nau na kamapim nupela heven na nupela graun em “stretpela pasin tasol bai i stap long en.” (2 Pita 3:13) Dispela i mas kirapim yumi long redim yumi yet bilong i stap long dispela taim i gat stretpela pasin long en, a? Bilong mekim olsem yumi mas bihainim dispela tok bilong Baibel: “Yupela i no ken laikim ol pasin bilong graun na olgeta samting bilong graun. Sapos wanpela man i laikim ol pasin bilong graun, orait em i no save laikim tru Papa.” (1 Jon 2:15) Olsem na yumi sakim pasin bilong dispela graun—pasin bilong bosim wokabaut bilong yumi yet, pasin bilong tingim yumi yet tasol, pasin pamuk na kros na pait. Oltaim yumi harim tok bilong Jehova na bihainim dispela tok long bel olgeta, maski sin i stap long skin bilong yumi i laik pasim yumi long mekim olsem. Wokabaut bilong yumi i kamapim klia olsem pasin bilong mekim laik bilong God i stiaim tingting na pasin bilong yumi.—Song 40:8.
14. (a) Bilong wanem nau yumi mas kisim save long ol pasin bilong Jehova na bihainim long wokabaut bilong yumi? (b) Ol skripsa i stap long paragraf i mas mekim wanem long yumi yet?
14 Jehova i makim pinis taim bilong pinisim pasin nogut bilong dispela graun na olgeta man i laikim dispela pasin, na em bai mekim dispela long taim stret. Em i no ken surikim taim o senisim lo bilong em bilong helpim ol manmeri i holimpas yet pasin bilong dispela graun na ol i givim hap bel tasol long kisim save long laik bilong God na bihainim. Nau em i taim bilong mekim wok! (Luk 13:23, 24; 17:32; 21:34-36) Olsem na yumi amamas long lukim bikpela lain manmeri i wok strong long kisim ol tok Jehova i givim ol long rot bilong Baibel na oganaisesen bilong em, na ol i stap wanbel na wokabaut long rot bilong em i go long nupela taim! Na taim yumi wok long kisim save moa yet long Jehova, bai yumi laikim em moa yet na yumi gat laik long mekim wok bilong em.
Stori Gen Long Ol Dispela Tok
• Jehova i gat wanem laik long lotu?
• Taim yumi kisim save pinis long ol as tok bilong Baibel, yumi mas wok strong moa long mekim wanem?
• Yumi wan wan i ken mekim wanem bilong i stap wanbel wantaim ol narapela i lotu long Jehova?
[Piksa long pes 4]
“Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap”