Pasin Wanbel Em Mak Bilong Lotu i Tru
“Bai mi bungim yupela gen olsem ol sipsip wasman i bringim i kam bek long banis.”—MAI. 2:12.
1. Olsem wanem ol samting God i bin wokim i kamapim ples klia bikpela save bilong em?
MAN bilong raitim song i tok: “Bikpela, yu bin wokim planti samting. Yu gat bikpela save na yu wokim olgeta dispela samting. Ol samting yu bin wokim i pulap tru long dispela graun.” (Sng. 104:24) Bikpela save bilong God i kamap ples klia long pasin bilong ol samting long wok gut wantaim long helpim narapela narapela, em yumi lukim long ol kain kain diwai na binatang na animal. Na tu, long bodi bilong yu, olgeta hap—ol bikpela na ol liklik hap bilong bodi—i save wok gut wantaim bilong helpim yu long i stap gut.
2. Olsem piksa long pes 13 i kamapim, olsem wanem na pasin wanbel namel long ol Kristen i olsem wanpela mirakel?
2 Taim Jehova i wokim ol manmeri, em i laik bai ol i wok gut wantaim long helpim narapela narapela. Olgeta manmeri i no wankain, ol i gat kain kain lukluk, pasin, na save. Na tu, God i bin givim namba wan man na meri sampela gutpela pasin kain olsem ol pasin bilong em yet, bilong helpim ol long wok gut wantaim na narapela i helpim narapela. (Stt. 1:27; 2:18) Tasol long nau, klostu olgeta manmeri i stap longwe long God, i no gat wanpela taim we olgeta wantaim i bin wanbel long mekim wok. (1 Jo. 5:19) Tasol long kongrigesen Kristen bilong pastaim ol i stap wanbel na dispela i olsem wanpela mirakel, long wanem, insait long dispela kongrigesen i gat kain kain man, olsem ol wokboi nating bilong Efesus, ol meri Grik i gat nem, ol Juda man i bin kisim bikpela skul, na ol man em bipo ol i lotuim ol god giaman, tasol ol i stap wanbel.—Ap. 13:1, NW; 17:4; 1 Te. 1:9; 1 Ti. 6:1.
3. Baibel i tok wanem long pasin wanbel bilong ol Kristen? Long dispela stadi bai yumi skelim wanem ol samting?
3 Lotu i tru i helpim ol manmeri long wok gut wantaim, olsem ol wan wan hap bilong bodi bilong yumi i wok gut wantaim. (Ritim 1 Korin 12:12, 13.) Sampela samting bai yumi skelim long dispela stadi i olsem: Olsem wanem lotu i tru i helpim ol man long stap wanbel? Olsem wanem na Jehova tasol inap helpim planti milion manmeri bilong olgeta lain i kamap wanbel? Wanem ol pasin bilong brukim lain em Jehova i helpim yumi long lusim? Na long ol samting bilong pasin wanbel, olsem wanem lotu Kristen tru i narapela kain long Kristendom?
Olsem Wanem Lotu i Tru i Helpim Ol Man Long Stap Wanbel?
4. Olsem wanem lotu i tru i helpim ol man long stap wanbel?
4 Ol manmeri i bihainim lotu i tru ol i save olsem Jehova i wokim olgeta samting, olsem na i stret em tasol i stap King bilong heven na graun. (KTH 4:11) Olsem na maski ol Kristen tru i stap long ol narapela narapela kantri na ol i gat kain kain sindaun, olgeta i bihainim ol wankain lo bilong God na ol wankain stiatok bilong Baibel. Olgeta man i lotu tru long God ol i kolim em “papa.” (Ais. 64:8; Mt. 6:9) Olsem na olgeta i stap brata brata na ol i amamas long pasin wanbel em man bilong raitim song i stori long en: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut.”—Sng. 133:1.
5. Wanem pasin i helpim ol Kristen tru long stap wanbel?
5 Ol Kristen tru i no gutpela olgeta, tasol ol i stap wanbel long mekim lotu, long wanem, ol i bin lain long laikim narapela narapela. Jehova yet i skulim ol long laikim ol narapela—i no gat narapela man inap givim kain skul olsem. (Ritim 1 Jon 4:7, 8.) Baibel i tok: “Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela. Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela. Yupela i mas givim bel bilong yupela long ol arapela manmeri. Dispela pasin i winim tru olgeta arapela pasin, na em i save mekim ol arapela gutpela pasin i kamap strong na i wok bung wantaim.” (Kl. 3:12-14) Pasin laikim—em dispela pasin i mekim ol man i kamap wanbel—em nambawan mak bilong ol Kristen tru. Long ol samting yu yet i bin lukim, ating yu save pinis olsem dispela pasin wanbel em mak bilong lotu i tru.—Jo. 13:35.
6. Ol samting yumi wetim Kingdom long mekim, olsem wanem dispela i helpim yumi long stap wanbel?
6 Na tu, ol man i lotu tru long God ol i stap wanbel, long wanem, ol i save olsem Kingdom Bilong God tasol inap helpim ol man. Ol i save olsem klostu nau Kingdom Bilong God bai kamap senis bilong ol gavman bilong graun na em bai kamapim gutaim tru long ol man i bihainim tok. (Ais. 11:4-9; Dan. 2:44) Olsem na ol Kristen i save bihainim dispela tok Jisas i mekim long ol disaipel bilong em: “Ol i no bilong dispela graun, olsem mi yet mi no bilong dispela graun.” (Jo. 17:16) Ol Kristen tru i no insait long ol pait bilong dispela graun, olsem na ol i stap wanbel maski ol i stap namel long ol man i insait long pait.
Wanpela Rot Tasol Bilong Kisim Skul Long God
7, 8. Olsem wanem na ol skul yumi kisim long Baibel i helpim yumi long stap wanbel?
7 Ol Kristen bilong pastaim i stap wanbel, long wanem, olgeta i kisim skul long wankain rot. Ol i luksave olsem Jisas i skulim na stiaim kongrigesen long rot bilong wanpela gavening bodi, em ol aposel na ol hetman i stap long Jerusalem. Ol dispela man i larim Tok Bilong God i stiaim ol tok ol i pasim na ol i salim ol wasman raun long givim dispela tok long ol kongrigesen i stap long planti hap. Baibel i stori long ol dispela wasman olsem: “Ol i wokabaut i go long ol taun, na dispela tok bipo ol aposel na ol hetman ol i pasim long Jerusalem, em ol i givim long ol Kristen. Na ol i tok, ‘Yupela i mas bihainim dispela [tok].’”—Ap. 15:6, 19-22; 16:4.
8 Long nau tu, Gavening Bodi—em ol Kristen God i bin makim i insait long en—i helpim ol bratasista i stap long olgeta hap long i stap wanbel. Gavening Bodi i kamapim ol buk na nius bilong Baibel long planti tokples. Tok Bilong God i as bilong ol dispela kaikai bilong spirit. Olsem na ol tok yumi kisim i no kam long ol man, nogat, em i kam long Jehova.—Ais. 54:13.
9. Olsem wanem wok God i givim long yumi i helpim yumi long stap wanbel?
9 Na tu, ol wasman Kristen i strongim pasin wanbel long rot bilong go pas long wok autim tok. Pasin pren i stap namel long ol lain i mekim wok bilong God, dispela i strong moa, winim pasin pren i stap namel long ol man i bung nating bilong painim amamas. Long kongrigesen Kristen, ol man i no bung nating bilong amamas tasol, nogat, wok bilong kongrigesen em bilong givim biknem long Jehova na mekim wanpela wok—em wok bilong autim gutnius, kamapim ol disaipel, na strongim ol bratasista. (Ro. 1:11, 12; 1 Te. 5:11; Hi. 10:24, 25) Olsem na aposel Pol inap mekim dispela tok long ol Kristen: “Yupela i sanap strong na i stap wanbel, na long wanpela tingting tasol yupela i wok wantaim bilong kirapim ol manmeri long bilip long gutnius.”—Fl. 1:27.
10. Wanem sampela samting i mekim na yumi lain bilong God i stap wanbel?
10 Em nau, yumi lain bilong Jehova i stap wanbel, long wanem, yumi daun long wok bos bilong Jehova, laikim tru ol brata, bilip na wet long Kingdom Bilong God, na rispektim ol man God i yusim bilong go pas long mekim wok. Jehova i helpim yumi long daunim sampela kain pasin bilong yumi ol sinman, em ol pasin we inap bagarapim pasin wanbel bilong yumi.—Ro. 12:2.
Rot Bilong Daunim Pasin Antap na Pasin Jeles
11. Bilong wanem pasin antap i save brukim lain? Olsem wanem Jehova i helpim yumi long daunim pasin antap?
11 Pasin antap i save brukim lain. Man i gat pasin antap em i save ting em i winim ol narapela na em i amamas long apim nem bilong em yet. Tasol dispela kain pasin i save pasim rot bilong stap wanbel; ol man inap jeles taim ol i harim wanpela i apim nem bilong em yet. Disaipel Jems i tok: “Kain hambak pasin olsem, em i pasin nogut tru.” (Jem. 4:16) I no gutpela pasin long luk daun long ol arapela. Jehova i save mekim sampela wok wantaim yumi ol man i gat sin, na dispela i soim olsem em i gat pasin daun. Devit i tok: “Pasin daun bilong yu i mekim na mi gat biknem.” (2 Sml. 22:36, NW) Tok Bilong God i skulim yumi long wokim gut tingting na skelim stret ol samting, na dispela i helpim yumi long daunim pasin antap. Pol i tok: “Husat i putim yu i stap bikman? Yu gat wanpela gutpela samting yu no bin kisim long God, a? Na sapos i tru yu bin kisim olgeta samting long han bilong God, orait bilong wanem yu litimapim nem bilong yu yet, olsem yu yet yu bin kamapim ol dispela samting?”—1 Ko. 4:7.
12, 13. (a) Wanem samting i stap long yumi na i save mekim yumi jeles? (b) Wanem samting i kamap taim yumi tingim ol narapela long wankain pasin olsem Jehova i save tingim ol?
12 Pasin jeles tu i save brukim lain. Yumi olgeta i gat sin, olsem na “pasin bilong bel nogut” i stap insait long yumi olgeta. Ol Kristen i stap longpela taim long tok i tru, ol tu inap jeles long sindaun, mani kago, ol wok, o save bilong ol arapela. (Jem. 4:5, NW) Olsem: Brata i gat meri pikinini inap jeles long wanpela brata i insait long fultaim sevis, tasol em i no luksave olsem dispela brata inap jeles long brata i gat meri pikinini. Yumi ken mekim wanem na bai pasin jeles i no ken bagarapim pasin wanbel bilong yumi?
13 Bilong helpim yumi long abrusim pasin jeles, tingim tok em Baibel i mekim long kongrigesen Kristen, em i tok ol Kristen God i bin makim ol i kain olsem ol hap bilong wanpela bodi. (Ritim 1 Korin 12:14-18.) Maski ai em samting i stap ples klia na lewa em samting i stap hait, tupela wantaim i mekim wok bilong helpim yu. Na olsem tasol, Jehova i tingim olgeta wan wan insait long kongrigesen, maski sampela i holim bikpela wok na sampela nogat. Olsem na i gutpela yumi tingim ol brata bilong yumi long wankain pasin olsem Jehova i save tingim ol. Yumi mas tingim tru ol arapela, na no ken jeles long ol. Long dispela rot yumi kamapim klia olsem pasin bilong ol Kristen tru i narapela kain long ol man insait long ol lotu bilong Kristendom.
Kristendom i No Stap Wanbel
14, 15. Wanem samting i mekim na lotu apostet Kristen i no stap wanbel?
14 Pasin wanbel i stap namel long ol Kristen tru, tasol i no olsem long ol lotu bilong Kristendom we i gat pasin bilong kros pait. Inap 300 yia samting bihain long Krais, lotu apostet Kristen i stap long planti hap, olsem na wanpela empera haiden bilong Rom i laik insait long en na i kirap bosim dispela lain. Dispela i mekim na lain Kristendom i kamap bikpela moa. Bihain, planti kingdom i bruk long Rom na ol i kamapim lotu bilong kantri bilong ol yet.
15 Inap planti handet yia, planti bilong ol dispela kingdom i pait long narapela narapela. Long ol yia namel long 1600 na 1800, ol manmeri long Amerika, Briten, na Frans, ol i kirap strongim pasin bilong litimapim kantri bilong ol, na dispela pasin i kamap olsem wanpela lotu. Long ol yia namel long 1800 na 2000, pasin bilong litimapim kantri i kirap bosim tingting bilong klostu olgeta manmeri long graun. Bihain, ol lotu bilong Kristendom i bruk bruk na kamap planti liklik lotu, em planti ol i orait long pasin bilong litimapim kantri. Ol man i save go long lotu, ol i bin go pait long ol wanlotu bilong ol em ol i bilong narapela kantri. Long nau, ol kain kain bilip na pasin bilong litimapim kantri i mekim na lain Kristendom i no stap wanbel.
16. Wanem sampela samting i mekim na lain Kristendom i no stap wanbel?
16 Bihain long yia 1900, sampela lotu bilong Kristendom i kirapim wanpela pasin bilong strongim ol lotu long wok bung wantaim. Inap planti yia ol i bin wok strong long mekim olsem, tasol long nau wan wan lotu tasol i wok bung wantaim, na ol manmeri i go long lotu ol i no wanbel long ol kain samting olsem evolusen, rausim bel, pasin bilong man i slip wantaim man na meri i slip wantaim meri, na makim meri long mekim wok pasto. Long sampela lotu bilong Kristendom, ol hetman bilong lotu i traim long helpim ol man bilong ol narapela narapela lotu long wok bung wantaim, na bilong mekim olsem ol i daunim sampela bilip i bin brukim lain. Tasol dispela i mekim na bilip bilong ol man i no strong moa na i no helpim lain Kristendom long kamap wanbel.
Lotu i Tru i No Insait long Pasin Bilong Litimapim Kantri
17. Baibel i mekim wanem tok profet long lotu i tru bai bungim ol man na mekim ol i stap wanbel long “taim bilong las de”?
17 Maski ol lain man long nau i no stap wanbel, pasin wanbel i stap yet olsem mak bilong ol man i lotu tru long God. Profet bilong God, Maika, i tok profet olsem: “Bai mi bungim yupela gen olsem ol sipsip wasman i bringim i kam bek long banis.” (Mai. 2:12) Maika i tok profet olsem lotu i tru bai stap antap tru na i winim olgeta narapela lotu—maski em lotu we ol man i lotuim ol giaman god o litimapim kantri olsem wanpela god. Em i tok: “Wanpela taim bai i kamap bihain [“taim bilong las de,” NW] na dispela maunten, haus bilong Bikpela i sanap long en, bai i stap antap tru na i winim olgeta arapela maunten. Na planti lain manmeri bai i kam bung long en. Maski olgeta arapela lain pipel i lotu long ol giaman god bilong ol yet na bihainim ol, bai yumi Israel i lotu long God, Bikpela bilong yumi oltaim oltaim, na bihainim em wanpela tasol.”—Mai. 4:1, 5.
18. Lotu i tru i bin helpim yumi long mekim wanem ol senis?
18 Maika i stori tu long olsem wanem lotu i tru bai helpim ol birua long kamap wanbel. “[Planti lain manmeri] bai ol i tok, ‘Kam, yumi go antap long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.’ . . . Na bai ol i paitim bainat bilong ol i kamap olsem ain bilong brukim graun, na paitim spia bilong ol i kamap olsem naip. Na olgeta lain manmeri bai i no pait moa, na bai ol i no skul moa long pait.” (Mai. 4:2, 3) Ol manmeri husat i lusim pasin bilong lotuim ol giaman god em ol man yet i bin wokim o pasin bilong litimapim kantri, na ol i kirap long lotuim Jehova, ol i stap wanbel long olgeta hap bilong graun. God i skulim ol long ol rot bilong mekim pasin laikim.
19. Planti milion manmeri ol i wanbel long lotu i tru na dispela i kamapim klia wanem samting?
19 Pasin wanbel bilong ol Kristen tru long olgeta hap em i narapela kain—i no gat narapela lain i gat pasin olsem—na dispela i kamapim klia olsem Jehova i wok yet long stiaim ol manmeri bilong em long rot bilong spirit bilong em. Ol manmeri bilong olgeta lain ol i wok long kamap wanbel—namba bilong ol i bikpela tru, winim olgeta taim bipo. Dispela i stret long tok em Kamapim Tok Hait 7:9, 14 i mekim, na i soim olsem klostu nau ol ensel bilong God bai lusim ‘ol win’ bilong bagarapim dispela pasin nogut i stap nau. (Ritim KTH 7:1-4, 9, 10, 14.) Em i gutpela samting tru long stap insait long bikpela lain brata i stap wanbel long olgeta hap. Olsem wanem yumi olgeta wan wan inap strongim dispela pasin wanbel? Stadi i kamap bihain bai stori long dispela samting.
Bai Yu Bekim Olsem Wanem?
• Olsem wanem lotu i tru i helpim ol man long i stap wanbel?
• Yumi ken mekim wanem na bai pasin jeles i no ken bagarapim pasin wanbel bilong yumi?
• Maski ol lain man i no stap wanbel, bilong wanem ol Kristen tru i stap wanbel yet?
[Piksa long pes 13]
Ol Kristen bilong pastaim ol i bilong kain kain sindaun
[Ol Piksa long pes 15]
Taim yu helpim wok bilong Haus Kingdom, olsem wanem dispela i helpim pasin wanbel?