Stap Wanbel Nau Long Taim Bilong Las De
“Wokabaut bilong yupela em i mas i stap stret na bihainim tru gutnius . . . [na] sanap strong na i stap wanbel, na long wanpela tingting tasol yupela i wok wantaim bilong kirapim ol manmeri long bilip long gutnius.”—FILIPAI 1:27.
NAU yumi stap long “taim bilong las de.” Tru tumas, “planti hevi nogut tru” i kamap. (2 Timoti 3:1-5) Nau long dispela “taim bilong las de” ol man bilong graun i no stap isi wantaim, tasol ol Witnes Bilong Jehova i stap narapela kain tru, long wanem, ol i stap isi wantaim na i stap wanbel. (Daniel 12:4) Tasol olgeta wan wan insait long famili bilong Jehova i stap long olgeta hap ol i mas wok strong bambai dispela pasin wanbel i ken stap yet namel long ol.
2 Aposel Pol i tokim ol wanlain Kristen long ol i mas wok long i stap wanbel. Em i tok: “Wokabaut bilong yupela em i mas i stap stret na bihainim tru gutnius bilong Krais. Olsem orait maski sapos mi kam lukim yupela o mi harim tok tasol long yupela, mi bai save olsem yupela i sanap strong na i stap wanbel, na long wanpela tingting tasol yupela i wok wantaim bilong kirapim ol manmeri long bilip long gutnius. Na mi bai save olsem ol birua bilong yupela ol i no inap mekim yupela i pret. Na sapos ol i lukim yupela i no pret, orait ol bai i save olsem, ol bai i lus, tasol God yet bai i mekim yupela i stap gut tru.” (Filipai 1:27, 28) Tok bilong Pol i kamapim klia olsem yumi mas wok gut wantaim olsem ol Kristen. Orait, wanem samting bai helpim yumi ol Kristen long i stap wanbel yet nau long dispela taim bilong planti hevi?
Daun Long Laik Bilong God
3 Wanpela rot bilong helpim pasin wanbel bilong yumi, em yumi mas daun long laik bilong God long olgeta taim. Bilong mekim olsem, ating yumi mas senisim sampela tingting bilong yumi. Yumi ken tingim ol disaipel Juda bilong Krais Jisas long bipo. Taim aposel Pita i autim tok pastaim long ol manmeri bilong ol narapela lain long yia 36 C.E., em ol i no bin bihainim pasin bilong katim skin, God i bin givim spirit holi long ol dispela manmeri bilong ol narapela lain, na ol i kisim baptais. (Aposel, sapta 10) Paslain long dispela taim, ol Juda, na ol man bilong ol narapela lain i bihainim lotu Juda, na ol Samaria, ol tasol i bin kamap disaipel bilong Krais Jisas.—Aposel 8:4-8, 26-38.
4 Taim ol aposel na ol brata long Jerusalem i kisim save olsem Kornilius na sampela manmeri moa bilong ol narapela lain i bin kisim baptais, ol i laik harim stori bilong Pita long dispela samting. Taim Pita i stori pinis long ol samting i bin kamap long Kornilius na sampela bilipman moa bilong ol narapela lain, em i tok: “Bipo yumi [ol Juda i] bilip long Bikpela Jisas Krais, na God i givim Holi Spirit olsem presen long yumi. Na nau God i givim dispela wankain presen tasol long ol [dispela manmeri bilong ol narapela lain ol i bilip]. Olsem na mi husat na mi inap pasim wok God yet i mekim long ol?” (Aposel 11:1-17) Dispela em i wanpela traim i painim ol Juda i bihainim Krais Jisas. Olsem wanem? Bai ol i daun long laik bilong God na kisim ol bilipman bilong ol narapela lain olsem ol wanlotu bilong ol? O ating dispela inap bagarapim pasin wanbel i stap namel long ol wokman bilong God long graun?
5 Baibel i tok: “Ol man [em ol aposel na ol narapela brata] i harim dispela tok bilong Pita, na ol i no gat tingting moa bilong kros. Nogat. Ol i litimapim nem bilong God na ol i tok olsem, ‘Nau yumi save, God i larim ol arapela lain tu i tanim bel na kisim laip.’ ” (Aposel 11:18) Dispela tingting bilong ol i helpim na strongim pasin wanbel namel long lain bilong Jisas. Insait long sotpela taim tasol, wok bilong autim tok i go bikpela namel long ol manmeri bilong ol narapela lain, na blesing bilong Jehova i stap long dispela wok. Na yumi tu, taim oganaisesen bilong Jehova i laik kamapim wanpela nupela kongrigesen na ol i laik bai yumi wok gut wantaim ol long dispela samting, o taim spirit holi bilong God i stiaim oganaisesen na ol i stretim sampela tok em pastaim ol i bin mekim, yumi mas daun long en na bihainim. Taim yumi givim bel tru long wok gut wantaim ol, Jehova bai amamas, na tu, dispela bai helpim yumi long i stap wanbel yet nau long taim bilong las de.
Holimpas Tok i Tru
6 Yumi insait long famili bilong Jehova i save lotuim em, olsem na yumi stap wanbel, long wanem, ‘God i skulim’ yumi na yumi holim strong ol tok i tru bilong em i kamap ples klia pinis. (Jon 6:45; Song 43:3) Baibel i as bilong ol tok yumi skulim ol man long en, olsem na yumi olgeta i wanbel long ol toktok yumi mekim. Yumi amamas long kisim ol kaikai bilong spirit Jehova i givim long yumi long rot bilong “wokboi i gat gutpela tingting.” (Matyu 24:45-47) Yumi bilip long wankain tok, na dispela i helpim yumi long i stap wanbel wantaim ol narapela brata i stap long olgeta hap.
7 Tasol olsem wanem sapos yumi wan wan i hatwok long kisim gut o bilip long wanpela tok? Yumi mas beten askim God long givim gutpela tingting na save long yumi, na yumi mas wok strong long painim ol tok bilong dispela samting long Baibel na ol buk na nius Kristen. (Sindaun 2:4, 5; Jems 1:5-8) Na yumi ken toktok wantaim wanpela elda na ating dispela bai helpim yumi. Sapos yumi mekim pinis ol dispela samting na yumi no kisim gut yet dispela tok, orait larim dispela samting i stap pastaim. Ating bihain bai ol i kamapim sampela tok moa bilong dispela samting long ol buk o nius samting bilong yumi, na bai yumi inap kisim sampela save moa long dispela tok. Tasol i no stret sapos yumi wok long kirapim ol narapela long kongrigesen long kisim wankain tingting olsem bilong yumi i narapela kain long tok bilong oganaisesen. Sapos yumi mekim olsem, yumi wok long brukim kongrigesen—yumi no wok long helpim kongrigesen long i stap wanbel. Mobeta yumi “bihainim tok tru” na wok long kirapim ol narapela long mekim olsem!—3 Jon 4.
8 Bipo Pol i tok: “Nau yumi save hap hap tasol long ol samting bilong God. I olsem yumi lukim ol long glas tasol. Tasol long dispela taim bihain, bai yumi lukim tru pes bilong God. Na bai yumi save tru long em, olsem nau em i save tru long yumi.” (1 Korin 13:12) Tru, ol Kristen bilong bipo i no klia gut long ol samting bilong God, tasol ol i stap wanbel. Orait nau yumi gat planti save liklik long ol samting Jehova i laik mekim na long tok i tru bilong em long Baibel. Olsem na yumi mas amamas long tok i tru yumi bin kisim long rot bilong “wokboi i gat gutpela tingting.” Na yumi mas tenkyu long Jehova, em i bin stiaim yumi long rot bilong oganaisesen bilong em. Tru, bipo yumi no gat bikpela save olsem, tasol yumi no bin hangre o nek i drai long ol samting bilong spirit. Wasman bilong yumi, Jehova, em i bin mekim yumi i stap wanbel, na em i lukautim gut yumi.—Song 23:1-3.
Mekim Stretpela Wok Long Maus!
9 Pasin bilong mekim wok long maus bilong strongim bel bilong ol narapela, dispela em i bikpela samting bilong strongim pasin wanbel na pasin bilong i stap olsem brata brata. Dispela pas em lain bilong bosim ol Kristen bilong pastaim i bin salim i go long ol kongrigesen bilong stretim wanpela tok i kamap long pasin bilong katim skin, dispela i bin strongim tru bel bilong ol Kristen. Taim ol disaipel bilong ol narapela lain long Antiok i kaunim pinis pas, ol i “amamas long kisim dispela gutpela tok bilong strongim ol.” Judas na Sailas, em ol i bin stap long Jerusalem na ol i karim dispela pas i kam, ol i “givim planti gutpela tok long ol Kristen, na long dispela pasin tupela i strongim bel bilong ol.” Pol wantaim Barnabas i stap, na yumi save, ol tu i strongim bel bilong ol wanbilip long Antiok. (Aposel 15:1-3, 23-32) Yumi tu inap mekim olsem taim yumi bung long ol miting Kristen—yumi “strongim bel bilong ol arapela” taim ol i lukim yumi i stap long miting na yumi bekim ol gutpela tok bilong strongim man.—Hibru 10:24, 25.
10 Tasol sapos yumi mekim wok nogut long maus bilong yumi, dispela inap bagarapim pasin wanbel i stap namel long yumi. Disaipel Jems i tok: “Maus em i liklik hap tasol bilong bodi, tasol em i save hambak moa yet na litimapim nem bilong em yet. Yumi save, liklik paia tasol em inap kirapim bikpela paia moa long bus na kukim olgeta diwai.” (Jems 3:5) Jehova i nolaik tru long ol man i kamapim tok pait. (Sindaun 6:16-19) Kain tok olsem inap mekim na kongrigesen i no stap wanbel moa. Olsem na sapos wanpela i tok bilas nogut long narapela, olsem toknogutim em, ol elda i ken mekim wanem? Ol bai wok strong long helpim man i bin mekim dispela rong. Tasol sapos wanpela man i toknogutim narapela na em i no tanim bel, kongrigesen i mas rausim em bambai bel isi na pasin bilong mekim stret ol wok na pasin wanbel i ken i stap yet insait long kongrigesen. Pol yet i tok olsem. Em i tok: “Sapos wanpela man yupela i save kolim brata long Krais, em i . . . tok bilas . . . , orait yupela i no ken i stap wantaim em. Nogat. Na tu, yupela i no ken kaikai wantaim kain man olsem.”—1 Korin 5:11.
11 Taim yumi bosim maus, dispela i helpim yumi long i stap wanbel. (Jems 3:10-18) Tasol sapos yumi bin mekim wanpela tok na dispela i kamapim hevi namel long yumi na narapela Kristen, yumi ken mekim wanem? I gutpela sapos yumi yet i kirap na traim stretim dispela hevi wantaim brata bilong yumi, a? Na sapos yumi mas tok sori long em, i gutpela yumi mekim olsem. (Matyu 5:23, 24) Tru, bilong mekim olsem yumi mas i gat pasin daun, tasol Pita i tok: “Yupela olgeta i mas bihainim pasin bilong daunim yupela yet na i stap aninit long ol arapela manmeri bilong God. Yumi save, ‘God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.’ ” (1 Pita 5:5) Pasin daun bai kirapim yumi na bai yumi ‘wok strong long kamap wanbel’ wantaim ol brata bilong yumi, na tokaut olsem yumi bin popaia, na yumi ken mekim tok sori. Dispela i save helpim famili bilong Jehova long i stap wanbel.—1 Pita 3:10, 11.
12 Sapos yumi mekim stretpela wok long maus bilong yumi, yumi inap kamapim strong pasin wanbel olsem bilong famili insait long oganaisesen bilong Jehova. Pol i bin mekim dispela samting, olsem na em inap tokim ol Tesalonaika: “Yupela i save, mipela i bin mekim wankain pasin long yupela olsem papa i save mekim long ol pikinini bilong en, na mipela i mekim tok bilong kirapim tingting bilong yupela na strongim bel bilong yupela. Na mipela i tokaut long yupela i mas wokabaut long pasin inap tru long pasin bilong God yet.” (1 Tesalonaika 2:11, 12) Pol i stap olsem gutpela piksa bilong dispela samting, olsem na em inap kirapim ol wanlain Kristen long “strongim bel bilong ol man i save pret [olsem ol i stap bel hevi].” (1 Tesalonaika 5:14) Sapos yumi mekim wok long maus bilong yumi long mekim gut bel bilong ol narapela na strongim ol, bai yumi helpim tru ol, a? Tru tumas, “sapos . . . yu wetim gutpela taim na yu mekim wanpela gutpela tok long ol [man], orait bai yu amamas.” (Sindaun 15:23) Na kain gutpela tok olsem, em i save helpim na strongim pasin wanbel i stap insait long lain bilong Jehova.
Lusim Rong Bilong Man!
13 Sapos wanpela brata i mekim rong long yumi na em i tok sori pinis, yumi mas lusim rong bilong em bambai pasin wanbel bilong ol Kristen i ken stap yet. Na hamas taim yumi mas lusim rong bilong brata? Jisas i tokim Pita: “Mi no tok long yu mas lusim rong bilong en inap 7-pela taim tasol. Nogat. Mi tok, yu mas lusim inap 70 taims 7-pela taim.” (Matyu 18:22) Sapos yumi no lusim rong bilong brata, yumi nogutim yumi yet. Olsem wanem yumi nogutim yumi yet? Long wanem, sapos yumi bel nogut long wanpela na yumi wok long tingim tingim rong bilong em, dispela bai mekim na yumi no stap bel isi. Na sapos ol narapela i save yumi man bilong mekim hatpela pasin na yumi no save lusim rong bilong man, ating bai ol i givim baksait long yumi. (Sindaun 11:17) Jehova i no laikim pasin bilong tingim tingim rong bilong man, na bihain dispela pasin inap kirapim yumi long mekim wanpela bikpela rong. (Wok Pris 19:18) Yumi ken tingim Jon Bilong Baptais—meri nogut Herodias em i “bel nogut tru” long Jon, olsem na em i wokim rot na ol i katim nek bilong Jon.—Mak 6:19-28.
14 Wanpela hap bilong bikpela beten bilong Jisas i olsem: “Yu ken lusim ol sin bilong mipela, long wanem, mipela i save lusim ol rong ol arapela i bin mekim long mipela.” (Luk 11:4) Sapos yumi no lusim rong bilong man, dispela inap mekim na wanpela taim bihain bai Jehova i no inap lusim moa ol rong bilong yumi, long wanem, Jisas i tok: “Sapos yupela i lusim rong bilong ol arapela manmeri, orait Papa bilong yupela long heven em bai i lusim rong bilong yupela tu. Tasol sapos yupela i no lusim rong bilong ol arapela manmeri, orait Papa bilong yupela em tu bai i no lusim ol rong bilong yupela.” (Matyu 6:14, 15) Olsem na sapos yumi laik tru long helpim famili bilong Jehova i save lotuim em na bai ol i ken i stap wanbel yet, bai yumi lusim rong bilong brata—olsem yumi ken lusim tingting long wanpela rong em i bin mekim long yumi, long wanem, ating em i no bin tingting gut, na em i no gat laik long mekim nogut long yumi. Pol i tok: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.” (Kolosi 3:13) Taim yumi lusim rong bilong brata, yumi helpim dispela gutpela pasin wanbel long i stap yet insait long oganaisesen bilong Jehova.
Pasin Wanbel na Tingim Ol Samting Yumi Mas Mekim
15 Taim God i bin wokim yumi, em inapim yumi bambai yumi ken tingim rot yumi laik bihainim, na tu, yumi gat wok long skelim ol samting yumi mas mekim. (Lo 30:19, 20; Galesia 6:5) Tasol yumi inap i stap wanbel yet, long wanem, yumi bihainim ol lo na tok bilong Baibel. Yumi save tingim ol dispela tok taim yumi tingting long mekim wanpela samting. (Aposel 5:29; 1 Jon 5:3) Sapos wanpela tok i kamap long pasin bilong klia olgeta long ol pait samting bilong dispela graun, yumi inap skelim gut ol samting yumi mas mekim sapos yumi tingim ol tok bilong Baibel olsem yumi “no bilong dispela graun,” na yumi bin ‘paitim ol bainat bilong yumi i kamap olsem ol ain bilong brukim graun, na yumi paitim ol spia bilong yumi i kamap olsem ol naip.’ (Jon 17:16; Aisaia 2:2-4) Na i olsem tu sapos yumi gat wok long skelim ol samting yumi mas mekim long gavman—yumi save tingim tok bilong Baibel, olsem ‘samting bilong God, em yumi mas givim long God,’ tasol yumi mas daun long “ol gavman” long ol samting i no samting bilong lotu. (Luk 20:25; Rom 13:1-7; Taitus 3:1, 2) Em nau, sapos yumi tingim ol lo na tok bilong Baibel taim yumi tingting long mekim wanpela samting, dispela i save helpim pasin wanbel bilong ol Kristen long stap yet namel long yumi.
16 Na yumi inap helpim pasin wanbel bilong ol Kristen taim yumi tingting long mekim wanpela samting em i samting bilong yumi yet na i no gat wanpela lo bilong Baibel i tok, dispela i stret o nogat. Olsem wanem yumi inap helpim pasin wanbel olsem? Yumi ken mekim pasin sori na tingim ol narapela, nogut dispela samting yumi tingting long mekim i givim hevi long ol. Olsem: Long kongrigesen i bin stap long Korin bilong bipo, bikpela tok i kamap long pasin bilong kaikai abus ol i bin ofaim long ol god giaman. Tru, ol Kristen i no save insait long pasin bilong lotuim god giaman. Tasol sapos ol man i bin rausim gut blut bilong abus na i gat sampela hap ol i no bin kaikai na ol i putim long maket bilong ol man i baim, i no gat rong long kaikai dispela abus. (Aposel 15:28, 29; 1 Korin 10:25) Tasol bel bilong sampela Kristen i gat tok long kaikai dispela kain abus. Olsem na Pol i laik kirapim ol Kristen long ol i no ken pundaunim ol dispela brata. Em i tok: “Sapos kaikai i save mekim brata bilong mi i pundaun long sin, orait mi no inap tru kaikai mit gen long laip bilong mi. Nogut mi mekim brata bilong mi i pundaun long sin.” (1 Korin 8:13) Olsem na maski i no gat wanpela lo bilong Baibel i toktok long dispela samting, yumi mas mekim pasin sori na tingim ol narapela, sapos samting yumi tingting long mekim inap bagarapim pasin wanbel insait long famili bilong God!
17 Sapos yumi no save gut wanem rot bai yumi bihainim, i gutpela yumi tingting long mekim samting em bel bilong yumi bai i no gat tok long en—dispela em i pasin bilong gutpela tingting, na samting yumi tingting pinis long mekim, ol narapela i no ken skelim. (Rom 14:10-12) Tru, taim yumi mas pasim tok long bel long mekim wanpela samting, pastaim yumi mas beten na askim Jehova long soim rot long yumi. Olsem man bilong raitim Song i bin mekim, yumi tu inap beten olsem: “Yu mas harim mi . . . Yu olsem ples hait bilong mi na yu lukautim mi. Yu go pas long mi na bringim mi i go long gutpela rot, olsem yu bin tok bipo long mekim.”—Song 31:2, 3.
Stap Wanbel Oltaim Olsem Kristen
18 Long 1 Korin sapta 12, Pol i mekim tok piksa long bodi bilong man bilong makim pasin wanbel bilong kongrigesen Kristen. Em i tok, narapela hap i mas helpim narapela hap, na olgeta wan wan hap i gat wok bilong ol. Em i tok: “Sapos wanpela hap bilong bodi tasol i stap, orait dispela em i no bodi tru. Tasol bodi i no olsem. Nogat. I gat planti hap bilong bodi, na ol i stap wanpela bodi tasol. Na ai i no inap tokim han olsem, ‘Sapos yu no i stap, mi wanpela bai mi stap gut.’ Na het tu i no inap tokim lek, ‘Sapos yu no i stap, mi wanpela bai mi stap gut.’ ” (1 Korin 12:19-21) Tru, insait long famili bilong Jehova ol i save lotuim em, yumi olgeta wan wan i no mekim wankain wok tasol. Tasol yumi stap wanbel, na narapela i mas kisim helpim long narapela.
19 Bodi bilong yumi i mas i gat kaikai, na yumi mas lukautim gut na stiaim bodi, na olsem tasol yumi mas i gat ol kaikai samting bilong spirit em God i save givim long yumi long rot bilong Baibel, na spirit bilong em, na oganaisesen bilong em. Tasol bilong ol dispela samting i ken helpim yumi, yumi mas insait long famili bilong Jehova i stap long graun. Wanpela brata i bin mekim wok bilong God inap planti yia, em i tok: “Mi tenkyu tru, long wanem, long i stap bilong mi mi bin bihainim ol save mi kisim long ol samting Jehova i laik mekim, kirap long ol dispela yia paslain liklik long 1914, taim mipela i no klia gut long sampela tok i tru . . . na i kam inap long nau, taim tok i tru i lait olsem san long belo. I gat wanpela samting i bikpela samting tru long mi, em pasin bilong i stap klostu tru long oganaisesen bilong Jehova long graun. Ol samting i bin painim mi long bipo i skulim mi olsem: Em i no pasin bilong gutpela tingting sapos yumi bihainim tingting bilong ol man bilong graun. Taim mi kisim pinis dispela tingting, mi tingting strong long i stap klostu long dispela oganaisesen em i save stap gut long Jehova. I no gat narapela rot yumi ken bihainim na bai Jehova i ken orait long yumi na mekim gut long yumi, a?”
20 Jehova em i bin singautim lain bilong em long lusim tudak bilong dispela graun na pasin bilong en long brukim lain na i no stap wanbel. (1 Pita 2:9) Em i bringim yumi i kam na yumi stap wanbel wantaim em na ol wanbilip bilong yumi. Dispela pasin wanbel bai stap long nupela taim klostu nau bai kamap. Olsem na long dispela taim nogut bilong las de, yumi mas wok yet long ‘givim bel bilong yumi long ol arapela manmeri,’ na mekim olgeta samting bambai yumi ken i stap wanbel yet na kamapim strong dispela gutpela pasin.—Kolosi 3:14.
Bai Yu Bekim Olsem Wanem?
◻ Taim yumi mekim laik bilong God na holimpas tok i tru, olsem wanem dispela i helpim yumi long i stap wanbel yet?
◻ Pasin bilong mekim stretpela wok long maus, olsem wanem dispela i helpim pasin wanbel?
◻ Yumi mas mekim wanem bilong lusim rong bilong man?
◻ Taim yumi tingting long mekim wanpela samting, yumi ken mekim wanem na bai pasin wanbel i stap yet namel long yumi?
◻ Bilong wanem yumi mas wok long i stap wanbel olsem Kristen?
[Askim Bilong Stadi]
1. Olsem wanem ol Witnes Bilong Jehova i stap narapela kain long ol man bilong dispela graun?
2. Pol i tok wanem long i stap wanbel? Bai yumi skelim wanem askim?
3. Namba wan lain bilong ol man bilong ol narapela lain i no bihainim pasin bilong katim skin, wanem taim ol i kamap disaipel bilong Krais? Ol i kamap disaipel olsem wanem?
4. Taim Pita i kamapim pinis stori bilong Kornilius, em i tok wanem? Dispela i kamapim wanem traim long ol disaipel bilong Jisas bilong lain Juda?
5. Ol aposel na ol narapela brata i mekim wanem long taim ol i save God i bin larim ol manmeri bilong ol narapela lain i tanim bel? Tingting bilong ol inap lainim yumi long wanem samting?
6. Tok i tru i save mekim wanem long pasin wanbel bilong ol manmeri i lotuim Jehova?
7. Sapos yumi yet i hatwok long kisim gut wanpela tok, yumi mas mekim wanem? Yumi no ken mekim wanem?
8. Yumi mas kisim wanem tingting long tok i tru?
9. Olsem wanem yumi ken mekim wok long maus bilong yumi long strongim pasin wanbel namel long yumi?
10. Bilong i stap wanbel yet, ating ol elda i mas mekim wanem sapos wanpela i tok bilas nogut long narapela?
11. Bilong wanem pasin daun i bikpela samting sapos yumi bin mekim wanpela tok na dispela i kamapim hevi namel long yumi na wanpela wanbilip?
12. Olsem wanem yumi ken mekim wok long maus bilong helpim lain bilong Jehova long i stap wanbel yet na strongim dispela pasin?
13. Bilong wanem yumi mas lusim rong bilong narapela?
14. (a) Matyu 6:14, 15 i skulim yumi olsem wanem long pasin bilong lusim rong bilong narapela? (b) Taim wanpela i rongim yumi, yumi mas wetim em i kam na tok sori long yumi, o olsem wanem?
15. Taim yumi tingting long mekim wanpela samting, wanem pasin i save helpim lain bilong Jehova long i stap wanbel yet?
16. Taim yumi tingting long mekim wanpela samting na i no gat wanpela lo bilong Baibel i tok, dispela i stret o nogat, yumi ken mekim wanem bilong helpim pasin wanbel long i stap yet namel long yumi? Kamapim wanpela stori bilong dispela samting.
17. Taim yumi mas pasim tok long bel long mekim wanpela samting, i gutpela yumi mekim wanem?
18. Pol i mekim wanem tok piksa long pasin wanbel i stap insait long kongrigesen Kristen?
19. Yumi ken mekim wanem bambai ol kaikai samting bilong spirit God i givim long yumi ol inap helpim yumi? Wanpela lapun brata i tok wanem long dispela samting?
20. Yumi mas tingting strong long mekim wanem long pasin wanbel bilong yumi ol lain bilong Jehova?
[Piksa long pes 16]
Dispela wasman bilong sipsip i save wok long bungim lain sipsip bilong em, na olsem tasol Jehova i save helpim lain bilong em long i stap wanbel
[Ol Piksa long pes 18]
Taim yumi mekim wanpela samting i bagarapim bel bilong wanpela brata na yumi mekim pasin daun na tok sori long em, dispela i helpim yumi long strongim pasin wanbel namel long yumi