Pasin Wanbel Tru Bilong Ol Kristen—Olsem Wanem Dispela i Kamap?
1 Wanem samting i mekim na winim 6 milion manmeri long 234 kantri em ol i mekim olsem 380 tok ples, ol inap i stap wanbel wantaim? Wanpela samting tasol em: Ol i lotuim God Jehova. (Mai. 2:12; 4:1-3) Ol samting i bin painim ol Witnes Bilong Jehova i helpim ol long save olsem pasin wanbel namel long ol Kristen i stap tru long nau. Yumi stap olsem “wanpela lain sipsip” aninit long “wanpela wasman tasol,” na yumi gat strongpela tingting long sakim pasin bilong dispela graun long brukim lain.—Jo. 10:16; Ef. 2:2.
2 God i laik bai olgeta ensel na ol man long graun i stap wanbel long lotu i tru. (KTH 5:13) Jisas i save olsem dispela em i bikpela samting, olsem na em i beten strong long ol disaipel bilong em i mas i stap wanbel. (Jo. 17:20, 21) Yumi wan wan i ken mekim wanem bilong strongim pasin wanbel insait long kongrigesen Kristen?
3 Rot Bilong i Stap Wanbel: Sapos i no gat Baibel na spirit bilong God, bai i no gat pasin wanbel namel long ol Kristen. Taim yumi bihainim ol tok yumi ritim long Baibel, dispela i opim rot long spirit bilong God inap mekim wok long i stap bilong yumi. Dispela i helpim yumi long “i stap wanbel, na dispela pasin em i olsem rop i pasim yumi na yumi stap wanlain.” (Ef. 4:3) Em i kirapim yumi long laikim ol narapela na lusim rong bilong ol. (Kl. 3:13, 14; 1 Pi. 4:8) Yu save strongim pasin wanbel long rot bilong tingim tingim long bel Tok Bilong God long olgeta de?
4 Wok bilong yumi long autim tok na kamapim ol disaipel, dispela tu i mekim yumi i stap wanbel. Taim yumi wok wantaim ol narapela long wok autim tok, olsem “wok wantaim bilong kirapim ol manmeri long bilip long gutnius,” yumi ‘kamap wanwok long tok i tru.’ (Fl. 1:27; 3 Jo. 8) Taim yumi mekim olsem, pasin laikim insait long kongrigesen bai kamap strong moa. Ating yu ken singautim wanpela em yu no bin wok wantaim em long poromanim yu long wok autim tok long dispela wik.
5 Yumi insait long dispela bikpela lain brata i stap long olgeta hap na dispela i wanpela gutpela samting tru. (1 Pi. 5:9) Long dispela yia, planti tausen manmeri i bin pilim tru dispela pasin wanbel long ol “Givim Biknem Long God” kibung intenesenel. Yumi olgeta i ken strongim dispela pasin wanbel long rot bilong ritim Baibel long olgeta de, bihainim pasin bilong laikim tru narapela na stretim ol hevi, na wok wantaim long autim gutnius.—Ro. 15:6.