Kirap Bek—Yu Save Bilip Tru Long En?
“God bai i kirapim bek ol man i dai pinis.”—APOSEL 24:15.
1. Bilong wanem i luk olsem yumi no inap abrusim indai?
“I GAT tupela samting yumi no inap abrusim—em takis na indai.” Dispela em tok wanpela bikman bilong Amerika, Benjamin Franklin, i bin raitim long yia 1789, na sampela man i ting dispela tok i wanpela savetok. I gat planti man husat i giaman na i no save baim takis. Tasol indai em samting i save painim olgeta man. Sapos i no gat man bilong helpim yumi, bihain yumi olgeta bai i dai, yumi no inap abrusim dispela samting. Ples bilong ol man i dai pinis i save daunim ol man yumi laikim tumas, i olsem dispela ples i hangre nogut tru. (Sindaun 27:20) Tasol tingim wanpela tok em inap mekim gut bel bilong yumi.
2, 3. (a) Bilong wanem dai i no ken painim sampela man? (b) Bai yumi skelim wanem ol samting long dispela stadi?
2 Baibel i helpim yumi long bilip na wet long kirap bek, olsem ol man i dai pinis ol bai i stap laip gen. Dispela i no wanpela driman nating, na i no gat wanpela samting long heven na long graun em inap pasim Jehova long kirapim bek ol man i dai pinis. Tasol planti i no save olsem i gat sampela man em dai i no ken painim ol. Bilong wanem i olsem? Long wanem, “planti manmeri tru” em man i no inap kaunim namba bilong ol, ol bai abrusim bagarap long “bikpela hevi” tru em klostu nau bai kamap. (KTH 7:9, 10, 14) Ol bai i stap laip bihain long dispela bikpela hevi, na ol inap i stap oltaim oltaim. Olsem na dai i no ken painim ol. Na God “bai i pinisim dai tu.”—1 Korin 15:26.
3 Yumi mas bilip tru long kirap bek olsem aposel Pol i bin mekim, em i tok: “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Nau yumi ken skelim tripela askim bilong kirap bek. Namba wan, wanem samting i mekim na yu ken bilip tru long kirap bek? Namba tu, olsem wanem kirap bek inap mekim gut bel bilong yu yet? Namba tri, bilip long kirap bek inap mekim wanem long i stap bilong yu long nau?
Kirap Bek Bai Kamap Tru
4. Olsem wanem kirap bek em i bikpela samting tru bilong Jehova i ken kamapim ol samting em i tingting pinis long mekim?
4 I gat planti samting i soim olsem kirap bek bai kamap tru. Nambawan samting, kirap bek i mas kamap na bai Jehova i ken kamapim ol samting em i tingting pinis long mekim. Tingim, Satan i bin pulim ol man long mekim sin, na sin i kamapim indai. Olsem na Jisas i stori long Satan olsem: “Bipo yet em i stap man bilong kilim ol man i dai.” (Jon 8:44) Tasol Jehova i tok promis olsem “meri” bilong em, em oganaisesen bilong em long heven, bai kamapim wanpela “pikinini” husat bai krungutim het bilong dispela “snek bilong bipo yet,” olsem pinisim tru Satan. (Stat 3:1-6, 15; KTH 12:9, 10; 20:10) Isi isi Jehova i kamapim klia ol samting em i laik bai dispela Pikinini i mekim, na ol samting i soim olsem dispela Pikinini bai bagarapim Satan, na tu, em bai mekim sampela samting moa. Baibel i tok: “Pikinini Bilong God i bin kamap ples klia bilong bagarapim na rausim wok bilong Satan.” (1 Jon 3:8) Indai em sin yumi kisim long Adam i bin kamapim, em i namba wan wok bilong Satan em Jehova i laik pinisim long rot bilong Jisas Krais. Olsem na pe bilong Jisas long baim bek ol man na kirap bek i bikpela samting tru.—Aposel 2:22-24; Rom 6:23.
5. Bilong wanem kirap bek bai litimapim nem bilong Jehova?
5 Jehova i strong tru long litimapim nem holi bilong em. Satan i bin krungutim gutnem bilong God na kamapim ol tok giaman. Em i bin giaman long Adam tupela Iv na tok ol “i no inap i dai” sapos ol i kisim pikinini bilong diwai em God i bin tambuim. (Stat 2:16, 17; 3:4) Kirap long dispela taim na i kam inap long nau, Satan i bin kamapim ol wankain tok giaman, olsem taim man i dai em i gat wanpela spirit i no save dai. Tasol long rot bilong kirap bek, Jehova bai kamapim long ples klia olsem ol dispela tok i giaman. Em bai kamapim klia tru olsem em wanpela tasol em i Man Bilong Lukautim na Givim Bek laip.
6, 7. Jehova i gat wanem tingting long wok bilong kirapim bek ol man? Olsem wanem yumi save long tingting bilong em?
6 Jehova i gat bikpela laik long kirapim bek ol man. Baibel i kamapim klia tingting bilong Jehova long dispela samting. Olsem: Tingim dispela tok bilong gutpela man Jop: “Ol manmeri i dai pinis, ating ol i no inap kisim laip gen. . . . Bai mi wet i stap inap long taim yu makim bilong mi i stap long dispela ples, em i pinis. Na long dispela taim bai yu ting long yu yet yu bin wokim mi, na bai yu laikim tumas bai mi stap klostu long yu gen. Olsem na bai yu singautim mi na bai mi lusim dispela ples na kam long yu.” (Jop 14:13-15) Wanem mining bilong ol dispela tok?
7 Jop i save taim em i dai, em i mas slip long matmat na wet i stap. Em i ting dispela haptaim i olsem ‘taim God i makim bilong em long stap long dispela ples,’ em wanpela haptaim we em i mas wet i go inap long taim em i ken lusim dispela ples. Em i bilip olsem bihain em bai lusim dispela ples. Bilong wanem em i bilip olsem? Long wanem, em i save long tingting bilong Jehova. Jehova i “laikim tumas” long lukim gen gutpela wokboi bilong em. Yes, God i gat bikpela laik tru long kirapim bek ol stretpela man. Jehova bai opim rot long ol narapela man tu i ken kisim laip oltaim long Paradais long graun. (Luk 23:43, NW; Jon 5:28, 29) Em i laik bilong God long kamapim dispela samting, olsem na husat inap stopim em?
8. Jehova i bin mekim wanem na yumi ken “bilip tru” long gutpela samting bai kamap bihain?
8 Kirap bek bilong Jisas i mekim na yumi ken bilip tru long gutpela samting bai kamap bihain. Taim Pol i mekim tok long Atens, em i tok: “[God] i makim pinis wanpela de bilong em bai i kotim ol manmeri. Na long stretpela pasin bilong en, em bai i skelim pasin bilong olgeta manmeri bilong graun. Na em i bin makim wanpela man bilong bosim dispela kot. Dispela man i bin dai na God i kirapim em bek long matmat. Olsem na yumi ken bilip tru long God i bin givim dispela wok long em.” (Aposel 17:31) Sampela man husat i harim tok bilong Pol, ol i tok bilas long em taim em i toktok long kirap bek. Tasol sampela man i kamap bilipman. Pol i soim olsem i gat as na ol man i ken bilip tru long dispela tok, na ating dispela i kirapim tingting bilong sampela man. Taim Jehova i kirapim bek Jisas, Em i mekim nambawan bikpela mirakel. Em i kirapim bek Pikinini bilong em olsem wanpela strongpela spirit. (1 Pita 3:18) Taim Jisas i kirap bek, em i gat bikpela namba na strong moa, winim taim em i no kam daun yet long graun. Jisas i no inap i dai na em i gat bikpela strong tru, Jehova tasol i winim em, na nau Jisas i redi long kisim wanpela gutpela wok tru long Papa bilong em. Long rot bilong Jisas, Jehova bai kirapim bek ol man—bilong kisim laip long heven o long graun. Jisas yet i bin tok: “Kirap bek, em mi yet. Na laip, em mi yet.” (Jon 5:25; 11:25) Long rot bilong kirapim bek Pikinini bilong em, Jehova i stretim rot na olgeta man i stap gut long em ol i ken bilip na wet long kirap bek.
9. Olsem wanem ol stori bilong Baibel i kamapim klia olsem kirap bek em i samting tru?
9 Planti man i bin lukim ol man i kirap bek na stori bilong ol i stap long Baibel. Baibel i stori gut long 8-pela man i bin kirap bek na i stap laip gen long graun. Ol dispela mirakel i no bin kamap long ples hait, nogat, ol i bin kamap long ples klia na planti taim long ai bilong ol man. Lasarus i bin stap long matmat inap 4-pela de, na Jisas i kirapim em bek long ai bilong ol man i krai sori—ating famili, ol pren, na neiba bilong Lasarus i stap namel long ol. Dispela samting i kamapim klia tru olsem God i bin salim Jisas i kam, na i no gat wanpela taim we ol bikman bilong lotu husat i birua long Jisas, ol i tok dispela samting i no bin kamap. Olsem na ol i toktok long kilim i dai Jisas na Lasarus tu! (Jon 11:17-44, 53; 12:9-11) Tru tumas, yumi ken bilip tru olsem ol man bai kirap bek. God i bin kamapim ol stori bilong kirap bek bambai dispela i ken mekim gut bel bilong yumi na strongim bilip bilong yumi.
Bilip Long Kirap Bek i Mekim Gut Bel Bilong Yumi
10. Yumi mas mekim wanem na bai ol stori bilong Baibel long kirap bek i ken mekim gut bel bilong yumi?
10 Olsem wanem? Taim dai i laik painim yu o wanpela long famili, yu laik bai i gat samting bilong mekim gut bel bilong yu? Wanpela samting i ken mekim gut bel bilong yu, em ol stori bilong Baibel long ol man i bin kirap bek. Taim yu ritim ol dispela stori, tingim tingim long bel, na piksaim long tingting ol dispela stori, dispela inap helpim yu long bilip moa long kirap bek. (Rom 15:4) Ol dispela stori i no stori nating tasol. Ol dispela samting i bin painim ol man i bin stap tru tru olsem yumi. Yumi ken stori liklik long wanpela stori olsem—em namba wan kirap bek Baibel i stori long en.
11, 12. (a) Wanem bikpela hevi i painim meri wanpis bilong Sarefat? Pastaim em i mekim wanem? (b) Stori long samting Jehova i strongim Elaija long mekim bilong helpim meri wanpis.
11 Piksaim long tingting ol samting i kamap. Inap sampela wik pinis, profet Elaija i bin slip long wanpela rum antap long haus bilong wanpela meri Sarefat, em man bilong em i dai pinis. Em i taim nogut. Dispela ples i sot tru long wara na kaikai. Planti ol i wok long i dai. Jehova i bin mekim wok long Elaija bilong givim gutpela pe long dispela meri wanpis i gat strongpela bilip, na Elaija i wokim wanpela mirakel i helpim dispela meri inap longpela taim. Meri hia na pikinini man bilong em i stap hangre, kaikai bilong ol i laik pinis olgeta, na nau God i givim strong long Elaija long wokim mirakel na bai plaua na wel bilong meri i no pinis. Tasol bikpela hevi i painim em. Wantu pikinini man i kisim sik, na i no longtaim na em i no pulim win moa. Bel bilong meri hia i bagarap stret! Laip bilong meri i gat hatwok, long wanem, man bilong em i no stap moa bilong helpim na strongim em, na nau dispela wanpela pikinini bilong em i dai. Em i bel hevi tru na em i sutim tok long Elaija na God bilong em, Jehova! Orait, profet bai mekim wanem?
12 Elaija i no stretim meri wanpis long tok em i sutim. Nogat. Em i tok: “Givim pikinini long mi.” Elaija i karim pikinini i dai pinis i go antap long rum bilong em, na em i beten askim Jehova planti taim long putim laip bilong pikinini i go bek long em. Bihain, Jehova i mekim olsem! Tingim bikpela amamas i kamap long pes bilong Elaija taim em i lukim bros bilong pikinini i go antap taim em i pulim win. Pikinini i opim ai, na ai bilong em i lait. Elaija i bringim pikinini i go long mama bilong em na i tok: “Lukim. Pikinini bilong yu i stap gut.” Mama i amamas nogut tru. Em i tok: “Tru tumas, nau mi save, yu man bilong mekim wok bilong God. Na tru tumas, Bikpela yet i save givim tok long yu na yu save autim.” (1 King 17:8-24) Bilip bilong em long Jehova na wokman bilong em i kamap strong moa.
13. Bilong wanem stori bilong Elaija i kirapim bek pikinini bilong meri wanpis i mekim gut bel bilong yumi long nau?
13 Pasin bilong tingim tingim long bel dispela stori inap mekim gut bel bilong yu. Em i klia tru olsem Jehova inap daunim indai, dispela birua bilong yumi! Tingim taim we planti tausen manmeri bilong graun bai i kisim wankain amamas olsem dispela meri wanpis taim ol man i kirap bek! Long heven tu ol bai amamas taim Jehova i stiaim Pikinini bilong em long kirapim bek ol man long olgeta hap bilong graun. (Jon 5:28, 29) Olsem wanem? Wanpela long famili bilong yu i dai pinis? Yumi amamas tru long save olsem Jehova inap kirapim bek ol man i dai pinis na em bai mekim olsem!
Samting Yu Wetim na Pasin Yu Bihainim Long Nau
14. Bilip bilong yu long kirap bek inap mekim wanem long i stap bilong yu?
14 Bilip bilong yu long kirap bek inap mekim wanem long i stap bilong yu long nau? Dispela bilip inap strongim yu taim ol hevi i painim yu, taim ol man i birua long yu, o bagarap i laik painim yu. Satan i laik bai yu pret nogut tru long i dai na bilong yu ken abrusim indai yu bai orait long lusim pasin bilong bihainim stretpela pasin. Tingim, Satan i tokim Jehova olsem: “[Man] inap givim olgeta samting bilong en bilong baim bek laip bilong en.” (Jop 2:4) Taim Satan i mekim kain tok olsem, em i sutim tok giaman long yumi olgeta. Olsem wanem? Bai yu lusim wok bilong God sapos bagarap i laik painim yu? Pasin bilong tingim tingim kirap bek bai strongim yu long wok yet long mekim laik bilong Papa bilong yu long heven.
15. Olsem wanem tok bilong Jisas long Matyu 10:28 (NW) inap mekim gut bel bilong yumi taim bagarap i laik painim yumi?
15 Jisas i tok: “Yupela i no ken pret long ol man husat inap kilim i dai bodi, tasol ol i no inap pinisim laip, nogat. Yupela i mas pret long man em inap bagarapim laip na bodi wantaim long Gehena.” (Matyu 10:28, NW) Yumi no gat wok long pret nogut tru long Satan o ol lain bilong em long graun. Tru, sampela i gat strong long bagarapim yumi, na ol inap kilim yumi i dai tu. Tasol ol samting nogut ol inap mekim long yumi i bagarapim yumi inap liklik taim tasol. Jehova i gat strong long stretim olgeta samting nogut i painim ol gutpela wokboi bilong em na em inap kirapim bek ol, na em bai mekim olsem. Yumi mas pret long Jehova wanpela tasol, yumi mas givim ona na rispek tru long em. Em wanpela tasol i gat strong long tekewe laip bilong man long nau na laip man inap kisim long bihain, na em inap bagarapim laip na bodi tu long Gehena. Tasol gutpela tru, Jehova i no laik bai kain samting olsem i painim yu. (2 Pita 3:9) Kirap bek i mekim na yumi ol wokboi bilong God i ken bilip tru olsem bai yumi stap gut. Sapos yumi stap gut long God, bai yumi kisim laip oltaim, na Satan na ol lain bilong em i no inap mekim wanpela samting long dispela.—Song 118:6; Hibru 13:6.
16. Olsem wanem tingting bilong yumi long kirap bek i stiaim yumi taim yumi makim ol samting i bikpela samting?
16 Sapos yumi bilip tru long kirap bek, dispela inap stretim tingting bilong yumi long laip. Yumi save olsem ‘sapos yumi stap laip o sapos yumi dai, em i samting bilong Bikpela.’ (Rom 14:7, 8) Olsem na taim yumi makim ol samting i bikpela samting, yumi bihainim tok bilong Pol: “Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.” (Rom 12:2) Planti man i bisi tru long inapim olgeta kain laik bilong ol. Ol i ting laip bilong yumi man i sotpela, olsem na ol i wok strong long painim amamas, na sapos ol i lotu, ol i no lotu long “pasin God i laikim.”
17, 18. (a) Baibel i tok wanem bilong soim olsem laip bilong yumi man i sotpela? God i gat wanem laik long yumi? (b) Bilong wanem yumi laik litimapim nem bilong Jehova long olgeta de?
17 Tru tumas, laip bilong yumi man i sotpela. Ating yumi stap inap 70 o 80 yia, na “dispela olgeta yia i pinis kwiktaim, na [yumi] tu i go pinis.” (Song 90:10) Ol manmeri i save kamap na i go pinis, olsem grinpela gras, olsem sedo i save lus kwiktaim, o olsem win man i winim long maus. (Song 103:15; 144:3, 4) Tasol em i no laik bilong God long yumi lusim sampela yia bilong kamap bikpela na kisim save, na bihain long dispela, bodi bilong yumi i wok long bagarap na yumi kisim sik na yumi dai. Taim Jehova i wokim ol man em i givim laik bilong i stap oltaim long ol. Baibel i tok: “Em i putim tingting bilong laip i stap oltaim long bel bilong ol man.” (Saveman 3:11, NW) Yu ting God em i man nogut na em i putim dispela kain laik long bel bilong man, tasol em i no opim rot bilong man i ken inapim dispela laik? Nogat, long wanem, “God yet em i as bilong dispela pasin bilong laikim ol arapela.” (1 Jon 4:8) Em bai kirapim bek ol man i dai pinis na bai ol i gat rot bilong kisim laip oltaim.
18 Kirap bek i mekim na yumi inap i stap gut long bihain. I gat planti samting yumi inap mekim long laip bilong yumi, tasol yumi no ken hariap hariap na traim long inapim olgeta dispela samting long nau. Yumi no laik mekim ‘wok long ol samting bilong dispela graun’ em klostu nau bai pinis. (1 Korin 7:29-31; 1 Jon 2:17) Yumi no olsem ol man i no gat gutpela samting bilong wet long en, nogat, yumi gat gutpela presen tru. Yumi save sapos yumi stap gut long God Jehova, yumi inap litimapim nem bilong em inap oltaim oltaim na stap laip. Olsem na long olgeta de yumi mas litimapim nem bilong Jehova, husat i stretim rot bilong kirapim bek ol man i dai pinis!
Bai Yu Bekim Olsem Wanem?
• Yumi mas ting olsem wanem long kirap bek?
• Wanem samting i mekim na yumi ken bilip tru long kirap bek?
• Olsem wanem bilip bilong kirap bek inap mekim gut bel bilong yu?
• Bilip bilong yu long kirap bek inap mekim wanem long i stap bilong yu?
[Piksa long pes 28]
Jop i save Jehova i gat bikpela laik long kirapim bek ol stretpela man
[Piksa long pes 29]
“Lukim. Pikinini bilong yu i stap gut”