Kirap Bek—Wanpela Bilip Yu Mas Tingim
“Mi bilip na mi wet long God bai i kirapim bek ol man i dai pinis, em ol stretpela man na ol man nogut wantaim.”—APOSEL 24:15.
1. Olsem wanem dispela bilip long kirap bek i kamap wanpela bikpela tok pait namel long ol kaunsil?
LONG 56 C.E., long pinis bilong namba 3 raun bilong em long autim gutnius, aposel Pol i stap long Jerusalem. Ol soldia bilong Rom i holim em, na bihain ol i larim em i kamap long ol kaunsil bilong ol Juda. (Aposel 22:29, 30) Pol i lukluk raun long ol kaunsil bilong kot, na em i lukim olsem sampela i bilong lain Sadyusi na sampela i bilong lain Farisi. I gat wanpela bikpela samting dispela tupela lain i no wanbel long en. Ol Sadyusi i no bilip olsem ol man i dai pinis bai kirap bek; tasol ol Farisi i bilip long kirap bek. Pol i laik kamapim bilip bilong em long dispela samting, olsem na em i tokaut long ol olsem: “Ol brata, mi man bilong lain Farisi, na mi pikinini bilong ol Farisi. Mi bilip olsem, ol man i dai pinis ol bai i kirap bek, na long dispela as tasol nau ol i kotim mi.” Em nau, tok pait i kamap namel long ol kaunsil na ol i wok long singaut bikmaus nabaut!—Aposel 23:6-9.
2. Bilong wanem Pol i redi long tokaut long bilip bilong em long kirap bek?
2 Planti yia paslain long dispela, Pol i bin wokabaut long rot i go long Damaskus na long piksa olsem driman em i harim nek bilong Jisas. Pol i askim Jisas: “Bikpela, bai mi mekim wanem nau?” Jisas i tok: “Yu kirap na yu go insait long taun Damaskus. Na long dispela hap wanpela man bai i tokim yu long olgeta wok mi bin makim bilong yu.” Orait taim Pol i kamap long Damaskus, wanpela disaipel Kristen, Ananaias, i painim em na i tokim em: “God bilong ol tumbuna bilong yumi em i bin makim yu bai yu ken save long laik bilong em, na yu ken lukim dispela Man bilong mekim stretpela pasin [em Jisas taim em i kirap bek pinis] na yu ken harim tok em i mekim long maus bilong em yet.” (Aposel 22:6-16) Ol dispela samting i mekim na nau Pol i redi long tokaut long bilip bilong em long ol man bai kirap bek long matmat.—1 Pita 3:15.
Em i Tokaut Long Kirap Bek
3, 4. Olsem wanem Pol i kamapim olsem em i strong long sambai long tok bilong kirap bek? Pasin bilong em inap lainim yumi long wanem samting?
3 Bihain Pol i sanap long ai bilong Gavena Feliks. Long dispela taim Tertulus, wanpela “saveman” i helpim ol Juda i kotim Pol, em i sutim tok long Pol olsem em i lida bilong wanpela narakain lain na em i biruaim gavman. Pol i bekim tok long em olsem: “Tok i tru, em i olsem. Mi save bihainim dispela Rot ol i kolim ‘narakain lain.’ Mi bihainim dispela Rot na mi lotu yet long God bilong ol tumbuna bilong mipela.” Orait nau Pol i laik autim nambawan bikpela tok bilong em na em i tok moa: “Mi bilip na mi wet long God bai i kirapim bek ol man i dai pinis, em ol stretpela man na ol man nogut wantaim.”—Aposel 23:23, 24; 24:1-8, 14, 15.
4 Tupela yia samting bihain, man bilong kisim ples bilong Feliks, em Porsius Festus, i singautim King Herot Agripa i kam helpim em long sutim ol askim long kalabusman Pol. Festus i tok, ol man i bin sutim tok long Pol ol i tok pait wantaim Pol long tok bilong em “long wanpela man i dai pinis, nem bilong en Jisas . . . [em] i stap laip.” Long kot Pol i askim olsem: “Bilong wanem yupela sampela man i ting, yumi no ken bilip long God bai i kirapim bek ol man i dai pinis?” Orait nau em i tokaut: “God i bin helpim mi na mi stap gut i kam inap long nau. Olsem na nau mi sanap hia, na mi autim tok long olgeta man nating na long olgeta bikman wantaim. Mi no autim narapela tok. Mi autim dispela tok tasol bipo ol profet na Moses tu ol i bin tok long en. Ol i bin tok olsem, ‘Dispela man God i makim bilong kisim bek ol manmeri bilong en, em i mas karim pen, na bihain bai em i kamap namba wan man bilong kirap long matmat. Na em bai i autim tok bilong lait bilong God long ol Israel na long ol arapela lain tu.’ ” (Aposel 24:27; 25:13-22; 26:8, 22, 23) Tru tumas, Pol i strong tru long sambai long dispela bilip bilong kirap bek! Olsem Pol, yumi tu inap bilip strong na tokaut olsem bihain ol man i dai pinis bai kirap bek. Tasol ol man bai ting olsem wanem long dispela tok? Ating ol bai i gat wankain tingting olsem ol man em Pol i bin autim dispela tok long ol.
5, 6. (a) Ol aposel i autim tok long kirap bek na dispela i kirapim ol man long mekim wanem? (b) Taim yumi tokaut long bilip bilong yumi long kirap bek, wanem samting i bikpela samting?
5 Yumi ken tingim samting i kamap paslain long dispela, long namba tu raun bilong Pol (olsem long 49-52 C.E.) taim em i go long Atens. Em i toktok wantaim ol man i bilip long planti god, na em i tokim ol olsem God i tingting pinis long skelim pasin bilong ol man long stretpela kot, long rot bilong wanpela man Em i bin makim. Dispela man em Jisas. Pol i tok God i bin kirapim bek Jisas na long dispela as yumi ken bilip tru long God i bin givim dispela wok long em. Orait ol man i harim dispela tok na ol i mekim wanem? Baibel i tok: “Sampela i tok bilas long Pol. Na sampela i tok, ‘Mipela i laik harim yu i toktok gen long dispela samting.’ ”—Aposel 17:29-32.
6 Dispela i wankain olsem samting i bin painim Pita na Jon bihain liklik long Pentikos 33 C.E. Long dispela taim tu ol Sadyusi i insait tru long tok pait bilong dispela samting. Aposel 4:1-4 i stori long samting i bin kamap: “Pita wantaim Jon i toktok yet long ol manmeri, na ol pris na ol Sadyusi wantaim kepten bilong ol man i save was long tempel, ol i kamap. Ol i save, tupela i autim tok long ol manmeri olsem, Jisas i kirap pinis long matmat, . . . Olsem na ol i gat bikpela kros long tupela.” Tasol sampela i laikim dispela tok. “Planti manmeri i harim tok pinis na ol i bilip long Jisas. Na namba bilong ol manmeri i bilip long en i go inap olsem 5,000.” Em nau, taim yumi autim tok long kirap bek, yumi ken ting sampela bai i laikim dispela tok na sampela nogat. Olsem na em i bikpela samting long yumi mas strongim bilip bilong yumi long dispela tok bilong Baibel.
Bilip na Kirap Bek
7, 8. (a) Olsem yumi lukim long wanpela pas i go long kongrigesen Korin, olsem wanem bilip i ken kamap olsem samting nating? (b) Olsem wanem stretpela save long bilip bilong kirap bek em i mekim na ol Kristen tru i stap narapela kain?
7 Ol man i kamap Kristen long taim bilong ol aposel, i no olgeta i bilip kwik long tok bilong kirap bek. Sampela insait long kongrigesen Korin ol i hatwok long bilip long en. Pol i raitim pas long ol olsem: “Bikpela tok tru mi bin givim long yupela, em dispela tok mi yet mi bin kisim bipo. Em i olsem. Krais i bin i dai bilong rausim olgeta sin bilong yumi, olsem tok i stap long buk bilong God. Na ol i putim em long matmat, na long de namba 3 em i kirap bek, olsem tok i stap long buk bilong God.” Na bilong strongim dispela tok i tru, Pol i tok, taim Krais i kirap bek pinis “planti brata wantaim i lukim em, namba bilong ol i winim 500,” na Pol i tok planti bilong ol dispela brata i stap yet. (1 Korin 15:3-8) Na Pol i tok moa olsem: “Mipela i save autim tok long Krais i bin i dai na God i kirapim em bek. Na bilong wanem sampela namel long yupela i save tok olsem, ‘Man i dai pinis, em i no inap kirap bek’? Sapos i tru ol man i dai pinis, ol i no inap kirap bek, orait yumi mas tok olsem, ‘God i no bin kirapim Krais.’ Na sapos i tru God i no bin kirapim Krais, orait dispela tok mipela i save autim, em i samting nating, na bilip bilong yupela em tu i samting nating.”—1 Korin 15:12-14.
8 Tru tumas, dispela tok bilong kirap bek em i wanpela as bilip bilong yumi, olsem na sapos yumi no bilip long kirap bek, orait bilip Kristen bilong yumi i samting nating tasol. Stretpela save long dispela bilip bilong kirap bek em i mekim na ol Kristen tru i stap narapela kain long ol Kristen giaman. (Stat 3:4; Esekiel 18:4) Olsem na Pol i bungim tok bilong kirap bek wantaim “ol skul yumi save kisim pastaim” long lotu Kristen. Em nau, yumi mas strong long “kisim olkain skul bilong ol man i bikpela pinis.” Na Pol i tok, “Sapos God i orait long yumi mekim olsem, orait bai yumi mekim.”—Hibru 6:1-3.
Bilip Bilong Kirap Bek
9, 10. Wanem insait bilong tok bilong Baibel long kirap bek?
9 Bilong strongim moa bilip bilong yumi long kirap bek, yumi ken kamapim gen ol askim olsem: Wanem insait bilong tok bilong Baibel long kirap bek? Dispela tok olsem ol man i dai pinis bai kirap bek, olsem wanem em i kamapim klia pasin laikim bilong Jehova? Bekim bilong ol dispela askim bai helpim yumi long i go klostu moa long God, na tu, em i helpim yumi long skulim ol narapela man long dispela tok.—2 Timoti 2:2; Jems 4:8.
10 Dispela tok “kirap bek,” insait bilong en long tok Grik i olsem “kirap sanap gen.” Wanem samting i insait long dispela tok? Long Baibel, dispela bilip long kirap bek i olsem man i bilip tru olsem man i dai pinis em inap i stap laip gen. Baibel i soim yumi tu olsem ol man bilong kisim laip long graun ol bai i kisim bodi bilong graun, o ol bai kisim bodi spirit sapos ol i bilong kisim laip long heven. Yumi kirap nogut tru long bikpela pasin laikim na savetingting na bikpela strong bilong Jehova i kamap ples klia long dispela gutpela samting tru yumi wet long en, olsem ol man i dai pinis bai kirap bek.
11. Ol man God i makim pinis, kirap bek bilong ol bai i olsem wanem?
11 Jisas na ol brata bilong em, em God i bin makim ol long holi spirit, ol i kisim bodi spirit taim ol i kirap bek, na dispela inapim ol long mekim wok bilong ol long heven. (1 Korin 15:35-38, 42-53) Ol bai i wok wantaim olsem ol king bilong Kingdom i stap long han bilong Mesaia, em bai kamapim Paradais long graun. Jisas em i Hetpris na dispela lain God i bin makim ol i wok aninit long em olsem lain pris i stap king. Ol bai mekim wok long ofa bilong Krais bilong helpim ol man i stap long nupela taim i gat stretpela pasin tasol long en. (Hibru 7:25, 26; 9:24; 1 Pita 2:9; KTH 22:1, 2) Tasol long nau, ol manmeri bilong dispela lain God i bin makim na ol i stap yet long graun, ol i laik i stap gut long God na bai em i orait yet long ol. Taim ol i dai pinis ol bai kisim “pe” bilong ol long rot bilong kirap bek na kisim laip long heven olsem spirit i no inap i dai. (2 Korin 5:1-3, 6-8, 10; 1 Korin 15:51, 52; KTH 14:13) Pol i tok: “Yumi pas wantaim Krais na yumi . . . dai olsem em i bin i dai. Olsem tasol bai yumi pas wantaim em na kirap bek tu olsem em i bin kirap.” (Rom 6:5) Tasol olsem wanem long ol lain i wet long kisim laip i stap long graun olsem ol manmeri bilong graun? Olsem wanem bilip bilong kirap bek inap helpim ol long i go klostu moa long God? Pasin bilong Abraham inap skulim gut yumi.
Kirap Bek na Stap Pren Wantaim Jehova
12, 13. Wanem as na Abraham i gat strongpela bilip long kirap bek?
12 Abraham em wanpela man i gat strongpela bilip tru, na Jehova i bin kolim em olsem “Pren bilong mi.” (Jems 2:23) Long lista bilong ol bilipman na bilipmeri i stap long Buk Hibru sapta 11, Pol i stori 3-pela taim long bilip bilong Abraham. (Hibru 11:8, 9, 17) Long namba 3 taim Pol i stori long strongpela bilip Abraham i kamapim taim em i bihainim tok bilong God na em i redi long kilim pikinini bilong em Aisak olsem ofa. Abraham i bilip tru olsem Jehova bai truim tok promis bilong em long wanpela pikinini bai kamap long rot bilong Aisak. Maski Aisak bai i dai olsem wanpela ofa, Abraham i “tingting olsem, ‘Sapos Aisak i dai, maski, God em inap long kirapim em bek.’ ”
13 Orait taim Jehova i lukim strongpela bilip bilong Abraham, Jehova i wokim rot na Abraham i kilim wanpela animal na mekim ofa long en, olsem senis bilong Aisak. Tasol dispela samting i bin painim Aisak i stap olsem piksa bilong kirap bek long matmat, olsem Pol i tok: “Tru tumas, yumi inap tok bokis long dispela samting i bin kamap na tok olsem, Abraham i kisim bek pikinini bilong en long matmat.” (Hibru 11:19) Na tu, longtaim pinis bilip bilong Abraham long kirap bek i gat as tru bilong en. Tingim samting Jehova i bin mekim: Em i bin kirapim bek strong bilong Abraham long kamapim pikinini taim em wantaim meri bilong em Sara i lapun pinis, na tupela i slip wantaim na kamapim pikinini man bilong tupela, em Aisak.—Stat 18:10-14; 21:1-3; Rom 4:19-21.
14. (a) Olsem Hibru 11:9, 10 i tok, Abraham i wetim wanem samting? (b) Bilong kisim ol gutpela samting bilong Kingdom long nupela taim, wanem samting i mas painim Abraham long bihain? (c) Olsem wanem yumi ken kisim ol gutpela samting bilong Kingdom?
14 Pol i stori long Abraham na i tok em i stap olsem man bilong narapela kantri na man bilong sindaun long haus sel na i “wet long lukim dispela taun i stap strong tru, em dispela taun God wanpela tasol i bin . . . wokim.” (Hibru 11:9, 10) Dispela i no wanpela taun tru tru olsem Jerusalem, em tempel bilong God i stap long en, nogat. Dispela taun em i tok piksa na i makim Kingdom Bilong God long heven, em Krais Jisas na lain 144,000 i stap king long en. Dispela 144,000 i kisim biknem long heven, Baibel i kolim ol tu olsem “taun bilong God, em nupela Jerusalem,” em “meri” bilong Krais. (KTH 21:2) Long 1914, Jehova i putim Jisas long sia king olsem King Mesaia bilong Kingdom bilong heven na i tokim em long mekim wok king namel long ol birua bilong em. (Song 110:1, 2; KTH 11:15) Bilong kisim ol gutpela samting bilong Kingdom, Abraham, em ‘pren’ bilong Jehova, em i mas i stap laip gen. Na olsem tasol, bilong yumi ken kisim ol gutpela samting bilong Kingdom, yumi tu i mas i stap laip long nupela taim God bai kamapim—olsem yumi insait long bikpela lain manmeri ol i abrusim bagarap long Armagedon o yumi bilong dispela lain i kirap bek long matmat. (KTH 7:9, 14) Tasol i gat wanem as na yumi ken bilip olsem ol man i dai pinis bai kirap bek?
Pasin Laikim Bilong God—Em As Bilong Bilip Long Kirap Bek
15, 16. (a) Olsem wanem namba wan tok profet long Baibel i as bilong bilip bilong yumi long kirap bek? (b) Olsem wanem bilip bilong yumi long kirap bek em inap helpim yumi long i go klostu moa long Jehova?
15 Pasin bilong yumi long pas gut wantaim gutpela Papa bilong yumi long heven, na strongpela bilip bilong yumi olsem bilong Abraham, na pasin bilong yumi long bihainim tok bilong God, ol dispela samting i mekim na God i kolim yumi stretpela man na em i tingim yumi olsem pren bilong em. Em nau, yumi gat rot long kisim ol gutpela samting taim Kingdom i bosim graun. Namba wan tok profet long Baibel, long Stat 3:15, i as na yumi ken bilip long kirap bek na kamap pren bilong God. Dispela skripsa i tok profet long Pikinini bilong meri bilong God bai krungutim het bilong Satan, na Satan bai i kaikaim lek bilong em. Taim Jisas i dai long pos, i olsem Satan i kaikaim lek bilong em. Taim em i kirap bek long namba 3 de, dispela i oraitim em gen na i givim rot long em long kirap na bagarapim “Satan, em dispela man i gat strong bilong mekim ol manmeri i dai.”—Hibru 2:14.
16 Pol i tok: “Yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet.” (Rom 5:8) Pasin bilong tenkyu tru long dispela samting God i bin mekim bai helpim yumi long i go klostu moa yet long Jisas na gutpela Papa bilong yumi long heven.—2 Korin 5:14, 15.
17. (a) Jop i bilip na wetim wanem samting? (b) Jop 14:15 i kamapim klia wanem pasin bilong Jehova? Yu pilim olsem wanem long dispela?
17 Jop, em wanpela gutpela man i bin i stap paslain long taim bilong ol Kristen, em tu i bilip na wetim taim bilong kirap bek. Em i bin kisim bikpela pen na hevi long han bilong Satan. Ol pren giaman bilong Jop ol i no toktok liklik long kirap bek, tasol dispela bilip i mekim gut bel bilong Jop na em i askim olsem: “Sapos wanpela man i dai, em inap kisim laip gen?” Jop yet i bekim na i tok: “Bai mi wet i stap inap long taim yu makim bilong mi i stap long dispela ples, em i pinis.” Em i tokaut long God bilong em Jehova olsem: “Bai yu singautim mi na bai mi lusim dispela ples.” Jop i tingim pasin sori bilong God na em i tok: “Long dispela taim bai yu ting long yu yet yu bin wokim mi, na bai yu laikim tumas bai mi stap klostu long yu gen.” (Jop 14:13-15; NW ) Tru tumas, Jehova i amamas tru long wetim taim bilong ol gutpela man bai kirap bek na kisim laip gen. Man! Taim yumi tingim pasin laikim na gutpela pasin Jehova i mekim long yumi maski yumi sinman tasol, yumi laik i go klostu moa long em!—Rom 5:21; Jems 4:8.
18, 19. (a) I gat wanem rot bilong Daniel long i stap laip gen? (b) Long stadi i kamap bihain long dispela, bai yumi toktok gen long wanem samting?
18 Yumi tingim profet Daniel, em ensel bilong God i bin tokim em, “God i laikim yu tumas.” Daniel i bin stap gut long mekim wok bilong God inap planti yia. (Daniel 10:11, 19) Em i bin bihainim stret ol tok bilong Jehova kirap long taim ol i kisim em i go olsem kalabus long narapela kantri long 617 B.C.E. na i go inap long taim em i dai, bihain long taim em i bin lukim piksa olsem driman long 536 B.C.E., em namba 3 yia bilong Sairus i stap king bilong Persia. (Daniel 1:1; 10:1) Insait long dispela namba 3 yia bilong Sairus, Daniel i lukim piksa olsem driman na em i lukim ol bikpela gavman bilong bosim graun, wanpela i kamap i go pinis na narapela i kamap, i go inap long taim bilong bikpela hevi tru bai kamap bihain. (Daniel 11:1–12:13) Daniel i no kisim gut as bilong dispela driman, olsem na em i askim ensel i bin givim dispela tok long em: “Bikman, ol dispela samting bai i pinis olsem wanem?” Orait ensel i tokim em long taim bilong “las de,” long dispela taim “ol . . . manmeri i gat gutpela save na tingting, ol tasol bai i save long as bilong ol dispela samting.” Na olsem wanem long Daniel yet long bihain? Ensel i tok: “Bai yu dai, tasol bihain bai yu kirap bek na long las de bai yu kisim ol samting God i bin makim bilong yu.” (Daniel 12:8-10, 13) Daniel bai i stap laip gen “long taim ol stretpela man i kirap bek long matmat,” long Taim Bilong Wan Tausen Yia Bilong Krais i Stap King.—Luk 14:14.
19 Nau yumi stap klostu long pinis bilong taim bilong las de na klostu long kirap bilong Wan Tausen Yia Bilong Krais i Stap King—em i klostu moa long taim yumi bin kamap bilipman. Olsem na yumi mas askim yumi yet: ‘Bai mi stap long nupela taim na mi inap bung wantaim Abraham, Jop, Daniel, na ol narapela man na meri i bin stap gut long God?’ Bai yumi inap mekim olsem sapos yumi stap klostu long Jehova na bihainim ol tok bilong em. Long stadi i kamap bihain long dispela, bai yumi toktok gen long bilip bilong yumi long kirap bek, na bai yumi inap save husat bai i kirap bek.
Yu Inap Tingim?
• Taim Pol i kamapim bilip bilong em long kirap bek, ol man i harim ol i mekim wanem?
• Olsem wanem na bilip bilong kirap bek i makim ol Kristen tru i stap narapela kain long ol Kristen giaman?
• Olsem wanem yumi save olsem Abraham, Jop, na Daniel i bilip olsem ol man i dai pinis bai kirap bek?
[Piksa long pes 8]
Pol i sanap long ai bilong Gavena Feliks na i tokaut strong long bilip bilong em long kirap bek
[Piksa long pes 10]
I gat wanem as na Abraham i bilip long kirap bek?
[Piksa long pes 12]
Jop i bilip long kirap bek, na dispela i strongim bel bilong em
[Piksa long pes 12]
Daniel bai i stap laip gen long taim ol stretpela man i kirap bek long matmat