Baptais! Baptais! Baptais!—Bilong Wanem?
WANPELA misineri Jesuit (Francis Xavier) i bin wok long hap bilong Travanko long India, em i tok: “Insait long sampela mun tasol mi bin baptaisim inap 10 tausen man meri pikinini. Mi bin go long ol liklik ples na olgeta i kamap Kristen. Long olgeta hap mi go long en, mi bin lusim buk bilong ol beten bilong yumi na ol lo bilong yumi long tok ples bilong ol.”
King Jon bilong Potyugal, em i amamas long kaunim ol pas bilong dispela misineri Jesuit, olsem na em i putim lo olsem olgeta haus lotu long kantri bilong em i mas kaunim bikmaus ol dispela pas. Pas yumi stori pinis long en, em bilong Janueri 1545 na ol i bin kamapim long ol nius samting. Taim ol nius i kamapim dispela pas, wanem samting i kamap? Wanpela man (Manfred Barthel) long buk bilong em (The Jesuits—History & Legend of the Society of Jesus) em i tok: ‘Planti sumatin bilong lain Jesuit long hap bilong Yurop i beten na krai strong, long wanem, ol i laik tru long go long India bilong helpim ol haiden long kamap Kristen.’ Na em i tok moa: ‘Planti bilong ol dispela sumatin i no tingting gut olsem ol bai hatwok long helpim olgeta man long dispela hap long kamap Kristen, na i no olsem ol bai givim ol liklik nius samting na tromoi liklik wara holi long ol na em tasol.’
Wanem samting i kamap long dispela pasin bilong helpim planti man long lusim olpela bilip na kamap Kristen? Wanpela Jesuit, nem bilong em Nikolas Lanseloto, em i salim ripot long Rom na toksave olsem: ‘Planti bilong ol dispela man i kisim baptais ol i gat narapela kain tingting na ol i kisim baptais. Ol wokman bilong ol Arap na ol Hindu i ting sapos ol i baptais na kamap Kristen dispela bai helpim ol long kamap fri o helpim ol na ol birua i no ken bagarapim ol o ol i laik kisim ol nupela klos. Planti bilong ol i kamap Kristen long wanem ol i laik abrusim wanpela kain strafe. . . . Sapos wanpela i givim bel long lotu bilong yumi na i bilip olsem em rot bilong kisim laip, ol narapela i ting em i wanpela longlong man. Taim ol i baptais pinis, i no longtaim na planti bilong ol i lusim bilip na go bek long olpela lotu bilong ol.’
Long dispela taim ol man bilong Yurop i save raun long sip samting na painim ol nupela kantri, ol tu i laik helpim ol man haiden long tanim bel na baptais. Ol i tok Kristofa Kolambas i bin baptaisim ol “Indian” em i bin bungim namba wan taim long hap bilong Karibian. Wanpela buk (The Oxford Illustrated History of Christianity) i tok: ‘Namba wan lo bilong gavman Spen em long helpim ol man long ples long tanim bel na kisim baptais. Long yia 1599 samting Spen i bosim kantri i gat 7,000,000 Indian i stap long en na ol i gat nem Kristen. Pedro de Gante em wanblut bilong King Sals Namba 5, na em i bin wok wantaim ol misineri na em i bin tok em wantaim narapela man i bin baptaisim 14,000 man long wanpela de tasol. Yumi save ol dispela man i no bin lain gut long wanpela samting bilong lotu pastaim na bihain ol i baptais.’ Sampela ol i bin mekim hatpela pasin na pasin nogut long ol man bilong ples na subim ol long kamap Kristen.
Ol dispela misineri na ol man i save raun na painim ol nupela kantri ol i ting baptais em i bikpela samting, olsem na ol i strong long mekim ol dispela samting. Long yia 1439, Pop Yujenias Namba 4, em i kamapim wanpela lo long Kibung bilong Florens na em i tok: ‘Baptais holi em i namba wan samting bilong lotu, long wanem, dispela i save opim rot bilong i go insait long ol samting bilong spirit. Long rot bilong baptais yumi kamap wanlain bilong Krais na wanbel wantaim Lotu. Long rot bilong namba wan man yumi olgeta i kisim indai, olsem na sapos yumi no kamap nupela long wara na long Holi Spirit, yumi no inap kisim kingdom bilong Heven.’
Tasol ol tok pait i bin kamap long baptais, olsem baptais bilong husat i stret. Wanpela bikpela buk (The Encyclopedia of Religion) i tok: ‘Baptais em olsem wanpela bikpela pasin bilong lotu ol man i mas mekim bilong go insait long wanpela lotu, olsem na sampela lotu i tok lotu bilong ol yet tasol i stret na ol narapela i olsem lotu giaman.’
Paslain long taim bilong ol Kristen ol man i bin baptais. Bipo long Babilon na long Isip ol i bin baptaisim ol man long Wara Nail na ol i ting taim man i baptais long dispela wara em bai kisim strong na taim em i dai tewel bilong em bai stap laip oltaim na i no ken i dai moa. Ol Grik tu i gat wankain tingting. Wanpela lotu bilong ol Juda (Qumran) i save baptaisim ol man taim ol i laik kam insait long lotu bilong ol. Ol man bilong narapela lain em ol i laik insait long lotu Juda, ol i mas katim skin bilong ol na 7-pela de bihain ol i mas baptais, olsem go insait long wara, long ai bilong sampela man.
Olsem na yumi save, bipo na i kam inap long nau planti man i ting baptais i bikpela samting. Tasol olsem wanem long nau? Man i mas kisim baptais? Sapos em i mas baptais, bilong wanem em i mas mekim olsem?