Olsem Wanem? Yu Mas Kisim Baptais?
LONG 3-pela yia i go pinis ol Witnes Bilong Jehova i bin baptaisim klostu wan milion manmeri. Olsem na long olgeta de 824 manmeri i bin kisim baptais. Olsem wanem? Pasin bilong ol dispela manmeri long kisim baptais i wankain long ol manmeri long yia 1400 na yia 1500 samting?
Nogat. I no gat wanpela man i bin subim dispela lain long nau long kisim baptais. Ol i no bihainim tingting bilong wanpela man na ol i baptais, nogat. Ol i kisim baptais, long wanem, Bikman bilong ol, em Jisas, em i tok ol i mas kisim baptais. Dispela lain i bin bihainim tok bilong Jisas, olsem ol aposel bilong em i bin mekim.
Bihain long Jisas i kirap bek na paslain long em i go antap long heven, em i tokim lain bilong em olsem: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. Harim. Mi save stap wantaim yupela olgeta de, i go inap long dispela taim i pinis.” (Matyu 28:19, 20) Kirap long dispela taim i kam inap long nau, dispela baptais, olsem go insait tru long wara, em dispela kain baptais tasol God i amamas long en.
Baibel i tokim yumi, dispela lain bilong bipo i save bihainim Krais, ol i kamap man bilong “autim tok bilong [Jisas] long Jerusalem, na . . . Judia, na long distrik Samaria, na i go inap long olgeta hap bilong graun.” (Aposel 1:8) Olsem Jisas i bin tok, wok bilong autim tok na lainim ol man, dispela bai helpim ol man i bilip na bai ol i kisim baptais na bihainim Krais.
Dispela samting i bin kamap long taim bilong Pentikos long Jerusalem long yia 33. Long dispela taim aposel Pita “i sanap wantaim ol 11-pela arapela aposel” na em i tokaut long bikpela lain manmeri olsem Jisas em i dispela man God i tok promis long salim i kam. Tok bilong Pita i bin ‘sutim bel bilong planti manmeri,’ na ol i askim Pita long ol i mas mekim wanem. Pita i tok: “Yupela olgeta wan wan i mas tanim bel na kisim baptais long nem bilong Jisas Krais, na God bai i lusim ol sin bilong yupela.” Olsem na “long dispela de samting olsem 3,000 manmeri i kam insait long lain bilong ol manmeri i bilip long Jisas.” (Aposel 2:14-41) Long ol narapela taim tu, Baibel i soim yumi, ol disaipel bilong Krais i harim gutnius bilong Krais pastaim, na bihain ol i bilip na tanim bel na kisim baptais.—Aposel 8:12, 13, 34-38; 10:34-48; 16:30-34; 18:5, 8; 19:1-5.
Wanem Kain Baptais i Stret?
Tasol ol dispela nupela disaipel i mas baptais olsem wanem? Wanpela pris i mas tromoi liklik wara long em? o kapsaitim liklik wara long het bilong em? o man i mas go insait tru long wara? Baibel i tok wanem long dispela samting? Jisas i soim yumi pinis pasin bilong em, bai yumi “i ken bihainim.” Olsem na yumi laik save, Jisas i kisim wanem kain baptais?
Baibel i tok, Jisas i bin kisim baptais long Wara Jordan. Dispela wara i bikpela liklik. Taim em i baptais pinis, em “i lusim wara na i kam antap.” (Mak 1:10; Matyu 3:13, 16) Olsem na yumi save, Jisas i bin go insait tru long Wara Jordan. Jon Bilong Baptais i bin baptaisim Jisas, na Jon i bin raun bilong painim gutpela ples bilong baptaisim ol manmeri. Em i bin makim wanpela hap klostu long Salim long ples daun bilong Jordan, long wanem, “planti wara i stap long dispela ples.” (Jon 3:23) Taim yumi skelim tok bilong wanpela man bilong Itiopia, yumi save taim lain bilong Jisas i baptaisim ol man, ol dispela man i go insait tru long wara. Dispela man bilong Itiopia em i amamas long harim tok Filip i autim long em, na em i tokim Filip: “Lukim, wara i stap. Ating wanpela samting i pasim rot na mi no inap kisim baptais?” Na Baibel i tok moa: “Filip wantaim dispela man i go daun long wara. . . . Na tupela i lusim wara na i kam antap.”—Aposel 8:36-39.
Orait, yumi laik save, taim ol Kristen bilong bipo i baptaisim ol man, ol man i save go insait tru long wara o nogat? Long sampela kantri ol i painim pinis ol bikpela hul bilong baptais i stap yet. Bikpela bilong ol dispela hul em inap long man i ken go insait tru long wara na kisim baptais. Wanpela buk (Ministry) i tok: ‘Ol samting ol lain bilong digim graun i painim i soim yumi, taim ol man, kirap long taim bilong ol aposel i go inap long yia 1300 samting i baptaisim ol man, ol man i save go insait tru long wara. Long ol pipia ston bilong ol haus Kristen samting na long ol haus lotu bilong bipo, em ol man i lotu yet long en, yumi ken save long pasin tru bilong ol Kristen long baptaisim ol man. Taim ol saveman i lukim ol olpela matmat, na ol olpela haus lotu, na sampela plua na banis na rup em ol man i bin wokim piksa long ol long ol liklik ston, ol i kisim save olsem, ol man i kisim baptais long bipo, ol i bin go insait tru long wara. Na tu, taim ol i lukim piksa long sampela olpela rait bilong Nupela Testamen, ol i save, bipo taim man i baptais, em i save go insait tru long wara.’
Wanpela bikpela buk (New Catholic Encyclopedia) i tok: ‘Yumi save, bipo taim man i baptais long misin, em i save go insait tru long wara.’ Olsem na yumi no kirap nogut taim yumi lukim sampela het-tok long ol nius olsem: ‘Ol Katolik i Kirap Baptaisim Ol Man Insait Long Wara,’ (The Edmonton Journal, bilong Kanada, Septemba 24, 1983), ‘Long Hia Ol Katolik i Amamas Long Baptaisim Ol Man Insait Long Wara,’ (St. Louis Post-Dispatch, Epril 7, 1985), ‘Planti Katolik i Laik Baptais Insait Long Wara,’ (The New York Times, Mas 25, 1989), na narapela i tok: ‘Ol i Wokim Gen Baptais Insait Long Wara,’ (The Houston Chronicle, Ogas 24, 1991).
Bilong Wanem Yumi Baptais?
Bilong wanem Jisas i tok lain bilong em i mas kisim baptais? Baptais i makim olsem ol Kristen i givim bel tru long God. Ol i mas autim “gutnius” long olgeta hap bilong graun, na mekim “olgeta lain manmeri” i kamap disaipel. (Matyu 24:14; 28:19) Olsem na yumi save God i no tingim moa lain Juda olsem em lain tru bilong em. Kornilius na famili bilong em ol i bilong narapela lain, ol i no bilong lain Juda, na ol i namba wan famili bilong narapela lain long kisim tok i tru long Jisas Krais na kisim baptais.
Taim ol man i go insait tru long wara, dispela i makim olsem ol i dai pinis long olpela pasin bilong ol, em pasin bilong tingim ol yet tasol. Taim ol i lusim wara na kam antap, dispela i makim olsem, nau ol i stap laip bilong mekim laik bilong God olsem Jisas i bin mekim, na dispela laik i olsem namba wan samting long laip bilong ol. (Matyu 16:24) Taim ol i baptais long “nem bilong Papa na bilong Pikinini na bilong Holi Spirit” dispela i makim olsem ol i bin lain pinis long wan wan na save ol i husat tru. (Matyu 28:19; lukim tu Aposel 13:48.) Baptais i namba wan samting ol i mekim bilong bihainim tok bilong God na daun long mekim laik bilong em.
Baibel i no kamapim bilip bilong sampela lotu olsem baptais em wanpela pasin lotu ol i kolim sakramen, na man i baptais em bai kamap holi, o baptais i ken helpim em long ol samting bilong spirit, nogat. Wanpela lo bilong Pop Yujenias Namba 4 i tok olsem long baptais: ‘Baptais i save pinisim ol sin, bipo na long nau, olsem na man i no ken kisim strafe long dispela ol sin. Olsem na man i baptais em i no ken kisim hevi long sin em i bin mekim bipo. Na sapos wanpela man i no mekim sin na em i dai, wantu em bai go long kingdom bilong heven na stap long ai bilong God.’
Jisas “i no bin mekim sin” tasol em i baptais. (1 Pita 2:22) Na Baibel i tok, God i save lusim tingting long ol sin bilong yumi long rot bilong ofa bilong Jisas Krais tasol. Ananaias i tokim Sol bilong Tarsus olsem: “Kirap na kisim baptais. Yu kolim nem bilong [Jisas], na em bai i wasim yu na rausim ol sin bilong yu.” (Aposel 22:12-16) Jisas i bin kapsaitim blut bilong em taim em i givim laip bilong em olsem ofa, olsem na long dispela rot God i kisim bek yumi. Na tu, yumi mas bilip na ‘kolim nem bilong Jisas.’—Hibru 9:22; 1 Jon 1:7.
Tasol olsem wanem long tok bilong Pita long 1 Pita 3:21? Em i tok: “Dispela wara em i olsem piksa bilong baptais, long wanem, God i save kisim bek yupela long wara bilong baptais. Baptais em i no bilong rausim doti bilong skin. Nogat. . . . Bilong kisim bek yupela, God i bin kirapim Jisas Krais long matmat.” Pita i tok baptais i wankain long samting i bin painim Noa long taim bilong Tait Wara, na God i kisim bek em. (Ves 20) Noa i bilip tru long God na em i wokim wanpela sip bilong lukautim em na famili bilong em. (Hibru 11:7) Olsem na sapos ol man i kamapim bilip bilong ol long God Jehova na long rot em i bin wokim bilong kisim bek ol man long ofa bilong Krais Jisas, ol inap kisim laip taim God i bagarapim ol lain nogut bilong nau. Tasol ol i no ken bilip nating, ol i mas kamapim bilip bilong ol. Ol i mas tanim bel na baut na lusim ol pasin nogut na dediketim laip bilong ol long God Jehova long rot bilong beten na askim God long ol i ken kisim stretpela bel. Jisas i bin givim laip bilong em olsem ofa na taim em i kirap bek em i givim pe bilong blut bilong em long God, olsem na long dispela rot tasol God i save lusim sin bilong ol man na kisim bek ol.—1 Pita 3:22.
Yu Bai Mekim Wanem?
Olsem wanem? Longpela taim liklik yu bin bung wantaim ol Witnes? Ating yu bin lusim ol pasin nogut olsem Baibel i makim, a? Tasol inap long nau yu no bin dediketim laip bilong yu na kisim baptais. Ating yu laik mekim laik bilong God, tasol yu pret olsem taim yu baptais yu mas mekim sampela samting moa. Olsem na ating yu laik abrusim sampela wok, a? Long 1992, klostu 11,500,000 manmeri i bin go long Kaikai Bilong Bikpela. Tasol 4,500,000 manmeri tasol i save mekim wok autim tok. Olsem na yumi save 7 milion samting manmeri i laikim tok i tru, tasol ol i no baptais olsem wanpela Witnes Bilong Jehova. Tru, sampela ol i yangpela, olsem pikinini samting, na sampela ol i nupela man long tok i tru, tasol sampela bilong ol dispela manmeri i autim tok, ol i no baptais yet. Planti manmeri i kisim save long tok i tru, tasol ol i no bin kisim baptais, em rot God i makim bilong kisim bek ol man.
Wanpela bikpela samting yumi mas tingim em olsem: Save yumi kisim pinis long ol samting God i laik yumi mekim, God bai skelim ol samting yumi mekim long dispela save yumi kisim pinis. Jems i tok: “Sapos yu save pinis long wanpela gutpela pasin yu mas mekim, tasol yu no mekim, orait yu mekim sin.” (Jems 4:17) Esekiel 33:7-9 i tok, sapos wanpela man i save long ol lo bilong God, orait em i mas bihainim. Olsem na sapos wanpela man i givim bel tru long God na em i laik tru long stap pren bilong God na God i ken orait long em, em i no ken pasim skin bilong em—em bai dediket long God. Na taim em i baptais, dispela i makim dediket bilong em. Sapos man i laik bai God i kisim bek em, em i mas kisim baptais. Ol man i bilip tru, ol i save kisim baptais.—Aposel 8:12.
Long nupela taim God bai givim planti gutpela samting long ol bilipman i dediket pinis long em. Dispela taim nogut nau i no gat wanpela gutpela samting tru bilong en. Taim yumi tingim strongpela han bilong God, i no gat wanpela man i ken pretim yumi. (1 Korin 10:22; 1 Pita 5:6, 7) Tru tumas, nau em i taim bilong askim skin bilong yumi yet olsem man Itiopia i bin askim Filip: “Ating wanpela samting i pasim rot na mi no inap kisim baptais?”
[Piksa long pes 7]
Olsem man Itiopia, yu save askim skin bilong yu yet olsem: “Ating wanpela samting i pasim rot na mi no inap kisim baptais?”