Jehova i Tingim Ol Sikman na Lapun

“LONG taim nogut” ol man i save painim hevi. (Song 37:​18, 19) Kain taim olsem i save bungim ol lapun i no gat strong. Sapos ol i gat bikpela sik, ol i bel hevi tru na ol i pilim olsem dispela sik i bosim tingting na pasin bilong ol, olsem karamapim ol olgeta.

Tasol gutpela tru, Jehova i tingim lain bilong em, na em i amamas long ol i givim bel yet long mekim wok bilong em na bihainim gutpela tingting, maski ol i lapun o sik o ol i gat ol narapela hevi. (2 Stori 16:9a; Sindaun 27:11) King Devit i tok: “Wanem ol manmeri i save bel tru na i singaut long em, em i save stap klostu long ol. . . . Em i save harim krai bilong ol na kisim bek ol.” Em i tingim ol na em i helpim ol na bai ol i no ken les long karim hevi bilong ol. (Song 145:​18, 19) Tasol olsem wanem long yumi? Yumi tu i tingim ol lapun olsem Jehova i save mekim?

Sik na lapun em wanpela samting i stap long nau na i save bagarapim ol man, na yumi mas karim dispela hevi i go inap long Jehova i kamapim laik bilong em long graun na long ol man. Long nau, planti man i save stap longpela taim, olsem na ol i pilim pinis ol hevi bilong lapun. Na sampela man i no lapun, tasol sik o bagarap i bin painim ol. Ol dispela sik na lapun em i samting bilong olpela taim nogut, na em i mas i stap inap long taim Jehova i pinisim na tekewe olgeta.

Ol brata sista i sik o i lapun, yumi amamas long ol i stap wantaim yumi, na ol inap lainim yumi long pasin bilong “strongim bel na karim hevi.” (Jems 5:​10, 11) Planti ol lapun nau ol i no gat strong moa, tasol bipo inap planti yia ol i bin skulim ol man, na nau ol dispela man i save lukautim ol wok bilong kongrigesen. Na sampela lapun i gat pikinini i save mekim wok painia.​—⁠Song 71:​17, 18; 3 Jon 4.

Sampela brata sista i stap wantaim yumi na ol i gat bikpela sik na hevi, tasol ol i gat strongpela bilip, na dispela pasin bilong ol i kirapim yumi long strongim bel. Ol i tingim ol gutpela samting bai kamap bihain na ol i karim hevi, na yumi lukim ol i mekim olsem, na dispela i strongim bilip bilong yumi. Ol i stap bel isi, na ol i no tingim ol hevi bilong skin, nogat; ol i tingim ol samting bilong spirit. Gutpela yumi ken bihainim dispela pasin bilong ol.

Sapos wantu sik kensa o strok o narapela bikpela sik olsem i painim man, dispela i bagarapim bel bilong em na senisim sindaun bilong em. Na papamama tu i kisim bikpela hevi sapos sik nogut o bagarap i painim pikinini bilong ol. Yumi ken mekim wanem bilong helpim ol? Yumi olgeta Kristen i save pilim hevi sapos kain samting olsem i bungim wanpela bilong yumi. Baibel i tok: “Ol brata i save sambai long helpim yumi long taim bilong hevi.” (Sindaun 17:17) Tru, ating olgeta wan wan bilong kongrigesen i no inap helpim ol sikman, tasol spirit bilong Jehova bai kirapim sampela brata long helpim ol. Na ol elda tu bai tingim husat i gat sik na bai sampela i ken helpim ol.​—⁠Lukim Kisim Bek 18:​17, 18.

Mas Save Long Tingting Bilong Ol

Sapos yu laik helpim man, yu mas toktok gut wantaim em long pasin sori, na no ken les o hariapim em. Harim gut ol tok bilong em, na long pasin sori yu ken traim givim sampela tok long em bilong strongim em, tasol yu mas tingting gut na bai ‘maus bilong yu i no mekim planti toktok’ na yu givim ‘pen’ long em.​—⁠Jop 16:⁠5.

Sampela taim ol sikman o lapun bai hatwok long haitim bel hevi bilong ol. Ol i bin tingting long i stap na winim “dispela taim bai i gat bikpela hevi tru,” tasol nau ol i ting ol bai i dai pastaim. (Matyu 24:21) Na sampela taim ol i les na ol i tingting planti. Ol i hatwok long i stap strong long bilip. Bipo ol i bin givim bel long mekim bikpela wok bilong autim tok, tasol nau ol i no inap. Wanpela elda i bin go lukim wanpela lapun sista, na taim elda i beten em i askim Jehova long lusim rong bilong ol, na taim em i beten pinis, em i lukim sista i krai. Sista i tok em i no inap raun moa na autim tok, na em i laik bai Jehova i lusim dispela rong bilong em. Tru tumas, sapos yumi pilim olsem yumi no inap mekim moa ol gutpela wok, bai yumi bel hevi.

Sapos bel bilong yumi i les, na skin tu, tingting bilong yumi i no save wok gut. Sapos man i lapun na skin bilong em i no strong moa na em i gat sik, ating em bai pilim olsem Jehova i lusim em, na em bai tok, ‘Mi bin mekim wanem rong? Bilong wanem mi mas i gat dispela hevi?’ Sindaun 12:25 i tok: “Sapos man i save wari oltaim, em bai i bel hevi tru na tingting bilong en bai i bagarap. Tasol sapos man i mekim gutpela tok long wantok bilong en, orait wantok bai i belgut tru.” Wok long mekim gut bel bilong ol. Ating sampela lapun i gat pen ol bai tok, ol i laik bai ol i ken i dai. Jop i bin tok olsem. No ken kirap nogut long ol i tok olsem, na no ken ting ol i lusim bilip. Jop tu i laik i dai na bai Jehova i ken “haitim [em] long ples bilong ol man i dai pinis,” olsem long matmat, na bihain Jehova i ken “singautim [em] na bai [em i] lusim dispela ples.” Olsem na sapos ol i gat strongpela bilip ol inap winim bikpela hevi na pen na i stap klostu yet long Jehova.​—⁠Jop 14:​13-15.

Givim Biknem Long Ol Sikman na Lapun

Yumi mas daun long ol lapun na givim biknem long ol. (Rom 12:10) Sapos ol i no mekim ol samting yumi laik bai ol i mekim, no ken les long ol. No ken kalapim o bosim laik bilong ol. No ken kolim ol samting ol i mas mekim o bihainim. Ol i gat laik bilong ol yet, na yumi no ken sakim o daunim dispela laik o tingting bilong ol. Long 1988 wanpela saveman, em Jette Ingerslev, em i bin skelim tingting bilong sampela lapun i gat 85 krismas, na em i kolim 3-pela samting ol i ting em bikpela samting bilong helpim ol, olsem: “Stap wantaim famili, na no gat sik, na ol yet i mas tingim ol samting ol i laik mekim.” Taim Jekop i lapun pinis, ol pikinini bilong em i no bin givim baksait long em na mekim olsem em i man nating na i no gat nem, nogat. Taim Jekop i lapun, ol i bin bihainim tok bilong em.​—Stat 47:​29, 30; 48:​17-20.

Na i olsem tu long ol sikman. Yumi mas givim biknem long ol na no ken mekim olsem ol i samting nating, na no ken givim baksait long ol. Ol dokta i bin popaia taim ol i katim wanpela elda, na bihain em i no inap toktok o kaunim buk o rait moa. Dispela i putim bikpela hevi long em, tasol ol narapela elda i pasim tok long mekim ol samting na bai em i no ken ting em i stap nating na em i no inap mekim sampela gutpela wok. Ol i save kaunim olgeta pas bilong kongrigesen long em na ol i larim em tu i tingim wanem ol samting kongrigesen i mas mekim. Taim ol i miting, ol i traim kisim tingting bilong em tu na bai em i ken save ol i tingim em na ol i ting em i stap elda yet. Yumi olgeta i ken mekim ol samting bilong helpim ol sikman na lapun na bai ol i no ken pilim olsem yumi “lusim [ol] na givim baksait long” ol.​—⁠Song 71:⁠9.

Helpim Ol Long i Stap Strong

Yumi olgeta i mas wok long kisim save long ol samting bilong spirit na bai bilip bilong yumi i ken i stap strong na i no ken i dai. Olsem na long olgeta de yumi mas kaunim Baibel na ol buk i kamapim ol tok bilong Baibel, na go long ol miting, na autim tok. Yumi mas helpim ol sikman na lapun inap long ol wan wan tu i ken mekim dispela samting. Planti ol inap i go long miting sapos yumi bringim ol, na long Haus Kingdom tu yumi helpim ol. Taim ol brata i lukim lapun i gat strongpela bilip na i no les long i kam long miting, dispela i strongim bel bilong ol dispela brata.

Planti taim ol sikman na lapun i ken mekim wok autim tok tu. Ol i ken go long ka wantaim ol narapela pablisa, na sapos ol yet i autim tok long sampela man, ol bai amamas. Sapos ol i no inap raun olsem, ol i ken amamas long autim tok long ol man ol i save bungim ol. Wanpela sista i gat sik kensa em i pasim tok long bel olsem em bai autim tok i go inap long em i dai. Em i kirap mekim olsem, na dispela i strongim bel bilong ol narapela brata sista. Na em i kolim ol samting em i laik bai ol i mekim long taim ol i planim em na bai ol wanblut na wanwok na ol manmeri i stap klostu long em ol i ken harim gut tok i tru. Olsem na bikpela hevi bilong dispela sista “i no pasim gutnius. Nogat. Em i mekim gutnius i kamap strong.” Long dispela hap taim em i bin stap laip em i strong long kamapim bilip bilong em, na dispela i bikpela samting long em.​—⁠Filipai 1:​12-14.

Gutpela sapos yumi strongim ol sikman na lapun long ol samting bilong spirit. Sampela famili i ken singautim sikman o lapun i kam bung wantaim ol long sampela taim na toktok na amamas wantaim, o ol i ken mekim famili-stadi bilong ol long haus bilong sikman o lapun. Wanpela mama na 2-pela liklik pikinini bilong em i bin go long haus bilong wanpela lapun sista na bai ol i ken bung wantaim na kaunim Baibel Stori Buk Bilong Mi. Lapun sista i amamas long dispela samting, na ol pikinini i amamas long em i bin toktok wantaim ol.

Tasol sampela taim i no gutpela long toktok tumas long sikman o lapun. Wan wan taim yumi ken kaunim sampela samting long ol. Na sapos wanpela i sik tumas na em i no inap toktok wantaim yumi, ating em i laik bai yumi ken toktok wantaim em long ol samting bilong spirit, maski em yet i no inap toktok o bekim tok. Na yumi ken beten wantaim em, na kaunim sampela stori samting long em; tasol no ken i stap longtaim tumas na bai skin bilong em i les.

I gat wanpela samting ol i ken mekim, maski ol i sik o ol i lapun; em i olsem: ol i ken beten askim Jehova long tingim na helpim ol narapela. Ol disaipel i bin ting dispela em wanpela bikpela wok bilong ol. Ol i bin skelim ol wok bilong kongrigesen i go long ol brata na bai ol aposel i gat bikpela taim long beten. “Epafras . . . em i save strong long [beten] na askim God long helpim [ol brata] long sanap strong olsem ol Kristen.” (Kolosi 4:12; Aposel 6:⁠4) Kain beten olsem em i bikpela samting na em inap mekim gutpela wok.​—⁠Luk 2:​36-38; Jems 5:⁠16.

Jehova i tingim ol sikman na lapun, na em i lukautim ol long taim bilong hevi. Em i ting yumi tu i mas mekim ol samting yumi inap mekim bilong helpim ol. Sapos yumi mekim olsem, dispela i makim olsem yumi laik holimpas tok i tru na i stap gut long Jehova. Na yumi amamas long tingim tok bilong King Devit olsem: “Bikpela i save was gut long ol manmeri i bihainim tok bilong em. Na ol samting God i givim ol, em ol bai i holim oltaim.”​—⁠Song 37:⁠18.

[Blok long pes 28]

Mekim Ol Samting Bilong Helpim Ol na Mekim Long Gutpela Tingting

OL PREN na famili bilong ol sikman o lapun ol i mas kisim save long pasin bilong lukautim ol. Yumi mas helpim ol na bai ol i ken save yumi tingim ol na yumi laikim ol na ol inap mekim gutpela wok. Olsem na i stap bilong ol bai helpim ol long amamas long Jehova, maski skin bilong ol i pen. Planti ol Witnes Bilong Jehova i stap inap ol i lapun tru. Ol i tingting long gutpela samting bilong bihain, olsem na ol i amamas, na ol i autim tok inap long skel bilong ol. Frederick W. Franz em i bin stap presiden bilong Sosaiti Was Taua, na klostu em i winim 100 krismas na em i dai. Inap longpela taim em i bin amamas long mekim ol gutpela wok. Em i bin makim gutpela pasin yumi ken bihainim.​—⁠Lukim 1 Stori 29:28.

Long olgeta de i gutpela sapos yumi ken helpim lapun long ol samting olsem: Em i mas waswas, o yumi mas wasim em, na em i mas kisim gutpela kaikai, na wara tu bilong dring, na sol tu, na yumi mas helpim em long kisim sampela liklik eksasais, na gutpela win tu, na yumi mas rapim skin bilong em liklik, na toktok wantaim em long sampela taim. Gutpela kaikai inap strongim yau na ai bilong em na bai em i ken harim gut na lukim gut ol samting, na strongim tingting tu, na strongim skin bilong em long sakim sik. Sapos em i kisim gutpela kaikai na planti wara samting bilong dring, dispela bai helpim em long i stap gutpela, na i helpim tingting bilong em long wok gut na bai tingting i no ken lus na em i kamap longlong. Mas tingim wanem kain eksasais i stret long em na inap long em i ken mekim. Wanpela sista i bin go kaunim ol buk samting long wanpela lapun aipas sista long olgeta wik, na paslain na bihain long en sista i putim kaset i gat musik na tupela i save danis isi isi, olsem eksasais.

Long sampela kantri i gat oganaisesen bilong helpim ol lapun o tokim yumi long pasin bilong lukautim lapun na ol samting yumi ken mekim bilong helpim em. (Tasol Kristen i mas was gut, nogut ol i tokim yumi long mekim sampela samting i pulim taim bilong yumi na yumi lusim wok Kristen bilong yumi long autim tok.) Sampela haus sik i save givim sampela samting long lapun, olsem bet kain olsem bilong haus sik, o masin bilong helpim lapun long wokabaut, o samting bilong stretim bun bilong em, o wilsia, o masin bilong helpim em long harim ol samting. Sampela lapun i save tok ‘Nogat’ long kain samting olsem, tasol famili i ken strong long ol i kisim. Bringim plaua long ol i gutpela, tasol ol dispela narapela samting i winim plaua.

Wok bilong lukautim lapun em i bikpela wok, na sapos tingting bilong lapun i paul na tingting i no wok gut moa, ating bai yumi hatwok tru long lukautim em. Pasin longlong i save kamap isi isi long lapun, olsem na nogut em i save stap nating planti taim na i no gat ol man i ken toktok wantaim em na kirapim tingting bilong em. Na em inap kros hariap long wanpela liklik tok yumi mekim, na ating em bai lusim tingting tu long ol samting, na lusim tingting long ol samting bilong tok i tru tu. Sori tumas, tasol i no olsem em i lusim bilip, nogat. Tingting bilong em i no wok gut moa.

Sapos sikman o lapun i stap long haus sik samting, ol nes na dokta i mas save long bilip bilong em long ol samting olsem betde na Krismas na ol holide bilong ol man bilong graun. Na sapos ol i mas katim em, famili i ken tokim ol dokta long bilip bilong em long blut na stretim ol pepa na kat bilong dispela samting.