Famili Kristen i Tingim Samting Bilong Spirit Pastaim

“Yupela olgeta i mas i stap wanbel na sori long olgeta man. Yupela i mas laikim tru ol arapela manmeri bilong God na marimari long ol, na lusim pasin bilong bikhet.”​—⁠1 PITA 3:⁠8.

DISPELA tok i stret tru long famili! Papamama i mas bosim gut famili! Ol gutpela pasin na pasin kranki tu bilong papamama em ol pikinini bai lain long bihainim. Ol i ken tingting long bihainim gutpela pasin o pasin nogut, laik bilong ol. Yumi ol Kristen tu, yumi ken tingting long ol samting bilong spirit na bihainim dispela, o yumi ken tingting long ol samting bilong skin na bihainim dispela. Yumi ken mekim ol samting God i laikim, o ol samting em i no laikim. Sapos yumi bihainim gutpela pasin, God bai mekim gut long yumi na yumi ken i stap oltaim, tasol sapos yumi mekim pasin nogut, bai yumi kisim nogut na bai yumi lus olgeta.​—⁠Stat 4:​1, 2; Rom 8:​5-8; Galesia 5:​19-23.

² Pastaim Pita i givim sampela gutpela tok long meri marit na man marit, na nau em i mekim dispela tok long 1 Pita 3:⁠8. Pita i gat bikpela tingting long ol famili Kristen. Em i save, sapos ol i strong long ol samting bilong spirit, ol bai i stap wanbel na narapela bai tingim narapela.a Olsem na long ves 7 i olsem em i tok, sapos man i no bihainim tok Pita i bin givim long em, dispela man i no inap i stap gut wantaim Jehova. Sapos em i no mekim gut long meri bilong em na lukautim em gut, Jehova i no inap harim beten bilong em.

Krais i Bihainim Tru Pasin Bilong Spirit

³ Sapos papa i go pas long makim pasin bilong spirit na pasin Kristen, ol narapela inap bihainim na ol tu bai tingim ol samting bilong spirit. Sapos famili i no gat papa Kristen, mama i mekim dispela wok. Krais Jisas em i nambawan gutpela piksa bilong i go pas long mekim ol wok bilong spirit. Ol pasin na toktok na tingting bilong em i save strongim na amamasim na kirapim ol man. Planti taim Pol i bin tokim ol man long gutpela pasin sori bilong Jisas. Em i tok: “Man em i het bilong meri bilong en, olsem Krais em i het bilong sios. Sios em i bodi bilong Krais . . . Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios.”​—⁠Efesus 5:​23, 25, 29; Matyu 11:​28-30; Kolosi 3:⁠19.

⁴ Jisas i win tru long makim pasin bilong tingim ol samting bilong spirit na bilong mekim wok bos long pasin sori na long tingim gut ol man. Em i daunim laik bilong em yet na bai em i ken helpim ol narapela man. Oltaim em i litimapim nem bilong Papa bilong em na daun long em. Em i bihainim tok bilong Papa na larim Papa i soim rot long em, olsem na em inap tok: “Mi no inap mekim wanpela samting long tingting bilong mi yet. Mi save bihainim tok mi kisim long Papa na mi skelim pasin bilong ol manmeri. Na kot bilong mi em i stret, long wanem, mi no save bihainim laik bilong mi yet. Nogat. Mi bihainim laik bilong Papa, em i bin salim mi na mi kam.” “Mi no mekim wanpela samting long tingting bilong mi yet. Nogat. Mi save autim olgeta tok olsem Papa i bin soim mi.”​—⁠Jon 5:30; 8:28; 1 Korin 11:⁠3.

⁵ Orait, olsem wanem long ol man marit? Ol i mas bihainim pasin bilong Jisas. Oltaim em i stap aninit long Papa bilong em. Jehova i givim kaikai long olgeta samting i gat laip long graun, na Jisas tu i givim kaikai long lain bilong em. Em inapim ol samting ol i mas kisim. Em i bin wokim mirakel na lukautim 5,000 manmeri na 4,000 manmeri long kaikai, na dispela i kamapim klia pasin bilong em long tingim gut lain bilong em. (Mak 6:​35-44; 8:​1-9) Long nau tu ol papa i mas lukautim famili long ol samting bilong skin. Wanem samting moa ol i mas mekim?​—⁠1 Timoti 5:⁠8.

⁶ Papa i mas tingim sampela bikpela samting tru em i mas lukautim famili long en, olsem: Em i mas lukautim famili long ol samting bilong spirit na bilong tingting, olsem Jisas i bin mekim. (Lo 8:3; Matyu 4:⁠4) Taim yumi stap wantaim famili o kongrigesen, ol toktok na tingting i save go i kam namel long yumi olgeta. I mas i gat man bilong stiaim dispela na kirapim yumi long mekim ol gutpela samting bilong strongim olgeta wan wan. Em bikpela wok bilong ol papa, na sapos ol i stap wokman bilong kongrigesen o ol i elda, ol i mas mekim tru dispela wok. Maski papa i no gat poroman, o mama i no gat poroman, em i mas mekim olsem na bai em i ken helpim ol pikinini. Papamama i mas save, ol pikinini i save toktok long wanem ol samting, na wanem ol samting ol i no save toktok long en. No ken les long kisim save long dispela. Olsem na Pita i tok, man i mas sori long famili na mekim gut long meri bilong em, na em i mas tingim pasin bilong ol meri.​—⁠1 Timoti 3:​4, 5, 12; 1 Pita 3:⁠7.

Samting Yu No Ken Mekim

⁷ Em i bikpela samting tru long famili i mas i stap strong long ol samting bilong spirit. Taim kepten i stiaim sip namel long ol rip, em i mas was gut, na olsem tasol, papa i mas was gut taim em i stiaim famili bilong em nau long dispela taim nogut. Long Ogas 1992 ol i stiaim sip Queen Elizabeth 2 (QE2) i go namel long ples nogut i gat ol rip samting, em planti kepten i save popaia long dispela hap. Wanpela man i tok: “Ol i bin rausim planti kepten i no bin stia gut long dispela hap.” Sip hia i bam long rip samting daunbilo na i kisim bagarap. Ol i lusim bikpela mani long stretim, na inap sampela wik em i no inap raun.

⁸ Ol kepten i mas lukim gut mep na bai ol i ken stia gut, na olsem tasol papa i mas lukim gut Baibel na bai em i ken stiaim gut famili long ol samting bilong spirit bambai famili i no ken bagarap. Sapos em i no mekim, ating em i no inap holim wok elda o wokman bilong kongrigesen, na inap rong i ken painim sampela bilong famili tu. Olgeta wan wan Kristen i mas was gut na bai ol i no ken slek long ol samting bilong spirit. Nogut Kristen i ting, bipo em i bin stadi gut na em i kisim strong, na nau em i no gat wok moa long stadi. Yumi mas stadi na wok long i stap strong long olgeta taim.​—⁠1 Korin 9:​24-27; 1 Timoti 1:19.

⁹ Kepten i mas lukluk oltaim long mep na bai em i ken stia gut na sip i no ken paul long rip samting, na olsem tasol yumi mas stadi oltaim long Baibel, na yumi no ken ting bipo yumi bin kisim ol as tok bilong Baibel na yumi kam insait long tok i tru na dispela em inap, nogat. Yumi mas stadi na autim tok na bai yumi ken i stap strong. Olsem wanem? Yu o famili i bin stadi gut long dispela Wastaua na kisim gut ol tok bilong en na kaunim ol skripsa na tingting long olsem wanem yu wantaim famili i ken bihainim tok bilong en? O yupela katim tasol ol bekim? Yu bin kaunim dispela Wastaua paslain long miting? Gutpela yu tingim ol dispela samting na ating dispela bai kirapim yupela long skelim pasin bilong yupela long stadi na bai yupela i ken wok strong moa long stadi, sapos yupela i mas mekim olsem.​—⁠Hibru 5:​12-14.

¹⁰ Bilong wanem yumi mas skelim pasin bilong yumi yet long stadi? Long wanem, tingting na pasin bilong Satan i pulap long graun, na dispela samting inap bagarapim bilip bilong yumi long God na long ol tok promis bilong em. Planti samting bilong graun i laik pulim yumi na bai yumi no gat taim bilong kisim ol samting bilong spirit. Olsem na yumi mas givim askim long yumi yet olsem: ‘Famili bilong mi i strong long ol samting bilong spirit? Mi strongpela papa long ol samting bilong spirit? Mipela famili i strong long kisim ol tingting bilong spirit na bai mipela i bihainim stretpela pasin long ol samting mipela mekim na i stap gut long Jehova?’​—⁠Efesus 4:​23, 24.

¹¹ Olgeta miting i bilong strongim yumi long spirit. Yumi stap inap sampela aua long ol miting long Haus Kingdom na long Buk-Stadi, na dispela i strongim yumi, long wanem, yumi mas i stap planti aua moa long painim ol samting bilong skin namel long pasin nogut bilong dispela graun. Long Buk-Stadi yumi bin kisim strong taim yumi stadi long buk Nambawan Man Tru i Winim Olgeta Narapela Man, na nau yumi save gut long Jisas na pasin bilong em na wok em i bin mekim. Yumi bin kaunim gut ol skripsa na yumi bin stadi long en paslain long Buk-Stadi, na yumi kisim planti save na tingting long ol gutpela pasin Jisas i bin mekim.​—⁠Hibru 12:​1-3; 1 Pita 2:⁠21.

¹² Yumi mas strong long spirit taim yumi raun autim tok o taim yumi autim tok long kain kain taim na ples na long taim ol i no laik harim o ol i kros. Sapos yumi laikim tru God na yumi sori long ol man, dispela i ken strongim yumi long mekim ol dispela wok. Tru, yumi no amamas taim ol i sakim yumi, tasol yumi mas save, ol i no sakim yumi tasol​—⁠ol i sakim gutnius. Jisas i tok: “Sapos ol . . . i birua long yupela, . . . pastaim ol i bin birua long mi tu. Sapos yupela i stap olsem ol man bilong dispela graun, . . . ol inap laikim yupela . . . tasol yupela i no man bilong dispela graun. . . . Olsem na ol bai i mekim olgeta dispela pasin nogut long yupela, long wanem, ol i save olsem yupela i lain bilong mi.”​—⁠Jon 15:​18-21.

No Ken Toktok Tasol ​—⁠Mas Mekim

¹³ Sapos wanpela tasol bilong famili em i no lukautim gut ol samting bilong haus, na graun malumalum i pas long lek bilong em na em i wokabaut i kam insait na bagarapim plua na em i no tingim, em i putim hatwok long ol narapela em ol i mas klinim. Na i olsem tu long samting bilong spirit: Sapos wanpela bilong famili em i tingim laik bilong em tasol na i mekim nabaut, em bai bagarapim gutpela nem bilong ol narapela bilong famili. I no papamama tasol i mas bihainim tingting na pasin bilong Krais​—⁠olgeta wan wan i mas mekim. Taim olgeta wantaim i wok strong long kisim laip oltaim, ol i save stap amamas. Dispela famili i save tingim ol samting bilong spirit, na ol i no save slek long dispela samting.​—⁠Saveman 7:16; 1 Pita 4:​1, 2.

¹⁴ Yumi olgeta i gat sampela wok yumi mas mekim na bai yumi ken lukautim yumi yet long ol samting bilong skin. (Matyu 6:​11, 30-32) Tasol planti taim yumi laik kisim sampela samting moa. Ol man bilong dispela graun em Satan i bosim, ol i wokim kain kain samting bilong grisim yumi long baim. Sapos yumi laik kisim ol nupela nupela samting, bai yumi no amamas tu, long wanem, bihain bai yumi les long dispela na yumi laik kisim samting i moa nupela. Ol stua i grisim ol man long ol dispela kain samting na subim ol long baim, tasol ol i mas painim mani bilong baim. Dispela bai mekim na “ol traim bai i kamap na . . . paulim ol tru. Na long dispela pasin ol bai i bagarap olgeta.” Sapos yumi aigris long ol dispela samting bilong skin, bai ol i sotim tru taim bilong yumi long autim tok na mekim ol narapela wok bilong spirit.​—⁠1 Timoti 6:​9, 10.

¹⁵ Papa bilong famili i mas makim pasin i stret long dispela samting. Em i mas skelim gut wok em i mekim, em ol wok bilong skin na bilong spirit, na bai famili i ken lukim na bihainim pasin bilong em. Sapos em i givim gutpela tok long famili, tasol em yet i no bihainim, ol bai save em i tok nating tasol, na ol i no ken bilipim tok bilong em. Na sapos wanpela elda o wokman bilong kongrigesen i kirapim ol pablisa long i go autim tok, tasol em yet i no go planti taim wantaim famili long autim tok, em nau, famili na kongrigesen i no ken givim bel long tok bilong em.​—⁠1 Korin 15:⁠58; lukim Matyu 23:⁠3.

¹⁶ Olsem na yumi mas skelim yumi yet. Olsem wanem? Yumi givim bel tumas long wok bilong skin na yumi no kamap strong long spirit? Yumi strong long painim ol samting bilong graun na yumi no strong moa long ol samting bilong kongrigesen? Pol i tok: “Sapos man i laik i stap wasman bilong [kongrigesen], em i laikim gutpela wok.” (1 Timoti 3:⁠1) Sapos yumi givim bel long wok bilong kongrigesen, dispela i makim olsem yumi i man bilong tingim samting bilong spirit, na dispela i winim namba yumi kisim long wok bilong skin. Bos long ples wok em i bosim wok bilong skin tasol. Yumi no dediket long em, nogat. Yumi dediket long Jehova.​—⁠Matyu 6:24.

Famili i Mas Toktok Gut Wantaim

¹⁷ Haus bilong planti famili em ples slip na ples kaikai tasol, na ol narapela taim ol i go nabaut. Ol i no save bung na kaikai na toktok na amamas wantaim olsem famili i mas mekim. Narapela i no tingim narapela, na ol i no pas gut wantaim. Sapos yumi laikim tru ol narapela bilong famili, bai yumi toktok wantaim ol na harim tok bilong ol na helpim na strongim ol, na nau yumi olgeta i stap strong long ol samting bilong spirit. Papamama i mas toktok gut wantaim, na ol i mas toktok tu wantaim ol pikinini.b Yumi mas lusim taim long mekim dispela samting, na tingting gut taim yumi toktok, na yumi mas kirapim olgeta wan wan long toktok na amamas wantaim na stori wantaim na kamapim hevi bilong ol na bai narapela i ken helpim narapela.​—⁠1 Korin 13:​4-8; Jems 1:⁠19.

¹⁸ Yumi mas makim taim na bai narapela i ken toktok wantaim narapela na harim tok bilong em. Televisen i namba wan samting bilong pasim rot na bai famili i no inap toktok gut wantaim. Olsem wanem? Televisen i bosim na kalabusim yu na pulim bikpela hap taim bilong yu, o yu bosim televisen na bai em i no ken pulim yu? Yu mas bosim gut laik bilong yu na mekim dai televisen na bai famili i ken toktok wantaim long ol samting bilong spirit. Yumi famili i mas mekim olsem na bai yumi ken stori gut wantaim long samting yumi sot long en na long amamas bilong yumi, na yumi ken stori long pasin sori ol narapela man i mekim long yumi na yumi pilim tru dispela gutpela pasin bilong ol.​—⁠Sindaun 31:​28, 29.

¹⁹ Olsem na sapos yumi tingim ol wan wan bilong famili na mekim pasin sori long ol, maski sampela i no bilipman, dispela bai helpim famili long kamap strong na i stap strong long ol samting bilong spirit. Sapos yumi mekim olsem, yumi bihainim tok bilong Pita, em i tok: “Yupela olgeta i mas i stap wanbel na sori long olgeta man. Yupela i mas laikim tru ol arapela manmeri bilong God na marimari long ol, na lusim pasin bilong bikhet. Sapos ol man i mekim nogut long yupela, orait yupela i no ken bekim. . . . Mas beten long God i ken mekim gut long ol. God i bin singautim yupela long mekim olsem.”​—⁠1 Pita 3:​8, 9.

²⁰ Sapos yumi givim bel long stap strong long spirit, Jehova bai mekim gut long yumi na bai yumi inap i stap oltaim long paradais long graun. I gat sampela samting moa famili i ken mekim bilong helpim olgeta wan wan long ol samting bilong spirit. Narapela stori bihain bai toktok long olsem wanem olgeta bilong famili i ken wok wantaim long mekim ol samting na dispela bai helpim famili olsem wanem.​—⁠Luk 23:43; KTH 21:​1-4.

[Ol Futnot]

Yu Tingim Yet?

◻ Samting bilong spirit em wanem samting?

◻ Olsem wanem papa i ken bihainim pasin bilong Krais?

◻ Yumi mas mekim wanem na bai yumi ken i stap strong long spirit?

◻ Wanem samting inap bagarapim famili long ol samting bilong spirit?

◻ Bilong wanem famili i mas toktok gut wantaim?

[Askim Bilong Stadi]

1. Wanem tupela rot yumi ken bihainim? Wanem samting inap painim yumi long rot yumi laik bihainim?

2. (a) Olsem wanem yumi save Pita i tingim ol famili? (b) Samting bilong spirit em wanem samting? (Lukim sta daunbilo.)

3. Pol i kolim wanem pasin bilong Jisas na ol man marit i mas bihainim?

4. Jisas i mekim wanem na yumi save em i man bilong tingim ol samting bilong spirit?

5. Jisas i mekim wanem bilong lukautim lain bilong em, na ol papa i ken mekim olsem?

6. (a) Papa i mas helpim famili long wanem ol samting? (b) Papa i mas bihainim wanem kain pasin?

7, 8. (a) Papa i mas mekim wanem na bai famili i no ken bagarap long ol samting bilong spirit? (b) Yumi mas mekim wanem na bai yumi ken i stap strong? (Matyu 24:⁠13)

9. (a) Bilong wanem yumi olgeta wan wan i mas stadi? (b) Wanem sampela askim yumi mas tingim?

10. Bilong wanem yumi mas skelim pasin bilong yumi?

11. Olsem wanem ol miting Kristen inap helpim yumi? Stori long olsem wanem wanpela miting i bin helpim yumi.

12. Olsem wanem wok autim tok i traim yumi, yumi strong long ol samting bilong spirit o nogat?

13. Olsem wanem wanpela tasol inap bagarapim wok bilong spirit long famili?

14. Satan i save grisim yumi olsem wanem?

15. Bilong wanem papa i mas i stap olsem gutpela piksa long famili?

16. Yumi mas givim wanem ol askim long yumi yet?

17. Famili i mas mekim wanem bilong kamapim pasin sori namel long ol?

18. (a) Wanem samting i pasim sampela famili na ol i no inap toktok gut wantaim? (b) Famili i ken mekim wanem na bai ol i ken pas gut wantaim?

19, 20. Sapos yumi tingim olgeta wan wan long famili, yumi mas mekim wanem?

[Piksa long pes 12]

Buk-Stadi i save strongim famili long ol samting bilong spirit