Painim Rot Bilong Pas Gut Wantaim God
LONG Bikpela Tok Long Maunten Jisas i bin tok: “Ol man i hangre long kisim save long God, ol i ken amamas, long wanem, kingdom bilong heven em i bilong ol.” (Matyu 5:3, NW) Ating yu wanbel long dispela tok. Ol manmeri long olgeta hap i luksave olsem ol inap amamas sapos ol i pas gut wantaim God. Tasol yumi mas mekim wanem bilong save gut long God? Na olsem wanem yumi inap pas gut wantaim Em?
Bilong save long God yumi mas kliagut long tingting bilong em na pasin bilong em long mekim ol samting. Bilong pas gut wantaim God yumi mas tingim Em tru na tingim tru ol samting bilong lotu.
Tasol yumi mas mekim wanem bilong pas gut wantaim God? Olgeta lotu i tok ol i save long rot bilong pas gut wantaim God, tasol klostu olgeta wan wan lotu i gat narapela narapela tingting long ol samting ol man i mas mekim bilong pas gut wantaim God. Sampela i tok God i bin kisim bek ol long wanpela bikpela bung bilong lotu, o ol i go long Misa bilong kamap wanbel wantaim God. Yu ting ol dispela manmeri ol i stap long rot bilong pas gut wantaim God?
Planti manmeri bai tok nogat long dispela askim. Ol i ting bilong pas gut wantaim God ol i no gat wok long go insait long wanpela lotu. Sampela arapela i tok bilong laip bilong yumi i gat as na yumi stap bel isi yumi no gat wok long go long lotu o pas gut wantaim God. Nogat. Ol i ting yumi gat wok long skelim bel na tingting bilong yumi yet. Wanpela man bilong raitim ol stori i tok dispela tingting olsem laip i gat as tru, “em samting i stap insait tru long bel na tingting bilong yumi wan wan. Em pasin bilong yu long laikim, pas gut wantaim na orait long ol samting i kamap na long ol manmeri i stap klostu long yu. Yu no inap painim dispela insait long wanpela sios o long rot bilong bilipim sampela tok bilong lotu.”
Em i klia tru olsem ol man i gat narapela narapela tingting long pasin bilong pas gut wantaim God. Planti buk i tok ol i save long rot bilong pas gut wantaim God, tasol planti taim ol man i ritim ol dispela buk ol i paul yet na ol i no pilim olsem ol i pas gut wantaim God. Tasol i gat wanpela buk i stap i gat ol gutpela tok bilong God yumi ken bilip long en na bihainim. I gat planti samting i kamapim long ples klia olsem spirit bilong God i bin kamapim olgeta tok i stap long en. (2 Timoti 3:16) Yumi laik skelim tok dispela buk, em Baibel, i mekim long pasin bilong pas gut wantaim God na olsem wanem dispela inap helpim yumi.
[Piksa Kredit Lain long pes 2]
COVER: Background: © Mark Hamblin/age fotostock