Bilong Wanem Yu Mas Laikim Ol Narapela Man?
BILONG kisim laip i stap oltaim, yumi mas laikim tru Jehova na ol narapela man. Dispela samting i kamap klia long wanpela tok i bin kamap klostu 2,000 yia bipo.
Wanpela Juda i save gut long Lo em i askim Jisas: “Bai mi mekim wanem na mi kisim laip bilong i stap gut oltaim oltaim?” Jisas i tok: “Wanem tok i stap long lo? Yu ritim olsem wanem?” Man i kolim hap tok bilong Lo na i tok: “ ‘Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long strong bilong yupela na long tingting bilong yupela. Na yu mas laikim tru ol wantok olsem yu laikim yu yet.’ ” Orait Jisas i tok: “Yu bekim tok stret. Yu mekim olsem, na bai yu kisim laip.”—Luk 10:25-28.
Dispela man i tok, “Taim lo i tok long wantok bilong mi, em i tok long husat tru?” Bilong bekim dispela askim, Jisas i mekim tok piksa long wanpela Juda em ol stilman i bin kisim mani bilong em na paitim em nogut na em i slip i stap long rot. Orait, tupela Juda i wokabaut i kam—namba wan em pris, na namba tu em wanpela Livai. Tupela i lukim wantok Juda i bagarap i stap long rot, tasol ol i no helpim em. Bihain wanpela man Samaria i kam. Em i lukim Juda i bagarap na em i sori tru long em. Em i putim marasin long ol sua bilong em na pasim, na em i kisim em i go long haus pasindia na tokim papa bilong haus long lukautim dispela man, na em yet bai baim.
Nau Jisas i askim saveman: “Husat bilong ol tripela man i laikim tru dispela man i bin bagarap long han bilong ol stilman?” Man i save, em dispela man Samaria. Olsem na Jisas i kamapim klia olsem yumi mas laikim tru olgeta man, na i no ol wantok tasol.—Luk 10:29-37.
Ol i No Laikim Ol Narapela Man
Long nau pasin birua i stap namel long ol narapela narapela lain. Sampela lain Natsi bilong nau long Jemani i holim wanpela man na tromoi em long graun na wok long krungutim em long ol strongpela su bilong ol, na ol i brukim klostu olgeta bun long banis bilong em. Nau ol i tromoi strongpela dring long em na putim paia long en na kukim em, na em i dai. Ol i mekim olsem, long wanem, ol i ting em i wanpela Juda. Na wanpela lain Natsi i tromoi paia-bom long haus bilong wanpela famili bilong Turki long Hambek (Jemani) na paia i kukim famili na ol i dai—wanpela em pikinini meri i gat 10-pela krismas.
Na long hap bilong Bolken bikpela pait i kamap namel long ol narapela narapela lain, na planti tausen manmeri ol i dai. Na long Banglades, India, Pakistan, ol narapela narapela lain i pait wantaim na planti manmeri i bagarap. Na long Afrika tu ol i mekim olsem.
Planti man ol i kirap nogut long ol dispela pait i kamap. Ol yet i no inap mekim nogut long ol narapela man. Olsem na long Jemani planti man i bung na mats bilong kamapim tingting bilong ol, ol i no orait liklik long ol dispela pait. Tasol wanpela buk (The New Encyclopædia Britannica) i tok: “Klostu olgeta lain long graun ol i ting pasin na i stap bilong ol i winim olgeta narapela lain, maski sampela lain i olsem hap wantok.” Tasol Jisas i tok, bilong kisim laip i stap oltaim, yumi mas laikim tru God na ol narapela man. Olsem na wanem samting inap stretim dispela hevi?
[Piksa Kredit Lain long pes 2]
Cover: Jules Pelcog/Die Heilige Schrift
[Piksa Kredit Lain long pes 3]
The Good Samaritan/The Doré Bible Illustrations/Dover Publications, Inc.