Sampela Ples Long Graun Bilong Promis

Kam Lukim Raunwara Galili!

OL MAN bilong kaunim Baibel ol i save gut long Raunwara Galili. Traim pasim ai bilong yu na long tingting yu inap lukim dispela traipela raunwara na sampela ples Baibel i stori long en, olsem ol hap em het na lek bilong Wara Jordan i stap long en, o yu ken tingim ples Kaperneam na Taiberias.

Lukim gut piksa daunbilo na skelim wantaim liklik blok long han sut. Yu inap kolim hamas ples em ol namba i stap long en? Sapos yu save long planti ples, orait taim yu kaunim Baibel bai i olsem yu lukim tru ol dispela ples, na bai yu pilim gut ol dispela stori. Olsem na yu mas kam na yumi raun long hap bilong Raunwara Galili na bai yu save gut long en.

Dispela em i piksa bilong hap bilong not-is. Yumi ken kirap long namba 1. Em wanem hap bilong raunwara? Em hap bilong saut, em ples Wara Jordan i lusim na i ran i go daun namel long Samaria na Gileat na i go insait long Raunwara Detsi. Long han kais yu inap lukim gut dispela hap bilong Raunwara Galili, olsem yumi lukim long kalenda bilong ol Witnes Bilong Jehova bilong 1993.

Raunwara Galili i stap daunbilo tru long wanpela bikpela ples daun, inap olsem 200 mita daunbilo long mak bilong Solwara Mediterenian. Lukim ol maunten long nambis bilong raunwara long hap bilong is (namba 7). Ol maunten i stap tu long nambis long hap bilong wes, na dispela i kamapim klia olsem dispela bikpela raunwara i stap long wanpela ples daun na em i longpela inap 21 kilomita samting, na braitpela bilong en i olsem 12 kilomita. Long nambis bilong raunwara i gat ol liklik ples na biktaun i stap, olsem biktaun Taiberias (namba 2). Baibel i stori long wanpela lain i lusim Taiberias long ol bot na ol i brukim raunwara i go kamap long ples Jisas i bin givim kaikai long 5,000 man.​—⁠Jon 6:​1, 10, 17, 23.

Orait, yumi lusim Taiberias na bihainim nambis i go long not, na yumi abrusim hap bilong Genesaret, em graun bilong en i gat gutpela gris (namba 3).a Long dispela hap Jisas i bin mekim bikpela tok long maunten, na ating long nambis klostu em i bin singautim Pita na tripela moa long mekim wok bilong “kisim ol manmeri,” olsem ol i makim long piksa hia. (Matyu 4:​18-22) Orait, yumi go moa na yumi kamap long Kaperneam (namba 4). Jisas i bin mekim bikpela wok long dispela hap, olsem na ol i kolim olsem “ples bilong em stret.” (Matyu 4:​13-17; 9:​1, 9-11; Luk 4:​16, 23, 31, 38-41) Yumi go long hap is na yumi wokabaut (namba 5) long hap em Wara Jordan i ran i go long dispela raunwara (lukim piksa daunbilo). Nau yumi kamap long hap bilong Betsaida (namba 6).

Em nau, sapos yu save gut long Raunwara Galili na ol ples klostu long en, orait, taim yu kaunim ol stori bilong Baibel bai i olsem yu lukim tru. Taim Jisas i givim kaikai long 5,000 man long hap bilong Betsaida na planti man i laik makim em long kamap king bilong ol, em i salim ol aposel long bot i go long Kaperneam. Taim ol i stap long raunwara, bikpela win i kirap long ol maunten na kam daun na i kirapim bikpela si, na ol aposel i pret nogut tru. Tasol Jisas i wokabaut antap long wara na i kam long ol, na em i mekim dai win na ol i sua gut long nambis klostu long Genesaret. (Matyu 14:​13-34) Ol man i kirap long Taiberias na i kam, ol i brukim raunwara gen na i go long Kaperneam.​—⁠Jon 6:​15, 23, 24.

Orait yumi go moa long hap is bilong raunwara na yumi abrusim “graun bilong ol Gerasa.” Long dispela hap Jisas i bin rausim ol spirit nogut i stap long tupela man. Ol dispela spirit nogut i go insait long wanpela bikpela lain pik, na ol i kalap long maunten na i go insait long dispela raunwara na ol i bagarap. Bihain wanpela bilong dispela tupela man i autim tok bilong en long sampela taun bilong Dekapolis em ol i save mekim tok ples Grik. Jisas i bin kisim bot na brukim raunwara Galili na kamap long dispela hap, na em i bin kirap long dispela hap bilong brukim raunwara na i go.​—⁠Matyu 8:​28–9:1; Mak 5:​1-21.

Bilong pinisim raun bilong yumi, nau yumi kamap long hap daunbilo long raunwara na yumi abrusim ples wanpela bikpela wara (Yarmuk) i ran long en na em i karim planti wara i kam long Wara Jordan long hap bilong lek bilong en.

Sampela samting i bin kamap long hap bilong Raunwara Galili, Baibel i no kolim ples stret bilong en, olsem taim Jisas i kirap bek pinis na em i kamap long Pita na ol narapela aposel taim ol i wok long kisim pis (piksa daunbilo). Yu ting dispela i bin kamap klostu long Kaperneam? Yu inap tingim dispela samting, long wanem, nau yu save gut long ol hap bilong Raunwara Galili.

[Ol Futnot]

[Ol Piksa long pes 24]

1

2

3

4

5

6

7

N

S

E

W

[Piksa Kredit Lain long pes 24]

Pictorial Archive (Near Eastern History) Est.

[Piksa Kredit Lain long pes 24]

Pictorial Archive (Near Eastern History) Est.

[Piksa Kredit Lain long pes 24, 25]

Garo Nalbandian

[Piksa Kredit Lain long pes 25]

Pictorial Archive (Near Eastern History) Est.