Sampela Ples Long Graun Bilong Promis

Genesaret—‘Gutpela na Naispela Tru’

“Long arere bilong Raunwara Genesaret i gat wanpela hap graun i gat wankain nem, na ol samting bilong en i gutpela na naispela tru. Graun i gat gutpela gris, olsem na olgeta diwai samting i save kamap gut, na ol man i stap long dispela hap i save planim olgeta kain diwai samting: win i no hat tumas, olsem na win i stret long ol narapela narapela kain diwai. . . . Dispela graun i kamapim kain kain diwai i karim kaikai na ol i karim long olgeta taim. . . . I gat gutpela wara i kamap insait long graun long dispela hap na i putim gris long graun.”

Man bilong raitim stori bilong bipo, em Josifas, i bin stori olsem long dispela hap graun i stap long arere bilong raunwara yumi save kolim Galili, long hap bilong not-wes. Ol piksa antap inap helpim yu long save dispela hap graun long provins Galili i gat ol gutpela gaden i bin kamapim planti gutpela kaikai.a Long taim bilong Jisas, dispela hap graun i bikpela samting long ol man bilong bipo, olsem na wanpela man bilong raitim Gutnius, em Luk, i kolim nem bilong dispela raunwara i stap klostu olsem “raunwara Genesaret.”​—⁠Luk 5⁠:⁠1.

Luk i kamapim dispela tok taim em i stori long Jisas i kam long dispela hap na bungim 4-pela man bihain ol i kamap aposel. Olsem wanem? Ol i man bilong wok gaden na ol i kamapim ol kain kaikai olsem grep, na mon, na oliv, na fik? Nogat. Tru ol dispela kain kaikai i save kamap planti long Ples Daun bilong Genesaret, tasol ol dispela man ol i wok bisnis long kisim pis, na i no hatwok long save bilong wanem ol i mekim dispela wok.

Ol liklik wara i ron long dispela hap graun i karim ol gras samting i kamap insait long wara i go long raunwara na em kaikai bilong ol pis. Olsem na planti kain kain pis i pulap tru long dispela raunwara na wok bisnis bilong kisim pis i kamap bikpela. Long dispela hap Pita na Andru i save wok bisnis long kisim pis, na Jems wantaim Jon, tupela tu i mekim dispela wok. Tupela i pikinini bilong Sebedi em man bilong kisim pis.​—⁠Matyu 4⁠:​18-22; Luk 5⁠:​2-11.

Sampela taim ol i kalap long bot long raunwara na tromoi umben bilong kisim pis. Taim Jisas i lukim Pita tupela Andru, tupela i wok long mekim olsem. Dispela kain umben i bikpela na i save trip long wara. Bilong helpim umben long i stap olsem, ol i save pasim ol liklik hap plang long hap i stap antap, na ol i pasim sampela hevipela samting long hap daunbilo bilong taitim umben i go daun klostu long as bilong wara. Long dispela rot kain umben olsem inap banisim bikpela lain pis. Bihain ol i pulim umben i kam insait long bot o pulim i kam klostu long sua na bai ol i ken kapsaitim ol pis long nambis. Ol gutpela pis bilong kaikai, ol i save bungim, na ol pis i no gutpela bilong kaikai, ol i tromoi. Long Luk 5⁠:​4-7 na Jon 21⁠:​6-11, Baibel i stori gut long dispela. Jisas i bin stori long dispela pasin bilong kisim pis taim em i mekim tok piksa long umben. Yu tingim? (Matyu 13⁠:​47, 48) Na Matyu 4⁠:21 i kamapim klia olsem, planti taim ol man i mas lusim bikpela hap taim long stretim ol umben em ston o pis i brukim.

Sapos yu wokabaut long nambis bilong Genesaret, ating bai yu lukim tupela ples ol man i tok Jisas i bin mekim sampela wok long en. Namba wan em wanpela maunten, na ol man i tok: Jisas i bin mekim bikpela tok bilong em long dispela maunten. Ol hap bilong Baibel i stori long wok bilong Jisas, i no pait long dispela tok, long wanem, Baibel i tok taim Jisas i mekim dispela tok long maunten, em i bin i stap klostu long Ples Daun bilong Genesaret.​—⁠Matyu 5⁠:1–7⁠:29; Luk 6⁠:17–7⁠:⁠1.

Tasol stori bilong narapela ples long dispela hap em ol man i tok Jisas i bin mekim wanpela wok long en i no stret wantaim ol tok bilong Baibel. I gat wanpela haus lotu ol i tok ol man i bin wokim long ples Jisas i kisim 7-pela hap bret na sampela pis na givim kaikai long 4,000 man. (Matyu 15⁠:​32-38; Mak 8⁠:​1-9) Tasol dispela samting i no bin kamap long Ples Daun bilong Genesaret. Nogat. Mak i tok dispela samting i bin kamap long “hap bilong Dekapolis,” em longwe liklik inap 11 kilomita samting long hapsait bilong raunwara.​—⁠Mak 7⁠:31.

Matyu na Mak i tok, bihain long Jisas i wokim dispela mirakel, em i kalap long bot i go long hap bilong Magadan o Dalmanuta. (Matyu 15⁠:39; Mak 8⁠:10) Ol saveman i tok, dispela hap em hap bilong Migdal i stap klostu long Ples Daun bilong Genesaret long hap saut na i klostu long taun Taiberias. Wanpela buk (The Macmillan Bible Atlas) i tok, Migdal ‘i gat nem long wok bisnis bilong mekim ol samting long pis bambai ol i no ken bagarap kwik.’ Planti pis tru i pulap long dispela hap bilong raunwara, olsem na kain wok bisnis olsem inap kamap gutpela na pulim bikpela mani.

Long yia 1985, 1986 i no gat ren long dispela hap, olsem na wara bilong Raunwara Galili i go daun liklik na sampela hap graun long as bilong raunwara i kamap ples klia. Klostu long Ples Daun bilong Genesaret, tupela man i painim pinis wanpela bot bilong bipo i bagarap pinis. Ol man bilong save long ol samting bilong bipo ol i kisim dispela bot diwai bilong kisim pis na ol i tok, em i bilong taim Jisas i bin i go long dispela Raunwara Genesaret na Ples Daun bilong Genesaret.

[Ol Futnot]

[Piksa Kredit Lain long pes 24]

Pictorial Archive (Near Eastern History) Est.

[Piksa Kredit Lain long pes 24]

Pictorial Archive (Near Eastern History) Est.

[Piksa Kredit Lain long pes 25]

Garo Nalbandian

[Piksa Kredit Lain long pes 25]

Pictorial Archive (Near Eastern History) Est.