Pasin Daun Yumi Ken Bihainim

“Yu bin helpim mi na mi gat biknem long ai bilong ol manmeri.” —⁠SONG 18:35.

JOSEPH F. RUTHERFORD em bikpela man inap 180 sentimita na hevi bilong em inap 90 kilogram. Em i gat strongpela nek na em i mekim wok long en bilong kamapim nem bilong Jehova na bilong kamapim giaman bilong ol misin. Em i tok, lotu bilong ol i “giaman na i paulim ol man.” Tasol taim em i beten wantaim lain bilong Betel long hetkota, nek bilong em i olsem bilong liklik manki i toktok long papa bilong em, na dispela i kamapim klia olsem bel bilong em i stap wantaim God, na em i gat pasin daun olsem bilong wanpela liklik pikinini.​—⁠Matyu 18:​3, 4.

² Olgeta wokman tru bilong God Jehova ol i gat pasin daun, olsem na ol i stap narapela kain long ol man bilong dispela graun. Long nau planti bikman, na man i gat namba, na planti rabisman na man nating tu ol i gat pasin antap.

³ Pasin antap i as bilong planti hevi. Bipo wanpela ensel i mekim pasin antap, na dispela i as bilong olgeta pasin bikhet na hevi i bin kamap long heven na long graun. Em i laik bai ol man i givim biknem long em na lotu long em, tasol biknem na lotu i bilong givim long God Jehova tasol. (Matyu 4:​9, 10) Dispela ensel i kamap Satan, em i grisim namba wan meri, Iv, long kisim kaikai tambu na bai Iv i ken kamap kain olsem God na em i ken save wanem samting i gutpela na wanem samting i nogut. Nau meri i bihainim pasin antap na i no laik daun long lo bilong God. Sapos em i gat pasin daun em i mas tokim Satan, ‘Mi no laik kamap olsem God.’ (Stat 3:​4, 5) Long nau ol man i stap nogut tru long pasin na sindaun na tingting bilong ol. Olsem na i no gat as na ol i ken hambak na mekim pasin antap, a? Ol i gat asua long dispela. Baibel i tok, Jehova i “no laik tru long pasin bilong bikhet na pasin bilong man i litimapim nem bilong em yet.” (Sindaun 8:13) Baibel i stori long sampela man ol i gat pasin daun, em ol i narapela kain tru long ol man i gat pasin antap.

Jehova i Gat Pasin Daun

⁴ Maski Jehova i God Antap Tru na i King bilong olgeta hap na em i save stap oltaim oltaim, em i gat pasin daun. (Stat 14:22) King Devit i tok: “Yu lukautim mi na kisim bek mi. Strong bilong yu i helpim mi. Yu bin helpim mi na mi gat biknem long ai bilong ol manmeri.” (Song 18:35) I olsem Devit i tok, Jehova i lukluk i kam daun na helpim Devit, na dispela pasin daun bilong Jehova i mekim na Devit i gat nem. Na Song 113:6 i tok, Jehova “i save lukluk i kam daun na lukim heven na graun wantaim.”

⁵ Na Jehova i mekim pasin daun na givim yau long Abraham long taim Abraham i gat tok long Jehova i laik bagarapim Sodom na Gomora, i stret o nogat.a (Stat 18:​23-32) Na wanpela taim ol Israel i bin lotuim god giaman, na narapela taim ol i bikhet, na Jehova i tok em i laik bagarapim ol, na tupela taim hia Moses i gat tok long Jehova long dispela na i olsem em i toktok wantaim wanpela man bilong graun. Tasol Jehova i mekim pasin daun na i givim yau long Moses na harim tok bilong em taim Moses i laik helpim ol Israel, em lain bilong God yet. (Kisim Bek 32:​9-14; Namba 14:​11-20) Jehova i save daun na toktok wantaim ol man olsem tupela man i toktok wantaim. Jehova i bin mekim olsem long Gideon na long Jona, olsem Hetman 6:​36-40 na Jona 4:​9-11 i tok.

⁶ Inap 8-pela taim samting Baibel i tok, Jehova i ‘no save belhat kwik’ o i ‘no save kros hariap.’b Inap planti tausen yia em i mekim pasin daun na i no les kwik o kros hariap long ol man i no bihainim stret laik bilong em. Bikpela God Jehova i gat pasin daun, tasol ol sinman bilong graun i gat pasin antap! Ol i save les kwik long man na kros kwik. Pasin bilong ol i narapela kain tru long pasin bilong Jehova, em i no save les kwik long man. Baibel i tok, yumi “mas bihainim ol pasin [God] yet i save mekim,” olsem pasin daun.​—⁠Efesus 5:⁠1.

Krais i Gat Pasin Daun

⁷ Jisas em i namba 2 gutpela piksa bilong bihainim pasin daun. Olsem 1 Pita 2:21 i tok: “God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.” Taim em i no kam daun yet long graun, Sekaraia 9:9 i tok profet long em olsem: “Em i no save litimapim nem bilong em yet. Nogat. Em i kam olsem man i no gat nem, na em i sindaun antap long wanpela donki . . . na i kam.” Sapos em i gat pasin antap na em i laikim biknem, ating em bai orait long lotuim Satan na bai em i ken i stap bos bilong ol gavman bilong graun. (Matyu 4:​9, 10) Na em i bin skulim gut ol man, tasol em i no litimapim nem bilong em yet long dispela samting​—⁠em i larim biknem i go long Jehova. Em i tok: “Mi no mekim wanpela samting long tingting bilong mi yet. Nogat. Mi save autim olgeta tok olsem Papa i bin soim mi.”​—⁠Jon 8:⁠28.

⁸ I stret long em i ken tokim ol man: “Yupela kisim save long mi na aninit long tok bilong mi, . . . long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo.” (Matyu 11:29) Na long laspela de em i bin stap wantaim ol aposel paslain long taim em i dai, em i mekim pasin daun na wasim lek bilong ol! (Jon 13:​3-15) Olsem na long Filipai 2:​3-8 Pol i tokim ol Kristen: “Yupela i mas daunim yupela yet . . . Yupela i mas holim wankain tingting olsem Krais Jisas i bin holim. . . . Em i kamap olsem wokboi nating. . . . Em i daunim em yet na i bihainim tok bilong God, i go inap long em i dai . . . long diwai.” Na taim bikpela hevi tru i laik painim em, em i beten long God olsem: “Yu no ken bihainim laik bilong mi. Nogat. Yu mas bihainim laik bilong yu tasol.” (Matyu 26:39) Tru tumas, sapos yumi laik bihainim lek bilong Jisas yumi mas i gat pasin daun.

Aposel Pol i Bihainim Pasin Daun

⁹ Aposel Pol i tok: “Bihainim pasin bilong mi na wokabaut, olsem mi tu mi save bihainim pasin bilong Krais na wokabaut.” (1 Korin 11:⁠1) Pol i bin bihainim pasin daun olsem bilong Jisas, olsem na yumi ken bihainim pasin bilong Pol. Em i tokaut olsem em i wokboi nating bilong Krais Jisas. (Filipai 1:⁠1) Em i tokim ol elda bilong Efesus olsem: “Mi daunim nem bilong mi olgeta, na mi mekim wok bilong Bikpela.” (Aposel 20:​17-19) Sapos em i no bin daunim em yet em i no inap mekim tok olsem yumi lukim long Rom 7:​18, 19: “I no gat wanpela gutpela samting i stap insait long mi. . . . Mi laik mekim gutpela pasin, tasol mi no inap mekim. Gutpela pasin mi laik mekim, em mi no save mekim. Na pasin nogut mi no laik mekim, em mi save mekim.”

¹⁰ Na Pol i kamapim pasin daun bilong em long ol Kristen long Korin, em i tok: “Taim mi stap wantaim yupela, mi no gat strong. Nogat. Mi save pret, na mi guria planti.” (1 Korin 2:⁠3) Em i no haitim rong bipo em i bin mekim taim em i no kamap Kristen yet. Em i tok: “Mi bin tok bilas long nem bilong [Krais], na mi birua long em na mi bin tok nogut long em. . . . Krais Jisas i bin kam long graun bilong kisim bek yumi manmeri bilong mekim sin. . . . Mi yet mi bin mekim sin moa yet.”​—⁠1 Timoti 1:​13, 15.

¹¹ Long pasin daun em i givim biknem long God long ol wok em i bin mekim. Em i tok: “Mi bin planim pikinini bilong kaikai. Apolos em i bin givim wara long en. Tasol God i bin mekim kaikai i kamap. Olsem na man i planim pikinini kaikai, em i no gat nem. Na man i givim wara, em tu i no gat nem. Nogat. God i save mekim kaikai i kamap, em wanpela tasol i gat nem.” (1 Korin 3:​6, 7) Na em i tokim ol brata long beten askim God long helpim em long autim gut tok, olsem Efesus 6:​18-20 i tok: “Yupela i mas askim God long helpim mi tu. . . . God i ken putim tok long maus bilong mi, na mi ken daunim pret na autim tru tok hait bilong gutnius. . . God i ken strongim mi, bai mi ken daunim pret na tokaut strong long ol manmeri.”

¹² Na Pol i mekim pasin daun long ol narapela aposel na wok gut wantaim ol. Em i tok: “Jems na Pita na Jon olsem ol bikman bilong [kongrigesen], na . . . God i bin marimari long mi na i givim dispela wok long mi . . . wantaim Barnabas, na . . . mitupela i ken mekim wok.” (Galesia 2:⁠9) Na em i bihainim tok bilong ol elda bilong kongrigesen long Jerusalem na em i kisim 4-pela yangpela man i go long haus lotu na em i baim ofa bilong ol taim ol i mekim wanpela promis long God.​—⁠Aposel 21:​23-26.

¹³ Pol i bihainim pasin daun, maski em i mekim bikpela wok bilong Jehova. “Long han bilong Pol, God i wokim ol . . . strongpela mirakel.” (Aposel 19:​11, 12) Na God i bin givim ol save na driman long em tu. (2 Korin 12:​1-7) Na tu, Pol i bin raitim 14 hap bilong Nupela Testamen i gat 27 hap bilong en. Tasol em i no bin hambak long ol dispela samting na litimapim nem bilong em yet. Em i bihainim pasin daun.

Pasin Daun Long Nau

¹⁴ Pol i tok, yumi mas tingim ol elda “bipo ol i autim tok bilong God long yupela. Yupela i mas tingting long pasin ol i bin wokabaut long en, na yupela i mas bihainim pasin bilong bilip bilong ol.” (Hibru 13:⁠7) Orait, yumi ken tingim namba wan presiden bilong Sosaiti Was Taua, em Charles Taze Russell, na yumi ken bihainim pasin na bilip bilong em. Em i gat pasin daun tru! Em i bin raitim ol tok bilong wanpela bikpela buk (Studies in the Scriptures) i gat 6-pela volyum na 3,000 pes, na em i no kolim nem bilong em yet bilong makim husat i bin raitim. Na olsem tasol ol narapela buk bilong Sosaiti Was Taua long nau i no gat nem bilong ol man i bin raitim ol tok bilong en, long wanem, dispela pasin i save litimapim nem bilong man.

¹⁵ Sampela man i bin tok bilas long Russell na ol i tok, “bilip bilong Russell” o “lain bilong Russell,” tasol long Wastaua em i tok, i no gat wanpela bilip o wanpela lain em yet i as bilong en. Em i tok: ‘Wok bilong mipela [olsem em wantaim lain i wok wantaim em] i bilong bungim ol tok i tru na givim long lain bilong Bikpela. Bikpela i bin orait long mekim wok long save bilong mipela ol man nating long stretim bek na kamapim ol tok i tru bilong Baibel, na mipela i no as bilong ol dispela tok.’ Russell i gat wankain tingting olsem bilong Pol, em 1 Korin 3:​5-7 i kolim.

¹⁶ Tasol Charles Darwin i no gat pasin daun olsem. Long buk bilong em (The Origin of Species, 1859) em i stori long evolusen na em i no kolim nem bilong ol narapela man tu i gat save long dispela samting, nogat; em i tok olsem em yet i bin kamapim. Wanpela bikman, em Samuel Butler, em i laik kamapim dispela tok kranki bilong Darwin na em i tok, Darwin em i helpim tasol tok bilong evolusen, na planti man paslain long Darwin i bin toktok long evolusen.

¹⁷ Narapela gutpela wokman bilong God Jehova long taim bilong yumi, em Joseph F. Rutherford, em yumi stori pinis long em. Em i bin mekim bikpela wok long kamapim tok i tru na nem bilong Jehova long ol man na em i no pret liklik. Planti man i kolim em Jas Rutherford, tasol em i man bilong pasin daun. Em i bin kolim samting em i ting bai kamap long 1925, tasol dispela samting i no bin kamap, na long pasin daun em i tokim lain bilong Betel long Bruklin olsem em i bin popaia na tok bilong em i kranki. Wanpela wanlain bilong em i tok, planti taim Brata Rutherford i bihainim tok bilong Matyu 5:​23, 24 na i tokaut long ol man long sampela tok em i bin mekim na i givim hevi long ol dispela Kristen, na em i tok sori long dispela samting em i bin mekim. Maski em i holim bikpela namba, em i mekim pasin daun na i tok sori long ol narapela i stap aninit long em na em i gat namba long bosim ol. Brata Rutherford i makim pasin daun na em i stap olsem gutpela piksa ol elda bilong kongrigesen o ol elda bilong raun o bilong brens bilong Sosaiti ol i ken bihainim.

¹⁸ Nathan H. Knorr em namba 3 presiden bilong Sosaiti Was Taua na em i holim namba namel long lain bilong Jehova, tasol em i no bin ting em i winim ol. Em i gat bikpela save long bosim ol samting na stretim wok bilong oganaisesen na long mekim pablik-tok, tasol em i save litimapim wok bilong ol narapela brata. Wanpela taim em i go lukim wanpela brata long Dipatmen Bilong Raitim Tok, na em i tok: “Yupela i gat namba wan bikpela wok, na i hatwok tu, olsem na mi no insait tumas long dispela wok.” Em i bihainim pasin em Filipai 2:3 i kolim: “Yupela i no ken tingting long yupela yet tasol, na wok long kamapim biknem bilong yupela. Nogat. Yupela i mas daunim yupela yet na yupela i mas ting pasin bilong ol arapela i winim pasin bilong yupela.” Wok presiden em i mekim long Sosaiti i bikpela wok, tasol em i save, wok bilong ol narapela brata tu i bikpela wok. Em i gat pasin daun na em i bin tokaut long dispela samting. Olsem na ol brata i holim bikpela wok long bosim ol samting, na ol narapela tu, ol i ken bihainim dispela pasin daun bilong Brata Knorr.

¹⁹ Fred W. Franz em namba 4 presiden bilong Sosaiti na em i gat pasin daun. Em i bin i stap nambatu bilong presiden inap 32 yia na em i raitim planti tok bilong ol magasin na bilong ol kibung, tasol em i no tokaut long dispela samting, long wanem, em i no laik litimapim nem bilong em. Em i olsem wanpela man bilong bipo, em Joap. Joap i winim pait long ol Amon, tasol em i larim King Devit i kisim biknem long dispela samting.​—⁠2 Samuel 12:​26-28.

²⁰ Tru tumas, planti man bilong bipo na bilong nau ol i bin mekim pasin daun na ol i stap olsem gutpela piksa yumi ken bihainim. Tasol i gat planti as moa na yumi mas mekim pasin daun, na long narapela stadi bihain bai yumi toktok long dispela samting na ol samting i ken helpim yumi long mekim pasin daun

[Ol Futnot]

Yu Tingim Yet?

◻ Pasin antap i as bilong wanem ol samting?

◻ Husat i win long mekim pasin daun?

◻ Husat i namba 2 long mekim pasin daun, na em i mekim wanem?

◻ Pol i mekim wanem na yumi save em i gat pasin daun?

◻ Husat bilong nau ol i bin mekim pasin daun?

[Askim Bilong Stadi]

1. Olsem wanem yumi ken save, presiden bilong Sosaiti Was Taua long bipo i gat pasin daun?

2. Wanem wanpela pasin bilong ol wokman bilong Jehova na ol i narapela kain long ol man bilong graun?

3. Pasin antap i as bilong wanem ol samting?

4. Wanem ol skripsa i makim olsem Jehova i gat pasin daun?

5. Wanem sampela samting i bin kamap na yumi ken save Jehova i gat pasin daun?

6. Wanem sampela pasin bilong Jehova i makim olsem em i gat pasin daun?

7, 8. Baibel i tok wanem long pasin daun bilong Jisas?

9-12. Pol i bin mekim wanem na yumi save em i gat pasin daun?

13. Wanem ol samting Pol i no bin hambak long en?

14-16. (a) Namba wan presiden bilong Sosaiti Was Taua i bin mekim wanem pasin daun? (b) Husat i no bin mekim pasin daun?

17. Wanem sampela samting moa Brata Rutherford i mekim na dispela i kamapim pasin daun bilong em?

18. Namba 3 presiden bilong Sosaiti i bin tok wanem na yumi save em i man bilong pasin daun?

19, 20. (a) Namba 4 presiden bilong Sosaiti i bin mekim wanem pasin daun? (b) Narapela stadi bihain bai lainim yumi long wanem samting moa bilong pasin daun?

[Piksa long pes 15]

Jisas i soim ol long gutpela pasin daun

[Piksa long pes 16]

Pol i bihainim gutpela pasin daun

[Piksa long pes 17]

Russell i no bin litimapim nem bilong em long ol buk na nius samting em i bin raitim