Jehova i Save Kamapim Glori Bilong Em Long Ol Man i Gat Pasin Daun
“Sapos yu daunim yu yet na yu stap aninit long Bikpela, bai yu gat planti mani samting na biknem, na bai yu stap gut.”—SINDAUN 22:4.
1, 2. (a) Olsem wanem Buk Aposel i soim olsem Stiven em “man i gat strongpela bilip, na Holi Spirit i pulap long em”? (b) Wanem samting i soim olsem Stiven em man bilong pasin daun?
STIVEN em “man i gat strongpela bilip, na Holi Spirit i pulap long em.” Na em man God “i givim strong long em.” Em i wanpela disaipel bilong Jisas i save wokim ol kain kain bikpela mirakel namel long ol manmeri. Wanpela taim, sampela man i kirap na pait long toktok wantaim Stiven, tasol em i gat “gutpela save tru . . . olsem na ol dispela man i no inap winim tok bilong em.” (Aposel 6:5, 8-10) Dispela i kamapim klia olsem Stiven i bin stadi gut long Tok Bilong God, na em i bin sambai gut long en taim em i autim tok long ol bikman bilong lotu Juda. Ol samting Stiven i stori long en long Aposel sapta 7 i kamapim klia olsem em i gat bikpela laik long save long samting God i tingting pinis long mekim.
2 Stiven em man bilong pasin daun—em i no olsem ol dispela bikman bilong lotu em namba na save bilong ol i mekim na ol i pilim olsem ol i winim ol man nating. (Matyu 23:2-7; Jon 7:49) Maski Stiven i save gut tru long ol tok bilong Baibel, em i orait long kisim wok bilong “tilim kaikai” bambai ol aposel i ken wok oltaim “long beten na long helpim ol manmeri long tok bilong God.” Stiven i gat gutpela nem namel long ol brata, olsem na em i wanpela bilong ol 7-pela man ol i makim bilong lukautim dispela wok bilong tilim kaikai long olgeta de. Long pasin daun em i kisim dispela wok.—Aposel 6:1-6.
3. Stiven i lukim wanem samting i narakain tru i kamapim marimari bilong God?
3 Jehova i lukim gutpela pasin bilong Stiven—em man bilong pasin daun, na tu, em i save tingim ol samting bilong spirit na holimpas bilip. Taim Stiven i autim tok long ol hetman Juda i sindaun long kaunsil, ol birua i “lukim pes bilong en i lait olsem pes bilong wanpela ensel.” (Aposel 6:15) Ol i lukim olsem em i stap bel isi, pes bilong em i lait olsem pes bilong wanpela ensel. Taim Stiven i autim tok pinis long ol kaunsil, em i lukim samting i narakain tru i kamapim marimari bilong God. “Holi Spirit i pulap long Stiven, na em i lukluk i go antap long heven. Em i lukim gutpela lait na bilas bilong God long heven, na em i lukim Jisas i sanap i stap long han sut bilong God.” (Aposel 7:55) Dispela samting Stiven i lukim long samting olsem driman em i strongim bilip bilong em olsem Jisas em i Pikinini Bilong God na em i Mesaia. Samting Stiven i lukim i strongim em na i helpim em long bilip tru olsem Jehova i orait long em.
4. Jehova i save kamapim glori bilong em long wanem kain man?
4 Samting Stiven i lukim i soim olsem Jehova i save kamapim glori bilong em na samting em i tingting pinis long mekim long ol man i stap aninit long em na i gat pasin daun na i tingim pasin bilong ol long pas gut wantaim God i bikpela samting. Baibel i tok, “sapos yu daunim yu yet na yu stap aninit long Bikpela, bai yu gat planti mani samting na biknem, na bai yu stap gut.” (Sindaun 22:4) Olsem na yumi mas save pasin daun em i wanem samting tru, na yumi inap kisim dispela pasin olsem wanem, na taim yumi kamapim dispela pasin long olgeta samting yumi mekim, dispela bai helpim yumi olsem wanem.
Pasin Daun—Wanpela Pasin Bilong God Yet
5, 6. (a) Pasin daun i makim wanem samting? (b) Olsem wanem Jehova i bin mekim pasin daun? (c) Pasin daun bilong Jehova i mas kirapim yumi long mekim wanem?
5 Ating sampela i kirap nogut long save olsem God Jehova, em nambawan bikpela bilong heven na graun, em i nambawan gutpela piksa tru long mekim pasin daun. King Devit i tokim Jehova: “Bikpela, yu bin kisim bek mi long han bilong ol birua. Yu givim mi hap plang bilong yu na mi hait i stap baksait long en. Yu bin holim han bilong mi na mi sanap strong. Yu bin bekim singaut bilong mi, olsem na mi gat biknem long ai bilong ol manmeri [“na pasin daun bilong yu bai givim biknem long mi,” NW ].” (Song 18:35) Taim Devit i stori long pasin daun bilong Jehova, em i mekim wok long wanpela tok Hibru olsem “lindaun.” Dispela tok Hibru i makim “pasin daun,” na tu em inap makim “pasin bilong daunim yu yet.” Olsem na Jehova i mekim pasin daun taim em i lindaun, olsem daunim em yet, bilong mekim sampela wok wantaim sinman Devit na makim em long stap king olsem mausman bilong Em. Olsem het tok bilong Song 18 i kamapim, Jehova i bin lukautim na helpim Devit na kisim bek em “long han bilong Sol na long han bilong olgeta arapela birua bilong en.” Devit i save olsem biknem em inap kisim olsem king, em bai kisim, long wanem, Jehova i mekim pasin daun na helpim em. Dispela save i helpim Devit long bihainim pasin daun.
6 Olsem wanem long yumi yet? Jehova i bin lainim yumi long tok i tru, na ating em i bin givim yumi sampela gutpela wok long rot bilong oganaisesen bilong em, o em i bin mekim sampela wok long yumi bilong kamapim laik bilong em. Yumi mas pilim olsem wanem long ol dispela samting? Dispela i mas kirapim yumi long daunim yumi yet. Yumi mas tenkyu long Jehova i bin mekim pasin daun na yumi mas abrusim pasin bilong litimapim nem bilong yumi yet, long wanem, dispela pasin bai nogutim yumi.—Sindaun 16:18; 29:23.
7, 8. (a) Olsem wanem Jehova i bin kamapim pasin daun long samting em i mekim long Manase? (b) Olsem wanem Jehova, na Manase tu, i stap gutpela piksa yumi ken bihainim long mekim pasin daun?
7 Jehova i bin mekim bikpela pasin daun taim em i daunim em yet bilong mekim sampela wok wantaim ol man i gat sin, na tu, em i bin soim olsem em i redi long marimari long ol man nating na em i litimapim ol man i daunim ol yet. (Song 113:4-7) Tingim King Manase bilong Juda. Em i bin mekim wok nogut long bikpela namba bilong em olsem king bilong helpim lotu giaman na em i “mekim planti sin moa long ai bilong Bikpela, na dispela pasin nogut bilong en i mekim Bikpela i belhat moa yet.” (2 Stori 33:6) Bihain Jehova i givim strafe long Manase na larim king bilong Asiria i rausim em long wok king bilong em. Long kalabus, Manase “i daunim em yet long ai bilong God, Bikpela,” olsem na Jehova i larim em i kamap king gen long Jerusalem, na nau Manase “i save gut olsem, Bikpela tasol em i God.” (2 Stori 33:11-13) Yes, Jehova i amamas long Manase i mekim pasin daun, na Em yet i kirap na mekim pasin daun na lusim rong bilong Manase na larim em i kamap king gen.
8 Pasin bilong Jehova long redi long lusim rong bilong Manase na pasin bilong Manase long tanim bel, dispela i skulim yumi long sampela bikpela samting bilong pasin daun. Oltaim yumi mas tingim olsem pasin yumi mekim long ol man i bin rongim yumi na pasin yumi kamapim taim yumi yet i mekim sin, dispela inap stiaim samting Jehova i mekim long yumi yet. Sapos yumi redi long lusim rong bilong ol arapela na long pasin daun yumi tokaut long rong bilong yumi yet, yumi ken ting olsem Jehova bai marimari long yumi.—Matyu 5:23, 24; 6:12.
God i Save Kamapim Glori Bilong Em Long Ol Man i Gat Pasin Daun
9. Pasin daun i makim olsem man i no gat bun? Stori long dispela.
9 Tasol no ken ting olsem pasin daun na pasin bilong daunim yu yet i makim olsem man i no gat bun o em i orait long ol arapela i mekim rong. Olsem Baibel i kamapim klia, Jehova em man bilong pasin daun, tasol em i save kamapim stretpela kros na bikpela strong bilong em taim em i mas mekim olsem. Jehova i gat pasin daun, olsem na em i tingim na helpim ol man i daunim ol yet, tasol em i save stap longwe long ol man i gat pasin antap. (2 Samuel 22:28) Olsem wanem Jehova i bin tingim na helpim ol wokboi bilong em i gat pasin daun?
10. Jehova i kamapim wanem samting long ol man i gat pasin daun, olsem 1 Korin 2:6-10 i tok?
10 Long taim na long rot Jehova i bin makim bilong givim tok long ol man, em i bin kamapim long ol man i gat pasin daun save bilong samting em i tingting pinis long mekim. Dispela gutpela save i stap hait long ol man i gat pasin antap, em ol i strong long bihainim save bilong ol man bilong graun. (1 Korin 2:6-10) Tasol Jehova i bin helpim ol man i gat pasin daun long kisim stretpela save long samting em i tingting pinis long mekim, na dispela save i kirapim ol long givim biknem long Jehova, long wanem, ol i pilim moa yet biknem bilong em.
11. Long taim bilong ol aposel, sampela i mekim wanem na dispela i kamapim olsem ol i no gat pasin daun? Dispela i nogutim ol olsem wanem?
11 Long taim bilong ol aposel, planti man, em sampela i tok ol i Kristen, ol i kamapim olsem ol i no gat pasin daun—ol i pundaun long ol tok aposel Pol i kamapim long ol bilong samting God i tingting pinis long mekim. Pol i kamap wanpela aposel namel long “ol manmeri bilong ol arapela lain,” tasol lain na skul na krismas bilong em na ol gutpela wok longtaim em i bin mekim, dispela i no mekim na em i kamap aposel, nogat. (Rom 11:13) Planti man, em ol i no tingim ol samting bilong spirit, ol i ting Jehova i mas tingim ol dispela samting taim em i makim wanpela man long mekim wok bilong em. (1 Korin 1:26-29; 3:1; Kolosi 2:18) Tasol Jehova i bin tingim Pol na makim em, long wanem, dispela i stret wantaim gutpela-pasin-sori bilong em na samting em i tingting pinis long mekim. (1 Korin 15:8-10) Ol man Pol i kolim olsem “namba wan aposel,” na sampela birua moa, ol i no laik daun long Pol na long ol tok bilong Baibel em i toktok long en. Ol i no gat pasin daun, na dispela i pasim ol long kisim save na kliagut long samting Jehova i tingting pinis long mekim. Nogut yumi long nau i daunim na skelim ol man Jehova i bin makim bilong kamapim laik bilong em, a?—2 Korin 11:4-6.
12. Olsem wanem stori bilong Moses i soim olsem Jehova i save mekim gut long ol man i gat pasin daun?
12 Tasol stori bilong planti man long Baibel i kamapim klia olsem God i bin larim ol man i gat pasin daun long lukim liklik hap lait bilong glori bilong em. Moses “em i man bilong daunim em yet,” winim olgeta arapela man, na em i bin lukim glori bilong God na em i bin pas gut wantaim God olsem gutpela pren. (Namba 12:3) God i bin givim kain kain blesing long dispela man i gat pasin daun, inap 40 yia samting long Poin Bilong Arebia em i bin was long ol sipsip, em wanpela wok i no gat nem. (Kisim Bek 6:12, 30) Jehova i helpim Moses na em i kamap mausman bilong lain bilong Israel na em i go pas long stretim ol wok bilong dispela lain. Em i save toktok wantaim God na God i toktok wantaim em. Long “samting olsem driman,” em i “lukim” Jehova. (Kisim Bek 24:10, 11, NW; Namba 12:7, 8) God i bin mekim gut tu long ol man i bilip long dispela wokboi i gat pasin daun em i stap mausman bilong God. Na God bai mekim gut tu long yumi sapos yumi bihainim tok na bilip long dispela profet i winim Moses, em Jisas, wantaim “wokboi i gat gutpela tingting” em i bin makim.—Matyu 24:45, 46; Aposel 3:22.
13. Olsem wanem glori bilong Jehova i bin kamap long ol wasman bilong sipsip?
13 “Bikpela lait,” o glori, bilong Jehova i bin kamap long husat na ensel i tokaut long ol long wanpela meri i bin karim pikinini, “em i Bikpela, na em i man God i makim bilong kisim bek ol manmeri”? Dispela i no kamap long ol hetman bilong lotu i gat pasin antap o long ol man i gat bikpela namba, nogat. Em i kamap long ol wasman bilong sipsip, em ol man nating i “stap ausait long taun, na ol i was long ol sipsip bilong ol long nait.” (Luk 2:8-11) Long ai bilong ol arapela, ol dispela man i no gat nem o namba. Tasol Jehova i tingim ol na ol i namba wan lain em i tokim ol long meri i karim Mesaia. Yes, Jehova i save kamapim glori bilong em long ol man i gat pasin daun na i stap aninit long em.
14. God bai givim wanem ol blesing long ol man i gat pasin daun?
14 Ol dispela stori i lainim yumi long wanem samting? Olsem: Jehova i save mekim gut long ol man i gat pasin daun na em i givim save long ol long samting em i tingting pinis long mekim. Em i makim ol man em sampela i olsem man nating na em i mekim wok long ol bilong tokim ol narapela long samting em bai mekim. Dispela samting yumi lainim pinis i mas kirapim yumi long lukluk i go yet long Jehova, na long Tok bilong em, na long oganaisesen bilong em, bilong soim rot long yumi. Yumi ken bilip olsem Jehova bai wok yet long autim save long ol wokboi bilong em i gat pasin daun long ol samting em i tingting pinis long mekim. Profet Amos i tok: “Olgeta samting God, Bikpela i laik mekim, em i save autim pastaim long ol wokman bilong en, em ol profet, na bihain em i save mekim olsem em i bin tok.”—Amos 3:7.
Wok Long Kisim Pasin Daun na Kisim Blesing
15. Bilong wanem yumi mas wok long holimpas pasin daun? Olsem wanem dispela i kamap klia long stori bilong King Sol bilong Israel?
15 Bilong God i ken orait long yumi, yumi mas holimpas pasin daun na bihainim yet. Yumi no ken ting olsem man i bihainim pasin daun, em bai holim yet dispela pasin, nogat. Em inap lusim pasin daun na kirap bihainim pasin antap na litimapim nem bilong em yet—em samting i kamapim pasin bilong bikhet na bagarap. Sol, namba wan man God i makim long kamap king bilong Israel, i bin mekim olsem. Pastaim Sol i bin ting em i “olsem samting nating.” (1 Samuel 15:17) Tasol taim em i mekim wok king 2-pela yia pinis, em i kirap mekim pasin bikhet. Sol i sakim rot Jehova i bin stretim long mekim ol ofa—em profet Samuel—na em i wokim eskius long em yet i bin kirap na mekim ol ofa. (1 Samuel 13:1, 8-14) Bihain em i mekim sampela samting moa i kamapim klia olsem em i no gat pasin daun. Olsem na God i tekewe spirit bilong em long Sol na em i no orait moa long em—dispela i mekim na bihain Sol i dai long wanpela pasin i semim em. (1 Samuel 15:3-19, 26; 28:6; 31:4) Dispela i givim skul long yumi olsem: Yumi mas wok long holimpas pasin daun, na daun long God, na kilim i dai pasin bilong tingim yumi yet i bikpela man, na long dispela rot bai yumi inap abrusim ol pasin bilong bikhet em i save mekim na Jehova i no laikim yumi moa.
16. Taim yumi tingim pasin bilong yumi long pas gut wantaim Jehova na i stap bilong yumi wantaim ol arapela, olsem wanem dispela inap helpim yumi long kisim pasin daun?
16 Tru, pasin daun i no stap long lista bilong ol pasin em holi spirit i kamapim, tasol em wanpela gutpela pasin yumi mas kisim. (Galesia 5:22, 23; Kolosi 3:10, 12) Em samting bilong tingting—olsem yumi gat wanem tingting long yumi yet na ol arapela—olsem na bilong kisim pasin daun, yumi mas kirap na mekim sampela wok. Pasin bilong skelim na tingim tingim long bel pasin bilong yumi long pas gut wantaim Jehova na ol arapela, dispela inap helpim yumi long bihainim pasin daun. Long ai bilong God, olgeta sinman i olsem grinpela gras i stap liklik taim tasol na bihain em i drai na pinis olgeta. Ol man bilong graun i olsem grasopa tasol. (Aisaia 40:6, 7, 22) Yu ting i gat as na wanpela gras i ken hambak long em i longpela, winim ol arapela gras? I gat as na wanpela grasopa i ken hambak long em inap kalap i go longwe, winim ol arapela grasopa? Nogat tru! Olsem na aposel Pol i kirapim ol wanbilip Kristen long tingim dispela tok: “Pren, olsem wanem? Husat i putim yu i stap bikman? Yu gat wanpela gutpela samting yu no bin kisim long God, a? Na sapos i tru yu bin kisim olgeta samting long han bilong God, orait bilong wanem yu litimapim nem bilong yu yet, olsem yu yet yu bin kamapim ol dispela samting?” (1 Korin 4:7) Taim yumi tingim tingim kain skripsa olsem, dispela inap helpim yumi long kisim na kamapim pasin daun.
17. Wanem samting i bin helpim profet Daniel long kisim pasin daun? Wanem samting bai helpim yumi long mekim olsem?
17 Profet Daniel em man God i ‘laikim em tumas,’ long wanem, em i gat pasin daun, em i bin ‘daunim em yet.’ (Daniel 10:11, 12) Wanem samting i bin helpim Daniel long kisim pasin daun? Namba wan samting, Daniel i bilip tru long Jehova, na oltaim em i beten long em. (Daniel 6:10, 11) Na tu, em i save stadi gut long Tok Bilong God, na dispela i helpim em long putim tingting i go long samting God i tingting pinis long mekim. Na tu, em i redi long tokaut long ol pasin kranki bilong em yet, na i no bilong lain bilong em tasol. Na em i gat laik tru long litimapim stretpela pasin bilong God, i no bilong em yet. (Daniel 9:2, 5, 7) Olsem wanem? Yumi inap kisim skul long dispela gutpela pasin bilong Daniel na wok long kisim na kamapim pasin daun long olgeta samting yumi mekim?
18. Wanem kain biknem i wetim ol man i save mekim pasin daun long nau?
18 Sindaun 22:4 i tok: “Sapos yu daunim yu yet na yu stap aninit long Bikpela, bai yu gat planti mani samting na biknem, na bai yu stap gut.” Yes, Jehova i save mekim gut long ol man i gat pasin daun, na ol i kisim biknem na ol i stap gut. Klostu Asap, man bilong raitim song, i lusim wok bilong God em i mekim, tasol taim Jehova i stretim pinis tingting bilong em, em i mekim pasin daun na i tok: “Yu save givim mi gutpela tok bilong stiaim wokabaut bilong mi, na bihain bai yu kisim mi [“na givim biknem long mi,” NW ].” (Song 73:24) Olsem wanem long yumi long nau? Wanem kain “biknem” i wetim ol man i kamapim pasin daun? Jehova bai orait long ol na ol bai stap gutpela pren bilong em, na tu, ol i ken wet long lukim truim bilong ol tok em holi spirit i bin kirapim King Devit long mekim: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” Gutpela samting tru i wetim ol!—Song 37:11.
Yu Inap Tingim?
• Olsem wanem Stiven i stap gutpela piksa bilong man i gat pasin daun em Jehova i kamapim glori bilong em long en?
• Wanem sampela samting God Jehova i bin mekim bilong kamapim pasin daun?
• Stori bilong husat i soim olsem Jehova i save kamapim glori bilong em long ol man i gat pasin daun.
• Olsem wanem pasin bilong Daniel inap helpim yumi long kisim pasin daun?
[Blok long pes 12]
Em i Gat Strongpela Tingting, Tasol Em i Gat Pasin Daun Tu
Long 1919 long wanpela kibung bilong ol Sumatin Bilong Baibel (nau ol Witnes Bilong Jehova), long Cedar Point, Ohio, Amerika, J. F. Rutherford, em i gat 50 krismas na long dispela taim em i go pas long lukautim wok, em i amamas long volantia long karim ol sutkes na bringim ol man i kam long kibung i go long rum bilong ol. Long laspela de bilong kibung, em i kirapim tru ol 7,000 manmeri i kam bung, taim em i tok: “Yupela wan wan i olsem mausman bilong King bilong olgeta king na Bikman bilong olgeta bikman, na yupela i wok long tokaut long ol man . . . long gutpela kingdom bilong Bikpela bilong yumi.” Tru, Brata Rutherford em man bilong strongpela bilip na em i gat nem olsem man i save tokaut strong long ol samting em i bilip em tok i tru, tasol tu, em i save daunim em yet long ai bilong God, em samting i save kamap ples klia long ol beten em i mekim long ol bung bilong lotu long moningtaim long Betel.
[Piksa long pes 9]
Stiven, em i save gut long ol tok bilong Baibel, em i mekim pasin daun na tilim kaikai
[Piksa long pes 10]
Manase i mekim pasin daun na Jehova i amamas long dispela
[Piksa long pes 12]
Wanem samting i mekim na God i ‘laikim Daniel tumas’?