Man i Gat Pasin Daun Em i Ken Amamas
“God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.”—1 PITA 5:5.
OLSEM WANEM? Yumi inap daunim yumi yet na i stap amamas tu? Jisas em i nambawan man tru i bin i stap long graun, na long wanpela bikpela tok em i bin mekim long maunten, em i kolim 9-pela amamas. (Matyu 5:1-12) Olsem wanem? Jisas i bin bungim pasin daun wantaim amamas? Em i bin mekim olsem. Insait long dispela 9-pela samting bilong amamas, planti taim em i bungim pasin daun wantaim. Em i tok, man i mas i gat pasin daun na bai em i ken pilim olsem em i sot long ol samting bilong spirit. Dispela kain man tasol i save hangre long stretpela pasin. Man i gat pasin antap em i no man bilong pasin isi o marimari o i stap isi wantaim ol man.
2 Man i gat pasin daun em i amamas, long wanem, i stret em i mekim olsem. Na em i amamas, long wanem, pasin daun em i pasin bilong man i gat gutpela tingting. Em i save em i man nating tasol, na nau em inap i stap gut wantaim God Jehova na ol narapela Kristen. Na taim man i daunim nem bilong em yet, em i save amamas, long wanem, dispela i makim olsem em i sori long ol narapela man.
3 Yumi mas i gat pasin daun, long wanem, yumi olgeta i gat sin na yumi save popaia. Pol i tok: “I no gat wanpela gutpela samting i stap insait long mi. Mi tok long olpela bel bilong mi tasol. Tru, mi laik mekim gutpela pasin, tasol mi no inap mekim.” (Rom 7:18) Yumi olgeta i gat sin na yumi sot long gutpela mak God i laikim. (Rom 3:23) Sapos yumi save yumi no gutpela manmeri tumas, dispela tingting bai helpim yumi na bai yumi no ken mekim pasin antap. Yumi mas i gat pasin daun na bai yumi inap tokaut stret olsem yumi bin mekim popaia, na sapos yumi gat pasin daun, orait, taim yumi mekim popaia yumi no putim asua i go long narapela man—yumi tok em asua bilong yumi yet. Planti taim yumi laik mekim gut wanpela samting tasol yumi sot tru na yumi no inap winim mak bilong en, olsem na i gat as na yumi mas i gat pasin daun.
4 Pol i kolim narapela as tu na yumi mas daunim yumi yet. Em i tok: “Yu gat wanpela gutpela samting yu no bin kisim long God, a? Na sapos i tru yu bin kisim olgeta samting long han bilong God, orait bilong wanem yu litimapim nem bilong yu yet, olsem yu yet yu bin kamapim ol dispela samting?” (1 Korin 4:7) Sapos yumi hambak na litimapim nem bilong yumi yet, o yumi hambak long ol kago samting bilong yumi, o long save bilong yumi, o ol wok samting yumi bin mekim, dispela pasin i no stret. Sapos yumi daunim yumi yet, bel bilong yumi bai i stap stret long ai bilong God, na bai yumi “wokabaut stret long olgeta taim.”—Hibru 13:18.
5 Sapos yumi bihainim pasin i stret na yumi no giaman, orait, taim yumi popaia yumi mekim pasin daun na tok em asua bilong yumi tasol, na yumi no sutim asua i go long narapela. Adam i bin sutim asua i go long Iv. Tasol Devit i no bin mekim olsem long Batseba. Em i no tok, ‘Batseba i waswas long ples klia, na asua bilong em na bel bilong mi i kirap.’ (Stat 3:12; 2 Samuel 11:2-4) Sapos yumi tok stret, dispela bai helpim yumi long i stap daun, na sapos yumi stap daun, dispela bai helpim yumi long mekim pasin i stret.
Bilip Long Jehova na Stap Daun
6 Sapos yumi bilip long Jehova, dispela tu bai helpim yumi long daunim nem bilong yumi. Bai yumi pilim tru olsem em i Man bilong wokim yumi, na em i Nambawan King, tasol yumi i man nating tasol. Aisaia 40:15, 22 i kamapim gut dispela samting na i tok: “Bikpela i lukim ol manmeri . . . ol i olsem das bilong graun na i olsem liklik wara i pundaun. . . . Long ai bilong em, ol manmeri bilong graun i samting nating olsem ol grasopa.”
7 Na sapos yumi bilip long Jehova na sampela i sutim tok giaman samting long yumi, yumi no bel hevi tumas. Yumi daun na wetim Jehova i stretim dispela, olsem Song 37:1-3, 8, 9 i tok. Pol tu i tok: “Yupela yet i no ken bekim rong ol i mekim long yupela. Yupela i mas larim God i belhat long ol. . . . God i gat tok olsem, ‘Bekim rong, em i wok bilong mi.’ ”—Rom 12:19.
Pasin Daun Em Pasin Bilong Gutpela Tingting
8 I gat planti as na yumi mas mekim pasin daun. Yumi tok pinis, dispela bai helpim yumi long i stap gut long God. Sindaun 16:5 i tok: “Bikpela i no laikim tru ol man i save hambak na litimapim nem bilong ol yet.” Na Sindaun 16:18 i tok: “Pasin bilong hambak na litimapim nem bilong yu yet bai i mekim yu i pundaun na bagarap.” Bagarap bai painim ol man i hambak na litimapim nem bilong ol yet, long wanem, 1 Pita 5:5 i tok: “Yupela olgeta i mas bihainim pasin bilong daunim yupela yet na i stap aninit long ol arapela . . . ‘God i save daunim ol man i apim nem bilong ol yet, tasol em i save . . . mekim gut long ol man i daunim ol yet.’ ” Jisas i bin mekim wankain tok taim em i tok piksa long Farisi na man bilong kisim takis em tupela i beten, na pasin dispela man bilong kisim takis i mekim i kamapim klia olsem em tasol i stretpela man long ai bilong God, na narapela nogat.—Luk 18:9-14.
9 Man i gat gutpela tingting em i save daun na i no hatwok long bihainim tok bilong Jems 4:7: “Yupela i mas daunim yupela yet na i stap aninit long God.” Olsem na taim Jehova i larim hevi i painim yumi, sapos yumi gat pasin daun yumi no bel nogut na bikhet. Yumi orait tasol na karim wanem kain hevi i painim yumi. Bikhetman i save toktok planti na krai long kisim ol samting, na taim wanpela hevi i painim em, em i save bel nogut na bikhet. Tasol man i gat pasin daun em i orait long karim ol dispela hevi olsem Jop i bin mekim. Ol samting bilong Jop i lus, na bikpela sik na pen i painim em, na meri bilong em i subim em long kamap bikhet na em i tok: “ ‘Yu lusim [God] na tok nogut long em na yu ken i dai.’ Tasol Jop i bekim tok olsem, ‘Tok bilong yu i olsem tok bilong kranki meri tru. Sapos yumi save kisim ol gutpela samting God i givim long yumi, orait bilong wanem yumi no inap kisim tu ol hevi em i mekim i kamap long yumi?’ . . . Taim nogut i painim Jop, tasol em i no mekim wanpela tok nogut long God.” (Jop 2:9, 10) Jop i gat pasin daun na em i no bikhet long ol hevi Jehova i larim i painim em. Bihain Jehova i mekim gut tru long em.—Jop 42:10-16; Jems 5:11.
Pasin Daun i Helpim Yumi Long Stap Gut Wantaim Ol Man
10 Sapos yumi gat pasin daun bai yumi stap gut wantaim ol narapela Kristen. Pol i tok: “Yupela i no ken tingting long yupela yet tasol, na wok long kamapim biknem bilong yupela. Nogat. Yupela i mas daunim yupela yet na yupela i mas ting pasin bilong ol arapela i winim pasin bilong yupela.” (Filipai 2:3, 4) Sapos yumi gat pasin daun yumi no tingting long winim ol narapela. Kain tingting olsem bai kamapim hevi long yumi na ol narapela Kristen tu.
11 Planti taim pasin daun inap helpim yumi na bai yumi no ken popaia. Sapos yumi gat pasin daun yumi no ting yumi gat strong na save inap tru long mekim ol samting. Pol i tok: “Sapos wanpela man i ting em i sanap strong, orait em i mas lukaut gut. Nogut em i pundaun.” (1 Korin 10:12) Man i hambak na i gat pasin antap em i save bilip long strong bilong em tasol, na taim ol samting i pulim em nabaut em i bihainim tingting bilong em yet na mekim planti popaia.
12 Na pasin daun bai helpim yumi long i stap daun long ol narapela tu. Efesus 5:21 i tok: “Yupela wan wan i mas i stap aninit long ol arapela manmeri bilong God.” Yumi olgeta i mas i gat pasin daun, a? Em i stret. Pikinini i mas daun long papamama, na meri i mas daun long man bilong em, na man i mas daun long Krais. (1 Korin 11:3; Efesus 5:22; 6:1) Na long ol kongrigesen Kristen, ol brata sista, na ol wokman bilong kongrigesen tu, ol i mas daun long ol elda. Na ol elda i mas daun long lain bilong lukautim oganaisesen, em wasman sekit i maus bilong ol. Na wasman sekit i mas daun long wasman distrik, na wasman distrik i mas daun long Komiti Bilong Brens. Na olgeta wan wan long Komiti Bilong Brens “i mas i stap aninit long ol arapela” na long Lain Bilong Bosim Ol Witnes, em ol i olsem maus bilong “wokboi i gat gutpela tingting,” na dispela “wokboi” i mas i stap aninit long King Krais Jisas. (Matyu 24:45-47) Dispela Lain Bilong Bosim Ol Witnes, ol wan wan i mas harim tingting bilong ol narapela, na sapos planti i no wanbel wantaim tingting bilong wanpela, em i mas lusim dispela tingting. Tru tumas, yumi olgeta i mas mekim pasin daun, long wanem, yumi olgeta i stap aninit long ol narapela.
13 Na sapos yumi gat pasin daun yumi no hatwok long harim tok bilong man i laik stretim yumi. Sampela taim yumi olgeta i mas kisim tok bilong stretim yumi. Sindaun 19:20 i tok: “Sapos yu larim man i skulim yu na givim gutpela tingting long yu, orait bihain bai yu gat gutpela tingting na save.” Sapos yumi gat pasin daun na man i laik stretim yumi, yumi no bel hevi long tok bilong em. Long Hibru 12:4-11 Pol i tok, sapos yumi gat gutpela tingting bai yumi harim tok bilong man i laik stretim yumi, olsem bai yumi inap wokabaut gut long pasin i stret, na bihain yumi ken i stap laip oltaim. Em gutpela prais tru, a?
14 Yumi ken tingim aposel Pita. Pol i bin givim strongpela tok long Pita bilong stretim em. Pol i tokim em: “Yu wanpela man bilong lain Juda. Tasol yu bihainim pasin olsem yu man bilong arapela lain, na i no olsem yu man bilong lain Juda. Olsem na watpo yu strong long ol man bilong ol arapela lain long ol i mas bihainim pasin bilong ol Juda?” (Galesia 2:14) Yu ting Pita i bel hevi o kros long dispela tok Pol i givim long em? Ating em i bel hevi liklik pastaim, tasol bihain nogat, long wanem, bihain em i tok: “God i bin givim gutpela save long brata tru bilong yumi Pol.”—2 Pita 3:15, 16.
15 Na yumi mas amamas long wok bilong yumi na ol samting Jehova i bin givim long yumi o larim yumi i mekim. Kristen i gat pasin daun em i mas ting olsem: “Wanem traim o hevi God i larim i kamap long mi, mi inap karim.” Pol i mekim kain tok olsem, em i tok: “Ol traim i bin kamap long yupela, . . . ol i wankain olsem ol traim i save kamap long olgeta man. Na God i . . . no inap larim wanpela bilong ol traim i . . . winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. . . . Em bai i mekim yupela i sanap strong, na dispela traim bai i no inap daunim yupela.” (1 Korin 10:13) Em nau, sapos yumi gat pasin daun yumi bihainim gutpela tingting, long wanem, em bai helpim yumi long i stap amamas tasol, maski wanem traim o hevi i painim yumi.
Pasin Sori i Helpim Pasin Daun
16 Sapos yumi gat pasin sori a·gaʹpe, dispela bai helpim yumi long mekim pasin daun. Olsem wanem na Jisas inap mekim pasin daun na karim pen long taim ol i nilim em long diwai, olsem Pol i tok long Filipai 2:5-8? Na bilong wanem Jisas i no laik kisim biknem olsem bilong God? Long wanem, em i “laikim tru Papa.” (Jon 14:31) Dispela i as na long olgeta taim em i wok long givim biknem tasol long Jehova, em Papa bilong em long heven. Wanpela taim em i tok, Papa wanpela tasol em i gutpela.—Luk 18:18, 19.
17 Wanpela man bilong raitim stori long bipo, em John Greenleaf Whittier bilong Amerika, em i stori long taim em i yangpela na em i bin laikim wanpela yangpela meri, na meri i laikim em tu, na taim tupela i bin stap long skul tupela i lain long spelim sampela tok, na meri i spelim stret, tasol man nogat, olsem na meri i bel hevi na i tok: “Mi sori tru long mi bin spelim olsem. Mi no laik winim yu, long wanem, mi laikim yu tumas.” Em nau, sapos yumi laikim tru narapela, yumi no laik antap long em—yumi laik i stap daun long em.
18 Dispela stori i ken lainim olgeta Kristen, na ol brata tu, long bihainim pasin daun. Sapos wanpela brata i kisim gutpela wok o namba insait long kongrigesen, bai yumi mekim wanem? Bai yumi amamas long em i bin kisim dispela wok o bai yumi bel nogut long em, long wanem, yumi no bin kisim? Sapos yumi laikim em tru, bai yumi amamas long em i kisim dispela wok. Tru tumas, pasin daun bai helpim yumi long bihainim tok bilong Rom 12:10 i tok: “Givim bel bilong yupela long ol arapela manmeri bilong God, na laikim ol tru olsem ol brata bilong yupela stret. Yupela i mas strong long litimapim nem bilong ol arapela tasol.” Na Galesia 5:13 i tok: “Yupela wan wan i mas i stap olsem wokboi bilong ol arapela . . . na yupela i mas givim bel bilong yupela long ol.” Sapos yumi laikim tru ol brata, bai yumi wok strong long helpim ol na mekim wok bilong ol, na yumi putim laik bilong ol i go pas long laik bilong yumi yet. Yumi mas i gat pasin daun bilong mekim olsem. Na pasin daun bai helpim yumi na yumi no ken tok hambak long ol samting bilong yumi yet, em dispela pasin i save kirapim ol narapela long mangal long samting yumi hambak long en. Pol i tok, sapos yumi gat pasin sori bai yumi no “bel nogut long ol man i gat planti samting” o “litimapim nem” bilong yumi yet. Man i mekim dispela kain pasin, em i save tingim em yet, tasol man i gat pasin sori em i no tingim laik bilong em yet—em i tingim ol narapela man.—1 Korin 13:4.
19 Stori bilong i stap bilong Devit wantaim King Sol na pikinini bilong em Jonatan i ken lainim yumi olsem pasin bilong laikim tru ol narapela em i poroman wantaim pasin daun, na pasin antap na hambak i poroman wantaim pasin bilong tingting long yumi yet tasol. Devit i winim planti pait, na ol meri bilong Israel i singsing olsem: “Sol i kilim planti tausen man. Na Devit i kilim planti planti tausen.” (1 Samuel 18:7) Sol i gat pasin antap na em i bel nogut long dispela tok. Em i laik bai em i stap namba wan. Olsem na nau em i belhat long Devit na i wok long biruaim em. Tasol Jonatan i no olsem. Em i laikim tru Devit olsem em i laikim em yet. (1 Samuel 18:1) Jehova i wok long mekim gut long Devit, na Jehova i no makim Jonatan long kamap king na senisim Sol, nogat; em i makim Devit. Tasol Jonatan i no bel nogut long dispela. Em i no olsem papa bilong em. Em i laikim tumas Devit, na em i tokim Devit: “Yu no ken pret. Papa bilong mi i no inap bagarapim yu. Bihain bai yu kamap king bilong Israel, na mi bai stap namba tu bilong yu.” (1 Samuel 23:17) Jonatan i laikim tru Devit, olsem na em i bihainim pasin daun na em i orait long laik bilong God long larim Devit i senisim Sol long i stap king bilong Israel.
20 Na i gat narapela samting i kamap na yumi save, pasin sori na pasin daun i poroman wantaim. Jon 13:1 i stori long laspela nait Jisas i bin stap wantaim ol aposel bilong em paslain long taim em i dai, na i tok, “em i laikim tumas ol . . . na em i laikim ol moa yet i go inap long taim em i dai.” Na em i mekim pasin daun na wasim lek bilong ol aposel, olsem wanpela wokman i save mekim. Dispela i mas lainim yumi tu long mekim pasin daun.—Jon 13:1-11.
21 I gat planti as na yumi mas bihainim pasin daun. I stret yumi mas mekim olsem. Man i bilip tru em i save mekim pasin daun. Na sapos yumi gat dispela pasin yumi inap i stap gut wantaim God Jehova na ol brata sista, em ol wanbilip bilong yumi. Na tu, em i pasin bilong man i gat tingting. Na bikpela samting tru, em i pasin bilong sori na laikim tru ol narapela, na em i helpim yumi long i stap amamas.
Bai Yu Bekim Olsem Wanem?
◻ Olsem wanem stretpela pasin bai helpim yumi long mekim pasin daun?
◻ Sapos yumi bilip long Jehova, olsem wanem dispela bai helpim yumi long i stap daun?
◻ Olsem wanem pasin daun em i pasin bilong man i gat gutpela tingting?
◻ Olsem wanem pasin sori i helpim yumi long i stap daun?
[Askim Bilong Stadi]
1, 2. Taim Jisas i mekim bikpela tok bilong em long maunten, olsem wanem em i makim klia olsem pasin daun em i poroman wantaim amamas?
3. Bilong mekim pasin i stret na yumi no giaman, bilong wanem yumi mas i gat pasin daun?
4. Long 1 Korin 4:7 Pol i kolim wanem as na yumi mas i gat pasin daun?
5. Sapos yumi bihainim pasin i stret, bai yumi mekim wanem long taim yumi popaia?
6, 7. Sapos yumi bilip long Jehova, olsem wanem dispela bai helpim yumi long mekim pasin daun?
8. Bilong wanem yumi mas daunim yumi yet na bai yumi ken stap gut long Jehova?
9. Pasin daun i ken helpim yumi olsem wanem long taim bilong hevi?
10. Olsem wanem pasin daun i helpim yumi long i stap gut wantaim ol narapela Kristen?
11. Sapos yumi gat pasin daun, olsem wanem dispela bai helpim yumi na bai yumi no popaia tumas?
12. Pasin daun bai helpim yumi long bihainim wanem ol tok bilong Baibel?
13, 14. (a) Pasin daun bai helpim yumi long wanem taim? (b) Wanem gutpela pasin daun Pita i bin mekim?
15. Olsem wanem yumi ken i stap daun na stap amamas tu?
16, 17. (a) Stori bilong husat long Baibel i makim wanpela pasin inap helpim yumi long i stap daun? (b) Wanem samting i bin kamap na i makim gut dispela samting?
18. Pasin daun bai helpim yumi long bihainim wanem ol tok bilong Baibel?
19. Wanem stori bilong Baibel i makim olsem pasin sori na pasin daun i poroman wantaim, na pasin antap i poromanim pasin bilong tingim yumi tasol?
20. Jisas i bin mekim wanem na em i kamapim klia olsem pasin sori na pasin daun i poroman wantaim?
21. Bilong wanem yumi mas bihainim pasin daun?
[Piksa long pes 21]
Jop i daun long Jehova. Em i no ‘tok nogut long God na bai em i ken dai’
[Piksa long pes 23]
Pol i stretim Pita long ai bilong ol man, na Pita i daun na harim tok