Olsem Wanem Yu Inap Mekim Pasin Daun Tru?
PASIN daun tru em i bikpela samting long ai bilong God. Jems i tok: “God i save daunim ol man bilong litimapim nem bilong ol yet, tasol em i save marimari na mekim gut long ol man i daunim ol yet.” (Jems 4:6) Taim Jems i raitim dispela tok, ating em i tingim sampela tok i stap long Ol Skripsa Hibru. “Bikpela, yu stap antap tru na yu nambawan, tasol yu save tingting long ol manmeri i no bikhet [olsem man i gat pasin daun]. Na ol bikhetman tu [olsem man i gat pasin antap] i no inap hait long yu.” “Bikpela . . . bai i daunim olgeta hambakpasin bilong ol man i save litimapim nem bilong ol yet, na bai ol i sem nogut tru. Na Bikpela tasol bai i kisim biknem long dispela taim.” “Sapos ol man i tok bilas long ol arapela man, orait God bai i bekim wankain pasin long ol. Tasol em i save mekim gut long ol man i daunim ol yet.”—Song 138:6; Aisaia 2:11; Sindaun 3:34.
Aposel Pita tu i laik kirapim ol narapela long mekim pasin daun. Em i tok: “Yupela olgeta i mas bihainim pasin bilong daunim yupela yet na i stap aninit long ol arapela manmeri bilong God. Yumi save, ‘God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.’ ”—1 Pita 5:5.
Pasin Daun Bilong Krais
Ating bai yu askim olsem: Sapos yumi gat pasin daun, dispela inap helpim yumi olsem wanem? Long ol man i wok strong long i stap Kristen tru, i gat wanpela bekim tasol bilong dispela askim—man i gat pasin daun em i wankain olsem Krais. Jisas i kamapim pasin daun bilong em taim em i orait long kisim wok bilong lusim heven na kam daun long graun na kamap wanpela man nating bilong graun i aninit tru long ol ensel. (Hibru 2:7) Em i Pikinini bilong God, tasol taim ol birua bilong em, em ol bikman bilong lotu, i mekim nogut long em na semim em, em i karim ol dispela hevi. Long taim bilong ol dispela hevi, em i bosim gut bel bilong em, maski em inap singaut long planti ensel moa yet i kam helpim em.—Matyu 26:53.
Bihain ol i hangamapim Jisas long pos olsem wanpela man nogut, tasol em i stap gut long Papa bilong em. Olsem na Pol inap tok long em olsem: “Yupela i mas holim wankain tingting olsem Krais Jisas i bin holim. Em i stap [kain olsem] God tru, tasol em i no ting long holimpas dispela pasin bilong i stap wankain olsem God. Nogat. Em i lusim dispela pasin, na em i kamap olsem wokboi nating. Em i kamap olsem man na ol man i lukim em i stap man tru. Na em i daunim em yet na i bihainim tok bilong God, i go inap long em i dai, yes, inap long em i dai long diwai.”—Filipai 2:5-8.
Orait, olsem wanem yumi inap mekim pasin daun tru? Taim sampela samting i kamap, olsem wanem yumi inap mekim pasin daun na yumi no mekim pasin antap?
Man i Gat Pasin Daun
Orait nau yumi ken stori long pasin daun long ples wok o long wok Kristen bilong autim tok. Bilong wok i ken kamap gutpela, sampela taim i mas i gat ol man bilong bosim wok. Wanpela man i mas tingim ol samting bilong dispela wok. Orait yu gat wanem tingting long dispela? Yu save ting, “Em i ting em i husat na em i tokim mi long ol samting mi mas mekim? Mi stap planti yia pinis long dispela wok, winim em.” Em nau, sapos yu gat pasin antap bai yu bel nogut long i stap aninit long wanpela man. Tasol man i gat pasin daun em i no save ‘tingting long em yet tasol na wok long kamapim biknem bilong em yet. Nogat. Em bai daunim em yet na ting pasin bilong ol arapela i winim pasin bilong em.’—Filipai 2:3.
Taim wanpela man i no gat bikpela krismas olsem yu em i givim wanpela tok long yu bilong helpim yu, o wanpela meri i mekim olsem, yu save mekim wanem? Sapos yu gat pasin daun bai yu skelim na tingim dispela tok. Sapos yu gat pasin antap bai yu bel nogut long en o bai yu sakim dispela tok. Olsem wanem? Yu laik bai ol man i litimapim nem bilong yu o givim gutpela tok gris long yu na bihain dispela bai bagarapim yu? O yu laik kisim ol tok bilong helpim na strongim yu?—Sindaun 27:9; 29:5.
Taim ol hevi i painim yu, yu inap karim ol dispela hevi na sanap strong? Pasin daun bai helpim yu long sanap strong long taim ol hevi i painim yu, olsem Jop i bin mekim. Sapos yu gat pasin antap, ating bai yu bel hevi na mekim pasin bikhet taim sampela hevi i kamap o yu ting wanpela man i mekim tok bilong sutim bel bilong yu.—Jop 1:22; 2:10; 27:2-5.
Man i Gat Pasin Daun i Save Sori na Lusim Rong
Sampela man i save hatwok long tok, “Mi laik tok sori. Mi bin popaia. Tok bilong yu i stret.” Bilong wanem ol i hatwok long tok olsem? Long wanem, ol i gat pasin antap! Tasol sapos man o meri i tok sori, dispela inap pinisim kwik tok pait i kamap namel long tupela marit.
Sapos wanpela man i bagarapim bel bilong yu, yu orait long lusim rong bilong em? O yu gat pasin antap na yu wok long holim dispela rong i stap long bel bilong yu inap sampela de o mun, na yu no laik toktok wantaim dispela man yu ting em i bin rongim yu? Yu wok long bel nogut na mekim pasin birua long em bilong bekim dispela rong? Dispela pasin i bin kirapim sampela man long kilim man i dai. Bilong bekim rong, sampela i save tok baksait long man bilong bagarapim gutnem bilong em. Tasol man i gat pasin daun em i save mekim pasin sori long man na lusim rong bilong em. Bilong wanem? Long wanem, man i gat pasin sori em i no save tingim rong narapela i mekim long em. Jehova i orait long lusim rong bilong ol Israel sapos ol i lusim pasin antap. Man i gat pasin daun na i stap disaipel bilong Jisas, em i orait long lusim rong bilong man, na em i orait long mekim inap planti taim!—Joel 2:12-14; Matyu 18:21, 22; 1 Korin 13:5.
Man i gat pasin daun em i save “strong long litimapim nem bilong ol arapela.” (Rom 12:10) Wanpela Baibel (New International Version) i tok olsem: “Givim biknem long ol narapela, winim bilong yupela.” Yu save litimapim nem bilong ol narapela na amamas long save bilong ol long mekim ol wok samting? O oltaim yu mas painim wanpela liklik pasin kranki long ol bilong daunim gutnem bilong ol? Olsem wanem? Yu inap litimapim nem bilong ol narapela na amamas long mekim olsem? Sapos yu hatwok long mekim, ating pasin antap i pasim yu, o yu pilim olsem yu yet yu no inap mekim gut ol wok samting.
Man i gat pasin antap em i save les kwik long ol man. Man i gat pasin daun em i save isi long ol man na em i no les kwik long ol. Olsem wanem long yu? Sapos yu ting wanpela man i no mekim gutpela pasin long yu, dispela i save skrapim bel bilong yu? Dispela i narapela kain long pasin bilong isi long man na i no les kwik long em. Sapos yu gat pasin daun, bai yu no tingting tumas long yu yet. Tingim samting i bin kamap taim ol disaipel bilong Jisas i tingting tumas long ol yet—ol i kirap mekim tok pait namel long ol yet long husat bai stap nambawan. Ol i lusim tingting olsem olgeta wantaim “i no gutpela wokboi”!—Luk 17:10; 22:24; Mak 10:35-37, 41.
Wanpela man bilong Frans i save raitim buk, nem bilong em Volte, em i stori long pasin daun olsem ‘man i daunim em yet long bel bilong em; em samting i save pinisim pasin antap.’ Em nau, pasin daun i olsem man i daunim em yet. Man i gat pasin daun em i no save mekim pasin antap. Em i save tingim tru ol narapela na givim biknem long ol, na em i save mekim gutpela pasin long ol man.
Olsem na bilong wanem yumi mas wok strong long kamap man bilong pasin daun? Long wanem, God i save laikim pasin daun na dispela pasin i save helpim yumi na bai God i ken soim rot long yumi. Daniel i gat pasin daun, na dispela em i wanpela as na Jehova ‘i laikim tumas’ dispela profet, na em i salim wanpela ensel i kam long Daniel bilong givim gutpela piksa olsem driman long em! (Daniel 9:23; 10:11, 19) Pasin daun i gat planti gutpela pe bilong en. Em i save helpim yu long kisim ol pren tru i save laikim yu tru. Na bikpela samting moa, Jehova bai mekim gut long yu. “Sapos yu daunim yu yet na yu stap aninit long Bikpela, bai yu gat planti . . . samting na biknem, na bai yu stap gut.”—Sindaun 22:4.
[Piksa long pes 7]
Sapos yumi mekim pasin daun na tok sori, bai i no gat planti kros o tok pait i kamap