Ripot Long Wok Bilong Kingdom
Nem Bilong Jehova “i Olsem Wanpela Strongpela Haus”
LONG nau taim nogut i stap na ol samting inap senis hariap hariap, maski yumi no redi long senis bai kamap. Bikpela hevi i bin painim sampela man olsem, na klostu bagarap i painim ol. Pait bilong gavman inap kamap, o wanpela man inap kamap birua, o guria o tait wara o bikpela win samting inap kamap, o sik inap painim yumi. Kristen i ken mekim wanem long kain taim olsem?
David em wanpela misineri long wanpela brens-ofis bilong Sosaiti Was Taua, na bikpela hevi olsem i bin painim em. Em i draiva, na i no tulait yet na em i draivim ka i go bilong kisim sampela moa em ol i save wok long brens. Em i kisim Rosalía pastaim, na em i go moa, na klostu long polis-tesin ol man i sut long ka.
Nau David i harim win i lusim taia bilong ka na em i save ol i bin sutim taia na taia i gat hul na win i lus. Wanpela soldia i sanap namel long rot na i makim em long gan bilong em na i laik sut long em. Soldia i mekim save sut long ka na ol glas i bruk. David na Rosalía i slip i go daun na bai ol i ken abrusim ol katres, na soldia i sut na katres i kam insait long ka.
Soldia i sut yet long ka, na David i putim brek. Tupela i ting nau bai ol i bagarap. Tupela i beten singaut long Jehova na askim em long lukautim tupela. Bihain Rosalía i tok, long dispela taim em i tingting planti long famili bilong em, olsem wanem long ol sapos ol i harim olsem em i dai!
Ol i Stap Laip Yet!
Gan i pairap, na brukpela glas i pundaun, na taim dispela pairap i pinis David i lukluk long Rosalía na em i lukim blut i kamap long baksait bilong em, na David i pret. Tasol i no katres i bin mekim, nogat; em hap glas tasol i bin sutim em na i pas yet long skin bilong em. Na glas i katim lek bilong em tu na blut i kamap, tasol gutpela tru em i no kisim bagarap.
Ol soldia i banisim ka na i tokim tupela long kam ausait na ol i hansapim tupela. Bikman bilong ol i krosim wanpela soldia na i tok: “Mi tokim yu pinis, yu no ken sutim ol manmeri nating.” Soldia i tok, em i bin harim gan i pairap na em i ting wanpela man long ka bilong David i bin sut long ol.
David i tokim ol, em wantaim Rosalía i Witnes Bilong Jehova, na nau ol i orait long tupela. Em i tokim ol long wok em i mekim, tasol ol i no laik larim tupela i go, long wanem, long hap nait yet wanpela lain bilong ami i kirapim pait bilong daunim gavman na ol dispela soldia i laik kisim polis-tesen long taim ka bilong David na Rosalía i bin ran long dispela hap.
Rosalía i bin kisim bikpela pret, na em i guria yet, tasol em i strongim bel. David i askim ol long larim tupela i go, na bihain ol i orait long lusim tupela, tasol ka nogat. Tupela i wokabaut i go kisim bas na i go long brens, na ol i mekim gut skin bilong Rosalía.
Beten i Gat Strong
Nau David i save pinis, beten i gat strong, na sapos yumi tokaut olsem yumi Witnes Bilong Jehova, dispela tu inap mekim na ol i no ken bagarapim yumi. Tru tumas, nem bilong Jehova “i olsem wanpela strongpela haus. Ol stretpela man i ken ran i go long en na i stap gut.”—Sindaun 15:29; 18:10; Filipai 4:6.
[Piksa Kredit Lain long pes 19]
Fotografía de Publicaciones Capriles, Caracas, Venezuela