Gutpela Kaikai na Kaikai Nogut
“Bikpela i soim mi, Jeremaia, wanpela samting olsem driman, na long dispela driman mi lukim tupela basket i gat ol pikinini bilong diwai fik . . . Wanpela basket i gat ol pikinini fik i gutpela tumas . . . Narapela basket i gat ol pikinini fik i nogut olgeta.”—JEREMAIA 24:1, 2.
EM YIA 617 paslain long Krais. Tenpela yia moa na bai strafe bilong Jehova i painim Jerusalem na lain bilong en. Jeremaia i wok strong yet long autim tok, olsem em i bin mekim inap 30 yia pinis. Ol manmeri i mekim wanem kain pasin long dispela taim? Long 2 Stori 36:15, Esra i tok: “God . . . i no laik bagarapim ol manmeri bilong en wantaim haus bilong en. Olsem na planti taim em i bin salim ol profet i kam long autim tok bilong em long ol manmeri, long wanem, em i sori long ol.” Tasol ol i mekim wanem? Esra i tok long 2 Sto. 36 ves 16: “Ol manmeri i wok long tok bilas long ol man God i salim long ol, na ol i ting tok bilong ol i samting nating, na ol i wok long rabisim ol dispela profet. Olsem na Bikpela i . . . belhat moa yet long ol, na ol i no inap abrusim bagarap em i laik salim long ol.”
2 Olsem wanem? Lain Juda i bin bagarap olgeta? Orait, nau yumi ken tingim sampela bikpela samting Jeremaia i lukim olsem driman. Stori bilong dispela i stap long Jeremaia sapta 24. Long dispela driman God i soim tupela basket long Jeremaia i gat ol pikinini bilong diwai fik long en. God i laik makim ol samting i kamap insait long lain bilong em, em ol i stap insait long kontrak wantaim em na ol i kamapim tupela kain kaikai—em gutpela kaikai na kaikai nogut.
3 Jeremaia sapta 24, ves 1 na 2 i stori long samting profet bilong God i lukim: “King Nebukatnesar bilong Babilon i winim Jerusalem pinis, orait em i kisim ol Juda i go bek long Babilon. Em i kisim pikinini man bilong King Jehoiakim, em King Jehoiakin, narapela nem bilong en Jekonia. Na em i kisim tu ol bikman bilong Juda na ol saveman bilong wokim olkain gutpela samting. Orait bihain long dispela, Bikpela i soim mi, Jeremaia, wanpela samting olsem driman, na long dispela driman mi lukim tupela basket i gat ol pikinini bilong diwai fik. Tupela basket i stap klostu long dua bilong haus bilong Bikpela. Wanpela basket i gat ol pikinini fik i gutpela tumas, olsem ol pikinini fik i save mau paslain long gaden. Na narapela basket i gat ol pikinini fik i nogut olgeta, na i no inap man i kaikai.”
Ol Gutpela Pikinini Fik
4 Jehova i askim Jeremaia long ol samting em i lukim, na long Jer. 24 ves 5 i go 7, Jehova i tok: “Mi bin rausim ol sampela Juda na ol i go long kantri Babilon, tasol long tingting bilong mi, ol i olsem dispela ol gutpela pikinini fik. Na bai mi was gut long ol na mekim gut long ol. Na bai mi bringim ol i kam bek long dispela graun. Na bai . . . ol i save olsem, mi yet mi Bikpela. Na bai ol i kam bek long mi na givim bel tru long mi. Na bai ol i kamap lain manmeri bilong mi, na bai mi stap God bilong ol.”
5 Dispela tok bilong Jehova i makim olsem bihain bai gutpela taim i kamap; lain Juda i no ken bagarap olgeta. Orait, nau yumi ken stori long ol samting basket i gat gutpela fik i makim.
6 Jekonia, o Jehoiakin, i stap king inap 3-pela mun na 10-pela de tasol na em i givim Jerusalem long han bilong King Nebukatnesar. Ol i kisim em i go long Babilon, na ol i kisim tu Daniel na 3-pela poroman Hibru bilong em, em Hanania na Misael na Asaria, na Esekiel. King bilong Babilon i no kilim ol i dai, olsem na yumi ken tok, Jehova i tingim ol dispela kalabusman i olsem ‘ol gutpela fik.’ Na em i tok promis long ‘was long ol na mekim gut long ol,’ a? Em i truim dispela tok promis olsem wanem? Inap 80 yia bihain, olsem long yia 537 paslain long Krais, Jehova i kirapim King Sairus long putim tok na larim liklik hap lain bilong ol tumbuna pikinini bilong ol i go bek long Juda. Ol dispela Juda i stap gut long Jehova ol i wokim gen taun Jerusalem; na ol i sanapim nupela haus lotu bilong lotuim God bilong ol, em Jehova; na ol i kam bek long em na givim bel tru long em. Ol i mekim ol dispela samting, olsem na long ai bilong Jehova ol dispela man i bin go kalabus na ol tumbuna pikinini bilong ol i olsem ol gutpela fik i save mau pastaim long gaden.
7 Pastaim yumi bin stori olsem ol tok profet bilong Jeremaia i makim taim bilong yumi tu. Na i wankain long ol tok bilong Jer. sapta 24. Long taim nogut bilong Namba Wan Pait Bilong Olgeta Hap, planti wokboi bilong Jehova, em ol i dediket long em, long sampela samting ol i stap olsem kalabus long Bikpela Babilon. Tasol Jehova i ‘was long ol na em i laik mekim gut long ol.’ Olsem na long rot bilong Man em Sairus i piksa bilong em, em Krais Jisas, Jehova i pinisim strong bilong Bikpela Babilon na ol i lusim kalabus, na isi isi Jehova i bringim ol i kam i stap long paradais bilong spirit. Ol dispela Israel bilong spirit i tanim bel na ol i kam bek long Jehova. Na long 1931 ol i amamas long kisim nem olsem ol Witnes Bilong Jehova. Tru tumas, nau long ai bilong Jehova ol i kamap olsem wanpela basket i gat ol gutpela fik tru long en.
8 God i marimari long ol Witnes Bilong Jehova na helpim ol long lusim Bikpela Babilon. Ol i kisim pinis marimari bilong em na ol i no mekim nabaut long en. Tok bilong Kingdom i swit olsem pikinini fik i mau, na ol i no bin pasim maus bilong ol yet tasol; ol i bin autim dispela switpela tok long ol lain long olgeta hap bilong graun bilong truim tok bilong Matyu 24:14, em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim.” Na wanem samting i bin kamap? Bikpela lain manmeri, winim 4,700,000, em ol i kain olsem sipsip na ol i no Israel bilong spirit, ol i bin lusim Bikpela Babilon!
Ol Pikinini Fik Nogut
9 Tasol olsem wanem long basket Jeremaia i lukim na i gat ol fik nogut long en? Nau Jeremaia i tingim tru tok bilong Jehova i stap long Jeremaia sapta 24, ves 8 i go 10, em i tok: “Na mi Bikpela, bai mi mekim nogut long King Sedekaia bilong Juda wantaim ol ofisa bilong en na ol manmeri bilong Jerusalem i stap yet long as ples o i bin i go long Isip. Bai mi mekim nogut long ol dispela lain, olsem man i mekim long ol fik nogut tru na i no inap man i kaikai. Na bai ol manmeri bilong ol arapela kantri i harim tok long dispela samting mi bin mekim long ol Juda na bai ol i pret na kirap nogut tru. Na bai mi . . . pinisim ol tru long dispela graun mi bin givim long ol tumbuna bilong ol na long ol yet.”
10 Olsem na long ai bilong Jehova, King Sedekaia i kamap olsem ‘fik nogut.’ Sedekaia i bikhet tru. Em i brukim tok promis em i bin mekim long nem bilong Jehova long i stap daun long King Nebukatnesar, na em i sakim tru marimari bilong Jehova i kam long em long rot bilong Jeremaia. Em i tok na ol i kalabusim Jeremaia! Olsem na long 2 Stori 36:12 Esra i tok: “Sedekaia i save mekim pasin nogut long ai bilong God . . . em i no daunim em yet na harim tok. Nogat.” Tru tumas, long ai bilong Jehova, Sedekaia na ol lain i stap yet long Jerusalem i olsem wanpela basket i gat ol fik nogut long en!
Ol Pikinini Fik Nogut Long Nau
11 Orait, lukluk raun long nau. Yu ting i gat wanpela lain i olsem basket i gat ol fik nogut long en? Orait, yumi ken skelim taim bilong Jeremaia wantaim taim bilong yumi. Nau long taim bilong yumi, Jehova i bin givim wok olsem bilong Jeremaia long lain remnan, em wok bilong autim toksave bilong em long ol lain bilong graun long belhat bilong em i laik painim ol long taim bilong bikpela hevi tru. Em i kirapim ol lain man long givim biknem long em, na lotuim em long spirit na long pasin i tru, na daun long Pikinini bilong em, Krais Jisas, nau em i stap King na i stret em i bosim graun. Tasol ol lain man i mekim wanem? Ol i mekim pasin wankain olsem long taim bilong Jeremaia; ol i mekim yet ol pasin nogut long ai bilong Jehova.
12 Husat ol i kirapim ol long mekim dispela pasin bikhet? Husat ol i save tok bilas long ol man i autim tok bilong God long nau olsem Jeremaia i bin mekim na ol i tok, ol i no wokman bilong God? Husat ol i save mekim olsem ol tok bilong God long Baibel i samting nating? Husat ol i as bilong planti pasin nogut ol man i mekim long ol Witnes Bilong Jehova? Bekim bilong ol dispela askim i stap ples klia—em ol misin i holim nating nem Kristen, na ol pris pasto i paslain long mekim ol dispela pasin nogut. Tingim kaikai nogut, olsem pasin nogut, ol i bin kamapim, em yumi stori pastaim long en. Tru tumas, i gat wanpela lain long nau ol i olsem basket i gat ol fik nogut long en! Jehova i tok ol i fik nogut na “i no inap man i kaikai.” Long nau yumi harim yet tok bilong Jehova olsem: “Bai mi pinisim ol tru.” Belhat bilong Jehova bai painim ol dispela misin na ol i no inap abrusim bagarap.
Em Bilong Skulim Yumi
13 Taim yumi skelim toksave bilong God em Jeremaia i autim, yumi tingim tok bilong aposel Pol long 1 Korin 10:11, em i tok: “Dispela ol samting i bin kamap long ol, em i olsem piksa bilong ol arapela man i ken lukim. Ol man i bin raitim ol dispela stori long buk bilong God, bilong givim tingting long yumi ol man i stap long dispela taim nau, em taim dispela graun klostu i laik pinis.” Olsem wanem long yumi? Yumi tingim gut toksave bilong dispela driman long tupela basket fik? Ol samting i bin painim lain Israel na yumi stori long en i olsem piksa bilong givim tingting long yumi.
14 Yumi ken tingim ol tok Jehova i bin mekim long King Devit long ol samting bai painim Israel. Long 2 Samuel 7:10, Jehova i tok: “Mi makim pinis wanpela graun bilong yupela Israel, ol manmeri bilong mi, na mi mekim yupela i sindaun gut long dispela graun bilong yupela.” Jehova i bin lukautim gut lain bilong em, em ol Israel, olsem na i gat as tru na ol i mas kamapim gutpela kaikai, olsem bihainim ol gutpela pasin. Ol i mas harim ol tok God Jehova i skulim ol long en na bihainim ol lo bilong em. Tasol wan wan tasol i mekim. Planti tru ol i bikhet na lusim rot God i makim na ol i kamapim kaikai i nogut tru.
15 Orait, olsem wanem long taim bilong yumi? Jehova i marimari tru long lain remnan bilong Israel bilong spirit wantaim bikpela lain poroman bilong ol i kain olsem sipsip. Em i helpim ol long lusim kalabus bilong spirit long yia 1919, na em i was gut long ol oltaim i kam inap long nau. Long olgeta de God Jehova yet, em nambawan gutpela Tisa, i save skulim ol, olsem em i tok promis long Aisaia sapta 54, ves 13. Ol tok em i skulim ol long en long rot bilong Krais Jisas i mekim na ol i stap wanbel wantaim na ol i kamap pren bilong Jehova. I olsem yumi stap long gutpela ples paradais bilong spirit, na dispela i helpim yumi long kisim save long Jehova, na harim gut tok bilong em, na kamapim gutpela kaikai, olsem bihainim ol gutpela pasin i litimapim nem bilong Jehova! Yumi mas mekim olsem bambai yumi ken abrusim bagarap!
16 Tasol maski God i marimari long yumi, sampela i bihainim yet pasin bilong sakim tok olsem planti i bin mekim long taim bilong Juda bilong bipo. Ol i mekim pasin i olsem kaikai nogut i sting pinis. Nogut yumi lusim tingting long toksave bilong tupela basket fik i gat gutpela kaikai na kaikai nogut long en. Stretpela strafe bilong Jehova i wok long i kam hariap bilong painim ol misin i holim nating nem Kristen, em ol i bikhet na lusim lotu i tru. Olsem na yumi mas tingim gut tok bilong aposel Pol, em i tok: “Olsem bai yupela inap wokabaut long pasin bilong ol manmeri tru bilong Bikpela, na bai em i laikim olgeta pasin bilong yupela. Na bai yupela i mekim planti kain gutpela wok.”—Kolosi 1:10.
Rivyu “Gutpela Kaikai na Kaikai Nogut” na paragraf 1-4 bilong “Jehova i Gat Kot Long Ol Lain Man”
◻ Ol gutpela pikinini fik i makim wanem samting?
◻ Husat i olsem wanpela basket i pulap long ol pikinini fik nogut?
◻ Tok bilong Jeremaia i skulim yumi long wanem samting?
◻ Wanem bikpela samting i bin kamap long yia 607 paslain long Krais na long yia 1914?
[Askim Bilong Stadi]
1. Jehova i sori long ol Israel, olsem na em i mekim wanem samting? Tasol ol i mekim wanem samting?
2, 3. Stori long samting Jehova i soim Jeremaia.
4. Jehova i givim wanem gutpela tok long ol Israel i no bin lusim em?
5, 6. (a) Bilong wanem Jehova i ting sampela Israel i olsem ‘ol gutpela fik,’ maski ol i kalabus long Babilon? (b) Olsem wanem Jehova i bin ‘was long ol na mekim gut long ol’ gutpela Israel?
7. Long wanem taim Jehova i bin ‘was long lain bilong em na mekim gut long ol’? Na em i mekim olsem wanem?
8. Ol Witnes i bin mekim wanem bilong autim dispela tok em i swit olsem pikinini fik i mau pinis?
9. Husat i olsem ol pikinini fik nogut? Na wanem samting i bin painim ol?
10. I gat wanem as na Jehova i tingim Sedekaia i olsem ‘fik nogut’?
11, 12. Husat i olsem ol pikinini fik nogut long nau? Na wanem samting bai painim ol?
13. Olsem 1 Korin 10:11 i tok, yumi mas ting olsem wanem long dispela driman long tupela basket fik?
14. Jehova i bin lukautim gut ol Israel, tasol ol i mekim wanem?
15. Ol Israel bilong spirit wantaim ol poroman bilong ol i mekim wanem taim Jehova i skulim ol?
16. Nau yumi olgeta wan wan i ken mekim wanem?
[Piksa long pes 15]
Olsem ol gutpela pikinini fik, lain bilong God i kamapim ol switpela kaikai bilong Kingdom
[Piksa long pes 15]
Ol lotu i holim nating nem Kristen i olsem wanpela basket i gat ol pikinini fik nogut long en