Amos​—Man Bilong Lukautim o Sutim Ol Fik?

SAMTING olsem 800 yia paslain long Krais, pris nogut Amasia, em man bilong lotuim bulmakau, em i tokim profet Amos long em i no ken autim tok profet moa long Israel. Tasol Amos i tok: “Mi wanpela wasman bilong ol sipsip tasol, na mi save wok long lukautim ol diwai fik. Mi mekim wok bilong mi i stap na Bikpela i kisim mi na tokim mi olsem, ‘Yu go na autim tok bilong mi long ol manmeri bilong mi, em ol Israel.’ ” (Amos 7:​14, 15) Tru tumas, Jehova yet i salim Amos olsem wanpela profet, na i no long tingting bilong Amos yet na em i mekim dispela wok. Tasol Amos i save mekim wanem wok long “lukautim” ol diwai fik?

Tok Hibru em Baibel New World Translation i tanim olsem “man bilong sutim ol fik,” em i kamap wanpela taim tasol long dispela Baibel. Sampela Baibel i tanim dispela tok “sutim” olsem “bungim,” “lukautim,” o “planim.” Tasol nius Economic Botany i tok, bilong tanim stret dispela hap tok, ol i mas tanim olsem “sutim,” long wanem, dispela i makim wanpela wok em man bilong lukautim ol diwai fik i mas mekim.

Kirap long bipo yet long Isip na Saiprus ol i bin mekim dispela pasin bilong sutim skin bilong ol fik. Long nau ol i no save mekim olsem long ol fik long hap bilong Israel, long wanem, ol i save planim ol narapela kain fik long dispela kantri. Tasol long taim bilong Amos ol Israel i save sutim skin bilong ol fik, long wanem, ol dispela kain fik bilong ol i bin kam long hap bilong Isip.

I luk olsem taim ol i sutim skin bilong fik, em inap pulim wara, na nau fik i gat bikpela wara. Na tu, pasin bilong sutim fik i kamapim wanpela kain ges i save mekim na fik i mau hariap, olsem na fik i bikpela na i swit moa. Na tu, ol binatang i no save bagarapim prut, long wanem, em i save mau hariap.

Maski Amos i bin holim wok nating olsem wasman bilong sipsip na man bilong sutim ol fik, em i no pret long ol birua. Em i gat strongpela bel na em i autim tok long kot bilong Jehova bai painim ol Israel. Tru tumas, Amos i stap olsem gutpela piksa tru ol wokman bilong God i ken bihainim long nau, em ol tu i mas autim wanpela tok em planti man i no laik harim!​—Matyu 5:​11, 12; 10:22.