No Ken Surik Long Mekim Baibel Stadi!

¹ Taim yumi givim bel tru long autim gutnius bilong Kingdom Bilong God, yumi givim samting i gutpela tru long ol man i stap long teritori bilong yumi. (Snd. 3:27) Tok bilong gutpela sindaun em God bai kamapim long bihain em i wanpela gutpela tok tru bilong skulim ol man long en, i no gat narapela tok i olsem. Ating yu save autim tok long kain kain taim na ples o tilim nius samting na stori long gutpela samting Kingdom bai kamapim, tasol i gutpela moa sapos yu putim mak bilong kirapim wanpela Baibel stadi sapos yu no mekim olsem yet.

² Wanpela bikpela samting tru i save pasim yumi sampela taim long kirapim wanpela Baibel stadi, em tingting yumi gat long kirapim wanpela Baibel stadi. Sampela i pret long mekim wanpela Baibel stadi, long wanem, ol i pilim olsem ol i no inap mekim gut o ol i no gat taim bilong mekim. Dispela tok inap helpim yu na yu no surik long insait long wok bilong mekim Baibel stadi.​—⁠Mt. 28:19; Ap. 20:⁠20.

³ Yu Pilim Olsem Yu No Inap Mekim Gut: Ating yu no bin skul gut o sampela samting i mekim na yu pilim olsem yu no inap mekim gut wanpela Baibel stadi. Ol gutpela Kristen long taim bilong ol aposel, ol “i no bin skul.” Tasol wanem samting i helpim ol long skulim ol narapela long tok i tru? Ol i bin “stap wantaim Jisas.” (Ap. 4:13) Ol i bin kisim skul long Bikpela Tisa, em Jisas. Ol samting em i skulim ol man long en na pasin bilong em long skulim ol man i stap long Baibel bilong yumi ken bihainim tu. Maski yu no bin skul gut, yu kisim save long God na laik bilong em na dispela i winim tru ol kain skul bilong graun.​​—⁠Ais. 50:4; 2 Ko. 3:⁠5.

⁴ Sampela taim Jehova i save yusim ol profet bilong stretim ol king o ol man i gat bikpela namba samting i bin mekim rong. Wanpela bilong ol dispela profet em Amos, em i wanpela man nating. Amos i tokaut olsem: “Mi no olsem ol arapela profet, na mi no wok bilong kisim pe. Mi wanpela wasman bilong ol sipsip tasol, na mi save wok long lukautim ol diwai fik.” (Amo. 7:14) Maski i olsem, Amos i no pret long tokaut long kot bilong Jehova long pris Amasia em man bilong lotuim ol bulmakau. (Amo. 7:​16, 17) Olgeta taim yumi mas tingim olsem wok yumi mekim em wok bilong God na em bai inapim yumi long mekim dispela wok.​​—⁠2 Ti. 3:​17.

⁵ Planti Wok: Maski yu gat planti wok, ating yu bin stretim pinis sediul bilong yu long insait long wok autim tok long olgeta taim. Wok bilong mekim Baibel stadi em wanpela hap bilong wok autim tok em yu inap kisim amamas long en. Em i gutpela samting tru long lukim senis i kamap long man i kisim save long tok bilong Jehova. (Hi. 4:12) Jehova i save amamas tru taim yumi daunim laik bilong yumi yet bilong helpim wanpela long “save long as bilong tok tru.” (1 Ti. 2:⁠4) Ol ensel tu i save amamas taim wanpela i lusim ol olpela pasin bilong em na kamap strong long ol samting bilong lotu olsem wanpela wokman bilong God.​​—⁠Lu. 15:⁠10.

⁶ God “i laik kisim bek olgeta manmeri, bai ol i ken save long as bilong tok tru.” (1 Ti. 2:⁠4) Em i gutpela wok tru yumi holim i stret wantaim laik bilong God, olsem na yumi no ken surik long mekim Baibel stadi!

[Askim Bilong Stadi]

1. Long wanem rot yumi givim samting i gutpela tru long ol man long teritori bilong yumi?

2. Wanem samting inap pasim yumi long mekim Baibel stadi?

3. Bilong wanem yumi inap tru long skulim ol man long Baibel?

4. Yumi kisim wanem skul long stori bilong Amos?

5. Bilong wanem yumi mas strong long mekim wanpela Baibel stadi maski yumi gat planti wok?

6. Yumi gat wanem gutpela wok tru?