Bihainim Gutpela Piksa Bilong Ol Profet—Amos
1. Olsem wanem eksampel bilong Amos inap strongim yumi?
1 Olsem wanem? Sampela taim yu pilim olsem yu no fit long autim tok, long wanem, yu no kisim bikpela skul na famili bilong yu i no gat nem? Sapos olsem, gutpela eksampel bilong Amos inap strongim yu. Em i man bilong lukautim ol sipsip na sampela taim long yia em i save wok long ol fam bilong ol diwai fik na wain, tasol Jehova i givim strong long em long autim wanpela bikpela tok. (Amo. 1:1; 7:14, 15) Long taim bilong yumi tu, Jehova i save yusim ol man i gat pasin daun. (1 Kor. 1:27-29) Yumi inap kisim wanem ol narapela skul long profet Amos bilong helpim yumi long autim tok?
2. Olsem wanem yumi inap sanap strong na karim hevi long ol man i birua taim yumi autim tok?
2 Sanap Strong Taim Ol Man i Birua: Taim Amasia, em pris nogut i save lotuim ol bulmakau—bilong 10-pela hap lain bilong Israel long hap not—i harim ol tok profet bilong Amos, em i tok: ‘Lusim mipela na go long Juda! Mipela i gat lotu bilong mipela yet!’ (Amo. 7:12, 13) Taim Amasia i askim King Jeroboam long putim tambu long wok bilong Amos, em i paulim tok bilong profet Amos. (Amo. 7:7-11) Tasol Amos i no pret. Long nau, sampela bikman bilong lotu i save askim ol gavman politik long sapotim wok bilong ol long mekim nogut long lain bilong Jehova. Tasol Jehova i strongim yumi olsem i no gat wanpela samting bilong pait bai bagarapim yumi.—Ais. 54:17.
3. Long nau, yumi autim tok long wanem tupela samting?
3 Autim Tok Long Kot Bilong God na Long Ol Blesing Long Bihain: Amos i bin autim tok long kot bilong God bai painim 10-pela hap lain bilong Israel, tasol long pinis bilong buk em i raitim, em Buk Amos, Amos i stori long tok promis bilong Jehova long mekim gut gen long lain bilong em na givim planti blesing long ol. (Amo. 9:13-15) Yumi tu i autim tok long “de bilong bikpela kot” bai i kamap, tasol dispela em hap tasol bilong “gutnius bilong Kingdom” em yumi tokaut long en. (2 Pita 3:7; Mat. 24:14) Taim Jehova i bagarapim ol man nogut long Armagedon, dispela bai opim rot long paradais i kamap long graun.—Sng. 37:34.
4. Olsem wanem yumi save tru olsem yumi inap mekim laik bilong Jehova?
4 Wok bilong autim tok bilong Kingdom long dispela taim em planti man i birua, dispela inap traim pasin bilong yumi long givim bel tru long Jehova na long tingting strong long mekim laik bilong em. (Jon 15:19) Tasol yumi save Jehova bai wok yet long helpim yumi long winim mak bilong mekim laik bilong em, olsem em i bin mekim long Amos.—2 Kor. 3:5.