Kam Long Jehova, Em i Save Skelim Bel Bilong Man
“Yupela kam long mi, na bai yupela i kisim laip.”—AMOS 5:4.
1, 2. Wanem mining bilong tok bilong Baibel olsem Jehova i “save lukim tingting na laik bilong man”?
GOD JEHOVA i tokim profet Samuel: “Ol man i save lukluk long bodi. Tasol mi save lukim tingting na laik bilong man na mi skelim ol.” (1 Samuel 16:7) Olsem wanem Jehova i “save lukim tingting na laik bilong man”?
2 Long Baibel, bel i save makim pasin tru tru bilong man—olsem ol laik bilong em, na tingting bilong em, na ol samting em i save pilim long bel, na ol samting em i laikim tru. Olsem na taim Baibel i tok Jehova i save lukim bel bilong man, dispela i makim olsem em i no save lukim skin tasol bilong man—em i save tingim pasin na tingting tru tru i stap insait long bel bilong man.
God i Skelim Ol Israel
3, 4. Olsem Amos 6:4-6 i tok, ol samting long 10-pela lain Israel i bin stap olsem wanem?
3 Taim Man bilong skelim bel bilong man i lukluk i kam daun long 10-pela lain bilong Israel long taim bilong Amos, Em i lukim wanem samting? Amos 6:4-6 i stori long “ol maniman i save slip long ol naispela bet tru.” Ol i “kaikai gutpela mit bilong bulmakau na sipsip.” Ol dispela man i “kamapim ol nupela song” na ol i “save dring planti kap wain.”
4 Taim yumi ritim ol dispela ves, ating pastaim yumi ting ol samting ol i mekim i gutpela tasol. Ol maniman i gat ol gutpela haus na ol gutpela tebol na bet samting long en, na ol i kaikai ol gutpela gutpela kaikai na dring planti wain, na ol i save harim ol gutpela musik ol i pilaim long ol gita samting. Na tu, ol i gat “ol naispela bet tru,” em ol i save bilasim long tit bilong elefan. Ol man bilong digim graun na painim ol samting bilong bipo, ol i bin painim planti naispela samting ol i bin wokim long tit bilong elefan long Samaria em nambawan biktaun bilong Israel. (1 King 10:22) Ating planti bilong ol dispela samting ol i bin pasim long ol bet samting na long banis insait long haus.
5. Bilong wanem God i no amamas long ol Israel long taim bilong Amos?
5 Olsem wanem? Jehova i kros long ol Israel i gat gutpela sindaun na ol i kisim ol kaikai i swit tumas long maus, na ol i dring gutpela wain, na ol i harim ol gutpela musik? Nogat! Em yet i save givim olgeta gutpela samting long ol man bambai ol i ken kisim amamas long en. (1 Timoti 6:17) Samting Jehova i no amamas long en, em ol laik nogut i wok long kamap long bel bilong ol man, na tingting nogut bilong ol long God, na ol i no laikim tru ol wantok Israel.
6. Long taim bilong Amos ol Israel i stap olsem wanem long ol samting bilong spirit?
6 Ol dispela man em ol i ‘slip long ol naispela bet tru na i kaikai gutpela mit bilong ol sipsip, na dring planti kap wain, na pilai musik long gita samting,’ ol bai kirap nogut. Profet i askim ol dispela man: “Yupela i ting taim bilong bagarap i no inap kamap long yupela”? Ol i mas bel hevi tru long ol samting i kamap long Israel, tasol ol “i no sori liklik long kantri Israel bai i bagarap.” (Amos 6:3-6) Lain Israel i gat gutpela sindaun na planti gutpela samting, tasol God i no tingim dispela—em i lukim olsem ol Israel i stap nogut tru long ol samting bilong spirit. Tasol ol manmeri i wok long mekim ol samting ol i save mekim long olgeta de na ol i no tingim ol dispela pasin nogut i kamap. Na planti manmeri long nau tu i olsem. Ating ol bai wanbel long tok olsem yumi stap long taim bilong planti hevi, tasol sapos ol dispela hevi i no painim ol yet, ol i no inap tingim liklik ol hevi i painim ol narapela man, na ol i no tingim ol samting bilong spirit.
Israel—Wanpela Lain i Wok Long Go Nogut
7. Wanem samting bai painim ol manmeri bilong Israel sapos ol i no putim yau long ol tok lukaut bilong God?
7 Ol tok Amos i mekim i kamapim olsem dispela lain i wok long go nogut tru, maski long skin i olsem ol i stap gutpela. Ol i no putim yau long ol tok lukaut bilong God na stretim tingting bilong ol, olsem na Jehova bai lusim ol na larim ol birua i daunim ol. Ol lain Asiria bai kam kisim ol na ol i mas lusim ol gutpela bet ol i bin bilasim long tit bilong elefan na i go kalabus long narapela kantri. Em nau, gutpela sindaun bilong ol bai pinis!
8. Wanem samting i mekim na Israel i kamap nogut long ol samting bilong spirit?
8 Olsem wanem na ol Israel i stap nogut olsem? Dispela pasin i bin kirap long 997 B.C.E., bihain long taim King Solomon i dai na pikinini man bilong em, Rehoboam, i kisim ples bilong em na 10-pela lain Israel long hap bilong not i bruk long lain Juda na Benjamin. Namba wan king bilong 10-pela lain bilong Israel em King Jeroboam Namba 1, “Nem bilong papa bilong en, em Nebat.” (1 King 11:26) Jeroboam i bin tokim ol manmeri long hap bilong em olsem i hatwok tumas long ol i go long Jerusalem bilong lotu long Jehova. Tasol em i no tingim tru ol dispela manmeri na em i laik helpim ol. Em i tingting long helpim em yet tasol. (1 King 12:26) Jeroboam i pret, nogut ol Israel i wok long go long tempel long Jerusalem long ol bikpela bung bilong lotuim Jehova, na bihain bai ol i gat laik long lusim em na bung gen wantaim lain Juda. Bilong pasim ol na bai ol i no ken lusim em, Jeroboam i sanapim tupela bulmakau gol, wanpela long Dan na wanpela long Betel. Olsem na pasin bilong lotuim bulmakau i kamap olsem lotu bilong Israel.—2 Stori 11:13-15.
9, 10. (a) King Jeroboam Namba 1 i stretim wanem ol bikpela de? (b) God i ting olsem wanem long ol dispela bikpela de bilong lotu bilong Israel ol i mekim long taim bilong King Jeroboam Namba 2?
9 Jeroboam i laik mekim na bai i olsem dispela nupela lotu em lotu bilong God tasol. Em i putim ol bikpela de bilong lotu i kain olsem ol bikpela bung bilong lotu ol i save mekim long Jerusalem. Long 1 King 12:32, yumi ritim tok olsem: “Jeroboam i makim de namba 15 bilong namba 8 mun olsem wanpela bikpela de bilong mekim lotu. Dispela bikpela de bilong lotu, em i wankain olsem dispela bikpela de bilong lotu bilong ol Juda. Na em i kilim ol abus na kukim antap long alta . . . Em i mekim ol dispela ofa long Betel.”
10 Jehova i no orait long ol dispela bikpela de bilong lotu. Nogat tru! Winim 100 yia bihain Jehova i kamapim klia dispela samting long rot bilong Amos long taim Jeroboam Namba 2 i bosim Israel, em i bin kamap king long 10-pela lain Israel long 844 B.C.E. samting. (Amos 1:1) Long Amos 5:21-24, God i tok: “Mi no amamas long ol bikpela de bilong lotu bilong yupela, na mi no laikim ol tru. Taim yupela i bringim ol ofa bilong kukim olgeta na yupela i bringim wit bilong mekim ofa, bai mi no ken kisim. Yupela i save givim kaikai long ol bulmakau na ol i kamap patpela. Na yupela i save bringim ol dispela bulmakau i kam long mi olsem ofa bilong tenkyu. Tasol mi no ken kisim ol dispela ofa. Nogat tru. Yupela i no ken singsing moa. Na yupela i no ken paitim ol gita samting. Mi les long harim. Tasol mi laik bai yupela i mas mekim ol gutpela na stretpela pasin na dispela pasin i mas i stap oltaim, olsem wanpela bikpela wara i no save drai.”
Ol Samting i Wankain Long Taim Bilong Yumi
11, 12. Wanem sampela pasin bilong lotu bilong ol Israel bilong bipo na lain Kristendom i wankain?
11 Em i klia tru olsem Jehova i bin skelim bel bilong ol man i mekim ol dispela bikpela bung bilong lotu long Israel na em i no laikim ol dispela bung wantaim ol ofa ol i mekim. Long nau tu, God i no laikim ol bikpela de haiden bilong Kristendom, olsem Krismas na Ista samting. Long ol man i lotu long Jehova, stretpela pasin i no inap poroman wantaim pasin bilong sakim lo, na lait i no inap bung wantaim tudak.—2 Korin 6:14-16.
12 I gat sampela pasin moa bilong lotu bilong Kristendom i wankain olsem pasin ol Israel i bin mekim taim ol i lotuim bulmakau. Tru, sampela man i tok ol i Kristen ol i bilip long tok tru bilong Baibel, tasol pasin bilong laikim tru God i no as na ol Kristendom i mekim lotu. Sapos ol i laikim tru Jehova, ol bai strong long lotuim em long “Spirit na long pasin i tru,” long wanem, dispela kain lotu em i save laikim. (Jon 4:24) Na yumi tingim pasin bilong Kristendom, ol i no save “mekim ol gutpela na stretpela pasin . . . i stap oltaim, olsem wanpela bikpela wara i no save drai.” Ol i no strong long lain bilong ol i mas bihainim ol lo bilong God long stretpela pasin bilong marit samting. Em i larim lain bilong en i mekim pasin pamuk, na ol narapela bikpela rong, na taim tupela man i marit, Kristendom i save givim blesing long ol!
“Bihainim Gutpela Pasin Tasol”
13. Bilong wanem yumi mas bihainim ol tok bilong Amos 5:15?
13 Long olgeta manmeri em ol i laik tru long mekim pasin Jehova i laikim, em i tokim ol: “Lusim pasin nogut, na bihainim gutpela pasin tasol.” (Amos 5:15) Pasin bilong laikim tru wanpela samting, na pasin bilong nolaik tru long wanpela samting, dispela i save kirap long bel. Bel i save giaman, olsem na yumi mas mekim olgeta samting bilong lukautim bel bilong yumi. (Sindaun 4:23; Jeremaia 17:9) Sapos yumi larim ol laik nogut i kamap long bel, ating bai yumi kirap laikim tru ol pasin i no stret, na yumi nolaik tru long ol pasin i stret. Na sapos yumi bihainim ol dispela laik nogut na yumi wok long mekim rong, orait maski yumi strong tru long mekim lotu, dispela i no inap helpim yumi long kam bek long God na bai em i ken orait gen long yumi. Olsem na i gutpela yumi beten long God i ken helpim yumi long “lusim pasin nogut, na bihainim gutpela pasin tasol.”
14, 15. (a) Long Israel, husat i bin mekim ol gutpela pasin? Tasol ol i mekim wanem long sampela bilong ol? (b) Olsem wanem yumi ken strongim ol lain i mekim fultaim sevis long nau?
14 Tasol i no olgeta Israel i bin mekim ol pasin i no stret long ai bilong Jehova, nogat. Olsem: Hosea na Amos i “bihainim gutpela pasin tasol” na ol i mekim wok olsem profet bilong God na ol i stap gut long dispela wok. Sampela i mekim strongpela tok promis bilong kamap olsem Nasa. Insait long taim ol i makim bilong i stap Nasa, ol i save stap tambu long wain na ol samting ol i wokim long pikinini bilong diwai wain. (Namba 6:1-4) Orait, ol narapela Israel i ting olsem wanem long ol kain bilipman olsem, em ol i daunim ol laik bilong ol yet? Bekim bilong dispela askim i kamapim klia olsem pasin bilong lain Israel i go nogut tru. Amos 2:11, 12 i tok: “Yupela i tambuim ol [profet] bai ol i no ken autim tok bilong mi. Na . . . yupela i strong long ol Nasa na mekim ol i dring wain.”
15 Taim ol i lukim pasin bilong ol Nasa na ol profet long i stap gut long God, ol dispela Israel i mas sem, na dispela i mas kirapim ol long senisim pasin bilong ol. Tasol nogat. Ol i laik mekim na bai ol man i stap gut long God ol i no ken givim biknem long em. Yumi no ken strong long ol wanbilip Kristen em ol i painia, ol misineri, ol wasman raun, o ol lain bilong Betel, long lusim fultaim sevis na ol i ken sindaun gut olsem ol narapela man. Yumi tok amamas long ol, na yumi laik strongim ol long mekim yet dispela gutpela wok!
16. Bilong wanem ol Israel long taim bilong Moses i stap gutpela, winim ol Israel long taim bilong Amos?
16 Long taim bilong Amos planti Israel i gat planti gutpela samting bilong skin, tasol ol “i stap rabis long ai bilong God.” (Luk 12:13-21) Ol tumbuna bilong ol i bin wokabaut long ples wesan nating, ol i bin kaikai mana tasol inap 40 yia. Ol i no kaikai ol gutpela patpela bulmakau o slip long ol gutpela bet ol i bilasim long tit bilong elefan. Tasol Moses i bin tokim ol: “Yupela i no ken lusim tingting long dispela samting. God, Bikpela bilong yumi, i bin mekim olgeta samting bilong yupela i kamap gutpela. . . . Inap 40 yia nau, em i stap wantaim yupela, na yupela i no bin sot long wanpela samting.” (Lo 2:7) Tru tumas, ol Israel i stap long ples wesan nating ol i gat olgeta samting ol i mas kisim. Na bikpela samting tru, God i laikim tumas ol, na em i lukautim ol, na i mekim gut long ol!
17. Bilong wanem Jehova i bringim ol Israel i kam long Graun Bilong Promis?
17 Jehova i kirapim gen tingting bilong ol wanlain bilong Amos olsem Em i bin bringim ol tumbuna bilong ol i kam long Graun Bilong Promis na em i bin helpim ol long rausim ol birua. (Amos 2:9, 10) Tasol i gat wanem as na God i bin kisim ol Israel long Isip na bringim ol i go long Graun Bilong Promis? I no bilong ol i ken sindaun olsem ol maniman i gat ol gutpela gutpela samting na givim baksait long Man Bilong Wokim ol. Nogat! Em i bin mekim olsem long ol bambai ol i ken lotuim em olsem ol man i stap fri na ol i klin long ol samting bilong spirit. Tasol ol manmeri i sindaun long hap bilong 10-pela lain bilong Israel ol i no lusim pasin nogut, na bihainim gutpela pasin tasol, nogat. Ol i givim biknem long ol imis ol i bin wokim, na ol i no givim biknem long God Jehova. Ol i mas sem tru long dispela samting!
Jehova Bai Mekim Save Long Ol
18. Bilong wanem Jehova i helpim yumi long i stap fri long ol samting bilong spirit?
18 God bai tingim pasin nogut bilong ol Israel. Em i tokaut klia long tingting bilong em olsem: “Bai mi mekim save long yupela bilong bekim olgeta sin bilong yupela.” (Amos 3:2) Dispela tok i mas kirapim yumi long tingim samting Jehova i bin mekim long yumi yet—em i bin kisim yumi long Isip bilong nau em yumi bin kalabus long en, em i makim dispela pasin nogut bilong graun nau yumi stap long en. Tasol Jehova i no bin kisim yumi long dispela kalabus na bai yumi ken mekim ol samting bilong inapim ol laik bilong yumi yet, nogat. Em i bin helpim yumi long kamap fri bambai yumi ken givim biknem long em olsem wanpela lain i stap fri na i lotu long em long pasin i klin. Na Jehova bai skelim yumi olgeta wan wan long ol samting yumi mekim olsem man i stap fri.—Rom 14:12.
19. Olsem Amos 4:4, 5 i tok, planti Israel i kirap laikim wanem samting?
19 Tasol sori tru! Planti bilong lain Israel i no bin putim yau long strongpela tok bilong Amos. Long Amos 4:4, 5, dispela profet i kamapim long ples klia bikpela sik bilong spirit i stap long bel bilong ol, em i tok: “Yupela ol manmeri bilong Israel, goan yupela go nau. Yupela go mekim sin long ples lotu bilong taun Betel. Na yupela go long ples lotu bilong taun Gilgal na mekim sin moa moa yet. . . . Yupela i save laikim tumas long mekim ol dispela kain pasin.” Ol Israel i no bin wok long kisim ol stretpela laik. Ol i no bin lukautim gut bel bilong ol. Olsem na planti ol i kisim pasin bilong laikim ol samting i nogut na nolaik tru long ol samting i gutpela. Ol dispela bikhetlain i lotuim bulmakau ol i no bin senisim pasin bilong ol. Jehova bai mekim save long ol, na ol bai dai long sin bilong ol!
20. Olsem wanem yumi ken bihainim tok bilong Amos 5:4?
20 Yumi save, ol man i laik i stap gut long Jehova long dispela taim bipo bai ol i gat hatwok tru. Sapos yumi laik sakim ol pasin em planti manmeri i save laikim, em bai i hatwok, olsem yumi subim wara na yumi laik sakim strongpela tait i laik karim yumi i go, na yumi olsem Kristen long nau, ol yangpela na ol lapun, yumi save gut long dispela samting. Tasol pasin bilong laikim tru God na laik bilong mekim ol samting em i laikim, dispela i bin kirapim sampela Israel long lotu tru long em. Jehova i singautim dispela lain yet, olsem yumi lukim long Amos 5:4, em i tok: “Yupela kam long mi, na bai yupela i kisim laip.” Long nau, God i marimari long ol man i tanim bel na wok long painim em long rot bilong kisim stretpela save long Baibel na bihainim laik bilong em. Em i no isi long mekim olsem, tasol sapos yumi mekim olsem bai yumi inap kisim laip oltaim.—Jon 17:3.
Stap Gut Maski Ol Man i Gat Bikpela Hangre Bilong Spirit
21. Ol man i no bihainim lotu i tru ol i gat bikpela hangre long wanem samting?
21 Wanem samting bai painim ol man i no bihainim lotu i tru? Wanpela kain hangre i nogut tru—em bikpela hangre bilong spirit! Bikpela King Jehova i tok: “Bihain bai mi mekim bikpela hangre i kamap long kantri bilong yupela. Na bai olgeta manmeri i hangre tru, tasol bai ol i no hangre bilong kaikai. Na bai nek bilong ol i drai, tasol bai ol i no laik dring wara. Long wanem, dispela hangre i no bilong kaikai na wara. Ol bai i hangre tumas long harim tok bilong mi tasol.” (Amos 8:11) Kristendom em i gat kain bikpela hangre bilong spirit olsem. Tasol ol manmeri namel long en em ol i gat stretpela bel, ol i lukim olsem lain bilong God i gat planti samting bilong spirit, na ol i wok long kam insait long oganaisesen bilong Jehova. Tok bilong Jehova i kamapim klia olsem i stap bilong ol lain bilong Kristendom i narapela kain long ol trupela Kristen, em i tok: “Ol wokman bilong mi bai ol i gat planti kaikai na wara. Tasol yupela ol lain i save givim baksait long mi, bai yupela i stap hangre na bai yupela i no gat wara bilong dring. Ol lain bilong mi, ol bai i amamas, tasol yupela bai i sem nogut tru.”—Aisaia 65:13.
22. I gat wanem as na yumi ken amamas?
22 Olsem wanem? Yumi ol wokman bilong Jehova, yumi wan wan i save tenkyu long ol gutpela kaikai bilong spirit na ol blesing yumi kisim? Taim yumi stadi long Baibel na ol buk na nius Kristen na go long ol miting bilong kongrigesen, na ol kibung, yumi belgut tru na yumi laik singaut, long wanem, amamas i pulap long bel bilong yumi. Yumi amamas, long wanem, yumi kliagut long as bilong ol tok bilong Baibel, na tok profet bilong Amos tu.
23. Ol man i givim biknem long God ol i kisim wanem ol gutpela samting?
23 Long olgeta manmeri i laikim tru God na i laik givim biknem long em, tok profet bilong Amos i gat gutpela tok bilong samting yumi inap wetim bai kamap bihain. Maski nau yumi stap olsem wanem long ol samting bilong skin o wanem ol traim i painim yumi long dispela taim nogut bilong nau, yumi ol manmeri i laikim tru God yumi kisim ol gutpela blesing bilong God na yumi gat ol nambawan gutpela kaikai bilong spirit. (Sindaun 10:22; Matyu 24:45-47) Olsem na yumi laik givim biknem tru long God, em Man bilong givim planti samting long yumi bilong helpim yumi. Yumi olgeta i laik wok yet long litimapim nem bilong em i go inap oltaim oltaim! Bai yumi inap mekim olsem sapos yumi wok long painim Jehova, em Man bilong skelim bel bilong ol man.
Bai Yu Bekim Olsem Wanem?
• Long taim bilong Amos ol Israel i stap olsem wanem?
• Ol samting i bin kamap long 10-pela lain bilong Israel i kamap long wanem lain long nau?
• Baibel i tok profet long nau i gat wanem kain hangre? Tasol husat i no gat dispela hangre?
[Ol Piksa long pes 21]
Planti Israel i gat ol gutpela gutpela samting bilong skin, tasol ol i no stap gut long ol samting bilong spirit
[Piksa long pes 23]
Strongim ol lain i mekim fultaim sevis long ol i no ken lusim gutpela wok bilong ol
[Ol Piksa long pes 24, 25]
Ol lain bilong Jehova i amamas na ol i no sot long ol samting bilong spirit