Mekim Singsing Bilong Litimapim Nem Bilong Jehova
“Nau bai mi singim song long Bikpela, long wanem, em i winim bikpela pait tru.”—KISIM BEK 15:1.
LONG Buk Song long Baibel, inap 13 taim Song 150 i tok, yumi mas litimapim nem bilong Jehova. Laspela ves i tok: “Yupela olgeta samting i gat laip, litimapim nem bilong [Jehova, NW]! Litimapim nem bilong [Jehova, NW]!” Yumi Witnes Bilong Jehova na yumi save, i stret yumi mas litimapim nem bilong God. Em i Nambawan Bikpela, na God Antap Tru, na King bilong oltaim, na Man bilong wokim yumi na helpim yumi. I no gat narapela i olsem em, o i gat biknem olsem em. Em i gat olgeta save, na olgeta strong, na pasin bilong em i stret olgeta, na em i As bilong pasin bilong laikim ol narapela. Em wanpela tasol em i gutpela na i stap holi. (Luk 18:19; KTH 15:3, 4) Olsem na i stret yumi mas litimapim nem bilong em!
2 Yumi mas lotuim Jehova na litimapim nem bilong em, na yumi mas tenkyu long em tu, long wanem, em i mekim planti samting bilong helpim yumi. Em i givim “olgeta gutpela samting” long yumi. (Jems 1:17) Em i As bilong laip. (Song 36:9) Em i givim olgeta gutpela samting long graun long yumi; em i Man bilong wokim yumi. (Aisaia 42:5) Em i givim ol blesing bilong spirit long yumi long rot bilong spirit bilong em, na oganaisesen bilong em, na Baibel. Em i tekewe sin bilong yumi long rot bilong ofa bilong Pikinini bilong em. (Jon 3:16) Yumi wetim Kingdom, em ‘nupela skai na nupela graun i gat stretpela pasin tasol long en.’ (2 Pita 3:13) Yumi gat ol gutpela poroman, em ol brata sista Kristen. (Rom 1:11, 12) Yumi holim gutpela wok na kisim ol blesing, long wanem, yumi Witnes bilong em. (Aisaia 43:10-12) Na yumi inap beten long em. (Matyu 6:9-13) Tru tumas, i gat planti as na yumi mas tenkyu long Jehova!
Ol Rot Bilong Litimapim Nem Bilong Jehova
3 Yumi ol man i givim bel long Jehova, olsem wanem yumi ken litimapim nem bilong em na tenkyu long em? Yumi ken mekim wok Kristen bilong autim tok—yumi ken go long ol haus na autim tok, na mekim ol gobek na Baibel-stadi, na autim tok long rot, na long kain kain taim na ples. Na yumi givim biknem long Jehova long taim yumi mekim stretpela pasin na mekim gut skin na bilas gut. Planti man i save litimapim nem bilong yumi ol Witnes Bilong Jehova long dispela samting. Na yumi ken givim biknem long Jehova na tenkyu long em long rot bilong beten.—Lukim 1 Stori 29:10-13.
4 Na wanpela gutpela rot bilong litimapim nem bilong gutpela Papa bilong yumi long heven, em olsem: Yumi ken mekim ol singsing bilong Kingdom. Planti man bilong wokim musik i tok, nek bilong ol man em i gutpela musik tru. Planti ol i raitim ol musik olsem ol song, long wanem, ol man i save amamas tru long harim nek bilong man o meri i singsing.
5 Jehova i amamas long harim ol manmeri i singsing, na em i save amamas moa long taim ol i mekim singsing bilong litimapim nem bilong em na tenkyu long em. Olsem na yumi mas givim bel long mekim ol singsing bilong Kingdom long ol bung bilong yumi, olsem long ol miting bilong kongrigesen, na long ol kibung sekit, na bikpela de kibung, na ol kibung distrik na kibung intenesenel. I gat planti gutpela singsing long buk singsing bilong yumi, na planti man bilong ausait tu i tok, ol i gutpela singsing. Sapos yumi givim bel long mekim, dispela bai helpim yumi yet na ol narapela bai amamas.
Ol Singsing Bilong Litimapim Nem Bilong Jehova Long Bipo
6 Baibel i tok, taim Jehova i helpim ol Israel na daunim ami bilong Isip long solwara Retsi, Moses wantaim ol Israel i mekim singsing olsem: “Nau bai mi singim song long [Jehova, NW], long wanem, em i winim bikpela pait tru. Em i tromoi ol hos wantaim ol man i sindaun long hos i go insait long solwara. Bikpela yet i save mekim mi strong, na mi singim song bilong litimapim nem bilong en. Em i save kisim bek mi, na mi . . . singim song long biknem bilong en.” (Kisim Bek 15:1, 2) Yumi save, ol Israel i amamas tru long mirakel God i wokim na ol i givim bel long mekim dispela singsing!
7 Long 1 Stori 16:1, 4-36, Baibel i stori long Devit i kisim Bokis Kontrak i kam long Jerusalem na ol i mekim singsing na wokim musik bilong litimapim nem bilong Jehova. Na taim ol i wokim pinis tempel long Jerusalem na King Solomon i givim long Jehova, ol i wokim musik na mekim singsing bilong litimapim nem bilong Jehova. Long 2 Stori 5:13, 14, Baibel i tok: “Ol lain man bilong mekim musik i stat long winim biugel na paitim plet bras, na ol i kirapim song bilong litimapim nem bilong [Jehova, NW]. Song bilong ol i olsem, ‘Yumi mas tenkyu long Bikpela, long wanem, em i gutpela tru long yumi. Oltaim oltaim em i save laikim yumi tru.’ Taim ol i kirapim dispela song, orait wantu klaut i pulapim haus bilong Bikpela. Na lait bilong Bikpela i lait moa yet long dispela klaut na i pulapim dispela haus bilong en olgeta. Olsem na ol pris i no inap i go insait na mekim wok bilong ol.” Dispela i makim olsem Jehova i harim dispela gutpela musik na singsing bilong litimapim nem bilong em na em i amamas long en, olsem na i gat dispela klaut. Long taim bilong Nehemia tu, taim ol i wokim pinis banis bilong Jerusalem, i gat tupela bikpela lain i singim song.—Nehemia 12:27-42.
8 Singsing em i bikpela hap wok lotu bilong ol Israel, olsem na ol i makim 4,000 Livai bilong mekim musik. (1 Stori 23:4, 5) Ol i mekim musik na ol lain bilong singsing i singim song. Musik na singsing i bikpela samting long lotu bilong ol, i no bilong skulim ol long ol bikpela tok bilong Lo, tasol bilong kirapim ol long givim bel long lotuim Jehova. Ol i redi gut na lain gut bilong mekim dispela hap wok lotu. Baibel i tok: “Namba bilong ol dispela man wantaim ol arapela Livai i bin skul gut long singim ol song bilong litimapim nem bilong Bikpela, em inap 288 olgeta. Olgeta dispela man i save gut tru long mekim musik.” (1 Stori 25:7) Singsing bilong litimapim nem bilong Jehova em i bikpela samting long ol. Ol i skul gut na ol i save gut tru long mekim!
9 Olsem wanem long musik na singsing long taim bilong ol aposel? Long nait ol birua i laik i kam holim Jisas, i gat planti bikpela samting em i mas tingim, tasol em i kirapim ol aposel long singim song long Jehova long taim em i pinisim bung bilong Pasova na nupela bung em i kamapim bilong tingim i dai bilong em. (Matyu 26:30) Na taim ol man i paitim Pol tupela Sailas na putim tupela long kalabus, “long biknait” tupela “i wok long beten na mekim song long God. Na ol arapela kalabus i harim i stap.”—Aposel 16:25.
Singsing Em i Bikpela Samting Long Lotu Bilong Yumi
10 Olsem wanem? Yu ting ol singsing bilong Kingdom i no bikpela samting na yu no givim bel long mekim? Sapos olsem, yu mas stretim tingting bilong yu, long wanem, long ai bilong God Jehova na Krais Jisas, ol singsing bilong litimapim nem bilong God i bikpela samting. Planti taim Baibel i tok, yumi mas mekim singsing bilong litimapim nem bilong God! Olsem: Aisaia 42:10 i tok: “Yupela olgeta manmeri bilong graun, yupela i mas singim nupela song bilong litimapim nem bilong Bikpela. Yupela ol man i raun long sip na yupela . . . ol manmeri bilong ol kantri i stap longwe, yupela i mas singim nupela song.”—Lukim tu Song 96:1; 98:1.
11 Aposel Pol i save, ol singsing inap strongim bel, olsem na em i mekim tupela tok long dispela. Long Efesus 5:18, 19 em i tok: “Taim yupela i toktok wantaim ol arapela manmeri bilong God, yupela i mas kisim ol tok i stap long ol song . . . na putim insait long tok bilong yupela. Na yupela i mas singim ol song long Bikpela, long maus na long bel bilong yupela tu.” Na long Kolosi 3:16 em i tok: “Yupela i mas . . . skulim ol arapela Kristen na . . . bai ol i ken mekim gutpela pasin tasol. Yupela i mas tenkyu long God long bel bilong yupela, na yupela i mas singim ol song.”
12 Pol i tok long ‘ol song bilong Buk Song, na ol arapela song bilong lotu, na ol song spirit holi i kamapim,’ na em i tok yumi mas ‘singim ol song long God.’ Long Kolosi, em i kamapim klia olsem, long rot bilong ol singsing yumi ken ‘skulim ol arapela bai ol i mekim gutpela pasin.’ Yumi save mekim olsem long ol singsing bilong yumi. Lukim nem bilong sampela—“Olgeta Samting i Mas Givim Biknem Long Jehova!” (namba 5), “Sanap Strong, No Ken Surik!” (namba 10), “Amamas Long Wetim Kingdom!” (namba 16), “No Ken Pret Long Ol!” (namba 27), “Amamas Long Jehova, God Bilong Yumi!” (namba 100).
13 Lain ‘gutpela wokboi’ i tingim ol dispela tok na ol i makim ol singsing bilong kirapim na pinisim ol bung bilong yumi, olsem ol miting bilong kongrigesen, na ol kibung sekit, na bikpela de kibung, na ol kibung distrik na kibung intenesenel. (Matyu 24:45) Na ol i makim ol singsing bilong mekim long ol narapela taim long ol dispela bung. I gat singsing bilong kirapim miting, olsem na gutpela sapos yumi kamap kwik long miting na yumi stap long taim bilong mekim dispela samting bilong lotuim Jehova, a? Na i gat singsing long pinis bilong miting, olsem na gutpela sapos yumi stap na mekim singsing na harim beten long pinis bilong miting, a?
14 Ol i makim ol singsing bilong miting i stret long as tok bilong miting. Olsem: Long ol “God i Skulim Yumi” Kibung Distrik bilong 1993-1994, i gat 3-pela tok long ol samting ol Kristen i mas wok strong long sakim, em Satan na pasin bilong graun na laik nogut bilong skin, olsem na ol i makim singsing 191, “Yu Mas Pilim Gut Tok i Tru,” bilong mekim bihain long dispela 3-pela tok, long wanem, em i kirapim ol Kristen long wok strong olsem. Na ol i makim singsing 164, “Ol Pikinini—Gutpela Presen Bilong God,” bilong mekim bihain long wanpela tok i stori long wok bilong papamama long skulim gut ol pikinini. Na ol i makim singsing 70, “Bihainim Pasin Bilong Jeremaia,” bilong mekim paslain long sampela tok long ol tok profet bilong Jeremaia. Na ol i makim singsing 156, “Mi Laik Mekim,” bilong kamap bihain long ol tok long wok autim tok, long wanem, singsing i stori gut long dispela. Long Stadi Wastaua na Miting Bilong Wok na Skul Bilong Wok Autim Tok tu, ol i makim ol singsing i stret long ol bikpela tok bilong miting. Olsem na taim elda i mekim pablik-tok na em i makim singsing bilong kirapim miting, em i mas makim singsing i stret long as tok bilong en.
15 Taim siaman i kolim namba bilong singsing, em i ken kolim tu nem bilong en, bilong helpim ol brata long tingim gut ol tok bilong dispela singsing, em i bilong Baibel. Na em i ken kolim tu skripsa i as bilong ol tok bilong singsing. Dispela tu bai helpim ol brata long givim bel long singsing. Na ating em i ken stori liklik long pasin bilong mekim dispela singsing na kirapim olgeta brata long pilim tru tok bilong en.
Mekim Singsing Bilong Tenkyu Long Gutpela Pasin Bilong Jehova
16 Ol tok bilong ol singsing bilong Kingdom i no ol tok nating; i gat as bilong en. Olsem na taim yumi mekim singsing, yumi mas tingim gut ol tok bilong en. Yumi mas mekim singsing long pasin i stret long ol tok bilong en. Olsem: Sapos yumi mekim singsing i stori long pasin bilong laikim ol narapela, yumi mas mekim long pasin sori. (Galesia 5:22) Yumi mas pilim tru ol tok long bel. Sampela i singsing bilong amamas na yumi mas mekim olsem; na sampela i olsem bilong ami i mats i go long pait, na yumi mas givim bel long singsing na singsing strong. Long Skul Bilong Wok Autim Tok yumi lain long givim bel long mekim tok na pilim tru long bel. Na yumi mas mekim moa yet long ol singsing.
17 Sapos yumi singsing, tasol tingting i wokabaut, bai yumi no pilim tru ol tok bilong singsing. Bai yumi olsem ol Israel, em God i krosim ol, long wanem, ol i litimapim nem bilong em long maus, tasol bel na tingting bilong ol i stap longwe long em. (Matyu 15:8) Nogut dispela tok i sutim pasin bilong yumi long mekim ol singsing bilong Kingdom, a? Sapos yumi mekim gut ol singsing, dispela bai strongim yumi yet na ol narapela i sanap klostu long yumi na ol yangpela tu. Tru tumas, sapos olgeta long Haus Kingdom i bihainim gut ol tok bilong ol singsing, dispela bai kirapim ol long wok strong long autim tok na klia long ol pasin nogut.
18 Planti taim ol man i no Witnes i pilim pasin bilong yumi long mekim ol singsing bilong Kingdom. Wanpela Wastaua i stori olsem: “Ol singsing [bilong yumi] tu inap helpim ol man long kisim save long God Jehova. Tingim stori bilong wanpela meri em i bin kisim baptais long ‘God i Win’ Kibung Distrik long Yanki Stediam, Nu Yok, long 1973. Em yet i bin go long Haus Kingdom long namba wan taim na em i stap harim tupela miting. Taim kongrigesen i mekim singsing . . . ‘Tingting Long Prais,’ em i pilim tru ol tok bilong singsing na pasin bilong ol long singsing, na em i laik i stap wantaim ol. Bihain em i go tokim wanpela Witnes em i laik stadi na lainim tok bilong Baibel. Em i kamap strong na kamap wanpela witnes Kristen bilong Jehova.”
19 Long ol miting, i gat wan wan taim bilong yumi ken kamapim bel bilong yumi na tenkyu long Jehova. Tasol yumi olgeta i ken mekim singsing na tenkyu long gutpela pasin bilong em. Taim yumi bung wantaim, bel bilong yumi i save amamas, a? Na yumi laik singsing, a? (Jems 5:13) Tru tumas, sapos yumi pilim tru gutpela pasin na marimari bilong Jehova, bai yumi givim bel olgeta long mekim ol singsing bilong litimapim nem bilong em.
Bai Yu Bekim Olsem Wanem?
◻ I gat wanem tupela bikpela as na yumi mas litimapim nem bilong Jehova?
◻ I gat wanem ol rot bilong litimapim nem bilong Jehova?
◻ Wanem wanpela gutpela rot bilong litimapim nem bilong Jehova?
◻ I gat wanem ol stori long Baibel long mekim singsing bilong litimapim nem bilong Jehova?
◻ Olsem wanem yumi ken mekim gut ol singsing bilong Kingdom?
[Askim Bilong Stadi]
1. Jehova i gat wanem ol pasin na i stret yumi mas litimapim nem bilong em?
2. I gat wanem ol as na yumi mas tenkyu long Jehova?
3. Yumi ken litimapim nem bilong Jehova na tenkyu long em long wanem ol rot?
4. Wanem wanpela gutpela rot bilong litimapim nem bilong Papa bilong yumi long heven?
5. Bilong wanem yumi mas givim bel long mekim ol singsing bilong Kingdom?
6. Long solwara Retsi, ol Israel i mekim wanem bilong tenkyu long Jehova?
7. Olpela Testamen i stori long wanem ol narapela taim ol Israel i bin mekim singsing bilong litimapim nem bilong Jehova?
8. Wanem samting i makim olsem singsing em i bikpela samting long ol Israel?
9. Olsem wanem long musik na singsing long Nupela Testamen?
10. I gat wanem ol tok long Baibel long yumi mas mekim singsing long Jehova?
11. Pol i mekim wanem tok long singsing?
12. Wanem sampela singsing bilong yumi ol i helpim yumi long ‘skulim ol arapela bai ol i mekim gutpela pasin’?
13. Lain ‘gutpela wokboi’ i mekim wanem na yumi save, ol i tingim ol singsing i bikpela samting long lotu bilong yumi?
14. Stori long sampela singsing ol i makim na i stret long ol tok bilong miting o kibung.
15. Siaman bilong miting em i ken mekim wanem bilong kirapim ol brata long tingim gut singsing?
16. Olsem wanem yumi ken mekim singsing long pasin i stret long en?
17. (a) Taim yumi mekim singsing, yumi no laik mekim wanem pasin olsem ol Israel i stap longwe long God i bin mekim? (b) Sapos yumi bihainim gut ol tok bilong ol singsing, wanem gutpela samting i kamap?
18. Pasin bilong kongrigesen long mekim singsing bilong Kingdom i mekim wanem long wanpela meri?
19. I gat wanem laspela tok bilong kirapim yumi long givim bel long mekim ol singsing bilong Kingdom?
[Blok long pes 11]
Amamas Long Ol Singsing!
Sampela i bin hatwok long lain gut long sampela nupela singsing. Tasol ol brata sista long sampela kongrigesen ol i no hatwok tumas. Sapos kongrigesen i wok strong moa long lain long ol singsing i gat hatwok, bai ol inap kisim gut. Na taim ol i lain pinis long en, ating bai ol i amamas moa long mekim, winim ol singsing i no gat hatwok. Olsem bai kongrigesen olgeta inap singsing strong. Tru tumas bai ol i ken amamas long ol dispela singsing.
[Blok long pes 12]
Mekim Ol Singsing Bilong Kingdom Long Ol Bung Bilong Amamas Tu
Yumi ken mekim ol singsing bilong Kingdom long ol narapela taim tu, i no long Haus Kingdom tasol. Pol tupela Sailas i mekim singsing long Jehova long kalabus. (Aposel 16:25) Na disaipel Jems i tok: “Ating bel bilong wanpela i amamas? Orait em i mas singim song bilong litimapim nem bilong God.” (Jems 5:13) Taim yumi bung wantaim long pati samting, yumi save amamas. Orait, em gutpela taim bilong mekim ol singsing bilong Kingdom, a? Sapos wanpela inap paitim gita o piano samting na yumi singsing, em i gutpela. O yumi ken putim kaset i gat ol singsing bilong Kingdom long en; planti famili Witnes i gat ol dispela kaset. Em gutpela musik bilong harim na i helpim singsing tu.
[Piksa long pes 8, 9]
Long solwara Retsi God i kisim bek ol Israel na ol i amamas na mekim singsing
[Piksa long pes 10]
Pasin bilong amamas na mekim singsing em hap wok bilong lotu Kristen long nau