Ol Famili Bilong Yu i Dai Pinis—Bai Yu Lukim Ol Gen?
JOHN i gat 9-pela krismas tasol na mama i dai. John i stori long taim ol i laik putim mama long bokis, na em i tok: “Mi wokim piksa na raitim liklik pas na tokim mama long wetim mipela olgeta long heven. Mi givim long papa bilong putim long bokis. Mama i dai pinis, tasol mi laik ting em i kisim dispela laspela tok mi salim long em.”—How It Feels When a Parent Dies, bilong Jill Krementz.
Yumi save, John i laikim tru mama bilong em. Em i stori long ol gutpela pasin bilong mama, na bihain em i tok: “Ating mi no laik tingim, tasol mi no inap tingim sampela samting nogut bilong mama. Em i gat gutpela skin tru, winim olgeta narapela meri mi bin lukim.”
Olsem John, planti narapela manmeri tu i tingim tru ol famili na gutpela pren i dai pinis na ol i laik tru bai ol inap lukim ol gen. Taim pikinini man bilong Edith i gat 26 krismas, sik kensa i kilim em i dai. Edith i tok: “Mi mas bilip olsem pikinini i stap laip yet long wanpela hap, tasol mi no save em i stap we. Bai mi lukim em gen? Mi no save, tasol mi laik lukim em.”
Man bilong wokim yumi em i gat pasin sori, olsem na em i pilim dispela laik bilong yumi, na em i tok promis olsem bihain bai planti milion manmeri i bung gen wantaim ol famili na gutpela pren i dai pinis. Planti taim Baibel i kamapim dispela tok promis olsem ol man i dai pinis bai ol i kirap bek.—Aisaia 26:19; Daniel 12:2, 13; Hosea 13:14; Jon 5:28, 29; KTH 20:12, 13.
Husat Ol Bai Kirap Bek na Go Long Heven?
John i bilip olsem mama bilong em i stap long heven na wetim em i kam. Orait, yumi ken skelim dispela bilip. Planti man i go long lotu ol i gat dispela bilip. Sampela pris pasto na man bilong helpim ol man, ol i paulim sampela tok bilong Baibel bilong helpim dispela bilip.
Wanpela dokta i gat save long helpim ol man em famili bilong ol i dai, em i tok: “I dai i olsem yumi rausim bodi wankain olsem yumi rausim olpela saket, o yumi lusim wanpela rum na i go long narapela. Long Saveman 12:7, Baibel i tok: ‘Bodi bilong yupela bai i kamap graun gen, na spirit God i bin givim yupela bai i go bek long God.’ Na Jisas i tok: ‘Mi go redim ples bilong yupela, na ples mi stap long en, yupela tu bai i stap long en wantaim mi.’ Na em i tokim stilman long kruse: ‘Nau bai yu stap wantaim mi long paradais.’ ”—Buk On Children and Death, bilong Dr. Elisabeth Kübler-Ross.
Olsem wanem? Ol dispela tok bilong Baibel i makim tru olsem ol lain i dai pinis ol i stap laip yet na wetim yumi long heven? Orait, yumi ken skelim gut ol dispela tok. Yumi ken skelim Saveman 12:7 pastaim. Man i raitim dispela tok i no tingting long raitim tok i pait long tok em i raitim pastaim long dispela buk, olsem: “Ol man i gat laip . . . i save bai ol i dai. Tasol ol man i dai pinis, ol i no inap save long wanpela samting.” (Saveman 9:5) Long Saveman 12:7 em i tok long olgeta man i dai. Yu ting olgeta man i strong long sakim God o long mekim pasin raskol ol i go bek long God taim ol i dai? Nogat, a? Yumi tu, maski yumi ting yumi gutpela man o nogat, yumi olgeta i no inap go bek long God, long wanem, i no gat wanpela i bin stap wantaim God long heven pastaim.
Orait, wanem insait bilong dispela tok olsem taim yumi dai ‘spirit i go bek long God’? Taim saveman i tok long “spirit,” hap tok Hibru em i kolim i no makim tewel. Em i no tok yumi gat tewel i makim yumi i narapela kain long ol narapela man. Nogat. Long Saveman 3:18-20, em i tok “laip” o “spirit” bilong ol man na ol animal i wankain. Dispela tok “spirit” i makim strong bilong i stap laip em i stap long skin bilong ol man na ol animal. God i givim laip long yumi long rot bilong papamama. Na taim yumi dai, dispela strong bilong i stap laip o “spirit” i pinis long skin bilong yumi, tasol i no olsem em i wokabaut i go bek long God. Insait bilong dispela tok “i go bek long God” i olsem: Nau strong bilong kirapim gen laip bilong yumi em i stap long han bilong God. Em yet i skelim wanem ol man em bai tingim na kirapim bek ol long bihain. Dispela i kamap klia long Song 104:29, 30 (long Buk Baibel ol i tanim tok “spirit” olsem “win”).
God Jehova i makim pinis liklik lain disaipel bilong Krais, inap 144,000 tasol, bilong kirap bek na stap long heven olsem ol pikinini spirit bilong em. (KTH 14:1, 3) Ol bai kamap gavman long heven wantaim Krais na helpim ol man i stap long graun.
Ol gutpela aposel bilong Jisas i namba wan lain i kisim save long dispela. Jisas i tokim ol: “Long haus bilong Papa bilong mi i gat planti rum i stap, na mi go bilong redim ples bilong yupela. Sapos i no olsem, orait mi no inap mekim dispela tok long yupela. Na sapos mi go redim ples bilong yupela, bai mi kam bek na kisim yupela i go i stap wantaim mi. Na ples mi stap long en, yupela tu bai i stap long en wantaim mi.” (Jon 14:2, 3) Ol dispela aposel na ol Kristen bilong pastaim, olsem Stiven, taim ol i dai pinis, ol i bin slip long matmat na wetim Krais i kam givim pe long ol, em laip i stap long heven.—Aposel 7:60; 1 Tesalonaika 4:13.
Kirap Bek na i Stap Long Graun
Tasol olsem wanem long tok promis Jisas i mekim long man nogut i hangamap long diwai klostu long em? Dispela man nogut i wankain olsem planti Juda long dispela taim, em i bilip olsem God bai salim wanpela Man bilong kamapim kingdom na bai lain Juda i stap gutpela gen long graun. (Skelim 1 King 4:20-25 wantaim Luk 19:11; 24:21; Aposel 1:6.) Na dispela man nogut i tok, em i bilip olsem Jisas em i dispela man God i makim bilong i stap King. Tasol long dispela taim i olsem Jisas i no inap kamap King, long wanem, em i kot olsem man nogut na em i mas i dai. Olsem na bilong strongim tok promis bilong em, Jisas i tok: “Mi tok tru long yu nau, bai yu stap wantaim mi long Paradais.”—Luk 23:42, 43, NW.
Ol Baibel i raitim dispela tok olsem “nau bai yu stap wantaim mi long heven,” i save paulim tingting bilong ol man, long wanem, Jisas i no i go long heven, o long wanpela paradais long dispela de; inap 3-pela de em i stap long matmat. Na taim em i kirap bek na go antap long heven, em i bin sindaun long han sut bilong God na wetim taim bilong kamap King na bosim ol man. (Hibru 10:12, 13) Klostu nau bai Kingdom bilong Jisas i helpim ol man na kamapim bek Paradais long graun. (Luk 21:10, 11, 25-31) Long dispela taim bai em i truim tok promis em i bin mekim long man nogut. Bai em i kirapim bek dispela man na helpim em long ol samting bilong skin na spirit, na long stretim pasin bilong em na bai em i bihainim ol lo bilong God. Long dispela rot i olsem Jisas bai i stap wantaim em.
Planti Man i Kirap Bek
Dispela man nogut i tanim bel na planti narapela man, ol bai kirap bek na i stap long graun. Dispela i stret long laik bilong God taim em i wokim man. Em i wokim namba wan man na meri bilong i stap long Paradais long graun na bosim olgeta samting long graun. Sapos tupela i bin bihainim tok bilong God, ol i no ken i go lapun o i dai, na bai olgeta hap bilong graun i kamap gutpela ples Paradais bilong Adam na ol lain bilong em i ken i stap long en.—Stat 1:28; 2:8, 9.
Tasol long laik bilong tupela yet, tupela i bikhet long God na mekim rong; dispela i bringim dai long tupela yet na olgeta lain bilong tupela. (Stat 2:16, 17; 3:17-19) Olsem na Baibel i tok: “Wanpela man [Adam] i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.”—Rom 5:12.
Wanpela man tasol i kamap long graun na em i no gat sin, em nambawan gutpela Pikinini bilong God, Krais Jisas. God i bin kisim laip bilong em long heven na putim long bel bilong meri singel bilong lain Juda, em Maria. Jisas i stap gut, no gat sin, na i no stret ol i kilim em i dai. Olsem na taim em i dai em inap “tekewe sin bilong olgeta manmeri.” (Jon 1:29; Matyu 20:28) Na em inap tok: “Kirap bek, em mi yet. Na laip, em mi yet. Na man i bilip long mi, maski sapos em i dai, em bai i stap laip [gen].”—Jon 11:25.
Olsem na yu inap bung gen wantaim ol lain yu laikim tumas, em ol i dai pinis, tasol yu mas bilip olsem Jisas em i Man bilong baim bek yu, na yu mas bihainim tok bilong em, em i King God i makim. Klostu nau bai Kingdom bilong God i pinisim olgeta samting nogut long dispela graun. Ol manmeri i no laik daun long Kingdom, olgeta bai bagarap. Tasol ol man i stap aninit long en, ol bai abrusim bagarap, na bai ol i gat bikpela wok long mekim graun i kamap paradais gen.—Song 37:10, 11; KTH 21:3-5.
Na bai gutpela taim bilong kirap bek i kamap. Bai yu stap bilong sekanim ol man i kirap bek? Nau yu mas mekim ol samting bambai yu inap i stap long dispela gutpela taim. Ol manmeri nau ol i daun long Kingdom bilong God na Krais, bai ol i kisim planti blesing.