Ol Tumbuna Bilong Yumi Bai Kisim Laip Gen
OLSEM wanem? Baibel i tok, taim man i dai em i save stap laip yet na go long wanpela ples spirit? Nogat. Baibel i tok yumi ken wetim wanpela gutpela samting bihain long taim yumi dai, tasol dispela gutpela samting i no dispela samting planti man i tingting long en.
Tingim tok bilong Baibel long namba wan tumbuna bilong yumi, Adam, Jehova i “kisim graun” na wokim em. (Stat 2:7) Olsem na rot i op bilong Adam i stap laip oltaim na stap amamas hia long graun. (Stat 2:16, 17) Tasol em i bikhet long gutpela Man i bin wokim em, olsem na bihain em i dai.
Taim Adam i dai, em i go we? God i bin tokim em: “Bai . . . yu go bek long graun. Long wanem, mi bin wokim yu long graun, na bai yu go bek gen long graun.”—Stat 3:19.
Taim Jehova i no wokim yet Adam long graun, Adam i stap we? Em i no stap long wanpela hap. Em i no stap laip. Olsem na taim Jehova i tokim Adam em bai “go bek long graun,” i olsem em i tokim Adam em bai kamap gen olsem graun—no gat laip. Adam i no go long wanpela ples spirit bilong kamap olsem papa bilong ol tumbuna spirit. Em i no go long wanpela gutpela ples long heven o long wanpela ples nogut bilong kisim pen oltaim oltaim. Wanpela samting tasol i painim Adam—bipo em i stap laip—bihain em i dai na i no gat laip moa.
Olsem wanem long ol narapela manmeri? Laip bilong ol tumbuna pikinini bilong Adam tu i save pinis taim ol i dai? Baibel i bekim tok olsem: “God i bin kisim graun na wokim [man na abus], olsem na taim tupela i dai bai tupela i kamap olsem graun gen.”—Saveman 3:19, 20.
Ol Samting i Painim Man i Dai Pinis
Tru tumas, ol man i dai pinis ol i no i stap laip moa; ol i no inap harim wanpela samting; ol i no inap lukim wanpela samting; ol i no inap toktok; ol i no gat tingting. Baibel i helpim yumi long save long dispela samting olsem: “Ol man i gat laip . . . ol i save bai ol i dai. Tasol ol man i dai pinis, ol i no inap save long wanpela samting. . . . Laik na kros na mangal bilong ol i pinis olgeta.” Na Baibel i tok moa olsem: “Yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.”—Saveman 9:5, 6, 10.
Olsem na Baibel i kamapim klia, taim man i stap laip, em i save bai em i dai. Tasol taim em i dai pinis, em i no save long wanpela samting. Tewel bilong em i no save sanap klostu long skin i dai pinis na lukluk long ol samting ol man i mekim long skin bilong em, nogat. Long samting i no stap laip moa, i no gat amamas o pen o bel hevi. Ol man i dai pinis i no save tingim ol de o yia samting. Indai i kain olsem slip, wankain olsem man i slip i dai.
Jop em i wanpela wokman bilong God long bipo na em i save, taim ol man i dai pinis, ol i no stap laip moa. Na em i save, sapos God i no mekim wanpela samting, ol daiman i no inap kisim laip gen. Jop i tok: “Taim mipela i dai, mipela i save pinis olgeta. . . . Ol manmeri i save dai . . . bai ol i slip i stap na i no gat wanpela samting bai i kirapim ol.” (Jop 14:10, 12) Jop i no gat tingting olsem taim em i dai em bai go long wanpela ples spirit bilong bungim ol tumbuna bilong em, nogat tru.
Tok Promis Long Kirap Bek
Ol man i dai pinis ol i no i stap laip moa, olsem na bikpela tok i kamap olsem Jop i tok: “God, i gutpela sapos yu haitim mi long ples bilong ol man i dai pinis . . . Na yu ken makim wanpela taim bilong tingim mi gen. . . . Olsem na bai yu [Jehova] singautim mi na bai mi lusim dispela ples.”—Jop 14:14, 15.
Olsem na maski Jop i dai; em i no gat laip moa, i no olsem God bai lusim tingting long em. Jop i bilip olsem bihain God Jehova bai “singautim” em i kirap bek na em bai stap laip gen.
Krais Jisas, Pikinini bilong God, i kamapim klia olsem tingting bilong Jop long kirap bek i gat as bilong en. Olsem wanem Jisas i kamapim klia dispela samting? Em yet i kirapim ol daiman! Tru, taim Jop i dai Jisas i no stap long graun bilong kirapim bek em, tasol taim Jisas i stap long graun em i bin kirapim bek pikinini man bilong wanpela meri wanpis bilong taun Nain. Na Jisas i bin kirapim bek pikinini meri i gat 12-pela krismas bilong wanpela man, em Jairus. Na pren bilong Jisas, Lasarus, em i dai pinis na 4-pela de bihain Jisas i kirapim bek em.—Luk 7:11-15; 8:41, 42, 49-56; Jon 11:38-44.
Jisas i wokim ol dispela mirakel bilong kirapim daiman, tasol em i stori tu long wanpela bikpela kirap bek long bihain. Em i tok: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:28, 29) Bihain Jehova i mekim wok long aposel Pol bilong kirapim bek wanpela yangpela man, na Pol tu i bilip olsem ol man i dai pinis ol bai kirap bek long bihain. Em i tok: “Mi bilip na mi wet long God bai i kirapim bek ol man i dai pinis, em ol stretpela man na ol man nogut wantaim.”—Aposel 20:7-12; 24:15.
Ol dispela tok bilong Baibel olsem ol man i dai pinis bai kirap bek long bihain, i no makim olsem ol i kirap bek na stap laip long wanpela ples spirit, nogat. Baibel i stori long taim planti milion manmeri em ol i dai pinis ol bai kirap bek long skin bilong man hia long graun. Na bai ol inap tingim bek ol samting i bin painim ol bipo taim ol i no dai yet. Na i no olsem mama i mas karim ol gen olsem nupela pikinini, nogat. Taim ol i kirap bek ol bai wankain stret olsem bipo—tingting na pasin bilong ol bai wankain olsem bipo. Ol yet bai save ol i husat, na ol narapela man tu bai luksave long ol. Man! Bikpela amamas tru bai kamap taim ol dispela manmeri i kirap bek na bungim gen ol pren na famili bilong ol! Na bai yumi amamas tru long bungim ol tumbuna bilong yumi!
Kirap Bek na Kisim Laip Long Heven
Olsem wanem? Jisas i tok sampela man bai go long heven? Yes, em i tok olsem. Long laspela apinun paslain long em i dai em i tok: “Long haus bilong Papa bilong mi i gat planti rum i stap, na mi go bilong redim ples bilong yupela. . . . Na sapos mi go redim ples bilong yupela, bai mi kam bek na kisim yupela i go i stap wantaim mi. Na ples mi stap long en, yupela tu bai i stap long en wantaim mi.” (Jon 14:2, 3) Taim Jisas i tok olsem, em i toktok wantaim ol gutpela aposel bilong em, tasol em i no stori long olgeta gutpela manmeri bai go long heven.
Jisas i tok ol man i kirap bek na go long heven ol i mas winim sampela mak, ol i no ken stap olsem ol gutpela man tasol. Wanpela samting ol i mas kisim em stretpela save long Jehova na laik bilong em. (Jon 17:3) Na ol i mas bilip long ofa bilong Krais Jisas na ol i mas bihainim tok bilong God. (Jon 3:16; 1 Jon 5:3) Na tu, ol i mas kamap “nupela gen” olsem wanpela Kristen i baptais na God i makim em long spirit holi. (Jon 1:12, 13; 3:3-6) Na narapela mak ol i mas winim bilong kisim laip long heven, em ol i mas stap gut long God inap long taim ol i dai olsem Jisas i bin mekim.—Luk 22:29; KTH 2:10.
Na ol dispela bikpela mak ol man i mas winim i gat as bilong en. Ol dispela man i kirap bek na stap laip long heven, ol bai mekim bikpela wok. Jehova i save ol gavman bilong graun i no inap bosim gut ol samting hia long graun. Olsem na em i stretim rot bilong kamapim wanpela gavman o Kingdom long heven bilong bosim ol man long graun. (Matyu 6:9, 10) Jisas bai stap olsem King bilong dispela Kingdom. (Daniel 7:13, 14) God bai makim sampela manmeri bilong graun bilong kisim laip long heven na mekim wok king wantaim Krais. Baibel i tok, taim ol dispela manmeri i kirap bek ol bai “stap lain pris bilong God bilong [yumi]. Na bai ol i stap king na bosim ol manmeri bilong graun.”—KTH 5:10.
Yu ting planti manmeri bai inapim ol dispela mak bilong kirap bek na stap laip long heven? Nogat. I no asua bilong ol, tasol klostu olgeta manmeri i dai pinis ol i no inap kisim laip long heven. Rot i no bin op bilong planti manmeri i ken save long tok i tru bilong Jehova na ol laik bilong em, o sampela i bin kisim hap save tasol. Ol i stap laip na bihain ol i dai, tasol ol i no bin kisim save long Krais Jisas o long Kingdom bilong God.
Jisas i tok ol dispela man bai go long heven ol i olsem “liklik lain sipsip.” (Luk 12:32) Bihain, Baibel i tok ol dispela manmeri God i bin “baim bek ol namel long olgeta manmeri bilong graun” bilong mekim wok king wantaim Krais long heven, em 144,000. (KTH 14:1-3; 20:6) Dispela namba 144,000 bai inap long ol dispela “planti rum” Jisas i bin stori long en, tasol taim yumi tingim ol bilion bilion tumbuna pikinini bilong Adam, dispela namba 144,000 i liklik namba tru.—Jon 14:2.
Ol Samting Paslain Long Kirap Bek na i Stap Long Graun
Orait, yumi ken tingim gen ol samting yumi stori pinis long en. Baibel i tok, ol man i dai pinis ol i no stap laip moa inap long taim God Jehova i kirapim bek ol. Sampela bai kirap bek na go long heven na ol bai mekim wok king wantaim Krais Jisas long Kingdom o gavman bilong God. Tasol klostu olgeta manmeri bai kirap bek na i stap laip long graun na ol bai stap aninit long dispela Kingdom.
Kirap bek na i stap laip long graun em wanpela samting bilong olgeta samting Jehova i laik mekim long graun. Jehova i “no wokim graun bilong i stap nating.” (Aisaia 45:18) Em i wokim graun bilong man i ken i stap oltaim oltaim long en. Olsem na man bilong raitim Song i tok: “Heven em i ples bilong God tasol, na em i givim graun long yumi manmeri.”—Song 115:16.
I gat sampela bikpela senis i mas kamap paslain long ol man i kirap bek long graun. Ating yu lukim ol hevi long graun olsem pait na bagarapim man, na pasin raskol, na pasin bilong bagarapim ol samting long graun, na yu pilim olsem dispela i no laik bilong God, a? Ol dispela hevi i kamap, long wanem, sampela man i no tingim God na ol stretpela lo bilong em. Olsem na wanpela bikpela samting Kingdom bilong God bai mekim bilong inapim laik bilong God long graun, em long “bagarapim ol man i bin bagarapim graun.” (KTH 11:18) Kingdom bai bagarapim olgeta man nogut na ol stretpela man tasol bai stap long graun inap oltaim oltaim.—Song 37:9, 29.
Paradais Long Graun
Ol dispela man i kirap bek taim graun i kamap klinpela gen, ol bai daunim nem bilong ol yet na tingting tru long ol narapela na mekim ol samting i stret. (Skelim wantaim Matyu 5:5.) Ol bai stap aninit long gutpela Kingdom bilong God na ol bai stap amamas na bel isi. Baibel i stori long dispela gutpela taim olsem: “[God] bai i mekim drai wara i stap long ai bilong olgeta . . . Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:4.
Tru tumas, graun bai kamap Paradais. (Luk 23:43, NW) Tingim: Ol haus sik na ol haus pasindia bilong ol lapun—ol bai pinis. Long Paradais man i no ken lapun na karim ol hevi olsem lapun i save karim long nau. Nogat. Skin bilong ol bai strong. (Jop 33:25; Aisaia 35:5, 6) Ol haus bilong redim skin bilong man i dai pinis, na matmat, na ston bilong matmat bai pinis. Long rot bilong Kingdom bilong em, Jehova bai ‘pinisim dai.’ (Aisaia 25:8) Tru tumas, long rot bilong ol dispela blesing, i stap bilong yumi na ol tumbuna bilong yumi bai gutpela tru.
[Piksa long pes 7]
Ol man i kirap bek na i stap long graun, ol bai stap aninit long Kingdom