Ol Witnes Bilong Jehova Long Olgeta Hap—Swiden

LONG hap is bilong Skandinevia, kantri Swiden i stap na i go antap winim hap bilong Aktik Sekel. Swiden i gat nem long olgeta hap, long wanem, i gat gutpela gutpela bus, na ol raunwara, na ol maunten. Long planti kantri long Yurop, Swiden em wanpela kantri i no gat planti man. Tasol maski olsem, klostu long yia 1900 i kam inap long nau, ol Witnes Bilong Jehova i bin wok long painim ol man i laik save long tok i tru. Tingim wanpela samting nau tasol i kamap.

Wanpela meri i bin stadi long Baibel wantaim ol Witnes, tasol man bilong em i no amamas em i mekim olsem. Man i tokim meri bilong em long lusim stadi, olsem na em i lusim. Man i wok long wanpela bakstua bilong dring. Wanpela de wanpela man i draivim trak i kam na bubu pikinini man i gat 10-pela krismas i kam wantaim em. Man bilong draivim trak i askim man bilong bakstua long was long pikinini taim em i putim kago i go long trak. Man i no laik sanap na pasim maus tasol, olsem na em i askim pikinini em i bin kisim wanem ol presen long betde i go pinis. Man i kirap nogut tru taim pikinini i tok em na famili bilong em i no save tingim betde, long wanem, ol i Witnes Bilong Jehova. Na pikinini i tok, em i save kisim ol presen long ol narapela taim bilong yia, olsem na em i no lus long wanpela samting. Na em i tok, famili bilong em i wanpela gutpela famili i save kamapim pasin sori na ol presen i no inap winim dispela kain pasin.

Inap planti taim pikinini i kam long bakstua wantaim bubu bilong em. Na long olgeta taim dispela man bilong bakstua i givim planti askim long pikinini. Em i kirap nogut long ol tok bilong pikinini​—⁠em i tok stret na em i no gat tupela tingting long ol tok em i kamapim. Na em i pilim tru tingting bilong dispela pikinini long ol gutpela lo na pasin. Wanpela nait dispela man i lukim wanpela program long televisen na program i kamapim ol hevi long graun. Dispela i mekim na em i save em i mas kirap na tingim ol samting bilong spirit. Em i telefon long dispela Witnes i bin stadi wantaim meri bilong em na askim em long kam long haus. I no longtaim tumas na dispela man i kirap na stadi wantaim wanpela Witnes na kwiktaim em i kamap strong. Long Epril 10, 1994, em i kisim baptais. Nau meri bilong em tu i baptais.

Planti Man—Mas Wokim Haus

Planti refyuji bilong ol narapela kantri i sindaun long Swiden. Taim ol Witnes Swiden i autim tok long ol dispela refyuji, planti i harim tok. Wok i kamap gutpela, olsem na ol Witnes i mas wokim ol nupela Haus Kingdom. Kirap long 1986 i go inap 1993, ol i bin wokim 37 Haus Kingdom long rot bilong sanapim hariap insait long sampela de tasol. Na ol i bin stretim 8-pela Haus Kingdom na skruim ol i go bikpela. Long 1994, ol i wokim narapela 7-pela Haus Kingdom na stretim 3-pela.

Long nau 65 kongrigesen i wet inap long sampela i ken helpim ol long wokim nupela Haus Kingdom, o skruim Haus Kingdom i go bikpela, o stretim Haus Kingdom bilong ol. Inap 2,500 volantia i save helpim dispela wok konstraksen, na ol kongrigesen i amamas long dispela gutpela wok bilong ol.

Sampela taim ol i kolim hap not bilong Swiden, em hap i go antap winim Aktik Sekel, olsem hap bilong san bilong biknait. Ol i tok olsem, long wanem, long taim bilong san, inap planti mun san i no go daun. Tasol long olgeta hap bilong Swiden, tok i tru i lait olsem san, na sapos Jehova i helpim yet dispela wok, dispela lait bilong tok i tru i no ken pinis, em bai lait moa moa yet.

[Blok long pes 8]

OL SAMTING BILONG KANTRI

Yia Bilong Wok Bilong 1994

HAMAS OL I AUTIM TOK: 24,246

SKELIM OLSEM: 1 Witnes insait long 362

HAMAS I BUNG LONG MEMORIAL: 40,372

HAMAS PAINIA, AVERES: 2,509

HAMAS BAIBEL-STADI, AVERES: 11,306

HAMAS I BAPTAIS: 850

HAMAS KONGRIGESEN: 358

BRENS-OFIS: ARBOGA

[Piksa long pes 9]

Em brens-ofis na Haus Betel long Arboga

[Piksa long pes 9]

Ol Witnes bilong bipo long Hio i bin mekim wok long dispela liklik bas bilong autim tok long ol hap i go inap 5,000 skwea kilomita