Ripot Long Wok Bilong Kingdom
“Sakim Satan, na Em Bai i Lusim Yupela”
LONG taim bilong ol aposel, sampela manmeri long Efesus, em ol i bin givim bel long “wokim posin na marila samting,” ol i kamap Kristen na ol i bungim ol buk bilong ol i stori long pasin bilong wokim dispela, na ol i kukim long paia long ai bilong ol man. (Aposel 19:19) Ol i kaunim pe bilong ol dispela buk em inap 50,000 mani silva. Sapos em mani silva bilong ol Rom, dispela em inap olsem K37,000!
Long nau tu i gat planti manmeri, bipo ol i gat kain buk olsem na ol tu i strong long rausim olsem ol dispela Efesus long bipo i bin mekim. Lukim dispela stori i kam long Kanada.
Inap 5-pela yia bipo, wanpela Witnes Bilong Jehova i go long ol haus na autim tok na em i bungim wanpela meri, nem bilong em Nora. Nora i pulim em i go insait long haus. Longtaim pinis Nora i laik kisim save long God na em i bin bungim planti handet buk i stori long lotu na long posin marila samting. Tasol em i laik save Baibel i tok wanem long ol man i dai pinis—ol i lus olgeta o olsem wanem? Witnes i givim liklik nius long em, I Gat Gutpela Samting Bai Painim Ol Man i Dai Pinis? Dispela i bekim ol askim bilong Nora, na em i kisim sabskripsen bilong nius Kirap! na Wastaua.
Bihain em i go sindaun long narapela hap na em i no bungim moa ol Witnes. Tasol em i kisim yet ol nius long rot bilong posofis long nupela atres bilong em. Na em i oda long sampela buk em ol nius i stori long en. Bihain liklik wanpela Witnes i kam autim tok long haus bilong em. Nora i givim sampela askim long Witnes na em i amamas tru long Witnes i opim Baibel na bekim ol askim bilong em. Olsem na em i tokim Witnes long kam bek na toktok moa wantaim em.
Tasol dispela Witnes i hatwok long bungim Nora gen. Em i go long narapela narapela taim bilong de na long narapela narapela de tasol em i no bungim Nora. Em i no les long i go planti taim, na bihain gutpela samting i kamap. Em i kirapim Baibel-stadi wantaim Nora. Laik bilong Nora na planti taim em i stadi 3-pela taim long wanpela wik. Ol samting em i kisim save long en i kirapim em long toktok wantaim ol pren na famili bilong em, olsem na 3-pela i tok, ol i laik bai ol Witnes Bilong Jehova i stadi wantaim ol tu na lainim ol long Baibel.
Nora i stadi na em i kisim save olsem i gat planti lotu giaman na profet giaman, na wanpela rot tasol i go long laip. Inap planti yia em i wok long painim bekim bilong askim bilong em insait long ol lotu giaman, tasol taim em i save pinis long tok bilong Baibel long ol spirit nogut, kwiktaim em i mekim olsem ol Efesus bilong bipo i bin mekim, em Aposel 19:19 i stori long ol. Em i rausim olgeta buk bilong em i stori long lotu giaman o posin marila samting. Insait long sampela de em i bagarapim planti buk, winim wan tausen, na fopela bilong ol dispela buk em i bagarapim, pe bilong en em inap K800!
Ol spirit nogut i no amamas long dispela na inap tupela wik ol i givim hevi long em. Tasol ol i no inap mekim na bai em i lusim pasin bilong em long stadi long Baibel na go long ol miting bilong lain bilong Jehova.
Kain samting olsem i makim klia olsem tok bilong Baibel i tru: “Yupela i mas daunim yupela yet na i stap aninit long God. Yupela i mas sakim Satan, na em bai i lusim yupela.”—Jems 4:7.