God i Save Harim Ol Beten
Kornilius em i wanpela man i laik bai God i ken orait long em, olsem na em i beten planti taim. Na tu, em i mekim gutpela wok long namba bilong em olsem wanpela ofisa bilong ami. Baibel i tok, “em i save givim planti mani samting” long ol man i sot.—Aposel 10:1, 2.
LONG dispela taim, kongrigesen Kristen i gat ol Juda i save bilip, na ol man bilong ol narapela lain, na ol Samaria. Kornilius em i man bilong ol narapela lain i no bin katim skin, na em i no bilong kongrigesen Kristen. Olsem wanem? Dispela i makim olsem ol beten bilong em i lus nating? Nogat. God Jehova i tingim Kornilius na ol gutpela pasin bilong em.—Aposel 10:4.
Wanpela ensel i stiaim ol samting na Kornilius i painim kongrigesen Kristen. (Aposel 10:30-33) Olsem na em wantaim famili bilong em ol i namba wan lain bilong ol man bilong ol narapela lain long kam insait long kongrigesen Kristen. God Jehova i ting samting i painim Kornilius i gutpela samting tru, olsem na ol i raitim stori bilong em long Baibel. Ating Kornilius i senisim planti pasin bilong em bambai i stap bilong em i stret wantaim ol lo bilong God. (Aisaia 2:2-4; Jon 17:16) Samting i painim Kornilius i mas strongim tru bel bilong ol manmeri bilong olgeta lain long nau, em ol i laik bai God i ken orait long ol. Tingim sampela man olsem.
Stori Bilong Sampela Long Taim Bilong Yumi
Wanpela yangpela meri long India i mas i gat man bilong mekim gut bel bilong em. Em i marit taim em i gat 21 krismas, na em i gat tupela pikinini. Tasol bihain liklik long em i karim namba tu pikinini, man bilong em i dai. Olsem na taim em i gat 24 krismas, em i meri wanpis i gat pikinini meri i gat tupela mun, na pikinini man i gat 22 mun. Em nau, em i mas i gat man bilong mekim gut bel bilong em, a? Husat inap helpim em? Long wanpela nait taim em i bel hevi tru, em i beten askim God olsem: “Papa i stap long heven, plis mekim gut bel bilong mi long rot bilong Tok bilong yu.”
Long de bihain, wanpela man i kam long haus bilong em. Em i wanpela Witnes Bilong Jehova. Long dispela de, em i hatwok long autim tok long ol haus, long wanem, wan wan man tasol i bin opim dua long em. Skin bilong em i les na em i bel hevi liklik, olsem na em i laik go bek long haus, tasol em i pilim olsem em i mas i go long wanpela haus moa. Em haus bilong dispela yangpela meri wanpis. Em i singautim Witnes long kam insait na em i kisim wanpela buk i kamapim insait bilong tok bilong Baibel. Taim meri i ritim buk na toktok wantaim dispela Witnes, dispela i mekim gut bel bilong em. Em i kisim save long tok promis bilong God long ol daiman bai kirap bek, na i no longtaim na Kingdom bilong God bai mekim graun i kamap Paradais. Na bikpela samting tru, em i kisim save long dispela wanpela trupela God i bin harim beten bilong em, em Jehova, na em i kirap laikim em tru.
Nora i sindaun long taun Jos, Saut Afrika, na em i makim wanpela mun bilong mekim wok autim tok long olgeta de. Paslain long em i kirap mekim dispela wok, em i beten askim Jehova long helpim em long painim wanpela man i gat laik tru long stadi long Baibel. Long teritori ol i makim em long wok long en, i gat haus bilong wanpela man i bin tok nogut long Nora taim em i autim tok long em long bipo. Nora i strongim bel na em i go gen long dispela haus. Em i kirap nogut, long wanem, narapela meri i sindaun long dispela haus, nem bilong em Noleen. Na tu, Noleen wantaim mama bilong em ol i bin beten askim God long helpim ol long save gut long Baibel. Nora i tok: “Taim mi tokim ol mi laik stadi wantaim ol long Baibel, ol i amamas tru.” Noleen na mama bilong em ol i kamap strong hariap. Bihain, tupela wantaim i kirap wok wantaim Nora long mekim wok bilong oraitim ol man long ol samting bilong spirit.
Narapela stori bilong kamapim klia olsem beten i gat strong, em stori bilong tupela marit i sindaun long taun Johanisbek, long Saut Afrika. Long wanpela Sarere long 1996, marit bilong Dennis na Carol i laik bruk. Ol i tingting long mekim wanpela samting moa bilong helpim marit bilong ol, na ol i beten askim God long helpim ol na ol i mekim olsem i go inap long biknait. Long de bihain, long 11 klok long moningtaim, tupela Witnes Bilong Jehova i paitim dua bilong ol. Dennis i opim dua na tokim ol Witnes long wet na bai em i singautim meri bilong em i kam. Dennis i tokim Carol sapos em i singautim ol Witnes i kam insait, ating ol bai hatwok long tokim ol long lusim haus. Carol i tokim Dennis olsem ol i bin beten askim God long helpim ol, na ating God i bin harim beten bilong ol na salim ol Witnes i kam. Olsem na ol i singautim ol Witnes i kam insait long haus, na ol i kirap stadi wantaim ol long buk Save i Bringim Man Long Laip Oltaim. Dennis na Carol i amamas tru long save ol i kisim. Long apinun, ol i go long namba wan miting bilong ol long Haus Kingdom bilong ol Witnes Bilong Jehova. Dennis na Carol i bihainim save ol i kisim long Baibel, na ol i painim rot bilong stretim ol hevi insait long marit bilong ol. Nau ol i stap amamas, na ol i baptais pinis, na ol i save litimapim nem bilong Jehova, na oltaim ol i save autim bilip bilong ol—em Baibel i as bilong en—long ol narapela man.
Olsem Wanem Sapos Yu Ting Yu No Gutpela Man Long Beten?
Sampela man i gat gutpela bel i ting ol i no gutpela man inap long ol i ken beten, long wanem, ol i save mekim pasin nogut. Krais Jisas i stori long kain man olsem, em wanpela man bilong kisim takis. Taim em i go insait long banis bilong tempel, dispela man i pilim olsem em i no gutpela man long go long hap ol man i save beten long en. Baibel i tok: “Man bilong kisim takis em i sanap longwe . . . Em i paitim bros bilong en na i tok, ‘God mi man bilong mekim sin. Yu ken marimari long mi.’ ” (Luk 18:13) Jisas i tok, God i harim beten bilong dispela man. Dispela i kamapim klia olsem God Jehova i save sori long ol man na em i laik helpim ol man i tanim bel tru.
Tingim wanpela yangpela man bilong Saut Afrika, nem bilong em Paul. Taim Paul i manki yet, em i bin go long ol miting Kristen wantaim mama bilong em. Tasol taim em i go long haiskul, em i kirap poromanim ol yangpela i no save bihainim rot God i makim. Taim em i pinis long skul, em i insait long ami bilong gavman apatet bilong bipo long Saut Afrika, em gavman i tok blakskin na waitskin i no ken bung wantaim. Na wantu tasol gelpren bilong em i lusim em. Paul i no amamas long i stap bilong em, na em i bel hevi tru. Em i tok: “Long wanpela apinun, mi beten askim Jehova long helpim mi, maski mi no bin beten long em inap planti yia.”
I no longtaim bihain long Paul i mekim dispela beten, mama bilong em i singautim em long kam long Memorial bilong tingim indai bilong Krais. (Luk 22:19) Paul i kirap nogut long mama i mekim olsem, long wanem, bipo Paul i save bikhet na em i no laik harim tok bilong Baibel. Paul i tok: “Mi ting taim mama i singautim mi long kam long Memorial, dispela i makim olsem Jehova i bin harim beten bilong mi na mi pilim olsem mi mas go long Memorial.” Kirap long dispela taim, Paul i go long olgeta miting Kristen. Em i stadi inap 4-pela mun, na bihain em i kisim baptais. Na tu, em i lusim skul bilong kamap ensinia, na em i insait long wok bilong autim tok long olgeta de. Long nau, Paul em i stap amamas, na em i no bel hevi moa long i stap bilong em long bipo. Inap 11-pela yia nau, em i bin wok long brens-ofis bilong Sosaiti Was Taua long Saut Afrika.
Tru tumas, God Jehova i save harim ol beten na em “i save mekim gut tru long ol man i wok long painim em.” (Hibru 11:6) Klostu nau bikpela de bilong Jehova bai kamap na pinisim olgeta pasin nogut. Tasol Jehova i wok yet long harim beten bilong lain bilong em, em ol i askim God long stiaim ol na givim strong long ol taim ol i givim bel long wok autim tok. Olsem na planti milion manmeri bilong olgeta lain ol i kam insait long kongrigesen Kristen na ol i kisim save long Baibel, em dispela save i bringim man long laip oltaim.—Jon 17:3.
[Piksa long pes 5]
Beten bilong Kornilius i mekim na aposel Pita i kam lukim em
[Piksa long pes 6]
Beten i bin helpim planti manmeri long taim bilong hevi
[Ol Piksa long pes 7]
Em i gutpela long beten askim God long helpim yu long save long tok bilong Baibel
Ol marit inap beten askim God long strongim marit bilong ol