Bilong Wanem Yu Mas Beten?

“TAIM yupela i beten long kisim samting, yupela i no save kisim, long wanem, tingting bilong yupela i no stret na yupela i beten long God. . . . Yupela i mas i go klostu tru long God, na em bai i kam klostu tru long yupela.” (Jems 4:​3, 8) Dispela tok bilong Jems, em wanpela disaipel bilong Jisas, inap kirapim yumi long skelim i gat wanem ol as na yumi mas beten.

Long rot bilong beten yumi inap tokim God long ol samting yumi sot long en, na yumi inap kamapim planti samting moa. Long tok bilong em antap long maunten, Jisas i tok: “Taim yupela i no opim maus yet long askim Papa bilong yupela long wanpela samting, em i save pinis long olgeta samting yupela i sot long en.” Tasol Jisas i tok tu olsem: “Yupela i mas prea na askim God long givim ol samting long yupela, na em bai i givim long yupela.” (Matyu 6:8; 7:⁠7) Olsem na Jehova i laik yumi tokim em long ol samting yumi ting yumi sot long en. Tasol i gat planti as moa bilong beten.

Ol pren tru i no save toktok tasol long taim ol i sot long wanpela samting, nogat. Narapela i save tingim tru narapela, na pasin bilong ol long pas gut wantaim i save kamap strong moa taim narapela i kamapim tingting long narapela. Olsem tasol, yumi no ken beten tasol bilong askim long ol samting yumi sot long en, nogat; beten i gat bikpela as moa. Taim yumi kamapim olsem yumi givim bel tru long Jehova, dispela i save opim rot long yumi long strongim pasin bilong yumi long pas gut wantaim em.

Yes, long rot bilong beten, God i save opim rot long yumi long go klostu long em. Dispela bai kamap tasol sapos yumi kamapim ol tingting bilong yumi long God, na yumi no ken kolim kolim nating ol beten yumi save holim long tingting. Man! Em i wanpela gutpela samting tru long toktok long Jehova long rot bilong beten! Na tu, wanpela savetok bilong Baibel i tok: “Em i amamas moa yet long prea bilong stretpela man.”​​—⁠Sindaun 15:⁠8.

Asap, em man bilong raitim Song, em i tok: “Tasol mi, mi stap klostu long [God] na dispela i gutpela tru.” (Song 73:28) Tasol bilong i go klostu long God, i gat sampela samting moa yumi mas mekim, i no beten tasol. Orait, nau yumi ken lukim olsem wanem dispela samting i kamap ples klia long stori nau yumi kamapim:

“Wanpela disaipel [bilong Jisas] i tokim em olsem, ‘Bikpela, yu skulim mipela long mekim prea.’ ” Bilong bekim askim bilong em, Jisas i tok: “Taim yupela i beten, yupela i ken tok olsem, ‘Papa, nem bilong yu i mas i stap holi. Kingdom bilong yu i mas i kam.’ ” (Luk 11:​1, 2) Yu ting, yumi inap pilim tru beten bilong yumi long bel sapos yumi no kisim save pastaim long nem bilong God na long olsem wanem yumi inap mekim holi dispela nem? Na yu ting yumi inap mekim beten i stret wantaim ol dispela tok bilong Jisas sapos yumi no klia gut long Kingdom bilong God em i wanem samting? Yumi inap klia gut long ol dispela samting sapos yumi skelim gut Baibel. Save yumi kisim bai helpim yumi long save long God na klia gut long ol pasin em i laikim. Na tu, taim yumi save gut long God Jehova, dispela bai helpim yumi long stap klostu moa long em na bai yumi givim bel moa yet long em. Dispela bai i helpim yumi na bai yumi no pret long toktok long em long rot bilong beten.

Beten Inap Stretim Ol Hevi

Sapos yumi kisim pasin bilong pas gut wantaim Jehova, dispela bai helpim yumi long stretim ol hevi. Tingim olsem wanem dispela samting i kamap long wan wan bilong ol dispela stori nau bai yumi kamapim. Ol dispela stori i kamapim olsem ol lain i beten ol i bin mekim pasin bilong ol long pas gut wantaim Jehova i kamap strong moa.

Long Brasil, wanpela meri nem bilong em Maria em i beten long God long helpim em. Em i laik bikhet long ol stretpela pasin ol man i mas bihainim, long wanem, em i lukim ol man i mekim planti pasin giaman. Maria i bin lusim man bilong em, na ol pikinini, na haus bilong em. Na tu, em i kirap long kisim ol drak. Tasol taim em i no painim amamas, em i kamapim bel bilong em long God na beten askim God long helpim em.

Bihain liklik, tupela Witnes Bilong Jehova i kam lukim em na lusim wanpela nius Wastaua wantaim em. Nius i stori long ol gutpela samting i kamap sapos man i bihainim tok bilong God. Dispela ol tok i sutim tru bel bilong em, na long dispela de stret em i kirap stadi long Baibel wantaim tupela Witnes. Bihain dispela i helpim sindaun bilong famili bilong em long kamap gut gen. Taim em i kisim save long Jehova, em i laik kamapim olsem em i laikim Em tru. Maria i tok: “Mi senisim ol pasin bilong mi na bihainim ol gutpela pasin. Pastaim man bilong mi na famili ol i no amamas long mi stadi long Baibel. Tasol taim ol i lukim olsem mi wok long senisim pasin bilong mi, ol i strongim mi.” Bihain, Maria i dediketim laip bilong em long Man bilong harim ol beten na bai em i ken mekim wok bilong em.

Maski José i gat wanpela naispela meri na gutpela bisnis bilong em long Bolivia, em i no stap amamas. Pasin bilong raun wantaim narapela meri i mekim na meri bilong em i lusim em. Em i save dring planti na em i pilim olsem em yet i olsem samting nating. José i tok: “Mi beten strong long bel na askim God long ol samting mi mas mekim bambai em i ken amamas long mi. Bihain liklik, ol Witnes Bilong Jehova i kam long ples wok bilong mi na ol i laik mekim Baibel-stadi wantaim mi, no gat pe, tasol mi no laik. Inap tripela taim dispela samting i kamap. Olgeta taim mi beten long God i helpim mi, ol Witnes i save kam. Orait nau mi pasim tok long bel olsem, narapela taim ol i kam bai mi putim yau long tok bilong ol. Mi bin kaunim Baibel olgeta na mi gat planti askim, tasol olgeta taim ol i save bekim stret ol askim bilong mi. Save mi kisim long Jehova i kamapim nupela as long i stap bilong mi, na ol pren bilong mi insait long lain Witnes ol i stap gutpela piksa na dispela i strongim tru bel bilong mi! Mi lusim gelpren bilong mi na ol poroman mi save dring spak wantaim ol. I no longtaim na mi stap gen wantaim meri na ol pikinini bilong mi. Mi kisim baptais long kirap bilong yia 1999.”

Long Itali, marit bilong Tamara i laik bagarap, olsem na em i beten long kisim gutpela tingting na save. Taim em i pikinini yet ol i bin paitim paitim em, na taim em i gat 14 krismas famili i bin rausim em, olsem na em i bin kisim pasin bilong belhat. Tamara i tok: “Mi painim wanpela Baibel na mi kirap long kaunim. Wanpela apinun mi kaunim wanpela hap bilong Baibel i tok, ‘yumi mas wok hat long painim gutpela tingting, olsem man i wok long painim mani samting ol i haitim.’ Mi beten na askim God long helpim mi long kisim dispela gutpela save na tingting. (Sindaun 2:​1-6) Long de bihain long moningtaim, ol Witnes Bilong Jehova i kam long haus bilong mi. Mi kirap stadi long Baibel wantaim ol, tasol mi no kirap kwik long bihainim ol tok mi lainim long Baibel. Bihain, mi pasim tok long bel long bihainim pasin Kristen na mi kisim baptais. Nau mi save wok wantaim man bilong mi long helpim ol narapela long larim gutpela tingting na save i kam long God i ken helpim ol.”

Beatriz em i wanpela bilong ol lain i gat biknem long Karakas, Veneswela. Tasol marit bilong em i bruk na em i stap bel hevi. Em i bel hevi tru, olsem na wanpela taim em i beten inap planti aua. Long de bihain long moningtaim, belo bilong haus i krai. Em i kros liklik na lukluk long liklik hul i stap long dua bilong lukim ol man i stap ausait, na em i lukim tupela marit i karim paus ol i sanap ausait. Em i giaman olsem em i no stap long haus, tasol paslain long tupela marit i lusim haus, tupela i subim wanpela liklik nius i go aninit long dua. Nius i tok, “Kisim Save Long Baibel.” Olsem wanem? Yu ting nau em i kisim bekim bilong beten em i bin mekim long nait paslain? Em i singautim tupela long kam bek. I no longtaim na em i kirap stadi long Baibel na bihain em i kisim baptais. Nau em i stap amamas na em i skulim ol narapela long rot bilong painim amamas.

Carmen i beten long ol hevi em i karim long i stap rabis. Em i gat 10-pela pikinini na man bilong em, Rafael, i save spak planti. Carmen i tok: “Mi traim long kisim liklik mani long rot bilong wasim ol klos bilong ol narapela.” Tasol pasin bilong Rafael long dring planti i go nogut moa. “Dispela pasin bilong em i stap yet i go inap long taim mipela i kirap stadi long Baibel wantaim ol Witnes Bilong Jehova, long dispela taim tasol em i kirap long senisim pasin bilong em. Mipela i kisim save long tok promis bilong Kingdom​​—⁠olsem liklik taim tasol na Jehova bai pinisim olgeta hevi bilong i stap rabis na pasin bilong daunim ol narapela. Inap longpela taim mi bin beten long God na nau em i harim beten bilong mi!” Ol save Rafael i kisim long ol pasin Jehova i laik yumi mas bihainim dispela i helpim em long lusim pasin bilong dring planti, na em i “kamap nupela.” (Efesus 4:​24) Nau em wantaim famili bilong em ol inap long mekim sindaun bilong ol i kamap gutpela moa. Rafael i tok: “Tru, mipela i no gat planti samting bilong skin, na mipela i no gat wanpela haus bilong mipela yet, tasol mipela i gat ol samting mipela i mas kisim na mipela i stap amamas.”

Taim God Bai Harim Olgeta Beten

Olsem wanem? Pasin bilong beten i bin helpim ol dispela manmeri? Tru tumas, em i bin helpim ol! Olsem wanem? Yu bin luksave olsem planti taim God i harim beten bilong ol taim wanpela long kongrigesen Kristen i helpim ol long i go klostu long God Jehova long rot bilong stadi long Baibel?​​—⁠Aposel 9:​11.

Olsem na yumi gat ol gutpela as bilong beten. Klostu nau, bai God i harim ol beten bilong yumi long Kingdom bilong God i mas i kam na laik bilong em i mas kamap long graun. (Matyu 6:​10) Taim God i rausim pinis ol man i birua long em, “olgeta samting long graun bai i save tru long Bikpela.” (Aisaia 11:⁠9) Long dispela taim olgeta man i laikim tru Jehova ol bai “stap gutpela tru” olsem “pikinini bilong God”​​—⁠na God bai harim olgeta beten bilong ol.​​—⁠Rom 8:​18-​21.

[Piksa long pes 7]

Yu save long as na yumi mas beten?