Hau Yu Ken Beten na Bai God i Harim?
Jehova God em i “Man Bilong Harim ol prea.” (Buk Song 65:2) Yumi ken beten long em long kain kain hap na long kain kain taim, na yumi ken beten long maus o long tingting. Jehova i laik yumi kolim em olsem “Papa,” na em i gutpela Papa bilong yumi. (Matyu 6:9) Long pasin laikim em i skulim yumi long hau yumi ken beten na em i ken harim yumi.
BETEN LONG JEHOVA GOD LONG NEM BILONG JISAS
“Sapos yupela i askim Papa long wanpela samting long nem bilong mi, em bai givim long yupela.”—Jon 16:23.
Tok bilong Jisas i kamapim klia olsem Jehova i laik bai yumi beten long em long nem bilong Jisas Krais, i no long rot bilong ol imis, ol santuman, ol ensel, o ol tumbuna bilong yumi i dai pinis. Taim yumi beten long God long nem bilong Jisas, yumi soim olsem yumi luksave long bikpela wok bilong Jisas. Jisas i tok: “I no gat man inap kam long Papa long narapela rot, nogat, long rot bilong mi tasol.” —Jon 14:6.
KAMAPIM OL TINGTING I STAP LONG BEL
“Autim olgeta tingting i stap long bel bilong yupela long em.” —Buk Song 62:8.
Taim yumi beten long Jehova, yumi mas toktok wantaim em olsem yumi toktok wantaim wanpela gutpela papa. Yumi no ken ritim tasol ol tok i stap long wanpela buk o kolim ol wankain tok gen na gen long beten, nogat, yumi mas toktok wantaim em long pasin rispek na kamapim ol tingting i stap long bel bilong yumi.
BETEN I STRET WANTAIM LAIK BILONG GOD
“Maski wanem wanem samting yumi askim em long en na i stret wantaim laik bilong em, em bai harim yumi.”—1 Jon 5:14.
Long Baibel, Jehova God i tokim yumi long ol samting em bai mekim bilong yumi na ol samting yumi mas mekim bilong em. Bilong God i ken orait long ol beten bilong yumi, beten bilong yumi i mas “stret wantaim laik bilong em.” Bilong mekim olsem, yumi mas stadi long Baibel na bai yumi ken kisim save gut long em. Sapos yumi mekim olsem, ol beten bilong yumi bai amamasim em.
YUMI KEN BETEN LONG WANEM SAMTING?
Yu Ken Beten Long Ol Samting Yu Nidim. Yumi ken beten askim God long ol samting yumi nidim long olgeta de—olsem kaikai, klos, na haus. Yumi ken beten askim em tu long kisim savetingting bambai yumi ken wokim ol gutpela disisen na long givim yumi strong na bai yumi ken sanap strong taim ol traim i painim yumi. Yumi ken beten askim God long givim yumi bilip, fogivim yumi, na helpim yumi.—Luk 11:3, 4, 13; Jems 1:5, 17.
Beten Bilong Helpim Ol Narapela. Ol papamama i save tingim tru ol pikinini, ol i save amamas taim ol pikinini bilong ol i laikim narapela narapela. Jehova tu i laik bai ol pikinini bilong em long graun i mas tingim narapela narapela. I stret long beten bilong helpim ol poroman marit bilong yumi, ol pikinini, ol famili, na ol pren bilong yumi. Disaipel Jems i tok: “Beten bilong helpim narapela narapela.”—Jems 5:16.
Kamapim Tenkyu Bilong Yumi. Baibel i tok long Krieta bilong yumi olsem: “Em i bin mekim ol gutpela samting . . . Em i mekim ren i lusim skai na i kam daun long yupela, na mekim planti gutpela kaikai i kamap na mekim bel bilong yupela i amamas.” (Aposel 14:17) Taim yumi tingim olgeta samting God i mekim bilong helpim yumi, dispela bai kirapim yumi long beten long em na tok tenkyu long em. Na tu, yumi mas soim tenkyu bilong yumi long God long rot bilong bihainim ol tok bilong em.—Kolosi 3:15.
NO KEN LES KWIK NA WOK YET LONG BETEN
Sampela taim yumi bel hevi bikos yumi no kisim kwik bekim bilong ol beten bilong yumi. Yu ting dispela i makim olsem God i no tingim yumi? Nogat tru! Skelim ol dispela ekspiriens i kamapim klia olsem yumi mas wok yet long beten.
Steve, em yumi stori long em long fes atikol, em i tok, “Sapos mi no wok long beten, bai mi givap pinis long mekim ol samting bilong i stap amamas.” Wanem samting i mekim na em i senis? Em i kirap stadi long Baibel na em i kisim save olsem em i mas beten na no ken les long mekim olsem. Steve i tok, “Mi beten long God bilong tok tenkyu long em long sapot ol pren bilong mi i givim long mi. Nau mi amamas tru winim long bipo.”
Olsem wanem long Jenny, em i pilim olsem em i no gutpela inap long God i ken harim beten bilong em? Em i tok: “Taim mi pilim olsem mi samting nating tru, mi beten askim God long helpim mi long kliagut long wai na mi pilim olsem mi no gutpela tumas.” Olsem wanem dispela i helpim em? Em i tok: “Taim mi toktok wantaim God, dispela i helpim mi long tingim mi yet olsem hau God i tingim mi, na lukim olsem maski bel bilong mi i kotim mi, God i no kotim mi. Dispela i helpim mi tu long no ken givap na wok yet long beten.” Wanem samting i kamap? Em i tok: “Beten i helpim mi long lukim Jehova olsem wanpela man i stap tru, em i gat pasin laikim, em God i save tingim mi tru, Papa, na Pren we i save sapotim mi na helpim mi long wok yet long mekim ol samting em i laikim.”
Taim em i lukim pikinini man bilong em Gerard i amamas long laip bilong em, maski em i no inap wokabaut, Isabel i tok, “Mi luksave olsem em i gutpela bekim bilong ol beten bilong mi”
Skelim tu ekspiriens bilong Isabel. Taim em i gat bel, ol dokta i tokim em olsem, pikinini bilong em bai bon wantaim sampela bagarap long bodi na em i no wokabaut. Bel bilong em i bagarap stret. Sampela i tokim em long rausim bel. Em i tok: “Mi pilim olsem mi bai dai long bel hevi.” Em i mekim wanem? Em i tok: “Mi beten na beten long God i helpim mi.” Bihain em i karim bebi boi, Gerard, na em i gat sampela bagarap long bodi. Yu ting Isabel i pilim olsem God i bekim ol beten bilong em? Yes, em i pilim olsem. Long wanem rot? Isabel i tok: “Taim mi lukim pikinini man bilong mi, nau em i gat 14 krismas, em i amamas long laip bilong em, maski em i no inap wokabaut, em i gutpela bekim bilong ol beten bilong mi, na em i gutpela blesing Jehova God i givim long mi.”
Kain ol gutpela tok olsem i mekim yumi tingim tok bilong man bilong raitim song, em i tok: “Jehova, yu bai harim singaut bilong ol man i gat pasin daun. Na yu bai strongim bel bilong ol na harim krai bilong ol.” (Buk Song 10:17) Em ol gutpela as na yumi mas wok yet long beten!
Baibel i stori long planti beten bilong Jisas. Wanpela bilong ol dispela beten em ol man i save gut long en, em dispela beten em i skulim ol disaipel long en. Yumi ken kisim wanem skul long dispela beten?