Ripot Long Wok Bilong Kingdom
Tok Bilong God i Wok Strong
“TOK bilong God em i gat laip, na em i wok strong i stap.” (Hibru 4:12) Dispela tok i kamap tru long ol man pastaim ol i bihainim lotu giaman na bihain ol i harim tok i tru bilong Baibel. Tok bilong Baibel i wok strong na em inap helpim man long senisim tru pasin bilong em na wetim gutpela samting i kamap, olsem stori hia i kam long Ripablik Dominika i makim.
Ol Witnes Bilong Jehova i go lukim wanpela meri i gat biknem long Misin Katolik na nau tasol tupela liklik pikinini bilong em i dai pinis. Meri i bel hevi tru na krai long olgeta de. Ol Witnes i soim tok bilong Baibel long Jon 5:28, 29 long em, i tok ol man i dai pinis bai kirap bek. Em i toktok sampela taim moa wantaim ol Witnes na nau tok bilong kirap bek i mekim gut bel bilong em, na em i save ol bikman bilong lotu Katolik i bin giamanim em.
Kwiktaim em i lusim Misin Katolik, na ol Witnes i kirap lainim em long Baibel. Tasol man bilong em i no wanbel wantaim em. Man tu i gat biknem long Misin Katolik na em i stretim rot bambai sampela pren bilong em, ol i bikman bilong wok politik na wok lotu, ol i ken toktok wantaim meri na pulim em i kam bek long lotu Katolik. Bihain man i tok long katim marit, na em i tokaut long ol wanblut na wanlotu olsem em bai katim marit.
Tasol ol samting em i mekim i no wok. Meri i strong moa long stadi long Baibel. Em i kamap strong long spirit na kirap bihainim ol gutpela pasin Kristen, olsem na man bilong em i senisim tingting na em i no katim marit. Wanpela taim man i orait long lukim sampela buk bilong Baibel meri i stadi long en, tasol em i tok em bai mekim wok long Baibel Katolik tasol.
Em i kirap nogut long nupela save em i kisim long Baibel bilong em yet long rot bilong ol dispela buk bilong ol Witnes Bilong Jehova. Nau em i save, meri bilong em i bihainim gutpela rot; i no longtaim na em tu i redi long bihainim dispela rot. Em i save em i mas stretim sampela pasin bilong em yet. Wanpela pasin em i hatwok tru long lusim, em pasin bilong smok. Em i kaunim tok bilong Kirap! bilong Janueri 8, 1990, i gat het-tok: “Ol i Laik Bai Yu Baim Dai—Tenpela Rot Bilong Lusim Smok,” na em i wok strong long lusim dispela pasin i no stret long tok bilong Baibel. Em i no putim moa smok long poket, olsem bipo em i save mekim; em i putim dispela Kirap! long poket bilong em. Taim skin i skrap long smok, em i kaunim ol tok bilong dispela Kirap! i stori long smok. Dispela samting i helpim em! Em i kaunim dispela Kirap! planti taim na bihain em inap lusim smok.
Nau dispela man wantaim meri bilong em i baptais pinis na tupela i mekim wok bilong Jehova. Taim man i gat rot, em i save mekim wok bilong God long olgeta de na lusim bikpela hap taim long autim gutpela tok bilong Kingdom bilong God, na em i stap wokman long kongrigesen bilong ol Witnes Bilong Jehova long hap bilong em. Em wantaim meri bilong em i tingting long taim tupela pikinini bilong ol bai kirap bek long nupela taim. Tru tumas, ol tok bilong Baibel, em Tok Bilong God, em i wok strong i stap!