Sanap Strong na Kisim Laip!
“MOBETA yu lusim [God] na yu tok nogut long em na yu ken i dai!” Piksa long skin bilong Wastaua i makim meri bilong Jop i sutim dispela tok long em. Dispela samting i bin kamap olsem 3,600 yia bipo. Tasol dispela tok em i sutim long gutpela wokboi bilong God i kamapim klia bikpela tok olgeta man i insait long en long bipo na i kam inap long nau. Planti samting bilong Jop i lus—olgeta bulmakau na sipsip na kamel bilong em, na haus, na olgeta 10-pela pikinini bilong em. Na wanpela sik nogut i wok long bagarapim skin bilong em. Em bikpela traim—Jop bai sanap strong o nogat? Wanem as bilong en? Nambawan birua bilong God na ol man, em Satan, em i as bilong en. Satan i bin tok, ol man i no inap i stap gut long God; em i tok, sapos bikpela traim i painim ol, bai ol i pundaun na lusim God, na long rot bilong ol samting em i mekim long Jop em i laik truim dispela tok bilong em.—Jop 1:11, 12; 2:4, 5, 9, 10.
Long nau, olsem long taim bilong Jop, “dispela graun olgeta em i stap aninit long strong bilong Satan.” (1 Jon 5:19) Dispela samting i kamap moa yet long nau, long wanem, ol i tromoi Satan i kam daun pinis long graun na em i “man bilong giamanim olgeta manmeri bilong graun.” (KTH 12:9) Dispela i as bilong ol bikpela hevi tru i bin painim ol man long taim bilong yumi. Namba wan pait bilong olgeta hap i bin kirap long yia 1914, na long dispela taim i kam inap long nau ol samting “em i olsem pen i save kamap pastaim long meri i laik karim pikinini” em i kamap.—Matyu 24:7, 8.
Hatpela pasin na pasin sem i pulap long graun na ating sampela taim yu pilim olsem yu no inap karim moa ol hevi? Olsem wanem? Sampela taim yu tingting: ‘I gat wanem as bilong i stap bilong mi?’ Ating Jop i gat tingting olsem, tasol maski em i popaia long sampela samting, em i stap strong long bilip na em i no lusim God. Em i tok strong olsem: “Mi no bin mekim rong na mi no gat asua long wanpela samting. Na bai mi mekim wankain tok tasol i go inap taim mi dai.” Em i bilip tru olsem God bai ‘save gut olsem, em i no gat asua long wanpela samting.’—Jop 27:5; 31:6.
Krais Jisas, em Pikinini bilong God yet, em tu i bin karim hevi hia long graun. Satan i putim kain kain traim long Jisas. Em i traim Jisas long ol samting bilong skin, na long maunten em i traim bilip bilong Jisas, em i bilip tru long Tok Bilong God. (Matyu 4:1-11) Ol saveman bilong lo na ol Farisi na ol man ol i giamanim, ol i mekim nogut long Jisas, na ol i kotim em long em i tok bilas long God, na ol i pasim tok long kilim em i dai—long dispela rot Satan i givim hevi long Jisas. (Luk 5:21; Jon 5:16-18; 10:36-39; 11:57) Ol i mekim nogut moa yet long Jisas, winim pasin nogut tripela pren giaman i mekim long Jop.—Jop 16:2; 19:1, 2.
Long gaden Getsemani, taim bikpela traim tru i laik painim Jisas, em i tokim ol disaipel: “Bel bilong mi em i hevi tumas, na klostu mi laik i dai.” Na em i “pundaun na putim pes bilong en i go daun long graun na em i beten olsem, ‘Papa bilong mi, sapos inap, orait mi laik bai yu rausim dispela kap long mi. Tasol yu no ken bihainim laik bilong mi. Nogat. Yu mas bihainim laik bilong yu tasol.’ ” Na taim em i hangamap long diwai, bilong truim tok bilong Song 22:1, em i singaut strong na em i tok: “God bilong mi, God bilong mi, bilong wanem yu lusim mi?” Tasol God i no lusim tru Jisas, long wanem, Jisas i sanap strong na i stap gut long God i go inap long em i dai. Em i stap gutpela piksa na olgeta Kristen tru i ken bihainim pasin bilong em. Jisas i sanap strong na Jehova i givim gutpela pe bilong em—em i kirapim bek Jisas na givim nem long em long heven i winim olgeta narapela nem. (Matyu 26:38, 39; 27:46; Aposel 2:32-36; 5:30; 1 Pita 2:21) God bai givim gutpela pe long olgeta narapela man em ol tu i sanap strong na i stap gut long em.
Pasin bilong Jisas long sanap strong i bekim tru tok bilas Satan i bin sutim long God, na tu ofa bilong Jisas i baim bek ol man na ol manmeri i sanap strong na stap gut long God bai ol inap kisim laip i stap oltaim. (Matyu 20:28) Pastaim Jisas i bungim “liklik lain,” em God i makim ol long spirit holi na ol bai mekim wok king wantaim Jisas long Kingdom bilong heven. (Luk 12:32) Bihain, Jisas i bungim ‘bikpela lain,’ em ol bai winim taim bilong “bikpela hevi” na bai ol inap kisim laip oltaim long graun aninit long Kingdom bilong God.—KTH 7:9, 14-17.
Jop i bin sanap strong na em bai kirap bek wantaim ol narapela bilion manmeri na bai ol i insait long lain bilong “nupela graun” em ol i stap wanbel wantaim. (2 Pita 3:13; Jon 5:28, 29) Piksa long skin bilong Wastaua long baksait i makim gutpela pe Jop i kisim long taim Jehova “i mekim gut moa yet long Jop. Na las hap bilong laip bilong en i winim tru ol yia em i bin i stap bipo.” Jop i kamap strong long spirit, long wanem, “em i no mekim wanpela tok nogut long God.” Na God i skruim laip bilong Jop na Jop i stap inap 140 yia moa. Na em i givim planti bulmakau samting moa long Jop, winim bilong bipo inap dabol, na Jop i kamapim “7-pela pikinini man na tripela pikinini meri,” em long olgeta hap bilong kantri i no gat wanpela meri i naispela olsem ol. (Jop 2:10; 42:12-17) Tasol olgeta dispela samting i makim tasol ol gutpela blesing ol man i sanap strong bai kisim long Paradais long “nupela graun.” Yu tu inap kisim ol dispela blesing, na ol tok long ol narapela pes bihain i stori long dispela!
[Piksa long pes 4]
Jisas em i gutpela piksa tru bilong pasin bilong sanap strong