Gutpela Samting Tru Bilong Tilim
EM STORI BILONG GLORIA MALASPINA
Mi wantaim man bilong mi i no inap lukim moa nambis bilong Sisili na nau mipela i tingting long ples mipela i laik i go long en, em ailan Malta long solwara Mediterenian. Mipela i amamas tru long i go! Sip i raun i go na mipela i wok long tingim ol samting i bin painim aposel Pol long Malta.—APOSEL 28:1-10.
MIPELA i go long yia 1953 na long dispela taim ol i no orait long ol Witnes Bilong Jehova i autim tok long Malta. Long 1952 mipela bin skul long kamap misineri. Mipela i go long Wastaua Baibel Skul Bilong Gileat, na ol i makim mipela bilong mekim wok long Itali. Mipela i lain liklik long tok Itali na nau mipela laik save long ol samting bai painim mipela long Malta.
Long dispela taim mi yangpela meri, na ating yu laik save olsem wanem mi bin kamap misineri long narapela kantri. Orait, mi ken stori.
Gutpela Pasin Bilong Mama i Givim Tingting Long Mi
Long yia 1926, famili bilong mipela i stap long taun Fot Fransis, long Onterio, long Kanada, na mama i kisim wanpela buklet long tok Inglis, nem bilong en Planti Milion Man Bilong Nau i No Ken i Dai. Wanpela Sumatin Bilong Baibel (em nem bilong ol Witnes Bilong Jehova bipo) i givim long em. Mama i kaunim na laikim tru, na long dispela wik em i go bung wantaim liklik lain ol i save lainim tok bilong Baibel long rot bilong Wastaua. Mama i save kaunim Baibel long olgeta taim, na em i amamas tru long tok bilong Kingdom bilong God, dispela em i gutpela samting tru em i bin wok long painim. (Matyu 6:33; 13:44) Papa i birua tru long em na em i gat 3-pela liklik pikinini meri em i mas lukautim, tasol mama i sanap strong na holimpas ol tok i tru em i kisim save long en.
Insait long 20 yia mama i holimpas bilip na em i no surik liklik, na dispela i strongim mi wantaim tupela bikpela sista bilong mi, em Thelma na Viola, na mipela i bilip na wet long kisim laip i stap oltaim long nupela taim i gat stretpela pasin tasol i stap long en. (2 Pita 3:13) Ol bikpela traim i painim mama, tasol em i no lusim rot—mipela save, rot em i bihainim em i stret.
Long yia 1931, taim mi gat 10-pela krismas tasol, mipela go i stap long wanpela fam long hap bilong not long Minesota, Amerika. Mipela i stap longwe long ol Witnes Bilong Jehova na mipela i no inap bung wantaim ol, tasol mama i wok yet long lainim mipela long Baibel. Em i givim bel long mekim wok colporteur, olsem autim tok long olgeta de, na dispela i kirapim laik long bel bilong mi long wok wantaim em long dispela wok. Long yia 1938 mi wantaim tupela sista bilong mi i baptais long wanpela kibung long Dulut, long Minesota.
Taim mi winim pinis haiskul long yia 1938, mama i tok, gutpela sapos mi mekim kos na lain long mekim ol wok long ofis bambai mi inap lukautim mi yet taim mi kamap painia (em nupela nem bilong colporteur). Em gutpela tingting, long wanem, papa i lusim mipela na mipela i mas lukautim mipela yet.
Long Olgeta De Mipela i Tilim Dispela Gutpela Samting Tru
Bihain mi go long Kalifonia, na long yia 1947 mi kirap mekim wok painia long biktaun San Fransisko. Mi mekim sampela wok bilong redi long wanpela bikpela kibung (“All Nations Expansion”) long Los Enjeles na mi bungim Francis Malaspina. Mitupela wantaim i gat laik long mekim wok misineri na narapela i kirap laikim narapela. Mitupela i marit long yia 1949.
Long Septemba 1951, ol i singautim mitupela Francis i go long namba 18 klas bilong Skul Gileat. Mipela i skul strong inap 5-pela mun na long Februeri 10, 1952 mipela i mekim bung bilong winim skul. Presiden bilong skul, em Nathan H. Knorr i kolim ol kantri mipela ol misineri bai i go long en; em i bihainim namba wan leta, olsem ABC, na kolim. Taim em i kolim Itali, na kolim nem bilong mitupela, long tingting i olsem mipela kirap pinis long raun i go!
Sampela wik bihain, mipela kalap long sip long Nu Yok bilong raun inap 10-pela de na i go kamap long Jenoa, long Itali. Brata Giovanni DeCecca na Max Larson bilong nambawan ofis long Bruklin i lusim mipela long bris. Long Jenoa, ol misineri i wetim mipela, em ol i save gut long ol lo bilong go insait long kantri.
Mipela i amamas long lukim olgeta samting bilong ples, na mipela i kalap long tren i go long Bolona. Taim mipela i kamap pinis, mipela i lukim taun i bagarap yet long ol bom bilong Namba 2 Pait Bilong Olgeta Hap. Tasol i gat planti gutpela samting i stap, olsem gutpela smel bilong kopi long moningtaim, na smel bilong ol kain kari ol i putim long kaikai bilong ol Itali.
Mipela Mekim Wok Mipela Laik Mekim
Mipela i lainim lainim sampela tok na taim mipela i autim tok, mipela i kolim i go inap long man i orait long harim tok o em i pasim dua. Mipela i wok strong long lainim gut tok ples, long wanem, mipela i laik tru long autim tok. Fopela mun bihain ol i salim mipela i go long nupela haus misineri long Nepels.
Nepels em bikpela taun tru na taim yu stap long en yu inap lukluk i go long ol gutpela ples. Mipela i amamas long mekim wok long dispela biktaun, tasol 4-pela mun bihain ol i makim man bilong mi long mekim wok sekit, o wok bilong raun, na mipela i go lukim ol kongrigesen kirap long Rom na i go inap long Sisili. Bihain mipela i go long Malta tu, na long Libia long hap not bilong Afrika.
Taim mipela i kalap long tren long Nepels na i laik raun i go long Sisili, i gat bikpela hatwok bilong skin. Ol man i pas pas insait long tren na mipela i mas sanap pas pas i stap long hap bilong wokabaut namel long ol sia. Mipela i sanap olsem inap 6-pela i go 8-pela aua. Tasol dispela i givim taim long mipela bilong lukim gut ol manmeri i stap klostu. Planti taim mipela i lukim traipela botol wain long basket na papa bilong en i sindaun antap; em wain ol yet i wokim, na taim nek bilong papa i drai, bai em i opim botol na dring. Ol pasindia i pren gut long mipela, na sampela i laik givim hap bret na sosis long mipela; mipela i pilim tru dispela gutpela pasin pren bilong ol.
Long Sisili ol brata i save wetim mipela, na ol i karim switkes bilong mipela taim mipela i wokabaut i go antap long maunten inap 3-pela aua na hap bilong kamap long kongrigesen long het bilong maunten. Skin bilong mipela i les, tasol ol brata Kristen i amamas tru long lukim mipela na mekim gut long mipela na mipela i no tingim moa ol hevi bilong skin. Sampela taim mipela i sindaun long donki, na mipela i no save lukluk i go daun long ples daunbilo em mipela bai pundaun long en sapos lek bilong donki i popaia. Ol brata i sanap strong na holimpas tok i tru bilong Baibel maski ol i gat hevi na dispela i strongim mipela; na ol i mekim gutpela pasin sori long mipela, olsem na mipela i amamas long i stap wantaim ol.
Malta na Libia
Ol gutpela pasin bilong ol brata i pulap long bel na tingting bilong mipela na mipela i lusim ol na i kalap long sip i go long Malta. Aposel Pol i bungim ol gutpela man long Malta, na mipela tu i bungim ol kain man olsem. Long Pasis Bilong Sen Pol, win na bikpela si i sakim sip bilong mipela na mipela i pilim hevi em inap painim ol liklik sip long dispela hap long taim bilong ol aposel. (Aposel 27:39–Aposel28:10) Bihain bai mipela i go long Libia na mipela i tingting: Wanem samting bai painim mipela long dispela kantri long Afrika i tambuim wok bilong mipela?
Long Libia mipela i bungim narapela kain lain olgeta. Mi kirap nogut long ol samting mi lukim na harim long biktaun Tripoli long taim mipela i wokabaut long ol rot namel long ol longpela pos ston long hap bilong ol stua. Ol man i pasim longpela klos ol i wokim long gras bilong kamel, em bilong lukautim ol long san bambai bikpela hat bilong ples nating bilong Sahara i no ken bagarapim ol, na long nait ol i karamapim olsem blanket bilong sakim kol. Mipela i kisim save long pasin bilong ol dispela man em ol i lain pinis long i stap long ples kol o ples hat na mipela i pilim tru.
Ol brata i was gut na wok strong na dispela i lainim mipela long bilip strong long Jehova na bihainim tok bilong ol brata i gat bikpela save moa long mekim wok autim tok long ples i gat tambu. Ol brata Kristen bilong mipela i bilong kain kain lain, tasol ol i wok gut wantaim long mekim wok bilong Jehova.
Nupela Ples Wok
Ol man i birua long wok bilong mipela long autim tok na mipela i mas lusim Itali, tasol mipela i amamas long kisim nupela ples wok long Brasil long 1957. Mitupela Francis i lain long nupela sindaun na ol pasin bilong dispela nupela ples, na 8-pela mun bihain ol brata i singautim Francis long mekim wok sekit. Mipela raun long bas, na balus, na wokabaut long lek. Nau mipela i kisim save long ol narapela narapela hap bilong dispela traipela gutpela kantri.
Namba wan sekit mipela i go long en i gat 10-pela kongrigesen long biktaun Sau Paulo, na 10-pela liklik taun long hap bilong bus na long nambis long hap saut bilong distrik Sau Paulo. Long dispela taim i no gat ol kongrigesen long ol dispela liklik taun. Mipela i save go painim haus slip; painim pinis, orait mipela i go long ol haus na autim tok bilong Kingdom. Na mipela i save tilim ol tanget tu bilong singautim ol manmeri i kam lukim wanpela piksa wokabaut bilong Sosaiti Was Taua i skulim gut ol man.
I hatwok long kalap long bas, long wanem, mipela i holim planti samting, olsem ol piksa wokabaut, na masin bilong soim piksa, na masin bilong stretim strong bilong paua, na ol pepa bilong wok sekit, na ol buk na nius, na ol tanget, na samting bilong prinim atres long tanget, em atres bilong ples bilong lukim piksa. Liklik switkes i gat ol klos bilong mipela i no givim hatwok long mipela. Taim mipela kalap pinis long bas, mipela i save sindaunim masin bilong soim piksa long lek bilong mipela bambai i no ken seksek nabaut long taim bas i raun long ol rot nogut.
Taim mipela painim pinis ples bilong soim piksa long ol man, mipela i save go long ol haus na givim tanget long ol man bilong singautim ol i kam lukim piksa. Sampela taim mipela i kisim tok orait long putim piksa long wanpela haus kaikai o haus pasindia. Sampela taim mipela i taitim sitbet namel long tupela pos ausait na putim piksa. Ol manmeri i kam lukim piksa ol i save laikim tru; planti ol i no bin lukim piksa wokabaut bipo na ol i save sanap na putim gut yau long stori bilong piksa, em Francis i kaunim. Bihain mipela i save tilim ol buk na nius bilong Baibel long ol.
Mipela i save raun long bas bilong kamap long ol liklik ples. Sampela taim bas i kamap long bikpela wara na i no gat bris, olsem na ol i putim bas long traipela bet na trip i go long hapsait. Ol i save tokim mipela long lusim bas na sanap long bet, na ol i tok, sapos mipela i lukim bas i laik lusim bet i go insait long wara, mipela mas kalap na lusim bet long narapela sait, nogut bas i pulim mipela i go daun insait long wara. I no gat wanpela taim bas i go insait long wara, na mipela i amamas tru, long wanem, wara hia i gat ol pis pirana long en, em ol i save kaikai man.
Long yia 1958 mipela i go long kibung intenesenel long Nu Yok, na taim mipela i kam bek long Brasil, i no longtaim na mipela i kirap gen mekim wok bilong raun. Distrik bilong mipela i go long hap saut bilong Brasil inap long boda wantaim Yurugwai, na long hap wes inap long kantri Paragwai, na long provins Penambuko long hap not, na inap long solwara Atlantik long hap is bilong Brasil.
Ples Bilong Ol Lepraman
Long yia 1965 samting ol i singautim mipela i go soim wanpela piksa wokabaut bilong Sosaiti long wanpela ples bilong ol lepraman, na mipela i go. Mi pret liklik. Mipela i no save gut long sik lepra; mipela i save tasol long stori bilong en long Baibel. Mipela i go insait long banis bilong ples, em ol i penim waitpela, na ol i makim bikpela haus bung mipela mas i go long en. Insait ol i banisim wanpela hap long rop long namel, em bilong mipela na ol masin samting bilong putim piksa.
Wanpela man bilong wok paua em i helpim mipela, na em i bin i stap 40 yia long dispela ples bilong ol lepraman. Em i no gat han, na sik i bin bagarapim ol narapela hap bilong skin bilong em tu. Pastaim mi kirap nogut long lukim skin bilong em, tasol em i amamas na mekim gut wok bilong em na mi no pret moa. Mipela i toktok gut wantaim em long planti samting na wok long redim ol samting bilong putim piksa. I gat wan tausen lepraman i stap long dispela ples na winim 200 ol i kam lukim piksa. Ol i wokabaut nogut i kam insait na mipela i lukim sik i bagarapim narapela narapela hap bilong skin bilong ol. Mipela bel sori tru long ol!
Mipela i tingim tok Jisas i mekim taim wanpela man i gat sik lepra i krai long em na i tok, “Bikpela, sapos yu laik, yu inap long mekim mi i kamap klin.” Jisas i putim han long em na i tok: “Mi laik. Yu kamap klin.” (Matyu 8:2, 3) Taim piksa i pinis, planti i kam tok tenkyu long mipela—sik i bagarapim tru bodi bilong ol na i kamapim klia bikpela pen na hevi ol man i karim. Bihain, sampela Witnes long dispela hap i kirapim Baibel-stadi long ol lepraman i laik kisim sampela save moa.
Long yia 1967 mipela i go bek long Amerika bilong stretim sampela bikpela sik i painim mipela. Mipela i wok long stretim na mipela i kisim gen blesing bilong mekim wok sekit. Inap 20 yia moa mi raun wantaim Francis long wok sekit long Amerika. Insait long dispela hap taim em i bin i stap tisa long Skul Bilong Wok Kingdom.
Man bilong mi i strongim mi tru! Em i save laikim mi na mekim gut long mi na em i stap gutpela poroman bilong mi, em i save stap gut long olgeta wok em i kisim. Mitupela i kisim bikpela blesing—mipela inap wok wantaim long tilim gutpela samting tru, em ol tok i tru bilong Baibel, long ol man long sampela hap bilong Afrika, na Yurop, na Not na Saut Amerika.
Dispela Gutpela Samting Tru i Strongim Mipela
Long yia 1950, mama i bin maritim David Easter, em wanpela gutpela brata i bin kisim baptais long yia 1924. Tupela i wok wantaim inap planti yia long wok painia. Tasol taim mama i go lapun, sik alsaima i kisim em na tingting bilong em i wok long lus. I gat bikpela wok long lukautim em. Tupela sista bilong mi na David ol i mekim dispela bikpela wok, long wanem, ol i no laik bai mipela i lusim wok bilong mipela long mekim wok bilong Jehova long olgeta de. Mama i stap gut long Jehova i go inap long em i dai long 1987. Gutpela pasin bilong em i bin soim rot long mipela, na mipela i save em i tingting tru long prais bilong kisim laip long heven, olsem na taim em i dai, dispela i mekim gut bel bilong mipela.
Long 1989 mi pilim olsem Francis i no gat strong bilong skin olsem bipo. Mipela i no save, tasol wanpela sik (ol demdem i kamapim) em planti man long planti hap i save long en, em i wok long bagarapim skin bilong Francis. Long 1990, dispela sik nogut i daunim em pinis na gutpela poroman bilong mi, em mi laikim em tumas, em i dai. Winim 40 yia mi bin wok wantaim em long wok bilong Jehova.
Long olgeta taim ol senis i save kamap na yumi lainim skin long en. Tasol Jehova i strongim mi, em Man bilong givim dispela gutpela samting tru—ol tok i tru bilong Baibel—long yumi. Em i strongim mi long rot bilong oganaisesen bilong em na long rot bilong gutpela pasin sori famili bilong mi i mekim long mi. Mi stap amamas yet na wetim Jehova i truim olgeta tok promis bilong em, em ol i no inap lus nating.
[Piksa long pes 23]
Mi wantaim man bilong mi taim mipela i stap misineri long Itali