Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w05 12/1 p. 13-17
  • Tingting Strong Long Mekim Yet Wok Bilong Jehova

No gat vidio bilong dispela seksen.

Sori, popaia kamap long lodim vidio.

  • Tingting Strong Long Mekim Yet Wok Bilong Jehova
  • Wastaua i Tokaut Long Kingdom Bilong Jehova—2005
  • Ol Liklik Het Tok
  • Wankain Infomesen
  • Mipela i Kisim Tok i Tru Bilong Baibel
  • Kirap Long Autim Tok Fultaim
  • Lain Long Asainmen Bilong Mipela
  • Ol Ekspiriens Bilong Wok Misineri
  • Karim Ol Hevi
  • Narapela Bel Hevi
  • Mi Mekim Wok Yet
  • Mi Lukluk na Tingting Long Prais
    Wastaua i Tokaut Long Kingdom Bilong Jehova—1996
  • Mi Amamas Mi Insait Long Wok Bilong Skulim Ol Man Long Baibel
    Wastaua i Tokaut Long Kingdom Bilong Jehova—2005
  • I Stap Bilong Mi Long Wok Bilong Jehova
    Wastaua i Tokaut Long Kingdom Bilong Jehova—2001
  • Gutpela Samting Tru Bilong Tilim
    Wastaua i Tokaut Long Kingdom Bilong Jehova—1995
Wastaua i Tokaut Long Kingdom Bilong Jehova—2005
w05 12/1 p. 13-17

Laip Stori

Tingting Strong Long Mekim Yet Wok Bilong Jehova

Stori bilong Constance Benanti

Ol samting i bin kamap wantu tasol! Insait long 6-pela de tasol, Camille, liklik gel bilong mipela i gat 22 mun, em i kisim bikpela fiva na i dai. Bel bilong mi i bagarap nogut tru. Mi laik i dai tu. Bilong wanem God i larim kain samting olsem i kamap? Tingting bilong mi i paul.

PAPAMAMA bilong mi ol i bilong Castellammare del Golfo, em wanpela taun long Sicily, Itali. Na ol i kam sindaun long New York City, we Mama i karim mi long Disemba 8, 1908. Long famili bilong mipela, em papa na mama na mipela 8-pela pikinini, 5-pela man na 3-pela meri.a

Long 1927 papa bilong mi, Santo Catanzaro, i stat long go miting wantaim wanpela liklik grup bilong ol Sumatin Bilong Baibel, em nem bilong ol Witnes Bilong Jehova bipo. Giovanni De Cecca, em wanpela brata Itali i wok long hetkota (ol i kolim Betel), long Brooklyn, New York, em i save mekim ol miting long hap we mipela i stap long en, klostu long New Jersey. Bihain, Papa i kirap long autim tok na insait long fultaim sevis, em i mekim dispela wok inap long em i dai long 1953.

Taim Mama i yangpela, em i gat laik long kamap wanpela sister, tasol papamama bilong em i no orait long em. Pastaim Mama i pasim mi long insait long Baibel stadi bilong Papa. Tasol i no longtaim mi lukim pasin bilong Papa i senis. Em i kamap man bilong stap isi na i no mekim hatpela pasin, na famili i stap bel isi moa. Mi laikim olsem.

Long dispela taim, mi bungim Charles, krismas bilong em i wankain long mi na mama i karim em long Brooklyn. Famili bilong em ol tu i bilong Sicily. I no longtaim na mitupela i pasim tok long marit, na taim Papa i kam bek long 1931 kibung bilong ol Witnes Bilong Jehova long Columbus, Ohio, mitupela i marit. Insait long wanpela yia, pikinini meri bilong mipela Camille i kamap. Taim em i dai, bel bilong mi i bagarap tru. Wanpela taim Charles i krai na tok: “Camille em i pikinini bilong yumitupela wantaim. Olsem na no ken wari tumas, yumi mas strongim bel na tingting long ol samting bai yumi mekim.”

Mipela i Kisim Tok i Tru Bilong Baibel

Charles i tok gen olsem Papa i bin stori long bilip bilong kirap bek taim em i mekim tok bilong planim Camille. Mi askim em: “Yu bilip tru long kirap bek?”

Em i tok: “Yes mi bilip! Olsem na mi laik bai yumi painimaut sampela tok moa bilong Baibel long dispela samting.”

Dispela nait mi no inap slip. Long 6 klok moningtaim, paslain long Papa i go long wok, mi go na tokim em olsem mitupela Charles i laik stadi long Baibel. Em i amamas na holimpas mi. Mama i slip yet long bet na harim mipela i toktok. Em i askim mi wanem samting i kamap. Mi tok: “Nogat, mitupela Charles i laik stadi long Baibel.”

Em i bekim tok: “Orait, yumi olgeta i mas stadi long Baibel.” Em nau, mipela olgeta, ol liklik brata na susa bilong mi​—⁠mipela 11-pela​—⁠mipela olgeta i kirap stadi wantaim olsem famili.

Stadi bilong Baibel i mekim gut bel bilong mi, na isi isi tingting kranki na bel hevi bilong mi i pinis na mi bilip na wetim gutpela samting bihain. Long yia bihain, long 1935, mitupela Charles i kirap autim tok i tru bilong Baibel long ol narapela. Long Februeri 1937, bihain long mipela i harim wanpela tok bilong Baibel long baptais​—⁠long hetkota long Brooklyn​—⁠mipela i kisim baptais wantaim planti narapela long ples waswas bilong wanpela hotel. Mi kirap mekim olsem, long wanem, mi laik lukim gen pikinini meri bilong mi, na tu, mi laik mekim wok bilong Man Bilong Wokim yumi, em mi bin kisim save long em na laikim em.

Kirap Long Autim Tok Fultaim

Taim mi toktok wantaim ol narapela long ol samting mi bin lainim mi amamas tru, long wanem, planti man long dispela taim i harim tok bilong Kingdom na ol tu i autim. (Matyu 9:37) Long 1941, mitupela Charles i kamap painia, em nem ol Witnes Bilong Jehova i kolim long lain bilong ol i save autim tok fultaim. I no longtaim mipela i baim wanpela haus ka, na Charles i lusim bisnis bilong famili long wokim trausis, long han bilong brata bilong mi Frank. Bihain, mipela i amamas long kisim pas olsem Sosaiti i makim mipela i kamap painia salim. Mipela i wok painia long New Jersey, na bihain ol i salim mipela i go long New York State.

Long 1946, taim mipela i go long kibung long Baltimore, Maryland, ol i tokim mipela long go long wanpela miting wantaim ol brata, ol i mausman bilong ol Witnes Bilong Jehova. Long dispela miting mipela i bungim Nathan H. Knorr na Milton G. Henschel. Ol i toktok long mipela long wok misineri, na moa yet, long wok bilong autim tok long Itali. Ol i kirapim mipela long tingting long Wastaua Baibel Skul Bilong Gileat.

Ol i tokim mipela: “Yupela i ken tingting long en na bihain tokim mipela.” Bihain long mipela i lusim ofis, mitupela Charles i lukluk long narapela narapela na tanim i go bek insait. Mipela i tok: “Mipela i tingim pinis. Mipela i redi long Skul Gileat.” Tenpela de bihain, mipela i insait long klas namba 7 bilong Skul Gileat.

Mipela i no inap lusim tingting long ol dispela mun em mipela i bin kisim trening. Wanpela samting mipela i pilim tru em pasin isi na pasin laikim bilong ol tisa, ol i redim mipela long karim ol hevi bilong wok autim tok long narapela kantri. Bihain long gretiuesen long Julai 1946, ol i makim mipela bilong autim tok liklik taim long New York City we planti manmeri bilong Itali i stap. Nau dispela de mipela i wetim i kamap! Long Jun 25, 1947, mipela i go long Itali, em asainmen bilong mipela long wok misineri.

Lain Long Asainmen Bilong Mipela

Mipela kalap long wanpela sip em bipo ol i yusim long pait. Inap 14 de bihain, mipela i kamap long pasis bilong Genoa long Itali. Dispela taun i gat ol mak bilong pait long Wol Woa 2, tupela yia i go pinis dispela woa i pinis. Olsem: Long tren stesin i no gat glas long ol windo, long wanem, ol bom i bagarapim. Mipela i kisim tren long Genoa i go long Milan we brens ofis na haus misineri i stap.

I stap bilong ol man long Itali bihain long pait i nogut tru. Ol i wok long stretim ol samting, tasol pasin bilong i stap rabis i go bikpela. I no longtaim na mi kisim bikpela sik. Wanpela dokta i tok, klok bilong mi i bagarap na em i ting i gutpela long mi go bek long Amerika. Tasol em i no bin sekim gut na em i tok olsem. Inap 58 yia i go pinis na mi stap yet long asainmen bilong mi long Itali.

Mipela stap long asainmen bilong mipela inap sampela yia tasol na ol brata bilong mi long Amerika i laik baim wanpela ka bilong mipela. Tasol Charles i tok nogat, na mi amamas long tingting bilong em. Long dispela taim mipela i luksave olsem i no gat wanpela Witnes long Itali i gat ka, na Charles i pilim olsem i gutpela long i stap bilong mipela i mas wankain long ol brata Kristen bilong mipela. I go inap long 1961 mipela i kisim wanpela liklik ka.

Namba wan Haus Kingdom bilong mipela long Milan i stap long rum aninit, plua em graun tasol. No gat rum waswas, tasol long taim bilong ren wara i save pulap long graun aninit long lek bilong mipela. Planti liklik rat i save ron i go i kam. Na tupela lait tasol bilong givim lait taim mipela i mekim ol miting. Maski i gat kain sindaun olsem, mipela i kisim strong taim mipela i lukim ol man i harim tok ol i kam long ol miting na bihain ol i autim tok wantaim mipela.

Ol Ekspiriens Bilong Wok Misineri

Wanpela taim mipela tilim buklet Peace​​—⁠Can It Last?, long wanpela man. Taim mipela i laik lusim em, meri bilong em, Santina, i kamap wantaim ol planti kaikai i pulap long han. Em i bel kaskas liklik, em i tok em i gat 8-pela pikinini meri bilong lukautim na em i no gat taim. Taim mi go bek lukim Santina man bilong em i no stap, na em i wok long samap. Em i tok: “Mi no gat taim bilong harim, na tu mi no save long rit.”

Mi beten long tingting na bihain mi askim em sapos mi inap baim em long wokim wanpela kol siot bilong man bilong mi. Tupela wik bihain mi kisim kol siot, na mitupela Santina i kirap stadi long Baibel long rot bilong buk “The Truth Shall Make You Free.” Santina i lain long rit na maski man bilong em i birua, em i wok strong na kisim baptais. Faipela pikinini meri bilong em i kamap Witnes, na Santina i bin helpim planti narapela long kisim tok i tru.

Long Mas 1951, ol i salim mipela wantaim tupela narapela misineri​—⁠Ruth Cannonb na Loyce Callahan, bihain em i maritim Bill Wengert​—⁠i go long Brescia, hap i no gat ol Witnes. Mipela i kisim naispela flet i gat ol tebol sia samting long en, tasol tupela mun bihain papa bilong haus i tokim mipela long lusim haus insait long dispela de tasol. No gat Witnes long dispela hap olsem na mipela i mas go stap long hotel, na mipela i stap long hotel klostu 2-pela mun.

Kaikai bilong mipela em liklik kopi, sampela skon, liklik sis na ol prut. Maski i stap bilong mipela i olsem, mipela i amamas long ol gutpela samting i painim mipela. Bihain mipela i painim wanpela liklik flet, na long Memorial bilong tingim i dai bilong Krais long 1952, inap 35 i bung long dispela liklik rum em mipela i yusim olsem Haus Kingdom.

Karim Ol Hevi

Long dispela taim, ol pris pasto i gat bikpela strong long bosim ol man. Olsem: Taim mipela i autim tok long Brescia, pris i kirapim sampela mangi long sutim mipela long ston. Tasol bihain 16 manmeri i kirap stadi long Baibel wantaim mipela na insait long liklik taim tasol ol i kamap Witnes. Namel long ol em wanpela bilong ol mangi i bin laik tromoi ston long mipela. Nau em i mekim wok elda long wanpela kongrigesen long Brescia. Long 1955 taim mipela i lusim Brescia, inap 40 pablisa bilong Kingdom i save autim tok.

Bihain mipela mekim wok inap 3-pela yia long Leghorn (Livorno), we planti Witnes em ol meri. Olsem na mipela ol sista i mas mekim ol wok em ol brata i save mekim long kongrigesen. Bihain mipela i go long Genoa, em hap mipela i bin kirap long en inap 11-pela yia i go pinis. Long nau i gat wanpela kongrigesen. Haus Kingdom i stap long namba wan plua long haus em flet bilong mipela i bin stap long en.

Taim mipela i kamap long Genoa, mi kirap stadi wantaim wanpela meri man bilong em bipo em i wanpela man bilong boksen na em i bosim haus boksen. Dispela meri i kamap strong long spirit na i no longtaim em i kamap wanpela sista Kristen. Inap longpela taim man bilong em i bin birua long em. Bihain em i stat long kam wantaim meri long ol miting. Tasol em i no go insait long Haus Kingdom, em i save sindaun ausait na harim tok. Bihain long mipela i lusim pinis Genoa, mipela i harim olsem em i bin askim ol Witnes long stadi wantaim em long Baibel. Bihain, em i kisim baptais na kamap gutpela wasman Kristen. Em i stap strong long bilip inap em i dai.

Na tu, mi bin stadi long Baibel wantaim wanpela meri i bin pasim tok wantaim wanpela polisman long marit. Pastaim man i kamapim olsem em i laikim tok bilong Baibel, tasol bihain long marit tingting bilong em i senis. Em i birua long meri, na meri i no stadi moa. Taim meri i kirap stadi gen, em i pretim meri na tok sapos em i lukim mitupela i stadi, em bai sutim mipela long gan. Meri i kamap strong long spirit na kamap wanpela baptais Witnes. Tasol man i no bin sutim mipela. Sampela yia bihain, taim mi go long wanpela kibung long Genoa, wanpela i kam baksait long mi na pasim ai bilong mi long han bilong em na tok, mi husat. Aiwara bilong mi i pundaun taim mi lukim man bilong dispela meri. Em i holimpas mi, na em i tokim mi olsem long dispela de em i kisim baptais bilong makim dediket bilong em long Jehova!

Long 1964 i go 1972, mi amamas long raun wantaim Charles taim em i raun lukim ol kongrigesen bilong strongim ol long samting bilong spirit. Mipela i mekim wok long klostu olgeta hap bilong noten Itali​—⁠long Piedmont, Lombardy, na Liguria. Bihain mipela i wok painia gen klostu long Florence na long Vercelli. Long 1977, i gat wanpela kongrigesen tasol long Vercelli, tasol taim mipela i lusim long 1999, i gat 3-pela kongrigesen. Long 1999 mi kisim 91 krismas na ol i strongim mipela long go sindaun long haus misineri long Rom, em naispela liklik haus i stap long hap i no gat pasin bikhet.

Narapela Bel Hevi

Long Mas 2002, Charles​—⁠em i no man bilong sik​—⁠i kisim sik wantu tasol. Isi isi sik i wok long go bikpela na em i dai long Me 11, 2002. Inap 71 yia, mitupela i save krai wantaim long taim bilong hevi na amamas wantaim taim mipela i kisim ol blesing. Dai bilong em i givim bikpela bel hevi tru long mi.

Planti taim long tingting mi lukim em wantaim saket bilong em na dispela hat bilong em bilong 1930. Long ai bilong tingting mi save lukim smail na harim kain lap bilong em. Helpim mi kisim long Jehova na pasin laikim planti gutpela bratasista i mekim i bin helpim mi long winim dispela taim bilong bel hevi. Mi wetim tru dispela taim i kamap na bai mi lukim Charles gen.

Mi Mekim Wok Yet

Wok bilong Jehova em i gutpela samting tru long laip bilong mi. Insait long ol dispela yia, mi bin “traim na lukim . . . olsem Bikpela i gutpela tru.” (Song 34:⁠8) Mi pilim pasin laikim bilong em na mi save olsem em i save tingim mi. Maski bebi bilong mi i dai, Jehova i givim mi planti pikinini man na meri bilong spirit​​—⁠ol i stap nabaut long Itali⁠​—⁠em ol i mekim mi i amamas na Jehova tu i amamas.

Wok bilong Jehova mi mekim, em i nambawan gutpela samting long laip bilong mi. Olsem na mi mekim yet wok autim tok na mekim ol Baibel stadi. Sampela taim mi bel hevi, long wanem, mi gat sik na mi no inap mekim bikpela wok. Tasol mi save olsem Jehova i save long skel bilong mi, na em i laikim mi na amamas long wok mi inap mekim. (Mak 12:42) Mi wok strong long bihainim tok bilong man bilong raitim Song 146:2: “Olgeta taim mi stap long graun bai mi litimapim nem bilong em. Bai mi mekim song bilong litimapim nem bilong God bilong mi inap long taim mi dai.”c

[Ol Futnot]

a Stori bilong brata bilong mi, Angelo Catanzaro i stap long nius The Watchtower, Epril 1, 1975, pes 205-​7.

b Bilong save long laip stori bilong em, lukim The Watchtower, Me 1, 1971, pes 277-​80.

c Sista Benanti i dai long Julai 16, 2005, taim ol i wok long redim dispela stori. Em i gat 96 krismas.

[Piksa long pes 13]

Camille

[Piksa long pes 14]

De mipela i marit, 1931

[Piksa long pes 14]

Pastaim Mama i no laik harim, bihain em i orait long mipela olgeta i stadi long Baibel

[Piksa long pes 15]

Mitupela wantaim Brata Knorr long gretiuesen bilong Skul Gileat, 1946

[Piksa long pes 17]

Mitupela Charles, paslain liklik long em i dai

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim