Yu Bin Strongim Wanpela Man?

ELENA i gat 17 krismas tasol taim ol dokta i tokim em, em i gat sik kensa bilong ovari. Mama bilong em, Mari, em i bel hevi stret taim em i lukim Elena i gat bikpela pen.

Bihain, ol i kisim Elena i go long wanpela haus sik long Madrit, Spen, em inap olsem 1,900 kilomita longwe long ples bilong em long ol ailan Kaneri. Long Madrit sampela dokta i orait long katim em na ol i no ken givim blut long em. (Aposel 15:​28, 29) Tasol taim ol i kirap long katim Elena, ol dokta i lukim olsem sik kensa i go pinis long olgeta hap bilong bodi, olsem na etpela de bihain long Elena i kamap long Madrit em i dai.

Tupela elda i baim rot bilong ol yet na ol i go wantaim Mari Carmen na namba wan pikinini man bilong em long Madrit. Ol i stap wantaim Mari inap long taim Elena i dai, olsem na i no em wanpela tasol i mas karim dispela hevi. Mari i tok: “Ol i helpim mi long karim dispela bikpela hevi. Bai mi no inap lusim tingting long ol samting ol i mekim bilong strongim mi. Ol samting ol i mekim bilong helpim mi long spirit na skin i bikpela samting tru. Ol i bin stap olsem ‘ples hait long taim bilong bikpela win.’ ”​—⁠Aisaia 32:​1, 2.

Jehova i save amamas long ol gutpela wasman olsem dispela tupela elda, em ol i save lukautim sipsip bilong em long pasin sori. (Sindaun 19:17; 1 Pita 5:​2-4) Tasol em i no wok bilong ol elda tasol long strongim ol brata, nogat. Olgeta Kristen i save bung wantaim bilong kisim ol samting bilong spirit na bilong “strongim bel bilong ol arapela.” (Hibru 10:​24, 25) Strongim narapela em i bikpela wok bilong ol Kristen.

Olsem Wanem Yumi Ken Strongim Man?

Wankain olsem wanpela naispela plaua i save pundaun sapos em i no gat wara, olsem tasol sampela insait long famili na ol brata sista long kongrigesen ol tu inap slek sapos i no gat man i strongim ol. Tasol sapos yu strongim man dispela i ken helpim em long winim traim, na helpim man i bel hevi long stap amamas, na givim nupela strong long ol man i mekim gut wok bilong Jehova.

Long tok Grik dispela tok “strongim man” i olsem mekim isi bel bilong man, na givim tok bilong strongim man, na strongim bel bilong man. Sapos yumi tokim man em i bin mekim gutpela wok dispela tasol i no inap strongim em, nogat. Ating sampela taim yumi mas mekim sampela samting moa bilong helpim em.

Insait bilong dispela tok Grik ol i tanim olsem “strongim man” i olsem “singautim wanpela man long stap wantaim yu.” Sapos yumi stap klostu long ol brata sista spirit bilong yumi, wantu yumi inap helpim ol sapos ol i slek o ol i laik pundaun. (Saveman 4:​9, 10) Lain bilong Jehova i save wok gut wantaim. (Sefanaia 3:⁠9) Aposel Pol i kolim wanpela Kristen olsem “wanwok tru” bilong em. (Filipai 4:⁠3) Sapos yumi wok gut wantaim, dispela bai helpim gut yumi long karim hevi na helpim moa yet ol man i no gat strong.​—⁠Skelim wantaim Matyu 11:29.

Ol i Strongim Man

Strongim man i bikpela samting, olsem na bai yumi skelim sampela man, em Baibel i stori long ol na ol i bin strongim narapela. Klostu long taim profet bilong God, Moses, i laik dai, Jehova i makim Josua long kamap olsem gopas bilong ol Israel. Moses i save, dispela em i wanpela bikpela wok. (Namba 11:​14, 15) Olsem na Jehova i tokim Moses long “skulim Josua gut, na strongim tingting bilong em.”​—⁠Lo 3:⁠28.

Long taim bilong ol hetman bilong Israel, pikinini bilong Jepta i bin amamas long truim tok promis bilong papa na em i go mekim wok long haus bilong God, olsem na em i no inap marit na karim pikinini. Olsem wanem? Ol man i tingim ol samting em i mekim? Hetman 11:40 i tok: “Ol yangpela meri bilong Israel i save lusim ples na i go na krai long pikinini meri bilong Jepta, dispela man bilong Gileat. Ol yangpela meri Israel i save mekim dispela pasin inap long 4-pela de long olgeta yia.” Ating pikinini bilong Jepta i amamas tru long ol yangpela meri i kam lukim em na dispela i strongim tru em.

Sampela taim yumi mas strongim bel na bai yumi inap strongim narapela man. Long namba wan taim aposel Pol i go raun na autim gutnius, ol man long sampela taun bilong Esia Maina i birua tru long em. Ol i rausim em long taun Antiok, na long Aikoniam ol i laik kilim em i dai, na long Listra ol i tromoi ol ston long em na lusim em, long wanem, ol i ting em i dai pinis. Tasol bihain liklik, Pol na ol wanwok bilong em i go bek long ol dispela taun bilong “strongim bel bilong ol disaipel. Tupela i tok strong long ol olsem, ‘Yupela i mas i stap strong long bilip. Yumi laik i go insait long kingdom bilong God, tasol pastaim yumi mas wokabaut long rot i gat planti hevi i stap long en.’ ” (Aposel 14:​21, 22) Pol i redi long i dai bilong strongim ol nupela disaipel.

Tasol yumi no ken strongim ol nupela disaipel tasol, yumi mas strongim ol narapela Kristen tu. Sampela yia bihain Pol i go long Rom bilong sanap long kot. Em i hatwok long wokabaut i go na ating taim em i kam klostu long Rom em i bel hevi. Tasol taim em i kamap 74 kilomita saut-is long Rom, bel bilong em i amamas. Bilong wanem? Long wanem ol brata bilong Rom i kam bungim em long Maket Bilong Apius na long ples ol i kolim Tripela Haus Pasindia. “Pol i lukim ol, na em i tenkyu long God, na bel bilong en i kisim strong.” (Aposel 28:15) Long kain taim olsem, sapos yumi stap klostu long ol wanbilip bilong yumi, dispela i ken strongim ol.

Painim Rot Bilong Strongim Man

Yumi ken strongim man long planti rot. Olsem wanem? Yu bin amamas long tok wanpela brata o sista i mekim long Skul Bilong Wok Autim Tok? Yu amamas long ol yangpela long kongrigesen i stap strong long tok i tru? Yu amamas long pasin bilong ol lapun brata sista em ol i sanap strong? Yu bin amamas long wanpela painia i mekim gut wok long Baibel taim em i autim tok? Em nau, rot i op na yu ken givim gutpela tok long man na dispela bai strongim em.

Pasin bilong strongim narapela i bikpela samting insait long famili tu. Dispela pasin i ken helpim papamama long mekim bikpela long ol pikinini “na stretim gut ol pikinini . . . na skulim ol long tok bilong Bikpela.” (Efesus 6:⁠4) Sapos yu tokim pikinini olsem em i bin mekim gutpela wok na olsem wanem em i mekim gut, dispela inap strongim tru em! Taim ol pikinini i gat 13 i go inap 18 krismas samting, planti traim na hevi i painim ol, olsem na em i bikpela samting long strongim ol long olgeta taim.

Sapos papamama i no strongim pikinini dispela inap bagarapim em. Michael, em i wanpela elda Kristen na em i man bilong toktok, em i no save sem, tasol em i tok: “I no gat wanpela taim papa i bin tokim mi olsem mi mekim gutpela wok. Olsem na taim mi go bikpela mi no amamas long mi yet. . . . Nau mi gat 50 krismas, tasol mi save amamas yet taim ol pren i tokim mi olsem mi mekim gutpela wok elda. . . . Samting i bin painim mi i lainim mi olsem, em i bikpela samting long strongim narapela, na mi save wok strong long mekim olsem.”

Yumi Mas Strongim Husat?

Yumi mas strongim ol elda Kristen i save mekim bikpela wok. Pol i tok: “Ol brata, mipela i laik tokim yupela olsem, yupela i mas aninit long ol man i wok long helpim yupela. Bikpela i putim ol i stap hetman bilong yupela, na ol i save givim tok long yupela bilong stretim pasin bilong yupela. Yupela i mas tingting long dispela wok ol i save mekim, na yupela i mas belgut tru long ol na laikim ol tru.” (1 Tesalonaika 5:​12, 13) Ating planti taim yumi no tingim bikpela wok ol elda i mekim. Tasol sapos yumi tokim ol long yumi amamas long gutpela wok ol i mekim, dispela bai helpim ol long mekim wok bilong ol.

Taim yumi karim hevi, i mas i gat man i strongim yumi. Baibel i tok: “Strongim bel bilong ol man i save pret na . . . helpim ol man i no strong.” (1 Tesalonaika 5:14) Long sampela taim ol papa o mama i stap wanpis, ol meri man bilong ol i dai pinis, ol yangpela, ol lapun, ol man i sik, ol i save bel hevi o ol i no pilim strong long samting bilong spirit.

María em wanpela meri Kristen na wantu man bilong em i bin lusim em. Em i tok: “Olsem Jop, sampela taim mi laik i dai. [Jop 14:13] Tasol sampela i strongim mi, olsem na mi sanap strong yet. Tupela elda, mi bin save gut long ol, ol i bin helpim mi long tingim wok painia bilong mi i bikpela samting na ol i strongim mi long mi no ken lusim. Na tupela sista, ol i save tingim gut hevi bilong narapela, ol tu i bin mekim isi bel bilong mi, long wanem, ol i bin putim gut yau long ol tok bilong mi; ol i no bin les. Ol i bin kamapim sampela tok bilong Baibel na long dispela rot mi kisim tingting bilong Jehova. Mi no tingim moa hamas taim mipela i bin kaunim Song 55:​22, tasol mi save, taim mi bihainim dispela tok, isi isi mi kamap strong gen long spirit na bel bilong mi i no hevi moa. Dispela samting i painim mi 12-pela yia i go pinis, na mi amamas mi mekim yet wok painia. Mi kisim planti blesing na mi amamas, maski sampela taim mi save bel hevi. Mi save, sapos narapela i strongim narapela long kain taim olsem, em i bikpela samting na dispela i ken helpim tru man.”

Sampela i bin mekim rong na ol i wok strong long stretim dispela samting, olsem na i mas i gat man bilong strongim ol. Ating sampela i bin givim tok long ol bilong stretim ol. (Sindaun 27:⁠6) Sapos ol elda i bin givim tok long man bilong stretim em, na ol i lukim man hia i bihainim dispela tok, ol i ken tok amamas long em long gutpela wok em i mekim. Dispela bai helpim man i bin mekim rong na em bai no gat “bikpela bel hevi” tumas na em bai tingim gutpela samting i kamap taim em i bihainim tok bilong stretim em.​—⁠2 Korin 2:​7, 8.

Wanpela elda i bin mekim bikpela rong, olsem na em i no inap mekim wok wasman moa insait long kongrigesen. Em i tok: “Taim ol i toksave long mi pinis long wok elda, mi ting ol brata bai i no amamas moa long poroman wantaim mi. Tasol ol elda i no kamapim as bilong rong bilong mi long ol narapela na ol i no les long strongim mi. Ol narapela long kongrigesen tu i bin kamapim pasin sori na mekim gutpela pasin pren long mi, na dispela i bin helpim mi long kamap strong gen long spirit.”

Strongim Narapela

Yumi gat planti wok, olsem na sampela taim yumi save lusim tingting long strongim man. Tasol sapos yumi strongim man dispela i ken helpim tru em! Sapos yu laik strongim man yu mas tingim tupela samting. Namba wan, tingim gut wanem tok yu ken givim man bilong strongim em. Na namba 2, painim rot bilong tok amamas long man i mekim gutpela wok samting o man i bel hevi.

Sapos planti taim yu strongim man, dispela bai mekim yu i amamas. Jisas i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” (Aposel 20:35) Sapos yu strongim narapela, dispela bai strongim yu tu. Gutpela sapos yu putim mak bilong strongim wanpela man long olgeta de.