Em i Larim God i Soim Rot Long Em
SAPOS ol i bin givim wanpela pikinini long yu bilong lukautim na em i nambawan olgeta, na yu mas mekim gut wok bilong yu long mekim bikpela long em, em bikpela wok tru yu kisim, a? Olsem wanem wanpela man bilong graun inap mekim dispela wok? Em i mas larim God i soim rot long em na bihainim tru long olgeta samting em i mekim.
Waspapa bilong Jisas, em Josep, em i bin mekim olsem. Ol buk nating i mekim planti stori long Josep, tasol Baibel i no stori tumas long wok Josep i bin mekim bilong lukautim Jisas taim em i manki yet. Yumi save, Josep na meri bilong em Maria i bin mekim bikpela long Jisas na fopela pikinini man moa na sampela pikinini meri tu.—Mak 6:3.
Josep em i wanpela tumbuna pikinini bilong King Devit bilong Israel, na em i bilong lain bilong Solomon. Em i pikinini bilong Jekop, na Heli em tambu papa bilong em. (Matyu 1:16; Luk 3:23) Josep em i wanpela kamda long taun Nasaret long Galili, na em i rabis liklik long ol samting bilong skin. (Matyu 13:55; Luk 2:4, 24; skelim wantaim Wok Pris 12:8.) Tasol em i olsem maniman long ol samting bilong spirit. (Sindaun 10:22) Josep i larim God i soim rot long em.
Yumi save, Josep em wanpela Juda i gat pasin daun na i bilip long God, na em i laik mekim ol pasin i stret. Liklik stori Baibel i mekim long Josep i makim olsem oltaim em i bihainim tok bilong Jehova—em ol tok i stap long Lo na ol tok Jehova i givim long em long maus bilong ol ensel.
Stretpela Man i Gat Hevi
Taim bikpela hevi i painim wanpela man i save daun long God, em i mas mekim wanem? Em i mas ‘putim olgeta hevi bilong em long han bilong Jehova’ na bihainim rot Jehova i soim long em! (Song 55:22) Josep i bin mekim olsem. Ol i makim em bilong maritim Maria, tasol “taim tupela i no i stap wantaim yet, ol i lukim Maria i gat bel. Holi Spirit tasol i bin mekim na Maria i gat bel.” Josep “em i stretpela man,” na “em i no laik givim sem long Maria long ai bilong ol manmeri. Olsem na em i laik lusim em isi tasol.” Orait Josep i tingting long dispela, na long driman wanpela ensel bilong Jehova i kamap long em na i tok: “Josep, . . . yu no ken pret long kisim Maria olsem meri bilong yu. Harim. Dispela pikinini i stap long bel bilong en, em Holi Spirit i bin givim long em. Bai em i karim pikinini man, na yu mas kolim nem bilong en Jisas, long wanem, em bai i tekewe sin bilong ol manmeri bilong en na kisim bek ol.” Taim Josep i kirap long slip, “em i mekim olsem ensel bilong Bikpela i bin tokim em. Em i kisim meri bilong en. Tasol em i no slip wantaim em, i go inap long taim Maria i karim pikinini man. Na em i kolim nem bilong en Jisas.” (Matyu 1:18-25) Josep i larim God i soim rot long em.
Sisar Ogastus i putim lo olsem olgeta manmeri i mas go long as ples bilong ol na bai gavman i ken kisim nem bilong ol. Josep na Maria i bihainim dispela tok na ol i go long Betlehem long Judia. Long dispela ples Maria i karim Jisas na i slipim em insait long bokis kaikai bilong bulmakau, long wanem, haus pasindia i pulap pinis. Long dispela nait, sampela wasman bilong sipsip i bin harim toksave bilong ensel long dispela nupela pikinini i kamap, na ol i kam lukim pikinini. Orait 40 de bihain, Josep na Maria i bihainim Lo na ol i kisim Jisas i go long Jerusalem long haus lotu, na ol i bringim ofa wantaim. Tupela i harim lapun Simeon i tok profet long ol bikpela samting Jisas bai mekim, na tupela i tingting planti.—Luk 2:1-33; skelim wantaim Wok Pris 12:2-4, 6-8.
Taim yumi kaunim Luk 2:39, i olsem Josep na Maria i go long Nasaret taim ol i ‘givim Jisas pinis long Bikpela.’ Tasol long dispela hap bilong Baibel ol i bin sotim dispela stori. Yumi ken ting i gat bikpela hap taim i lus na bihain ol “saveman bilong hap sankamap” i kam lukim Maria na Jisas long wanpela haus long Betlehem. Tasol Jehova i pasim rot na ol birua i no inap bagarapim Jisas. Taim ol “saveman” i go pinis, ensel bilong Jehova i kamap long Josep long driman na i tokim em: “Herot i laik painim pikinini na kilim em i dai.” Orait, Josep i bihainim tok bilong God na em i kisim meri pikinini i go long Isip.—Matyu 2:1-14.
Taim Herot i dai pinis, long Isip wanpela ensel i kamap long Josep long driman na em i tok: “Yu kirap na kisim pikinini wantaim mama bilong en, na yu go bek long Israel.” Tasol Josep i harim olsem pikinini bilong Herot, em Arkelaus, i kamap king, olsem na Josep i pret long go bek long Judia. Orait God i givim tok long Josep long driman na Josep i go long hap bilong Galili na i sindaun long taun Nasaret.—Matyu 2:15-23.
Tingim Ol Samting Bilong Spirit
Josep i stiaim famili long bihainim ol lo bilong God, na ol i kisim gutpela kaikai bilong spirit. Long olgeta yia em i save kisim famili olgeta i go wantaim em long Jerusalem bilong lukim bikpela de bilong Pasova. Long wanpela taim olsem, Josep na Maria i wokabaut i go bek long Nasaret. Ol i wokabaut inap wanpela de pinis na nau ol i lukim olsem dispela manki Jisas i gat 12-pela krismas i no stap wantaim ol. Orait ol i go bek long Jerusalem na ol i wok long painim em, na bihain ol i lukim em i stap long haus lotu, na em i wok long harim tok bilong ol tisa na givim ol askim long ol.—Luk 2:41-50.
Yumi ken save, Josep i larim Maria i mekim sampela samting, long wanem, taim ol i go bek long Jerusalem na ol i painim pinis Jisas, Maria yet i givim tok long Jisas long dispela samting. (Luk 2:48, 49) Taim Jisas i wok long i go bikpela, Josep i skulim em long ol samting bilong spirit. Na Josep i skulim em tu long wok kamda, olsem na ol man i save kolim em “wanpela kamda.” (Matyu 13:55; Mak 6:3) Ol papamama bilong nau i save daun long God, ol tu i mas wok strong long skulim ol pikinini bilong ol, na skulim ol tu long ol samting bilong spirit—em bikpela samting moa.—Efesus 6:4; 2 Timoti 1:5; 3:14-16.
Gutpela Pe Bilong Josep
Baibel i no stori liklik long indai bilong Josep. Tasol Mak 6:3 i kolim Jisas olsem “pikinini bilong Maria,” i no Josep. Olsem na yumi ken ting, long dispela taim Josep i dai pinis. Na tu, sapos Josep i stap yet long yia 33, orait taim Jisas i hangamap long diwai em i no ken tokim aposel Jon long kisim Maria olsem mama bilong em.—Jon 19:26, 27.
Olsem na Josep bai insait long dispela lain ol i dai pinis na ol bai harim nek bilong Pikinini bilong man, na ol bai lusim matmat na kirap bek. (Jon 5:28, 29) Taim Josep i lain long ol samting Jehova i bin putim bilong helpim ol man long kisim laip oltaim, yumi ken save, em bai amamas long mekim wok long en, na bai em i bihainim gut tok bilong Bikpela King Krais Jisas, olsem em i bin bihainim tok bilong God 1,900 yia bipo.
[Piksa long pes 31]
Josep i bin skulim Jisas long ol samting bilong spirit na i skulim em tu long wok kamda