Bilong Wanem Nau Yu Mas Tingim?

INAP wan tausen faiv handet yia samting paslain long Krais, God i bin makim ol Israel olsem “lain manmeri bilong [em] stret,” em ol “i save mekim wok bilong [em] olsem ol pris.” (Kisim Bek 19:​5, 6) Tasol i no longtaim na ol i no stap holi na klin moa long lotu. Ol i kisim pasin bilong ol narapela lain long lotuim ol god giaman na mekim ol narapela pasin nogut na ol i kamap doti long ai bilong God. Dispela i kamapim pasin bilong ol, em ol i “manmeri bilong bikhet tasol.” (Lo 9:​6, 13; 10:16; 1 Korin 10:​7-11) Inap 300 yia samting bihain long taim Josua i dai, Jehova i kamapim ol gutpela hetman i gat wok long bringim ol Israel i kam bek long lotu i tru. Tasol ol Israel i “strong tru long bihainim pasin nogut bilong ol yet.”​—⁠Hetman 2:​17-19.

Bihain God i kamapim ol gutpela king na profet bilong kirapim ol Israel long kam bek long lotu i tru. Profet Asaria i kirapim King Asa na ol wanples bilong em long painim Jehova. Em i tok: “Sapos yupela i wok long painim em, orait bai yupela inap i kam klostu long em. Tasol sapos yupela i givim baksait long em, orait bai em i givim baksait long yupela.” Asa i mekim wok bilong stretim bek lotu long hap bilong Juda. (2 Stori 15:​1-16) Bihain God i mas mekim gen dispela tok long maus bilong profet Joel. (Joel 2:​12, 13) Na bihain moa Sefanaia i tokim lain bilong Juda long ‘painim Jehova.’ Yangpela king Josaia i mekim olsem. Em i kirapim wok bilong rausim ol god giaman na ol pasin nogut bilong lotu insait long Juda na kamapim bek lotu i tru.​—⁠Sefanaia 2:3; 2 Stori 34:​3-7.

Tru sampela taim ol Israel i tanim bel, tasol isi isi ol i wok long kamap nogut moa yet long ol samting bilong lotu. (Jeremaia 2:13; 44:​4, 5) Jeremaia i mekim strongpela tok long lotu bilong ol, em ol i lotuim ol god giaman na ol i no inap senisim pasin nogut bilong ol. Em i tok: “Ating ol blakskin inap senisim skin bilong ol na kamap waitskin, a? Ating ol bikpela wel pusi inap rausim ol makmak long skin bilong ol, a? Nogat tru. Olsem tasol yu no inap lusim ol pasin nogut bilong yu na bihainim gutpela pasin.” (Jeremaia 13:23) Olsem na God i givim bikpela strafe long lain bilong Juda. Long yia 607 paslain long Krais, ol birua i kam bagarapim Jerusalem wantaim haus lotu bilong en, na ol Juda i stap laip yet ol i kisim ol i go long Babilon bilong wok kalabus, na ol i stap inap 70 yia.

Orait 70 yia i pinis na God i marimari long ol. Em i kirapim King Sairus long lusim ol Israel, na hap lain bilong ol i go bek long Jerusalem na sanapim gen haus lotu. Tasol dispela strafe ol i bin kisim i no givim save long ol. Bihain ol i lusim gen lotu i tru na Jehova i mas tokim ol gen: “Sapos yupela i lusim pasin nogut na kam bek long mi, mi tu bai mi lusim belhat na kisim bek yupela.”​—⁠Malakai 3:⁠7.

As na God i Rausim Ol Israel

Long taim bilong Jisas ol Israel i stap olsem wanem long lotu? Ol hetman bilong lotu i gat tupela maus na ol “i olsem ol aipas, na ol i laik soim rot long ol arapela,” na ol i “autim lo bilong ol man tasol.” ‘Ol i bihainim pasin bilong ol yet na ol i kalapim lo bilong God.’ Ol Israel i litimapim nem bilong God “long maus bilong ol,” tasol bel bilong ol i stap longwe long em. (Matyu 15:​3, 4, 8, 9, 14) Olsem wanem? Jehova bai givim rot gen long dispela lain na bai ol i ken tanim bel? Nogat. Jisas i tok: “God bai i rausim kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.” Na Jisas i tok: “Nau ples bilong yupela bai i bagarap na i stap nating.” (Matyu 21:43; 23:38) Rong bilong ol i bikpela tru. Ol i no bilip olsem Jisas em i Mesaia na ol i putim em long han bilong gavman bilong kilim em i dai, na ol i laikim Sisar bilong Rom i stap king bilong ol, maski em i mekim hatpela pasin.​—⁠Matyu 27:⁠25; Jon 19:15.

Ol Israel i no laik save, dispela taim Jisas i mekim wok bilong autim tok em i taim bilong skelim ol man long kot. Jisas i tokim ol manmeri bilong Jerusalem i bin lusim Jehova: “Yu no bin save long taim God i kam bilong helpim [olsem skelim pasin bilong] yu.”​—⁠Luk 19:⁠44.

Long Pentikos bilong yia 33, God i kamapim wanpela nupela lain, em ol disaipel bilong Pikinini bilong em Krais Jisas, em God i makim ol long spirit holi na ol i bilong olgeta kain skin na olgeta kantri. (Aposel 10:​34, 35; 15:14) Olsem wanem? Bihain ol Juda inap stretim bek dispela lotu Juda ol i stap aninit long en? Samting i kamap long yia 70 inap bekim dispela askim. Ol ami bilong Rom i kam bagarapim Jerusalem na kukim olgeta long paia. Em nau, God i rausim pinis dispela lotu bilong ol Israel.​—⁠Luk 21:​5, 6.

Ol Misin i Bin Lusim Bilip

Na ol dispela Kristen em God i bin makim ol long spirit holi ol i kamap “lain manmeri i holi, em ol lain manmeri tru bilong God.” (1 Pita 2:9; Galesia 6:16) Tasol i no longtaim tumas na lotu Kristen bilong pastaim tu i no stap gut long lotu i tru.

Baibel i tok profet long ol bai lusim trupela bilip na kisim ol bilip giaman. Dispela gras nogut Jisas i tok piksa long en, olsem ol Kristen giaman, bai wok strong long daunim ol wit, em ol Kristen tru God i bin makim ol long spirit holi. Dispela tok piksa i kamapim klia olsem lotu Kristen giaman, em Satan, nambawan birua bilong God, i helpim bilong en, em i laik kamap “taim ol manmeri i slip.” Dispela samting i kamap taim ol gutpela aposel bilong Krais i dai pinis, na i olsem ol manmeri i slip na i no tingim ol samting bilong spirit. (Matyu 13:​24-30, 36-43; 2 Tesalonaika 2:​6-8) Olsem ol aposel i tok profet long en, planti Kristen giaman i kam namel long lain bilong God. (Aposel 20:​29, 30; 1 Timoti 4:​1-3; 2 Timoti 2:​16-18; 2 Pita 2:​1-3) Olgeta aposel i dai pinis na aposel Jon tasol i stap, na long yia 98 samting em i tok, “yumi kamap pinis long taim bilong las de,” em laspela hap bilong taim bilong ol aposel.​—⁠1 Jon 2:​18, 19.

Taim King Konstantin bilong Rom i bungim lotu wantaim wok gavman, em nau, ol lotu i gat nem Kristen i go nogut tru long ol samting bilong spirit na bilip na long pasin bilong ol. Planti man bilong raitim stori bilong bipo ol tu i tok, ‘tru misin i bin kamap strong long yia 350 samting,’ tasol long tingting bilong ol Kristen tru, em i ‘go nogut olgeta.’ ‘Misin i lusim stretpela pasin’ na em i kisim ol pasin na tingting bilong ol haiden, na ‘pasin bilong lotuim Maria,’ na adorim ol ‘santuman,’ na kisim bilip bilong God Triwan.

Taim misin i giaman long kamap strong pinis, nau em i wok long go nogut nogut. Ol pop na kaunsil bilong misin i putim ol lo na kolim ol bilip ol man i mas bihainim, na ol i wokim Kot Bilong Misin bilong painim ol man i lusim bilip, na mekim ol Pait Bilong Lotu bilong subim ol lain long kamap olsem “Kristen,” na ol pait “holi” i kamap namel long ol Katolik na Talatala, na dispela i mekim na i no inap tru long stretim bek lotu na bai em i kamap gen olsem lotu i tru.

Long wanpela buk, A World Lit Only by Fire (Paia Tasol i Givim Lait Long Ol Man), William Manchester i tok: ‘Namel long yia 1400 na 1600, ol pop i gat gutpela sindaun tru wankain olsem ol king bilong Rom. Ol i maniman tru, winim ol narapela man long graun, na ol yet wantaim ol kadinal bilong ol i kisim bikpela mani long ol man i holim bikpela namba insait long misin, em ol i mas baim pop olsem takis long em.’ Long dispela taim bilong lusim bilip, sampela liklik lain na ol wan wan man i kirap na ol i laik kamapim bek lotu Kristen tru, na ol i olsem dispela wit long tok piksa bilong Jisas. Tasol planti ol i bin kisim nogut tru long han bilong ol misin. Dispela buk i tok: ‘I olsem ol dispela santuman tru bilong lotu Kristen, em ol i bilong lotu Talatala na Katolik, ol misin i kukim ol long paia olsem man bilong holimpas bilip.’ Sampela moa, olsem Martin Luter na Jon Kalvin, ol i bin kamapim ol lotu i bruk long misin Katolik tasol i holim yet ol as bilip bilong en. Na ol i insait tru long wok politik.

Sampela lain insait long ol lotu Talatala ol i wok strong long kirapim ol man long givim bel gen long lotu. Olsem na namel long yia 1700 na 1900 samting, planti ol i go mekim wok misineri long ol narapela kantri. Tasol ol wasman yet i tokaut olsem ol “sipsip” insait long ol lotu Talatala i stap nogut long ol samting bilong spirit. Wanpela tisa bilong lotu Talatala, em Oscar Cullmann, em i tokaut olsem, ‘insait long ol lotu yet, planti man i no bilip.’

Na sampela i bin wok long kamapim ol senis insait long misin Katolik tu. Namel long yia 1000 na 1200 samting, sampela i lukim pasin giaman na bikpela mani bilong ol bikman bilong misin na ol i kamapim sampela lain olsem bruder i mekim tok tru antap long i stap rabis. Tasol ol bikman bilong misin i was gut long ol samting dispela lain i mekim, na sampela saveman i tok, ol bikman bilong misin i daunim ol. Orait namel long yia 1545 na 1563, long Kibung Bilong Trent, ol i kirapim wok bilong pasim ol man long bruk long misin​—⁠ol i laik daunim ol lotu Talatala i bin bruk long misin Katolik.

Namel long yia 1800 na 1850 samting, misin Katolik i bin stretim sampela samting insait long misin, na i mekim olsem ol bikman bilong misin tasol i mas bosim ol samting. Tasol yumi no inap tok, ol i bin stretim tru ol samting bilong kamapim bek lotu Kristen tru, nogat. Misin i laik kamapim gen strong bilong ol bikman bilong misin, long wanem, ol i lukim ol bikpela senis i wok long kamap insait long ol lotu na wok politik na sindaun bilong ol man.

Long 1960 samting, long Namba 2 Kibung Bilong Vatiken, i olsem misin Katolik i laik kamapim sampela bikpela senis insait long misin. Tasol kwiktaim pop bilong nau i pasim dispela wok, nogut dispela i givim rot long sampela insait long misin long kamapim sampela senis moa ol yet i laikim. Wanpela lain olsem bruder bilong misin i tok, dispela pasin pop i mekim, em sampela i kolim olsem samting bilong strongim bek Wojtyła [em nem tru bilong pop], em i wankain olsem pasin Konstantin i bin mekim. Nius bilong wanpela lain bruder i tok, misin Katolik i wankain olsem ol narapela misin​—⁠bikpela hevi i painim misin long ol samting bilong bilip na ol lo i bosim i stap bilong ol Kristen; na hevi bilong misin i stap long olgeta hap, long wanem, olgeta samting bilong lotu Kristen i insait long dispela hevi.​—⁠La Civiltà Cattolica.

Ol misin i no bin kamapim ol senis tru bilong stretim bek ol bilip na pasin bilong en, nogat. Na ol i no inap mekim tu, long wanem, taim bilong kamapim bek lotu Kristen tru em i mas kamap long “taim bilong kisim kaikai”; long dispela taim ol bai bungim “wit” insait long klinpela lain bilong God, em wanpela lain tasol bilong em. (Matyu 13:​30, 39) Ol lotu bilong graun, maski ol i gat nem Kristen o nogat, ol i bin kirapim ol man long pait na bagarapim planti planti man na mekim ol narapela pasin nogut tu, olsem na yumi laik askim: Ol misin inap tru long stretim bek ol bilip na pasin bilong ol?

Ol i No Inap Stretim?

Kamapim Tok Hait long Baibel i tok piksa long wanpela bikpela pamukmeri i gat nem ‘Bikpela Taun Babilon.’ (KTH 17:​1, 5) Inap planti handet yia ol man bilong kaunim Baibel i laik save long insait bilong dispela nem. Sampela i les pinis long bikpela mani na pasin nogut bilong ol bikman bilong misin. Sampela i ting, Bikpela Taun Babilon i makim ol bikman bilong bosim misin. Wanpela man i gat dispela tingting, em Yan Hus, em wanpela pris Katolik bilong Bohimia, na long yia 1415 misin i bin kukim em long paia taim em i stap laip yet; na Aunio Paliario bilong Itali, misin i bin hangamapim em long diwai na kukim em long paia long yia 1570. Tupela i wok strong long kamapim sampela senis insait long misin Katolik bambai em i ken kamap gen olsem lotu Kristen bilong pastaim, tasol tupela i no inap.

Tasol Kamapim Tok Hait sapta 17 na sapta 18 i makim olsem Bikpela Taun Babilon i makim olgeta lotu giaman bilong graun.a I no gat rot bilong stretim pasin bilong dispela “bikpela pamukmeri,” long wanem, “em i hipim ol sin bilong en i kam antap long heven.” Long taim bilong yumi, klostu olgeta lotu bilong graun​—⁠i no ol lotu i gat nem Kristen tasol​—⁠ol i gat asua long ol pait i bin kamap na i bagarapim planti planti man na blut bilong ol i wok long kapsait yet, na ol i gat asua tu long pasin bilong ol man i go nogut olgeta. Olsem na God i tok pinis long “Babilon” i mas bagarap.​—⁠KTH 18:​5, 8.

Nau Em Taim Bilong ‘Lusim Em’

Truim bilong ol tok profet i kamapim klia olsem nau yumi stap long taim bilong “dispela graun i laik pinis.” (Matyu 24:⁠3) Ol man i gat laik tru long lotuim God ol i no ken bihainim ol tingting na laik bilong ol yet. Ol i mas wok long painim Jehova “na i go klostu long em.” Yes, nau tasol ol i mas mekim, long wanem, taim bilong “bikpela hevi tru” em Jisas i tok profet long en, klostu nau bai kamap. (Aisaia 55:6; Matyu 24:21) God i no bin orait long pasin nogut bilong lotu ol Israel i bin mekim, na olsem tasol God i no ken orait long pasin nogut bilong wanpela lotu long nau, maski em i tok em i bin i stap longtaim tru. Ol man i laik tru long God i ken orait long ol na kisim bek ol, ol i no ken wok long stretim wanpela sip i bagarap na i laik go daun insait long solwara; kwiktaim ol i mas bihainim tok bilong God long Kamapim Tok Hait 18:​4, i tok: “Yupela i mas lusim dispela ples [Bikpela Taun Babilon] na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin.”

Tasol ol bai “lusim” em na i go we bambai God i ken kisim bek ol? Nogut ol i go insait long wanpela ples nogut, a? Olsem wanem ol inap luksave long dispela wanpela lotu tasol God i orait long en? Ol inap painim bekim tru bilong ol dispela askim insait long Baibel tasol. (2 Timoti 3:​16, 17) Ol Witnes Bilong Jehova i laik bai yu skelim gut ol tok bilong Baibel. Olsem bai yu inap save, husat dispela lain em God i makim olsem “lain bilong em yet,” na em bai lukautim ol long bikpela de bilong em long kamapim belhat bilong em, klostu nau bai kamap.​—⁠Aposel 15:14; Sefanaia 2:3; KTH 16:​14-16.

[Ol Futnot]

[Piksa long pes 7]

Sapos lotu bilong yu i olsem wanpela sip i laik go daun insait long solwara, painim dispela sip bilong kisim bek yu, em lotu Kristen tru