Strafe Bilong God Bai Painim “Man Bilong Sakim Lo”
“Olgeta diwai i no save karim gutpela kaikai, em ol i save karim na tromoi i go long paia.”—MATYU 7:19.
1, 2. Man bilong sakim lo i kamap wanem samting? Dispela lain i wok long kamap olsem wanem?
TAIM spirit bilong God i kirapim aposel Pol long tokaut olsem bai wanpela “man bilong sakim lo” i kamap, Pol i tok dispela samting i wok long kamap long taim bilong em. Olsem yumi stori pinis, Pol i toktok long wanpela lain i mas kamap, em ol bai i go pas long mekim pasin bikhet long God na long lusim lotu Kristen tru. Paslain liklik long yia 100, sampela man i gat nem Kristen ol i kirap long lusim tok i tru bilong Baibel, na ol i mekim moa yet taim ol aposel i dai pinis. Dispela lain bilong sakim lo i kirap long lainim ol man long ol tok na pasin i no stret long tok bilong God long Baibel.—2 Tesalonaika 2:3, 7; Aposel 20:29, 30; 2 Timoti 3:16, 17; 4:3, 4.
2 Dispela lain bilong sakim lo i wok long kamap strong, na bihain i kamap olsem ol bikman bilong ol lain i gat nem Kristen, olsem ol pris pasto samting. Dispela lain i kisim bikpela strong long yia 325 samting, taim bikman bilong Rom, em Konstantin, i bungim Gavman haiden wantaim ol lain i lusim pinis lotu Kristen tru na nau Misin na Gavman i wok wantaim. Ol dispela lain i gat nem Kristen ol i wok yet long bruk bruk, na ol pris pasto i wok yet long litimapim ol i stap antap long ol man nating bilong misin, na planti taim ol i wok long antap long ol king na hetman bilong graun tu.—2 Tesalonaika 2:4.
3. Wanem samting i mas painim dispela man bilong sakim lo?
3 Wanem samting i mas painim dispela man bilong sakim lo? Pol i tok profet olsem: “Dispela man bilong sakim lo em bai i kamap ples klia. Na Bikpela Jisas bai i kilim em i dai . . . Bikpela bai i kamap ples klia wantaim bikpela lait bilong en, na . . . em bai i bagarapim tru dispela man bilong sakim lo.” (2 Tesalonaika 2:8) Dispela tok i makim olsem ol pris pasto bai bagarap taim God i pinisim olgeta samting Satan i bin kamapim. God i makim King Krais Jisas long heven bilong i go pas long ol ensel long wok bilong bagarapim ol man nogut. (2 Tesalonaika 1:6-9; Kamapim Tok Hait 19:11-21) Dispela strafe i mas painim ol pris pasto, long wanem ol i bin bagarapim nem bilong God na Krais, na ol i bin paulim planti milion manmeri na ol dispela manmeri i no bihainim rot tru bilong lotuim God.
4. I gat wanem lo bilong skelim dispela man bilong sakim lo?
4 Jisas i kolim lo bilong luksave long dispela man bilong sakim lo, Jisas i tok: “Yupela lukaut long ol giaman profet. Ol i save mekim gutpela tok bilong grisim yupela, tasol tingting tru bilong ol em i bilong paulim yupela na bagarapim yupela. Ol i olsem ol weldok i pasim skin bilong sipsip, bai ol i ken i go klostu long ol sipsip na holimpas ol. Yupela lukim pasin bilong ol na bai yupela i save, ol i giaman profet, o nogat. Olsem wanem? Ating ol man i save go long rop i gat nil bilong kisim ol pikinini bilong diwai wain, a? Na sapos ol man i laik kisim pikinini bilong diwai fik, ating ol i save go long gras nogut i gat mosong, a? Nogat tru. Olsem tasol olgeta gutpela diwai i save karim gutpela kaikai. Na diwai nogut i save karim kaikai nogut. Gutpela diwai em i no inap karim kaikai nogut. Na diwai nogut em i no inap karim gutpela kaikai. Olgeta diwai i no save karim gutpela kaikai, em ol i save katim na tromoi i go long paia . . . . Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.”—Matyu 7:15-21; lukim tu Taitus 1:16; 1 Jon 2:17.
Gutpela Pasin Kristen
5. Wanem samting em i as bilong gutpela pasin Kristen? Kolim wanpela lo em i bikpela lo.
5 Long 1 Jon 5:3, Baibel i kolim as bilong gutpela pasin Kristen, em i tok: “Sapos yumi laikim tru God, orait yumi save bihainim ol lo bilong en.” Na wanpela bikpela lo, em olsem: “Yu mas laikim ol [arapela man] olsem yu laikim yu yet.” (Matyu 22:39) Olsem na ol wokboi tru bilong God i mas laikim tumas ol narapela man, maski ol i bilong wanem kain skin o lain.—Matyu 5:43-48; Rom 12:17-21.
6. Ol Kristen i mas laikim moa yet husat?
6 Ol wokboi bilong God i mas laikim moa yet ol brata Kristen bilong ol. Baibel i tok: “Sapos wanpela man i tok, ‘Mi laikim tru God,’ tasol em i no laikim wanpela bilong ol arapela manmeri bilong God, orait dispela man em i man bilong giaman. I no gat wanpela man i bin lukim God. Olsem na man i no save laikim ol arapela, em ol manmeri em i lukim pinis, em i no inap laikim God em i no bin lukim. Dispela lo yumi kisim long Krais, em i olsem: Man i save laikim tru God, em i mas laikim tru ol arapela manmeri bilong God.” (1 Jon 4:20, 21) Jisas i tok, dispela kain pasin bilong laikim tru ol brata i olsem wanpela mak bilong ol Kristen tru. Em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:35; lukim tu Rom 14:19; Galesia 6:10; 1 Jon 3:10-12.
7. Wanem samting i mekim na ol Kristen tru bilong olgeta hap i pas gut wantaim?
7 Pasin bilong laikim tru ol brata i olsem “simen” i pasim ol wokboi bilong God strong wantaim na ol i stap wanbel. Baibel i tok: “Pasin bilong sori em i . . . pasim olgeta wantaim. Yupela i mas kisim dispela pasin bilong sori.” (Kolosi 3:14, NT 1988) Na ol Kristen tru i mas pas gut wantaim ol brata bilong ol long olgeta hap bilong graun, long wanem Baibel i tok: “Yupela olgeta i mas wanbel long ol toktok yupela i mekim. Yupela i no ken bruk nabaut. Yupela i mas i stap wanlain tru long wankain tingting na wankain laik.” (1 Korin 1:10) Bilong holimpas dispela pasin bilong sori, na bilong i stap wanbel wantaim ol brata bilong ol long olgeta hap, ol wokboi bilong God i no ken insait long ol wok politik bilong dispela graun. Jisas i tok: “Ol i no bilong dispela graun, olsem mi yet mi no bilong dispela graun.”—Jon 17:16.
8. Olsem wanem Jisas i bin kamapim long ples klia pasin ol Kristen tru i mas bihainim?
8 Jisas i kamapim gut dispela pasin ol Kristen tru i mas bihainim. Taim ol man i kam bilong holim em na Pita i pulim bainat na katim yau bilong wanpela na yau i pundaun, orait Jisas i mekim wanem? Yu ting Jisas i orait long lain bilong em i mekim pait bambai ol birua i no ken holim Pikinini bilong God? Nogat. Em i tokim Pita: “Putim bainat bilong yu i go bek long paus bilong en.” (Matyu 26:52) Olsem na ol Kristen tru i no save insait long pait bilong ol lain bilong dispela graun, na ol i no save insait long ol narapela pasin tu bilong kapsaitim blut bilong man, maski long dispela as ol man i kilim ol i dai olsem ol i bin mekim long planti Kristen tru long bipo na long nau. Ol Kristen tru i save, Kingdom bilong God long han bilong Krais, dispela samting tasol bai pinisim tru olgeta pait na pasin bilong kapsaitim blut bilong man.—Buk Song 46:9; Matyu 6:9, 10; 2 Pita 3:11-13.
9. (a) Stori bilong ol samting bilong bipo i kamapim wanem pasin bilong ol Kristen bilong pastaim? (b) Olsem wanem pasin bilong ol i narapela kain tru long pasin bilong ol misin i gat nem Kristen?
9 Stori bilong ol samting i bin kamap long bipo i tokaut klia olsem ol Kristen bilong pastaim i no ken kapsaitim blut bilong man. Wanpela man, bipo em i wanpela profesa bilong lotu long Inglan, nem bilong em Peter De Rosa, em i raitim tok long wanpela buk, olsem: “Ol Kristen i bin ting olsem i gat bikpela rong long kapsaitim blut bilong man. Olsem na ol i nolaik tru long pasin bilong ol Rom long lainim sampela man long pait bambai ol manmeri i ken bung na amamas long lukim ol i pait. . . . Tru, ol Rom i mas mekim pait na daunim ol man bambai gavman bilong ol inap i stap strong, tasol ol Kristen i no laik insait long dispela. . . . Ol Kristen i ting ol i gat wok olsem bilong Jisas, em wok bilong autim tok long pasin bilong i stap sekan na wanbel wantaim; ol i no ken tru kamap man bilong kilim i dai narapela man.” Tasol olsem wanem long ol misin i gat nem Kristen, em ol i bruk bruk? Ol i no bin bihainim lo bilong laikim tru ol brata; ol i bin kapsaitim blut bilong planti milion man. Ol i no bin mekim wok bilong autim tok long pasin bilong i stap sekan na wanbel wantaim; ol i bin kilim i dai ol man.
Bikpela Babilon i Gat Asua long Blut
10. Bikpela Babilon i makim wanem samting? Bilong wanem Baibel i kolim dispela nem long en?
10 Satan em i “hetman i save bosim dispela graun” na em i “god bilong dispela graun.” (Jon 12:31; 2 Korin 4:4) Wanpela hap bilong dispela graun Satan i bosim em olgeta lotu giaman i stap long olgeta hap bilong graun, em ol i bin wok long kamap insait long ol handet handet yia i go pinis. Ol misin i gat nem Kristen na ol pris pasto bilong ol i insait long dispela. Baibel i kolim olgeta dispela lotu giaman olsem “Bikpela taun Babilon, em mama tru bilong olgeta pamukmeri [bilong spirit] na bilong olgeta pasin nogut tru i stap long graun.” (Kamapim Tok Hait 17:5) As bilong olgeta lotu giaman bilong nau em olpela taun Babilon bilong bipo, em lotu giaman i pulap long en wantaim ol bilip na pasin i bagarapim tru nem bilong God. Olsem na Baibel i kolim olgeta lotu giaman bilong nau olsem Bikpela Babilon.
11. Baibel i mekim wanem tok long Bikpela Babilon? I gat wanem as na Baibel i mekim dispela tok long en?
11 Baibel i stori long dispela Babilon, olsem olgeta lotu giaman, na i tok: “God i lukim dispela taun i gat asua bilong kilim i dai ol profet na ol manmeri bilong en. Na olgeta man bilong graun ol birua i bin kilim ol i dai, asua bilong dispela tu em i stap long Babilon tasol.” (Kamapim Tok Hait 18:24) Olsem wanem na ol lotu bilong dispela graun i gat asua long kilim i dai olgeta dispela man? Long wanem olgeta dispela lotu—ol misin ol i kolim Kristen na ol narapela lotu tu—ol i bin helpim na orait long ol pait bilong ol lain man, na ol i bin i go pas long sampela pait. Na tu ol i bin mekim nogut long ol man i aninit long God na i no wanbel wantaim ol, na ol i bin kilim ol i dai.
Ol i Bin Bagarapim Nem Bilong God
12. Bilong wanem ol pris pasto bilong ol misin ol i kolim Kristen i gat bikpela asua moa, winim ol bikman bilong ol narapela lotu?
12 Ol pris pasto bilong ol misin ol i kolim Kristen ol i gat bikpela asua moa long kapsaitim blut bilong ol man, winim ol bikman bilong ol narapela lotu. Long wanem ol i tok ol i lain bilong God, na ol i tok ol i lain bilong Krais tu. Olsem na ol i gat wok long bihainim ol tok Jisas i bin skulim ol man long en. (Jon 15:10-14) Tasol ol i no bin bihainim ol dispela tok, na dispela samting i bin bagarapim tru nem bilong God na Krais. Ol dispela pris pasto i gat bikpela asua long blut, long wan kamapim wanpela kain Kot bilong skelim na givim strafe long ol man i no wanbel long ol tok bilong misin, na ol i bin mekim nogut long sampela lain na kilim ol i dai. Na ol i gat asua long blut, long wanem ol i bin orait long ol pait, em lain bilong ol i insait long en na ol i kilim i dai ol wanlotu bilong ol bilong narapela kantri.
13. Namel long yia 1100 na yia 1250 samting, ol pris pasto i gat asua long wanem samting?
13 Namel long yia 1100 na yia 1250 samting, ol bikman bilong misin i gat nem Kristen ol i bin kirapim ol pait bilong lotu bilong kisim bek Jerusalem long han bilong ol haiden. Ol i bin kirapim lain bilong ol long i go pait, na long nem bilong God na Krais ol dispela ami bilong misin i bin mekim pasin nogut tru—ol i bin kapsaitim blut bilong planti man na kisim ol samting bilong ol. Ol i bin kilim i dai planti handet tausen man na meri long ol dispela pait bilong lotu. Na long yia 1212, ol i bin salim pikinini tu i go pait na dispela pait i bin kilim i dai nating planti tausen pikinini.
14, 15. Wanpela man bilong raitim buk, em i wanpela Katolik, em i tok wanem long samting Misin Katolik i bin kirapim long yia 1250 samting?
14 Long 1250 samting, Misin Katolik bilong Rom i orait long narapela samting i bagarapim tru nem bilong God, em dispela kain Kot bilong skelim na givim strafe long ol man i no wanbel long ol tok bilong misin. Dispela pasin i bin kamap pastaim long hap bilong Yurop na i go kamap long ol hap bilong not na saut Amerika na i stap inap 600 yia samting. Ol pop i bin kirapim dispela kain Kot na ol i helpim wok bilong en. Long rot bilong dispela Kot ol i bin givim bikpela pen long ol man na kilim ol i dai, long wanem ol i laik pinisim olgeta man i no wanbel long ol tok bilong misin. Bipo misin Katolik i bin mekim nogut long ol lain i no Katolik, tasol dispela Kot i mekim nogut long ol dispela lain na long planti lain moa.
15 Wanpela man em i tok em i “gutpela Katolik,” nem bilong em Peter De Rosa, em i bin raitim wanpela buk i stori long ol pop (Vicars of Christ—The Dark Side of the Papacy), na em i tok: “Misin i bin mekim nogut long ol Juda, na em i bin kamapim Kot bilong skelim na givim strafe long ol man i no wanbel long ol tok bilong misin, na em i bin kilim i dai planti tausen man i bikhet long misin, na em i bin kamapim gen pasin bilong givim bikpela pen long ol man bilong skelim ol long kot. . . . Ol pop i bin makim sampela man i stap nambawan bikman bilong ples na ol i bin rausim sampela long dispela wok. Na ol pop i strong long ol dispela bikman i mas subim lain bilong ol long bihainim lotu Kristen, na sapos ol i no laik, ol i mas tok long givim bikpela pen long ol o kilim ol i dai. . . . Ol dispela pasin ol i bin mekim i bagarapim tru Gutnius bilong Krais.” Sampela man i bin mekim liklik “rong” tasol, olsem ol i bin holim wanpela Baibel, na long dispela as tasol ol man bilong misin i bin kilim ol i dai.
16, 17. Sampela man i tok wanem long dispela kain Kot bilong skelim na givim strafe long ol man i no wanbel long ol tok bilong Misin?
16 Dispela man bilong raitim buk (De Rosa) i stori long Pop Inosen Namba 3, em i bin i stap pop long yia 1200 samting, na dispela man i tok: “Sampela man i tok, taim Daioklisen i stap bikman bilong Rom [long yia 250 samting], long laspela taim em i mekim nogut long ol Kristen em i mekim nogut tru long ol, winim olgeta taim bipo, na 2,000 ol i bagarap, long olgeta hap bilong graun. Tasol long namba wan taim Pop Inosen i salim ami bilong Misin i go daunim ol man [i bikhet long Misin long Frans] ol i kilim i dai inap olsem 20,000 man. . . . Yumi kirap nogut long kisim save olsem wantu tasol pop i bin kilim i dai planti Kristen moa, winim tru Daioklisen. . . . Pop [Inosen] i mekim wok long nem bilong Krais, tasol em i mekim olgeta pasin Krais i no laikim, na bel bilong em i no gat tok liklik.”
17 Dispela man i tok, “long nem bilong pop, [ol man bilong mekim kot long ol man i no wanbel long ol tok bilong Misin] ol i bin givim bikpela pen tru long ol man na bagarapim ol tru, na i no get wanpela taim bipo ol man i bin mekim pasin nogut tru olsem i semim tru nem bilong yumi ol man.” Em i stori long wanpela bruder Katolik long Spen, em i bin mekim dispela wok kot, nem bilong em Tokemada (Torquemada), na em i tok: “Em i kisim wok long yia 1483 na em wanpela tasol em i stap hatpela bos inap 15 yia. Ol man em i bin bagarapim ol na kilim ol i dai ol inap olsem 114,000, na 10,220 bilong ol em i bin kukim ol long paia na kilim ol i dai.”
18. Dispela man bilong raitim buk i tok wanem long dispela kain Kot? Em i tok i gat wanem as na dispela samting i stap longtaim, inap olsem 600 yia samting?
18 Bilong pinisim ol dispela tok, dispela man bilong raitim buk i tok: “Sapos wanpela lain i mekim ol pasin nogut olsem dispela kain Kot i bin mekim, dispela bai semim dispela lain. Na em i bagarapim moa yet nem bilong Misin Katolik. . . . Winim 600 yia i no gat malolo liklik long pasin bilong ol pop long birua long stretpela kot. Kirap long yia 1250 samting na i kam, i gat 80 pop i bin i stap, na i no gat wanpela i bin tok, pasin na wok bilong dispela kain Kot i no stret. Olgeta i orait long en na narapela narapela i bin skruim sampela pasin nogut moa long en. Tasol yumi laik save: Olsem wanem ol pop inap mekim dispela wok nogut inap 600 yia, em dispela wok i sakim olgeta gutpela tok Jisas i bin autim?” Em yet i bekim dispela askim, olsem: “Ol pop i no laik tokaut olsem sampela pop paslain long ol i bin mekim pasin i no stret, nogut ol i tokaut olsem na dispela i bagarapim ol yet. Olsem na ol i kirap sakim Gutnius bilong Krais.”
19. I gat wanem narapela pasin bilong sakim lo, em planti pris pasto i bin orait long en?
19 Ol pris pasto i bin insait long narapela pasin nogut tu, em i olsem pasin bilong sakim lo. Dispela pasin em pasin bilong stilim ol man na baim ol i go wok kalabus long narapela man. Ol lain i gat nem Kristen ol i bin stilim planti tausen man bilong Afrika na bringim ol i go long narapela kantri longwe long kantri bilong ol yet, na ol i bin baim ol dispela Afrika i go wok kalabus, na bagarapim skin na tingting na bel bilong ol. Dispela pasin nogut i bin i stap inap planti handet yia. Wanwan pris o pasto i bin tok dispela pasin i no stret. Tasol sampela ol i bin tok, dispela pasin em i kamap long laik bilong God yet.—Lukim Matyu 7:12.
Asua long Blut Nau long Taim Bilong Yumi
20. Olsem wanem na nau long taim bilong yumi dispela man bilong sakim lo i gat bikpela asua moa yet long blut bilong ol man?
20 Nau long taim bilong yumi, dispela man bilong sakim lo em i gat asua moa yet long blut bilong ol man. Ol pris pasto i bin helpim ol pait i bin kilim i dai planti milion manmeri, em ol pait nogut tru i winim olgeta pait i bin kamap long bipo. Ol i bin helpim olgeta lain i insait long tupela pait bilong olgeta hap, na long dispela tupela bikpela pait ol man bilong lotu i bin kilim i dai ol wanlotu o “ol brata” bilong ol. Olsem: Long Namba 2 Pait Bilong Olgeta Hap ol Katolik bilong Frans na Amerika i bin kilim i dai ol Katolik bilong Jemani na Itali, na ol Talatala bilong Inglan na Amerika i bin kilim i dai ol Talatala bilong Jemani. Ol i bin kilim i dai ol dispela wanlotu bilong ol, na ol i bin kilim i dai sampela wanples bilong ol tu. Dispela tupela bikpela pait i bin kirap namel long ol lain i gat nem Kristen, na sapos ol pris pasto i bin bihainim pasin bilong laikim tru ol brata, na ol i bin skulim lain bilong misin long mekim dispela pasin bilong sori, bai dispela tupela pait i no inap kamap.
21. Sampela nius i no bilong misin ol i tok wanem long ol pris pasto i bin helpim ol pait?
21 Wanpela nius (The New York Times) i tok: “Bipo, taim wanpela kantri i insait long pait, planti taim ol bisop Katolik long dispela kantri i save helpim kantri bilong ol long pait, na ol i save givim blesing long ol ami bilong kantri, na ol i save beten askim God long helpim kantri bilong ol long winim pait. Na ol bisop bilong narapela kantri i insait long pait ol tu i beten askim God long helpim kantri bilong ol long winim pait. . . . Pasin Kristen na pasin pait i narapela narapela kain . . . na dispela samting i kamap ples klia long nau, long wanem long nau ol kantri i gat ol samting nogut nogut bilong pait em inap bagarapim tru planti man.” Na narapela nius (U.S. News & World Report) i tok: “Nem bilong lotu Kristen i bagarap long ai bilong ol man long olgeta hap bilong graun, long wanem planti taim ol lain i gat nem Kristen ol i save mekim pait.”
22. Ol pris pasto i gat asua long wanem samting moa long taim bilong yumi?
22 Tru, long nau i no gat dispela kain Kot nogut bilong misin olsem long bipo, tasol ol pris pasto i bin mekim wok long ol kot bilong gavman bilong mekim nogut long “ol profet” na “ol manmeri bilong God,” em ol i no wanbel long ol tok bilong misin bilong ol. Ol i bin subim ol hetman politik long “putim lo” bilong orait long dispela pasin nogut ol i mekim. Long dispela rot ol i bin kirapim ol gavman long putim tambu long ol manmeri i aninit tru long God, na putim ol long kalabus, na paitim ol, na givim pen long ol, na kilim sampela i dai, o ol i bin orait long ol gavman i mekim olsem nau long taim bilong yumi.—Kamapim Tok Hait 17:6; Buk Song 94:20.
Ol i Mas Kisim Strafe
23. Bilong wanem God bai givim strafe long dispela lain i olsem man bilong sakim lo?
23 Tru tumas, God i lukim ol lotu giaman i gat asua bilong kilim i dai ol profet na ol manmeri bilong em na olgeta man bilong graun ol birua i bin kilim ol i dai. (Kamapim Tok Hait 18:24) Ol bikpela pait tru i bin kamap insait long ol lain ol i kolim Kristen, olsem na ol pris pasto bilong ol dispela lain ol i gat bikpela asua moa. I stret tru Baibel i kolim nem long ol olsem “man bilong sakim lo”! Tasol Baibel i tok tu: “Nogut yupela i giamanim yupela yet . . . Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu.” (Galesia 6:7) Olsem na God i mas givim strafe long ol pris pasto i lain bilong sakim lo.
24. Wanem ol bikpela bikpela samting liklik taim bai kamap?
24 Jisas i tok: “Yupela ol man bilong mekim pasin nogut, yupela klia long mi.” (Matyu 7:23) Na em i tok: “Olgeta diwai i no save karim gutpela kaikai, em ol i save katim na tromoi i go long paia.” (Matyu 7:19) Klostu nau bai “paia” i pinisim dispela man bilong sakim lo na olgeta lotu giaman—ol lain politik ol i bin pamuk wantaim ol, ol yet bai bagarapim ol. Baibel i tok: “Ol bai i birua long [em na] . . . bagarapim em tru na rausim olgeta klos samting bilong en. Na ol bai i kaikai mit bilong bodi bilong en, na kukim em olgeta long paia.” (Kamapim Tok Hait 17:16) Klostu nau ol dispela bikpela bikpela samting bai kamap long graun, olsem na ol wokboi bilong God i mas tokim ol narapela man long en. Tok i kamap bihain long dispela bai stori long ol wok ol i bin mekim bilong toksave olsem long ol man.
Sampela Askim Bilong Kamapim Gen Ol Bikpela Tok
◻ Man bilong sakim lo i makim wanem samting? Em i wok long kamap olsem wanem?
◻ Ol Kristen tru i mas bihainim wanem ol gutpela pasin?
◻ Bikpela Babilon em wanem samting? Em i gat asua long blut bilong ol man o olsem wanem?
◻ Man bilong sakim lo i bin mekim wanem ol pasin nogut i bagarapim tru nem bilong God?
◻ God bai givim strafe olsem wanem long man bilong sakim lo?
[Piksa long pes 20]
Ol Pait Bilong Lotu i bin kapsaitim blut bilong planti tausen tausen man long nem bilong God na Krais
[Kredit Lain]
By courtesy of The British Library
[Piksa long pes 21]
“Taim wanpela kantri i insait long pait, planti taim ol bisop Katolik bilong dispela kantri i save helpim kantri bilong ol long pait”
[Kredit Lain]
U.S. Army