4
Ol Misin i No Stap Gut Long God na Baibel
1, 2. Bilong wanem sampela man i givim baksait long Baibel? Tasol Baibel i tok wanem?
1 Planti man ol i save givim baksait long Baibel, long wanem, ol i lukim pasin nogut bilong ol lain i tok ol i bihainim tok bilong Baibel. Long sampela kantri ol man i save tok, Baibel em i buk bilong kirapim ol man long pait, na em i buk bilong ol waitskin, na em i helpim pasin bilong sampela strongpela lain long daunim ol narapela kantri na bosim ol. Tasol ol dispela tok i kranki.
2 Ol i bin raitim Baibel long hap bilong Midel-Is, na Baibel i no helpim ol bikpela pait em ol kantri i tok ol i Kristen ol i bin kamapim bilong daunim ol narapela lain na kisim ol gutpela samting bilong ol. Sapos yu kaunim Baibel na yu kisim save long tok bilong lotu Kristen tru olsem Jisas i bin skulim ol man long en, bai yu save, Baibel i no orait liklik long ol pait na pasin pamuk na pasin bilong daunim ol narapela lain na kisim ol samting bilong ol. Asua i stap long ol man i save mangal long kisim planti samting—Baibel i no gat asua. (1 Korin 13:1-6; Jems 4:1-3; 5:1-6; 1 Jon 4:7, 8) Olsem na maski ol man i no bihainim ol gutpela tok bilong Baibel na ol i mekim pasin nogut, yu no ken larim dispela i pasim yu long kisim ol gutpela save i stap long Baibel.
3. Ol samting i bin kamap bipo na i kam inap nau i kamapim klia wanem pasin bilong ol misin i gat nem Kristen?
3 Na planti man long ol kantri i holim nem Kristen, ol tu i no bihainim tok bilong Baibel. Ol kantri long hap bilong Wes ol i gat ol bikpela misin em ol i bin kamap long yia 300 samting. Ol dispela misin i bin holim Baibel inap planti handet yia pinis, na ol pris pasto i tok ol i save skulim ol man long en na ol i olsem maus bilong God. Tasol yu ting ol dispela pris pasto na misineri bilong ol dispela misin ol i skulim ol man long tok i tru? Yu ting pasin bilong ol i makim olsem ol i maus bilong God na Baibel? Yu ting ol dispela misin na lain bilong ol i bihainim lotu Kristen tru? Nogat, a? Taim ol dispela misin i kamap long yia 300 samting na i kam inap nau, ol i bin biruaim God na Baibel. Ol samting ol i bin mekim i kamapim klia olsem ol i no stap gut long God na Baibel.
Ol Bilip i No Stap Long Baibel
4, 5. Wanem sampela bilip bilong ol misin em Baibel i no as bilong en?
4 Baibel i no as bilong ol bikpela bilip bilong ol dispela misin; ol stori nating bilong ol Grik na Isip na Babilon na sampela lain moa i as bilong en. Ol bilip olsem yumi gat tewel, na i gat bikpaia i stap, na klinpaia, na God Triwan, ol i no stap long Baibel.
5 Yumi ken tingim dispela bilip olsem ol man nogut bai kisim pen oltaim oltaim long bikpaia. Yu ting olsem wanem long dispela samting? Planti man i ting em i samting nogut tru. Ol i ting God i no inap givim bikpela pen long ol man inap oltaim oltaim. Dispela i no stret wantaim pasin bilong God. Baibel i tok, God i ‘as bilong pasin bilong laikim ol arapela.’ (1 Jon 4:8) Baibel i kamapim klia tru olsem God I Gat Olgeta Strong em i “no bin tingting” liklik long kamapim dispela kain bilip.—Jeremaia 7:31; 19:5; 32:35.
6. Baibel i tok wanem na i daunim tok bilong ol misin olsem yumi gat tewel?
6 Long nau planti lotu, na ol lotu i holim nating nem Kristen, ol i tok yumi gat tewel, na taim yumi dai dispela tewel i save lusim yumi na i go long heven o long bikpaia. Tasol Baibel i no as bilong ol dispela tok. Baibel i tokaut klia olsem: “Ol [man] i save bai ol i dai. Tasol ol man i dai pinis, ol i no inap save long wanpela samting. . . . Bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.” (Saveman 9:5, 10) Na Baibel i tok tu, taim ol man i dai, “ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.”—Song 146:4.
7. Taim Adam tupela Iv i brukim lo bilong God, em i givim wanem strafe long tupela?
7 Taim Adam na Iv i brukim lo bilong God na em i kolim strafe bilong ol, em i no tok ol bai stap oltaim oltaim. Em i no wanpela strafe, a? Em i gutpela samting! Tasol God i tok, “bai . . . yu dai na yu go bek long graun. Long wanem, mi bin wokim yu long graun, na bai yu go bek gen long graun.” (Stat 3:19) Olsem na dispela tok long yumi gat tewel, em i no stap long Baibel; ol misin i bin kisim long ol lain bilong bipo em ol i no Kristen.
8. Baibel i tok wanem na i kamapim klia olsem tok bilong God Triwan i no stret?
8 Na dispela bilip long God Triwan i mekim olsem God i narapela kain tru—olsem i gat tripela Man na tripela wantaim i wanpela God tasol. Tasol dispela tok tu i no stap long Baibel. Long Aisaia 40:25 God i tok: “Husat tru i olsem mi? I gat wanpela man i stap i save mekim wankain pasin olsem mi, a?” Yumi ken bekim olsem: I no gat wanpela man i kain olsem em. Na long Song 83:18 Baibel i tokaut klia: “Yu wanpela tasol, yu Bikpela, na yu God Antap Tru, na yu save bosim olgeta hap bilong graun.”—Lukim tu Aisaia 45:5; 46:9; Jon 5:19; 6:38; 7:16.
9. Taim yumi skelim tok bilong Baibel wantaim tok bilong ol dispela misin, yumi ken tok wanem?
9 Ol tok bilong Baibel long God na ol samting em i laik mekim ol i klia tru na yumi inap kisim gut, na i stret long tingting bilong yumi. Tasol tok bilong ol misin i no olsem. Na samting i nogut moa, em tok bilong ol i pait wantaim tok bilong Baibel.
Ol Pasin i No Stret
10, 11. Olsem wanem ol tok bilong Baibel i narapela kain long tok bilong ol misin?
10 Na ol samting ol misin i bin mekim long bipo na i kam inap nau i kamapim klia olsem ol i no stap gut long God na Baibel. Ol samting ol i mekim i narapela kain long ol samting em God bilong Baibel i tok yumi mas mekim, na i narapela kain tu long ol samting Krais Jisas, em As bilong lotu Kristen, i bin skulim ol man long en na em yet i bin mekim.
11 Olsem: Jisas i bin skulim ol disaipel olsem ol i no ken insait long wok politik na ol pait bilong graun. Na em i skulim ol long bihainim pasin bilong i stap isi wantaim ol man na bihainim ol lo na laikim tru ol man, na no ken bel nogut long sampela lain; ol i mas orait long givim laip bilong ol long helpim ol man—ol i no ken kilim ol i dai.—Jon 15:13; Aposel 10:34, 35; 1 Jon 4:20, 21.
12. Jisas i tok, wanem samting bai kamapim long ples klia husat ol i Kristen tru?
12 Tru tumas, Jisas i tok pasin bilong laikim tru ol narapela em i wanpela mak bilong yumi ken save, husat ol i Kristen tru na husat ol i Kristen giaman. Em i tok: “Mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:34, 35; 15:12.
13, 14. Olsem wanem yumi ken save, ol dispela misin i no olsem maus bilong God?
13 Tasol inap planti handet yia pinis ol pris pasto i bin insait long ol wok politik na ol i bin helpim ol pait bilong kantri bilong ol. Na long taim bilong pait, olsem long tupela bikpela pait i bin kamap long taim bilong yumi, ol pris pasto i bin beten askim God long helpim kantri bilong ol long winim pait, na ol pris pasto bilong lain birua ol tu i beten olsem. Na lain bilong wanpela kantri i bin kilim i dai ol wanlotu bilong ol long narapela kantri. Baibel i tok, ol pikinini bilong Satan bai mekim olsem—tasol ol pikinini bilong God nogat. (1 Jon 3:10-12, 15) Olsem na maski ol pris pasto wantaim lain bilong ol i tok ol i Kristen, ol samting ol i mekim i pait wantaim tok bilong Jisas, em i bin tokim ol disaipel long ‘putim bainat i go bek long paus bilong en.’—Matyu 26:51, 52.
14 Inap planti handet yia ol misin i bin wok wantaim ol gavman i gat nem Kristen taim ol i go daunim ol narapela lain na mekim ol i wok kalabus long ol na mekim nogut long ol. Ol i bin mekim olsem long Afrika, na ol i mekim olsem tu long Saina.
15. Ol misin bilong dispela graun i bin kirapim wanem ol pasin nogut?
15 Na bipo ol dispela misin i gat nem Kristen ol i go pas long mekim nogut long ol man i no wanbel wantaim ol, na ol i givim bikpela pen long ol na kilim ol i dai. Ol i bin kamapim Kot Bilong Misin na ol i mekim nogut long ol man i no gat rong—ol i givim bikpela pen nogut tru long ol na kilim ol i dai, na dispela pasin nogut i stap inap sampela handet yia. Ol man i kirapim dispela Kot, em ol pris wantaim lain bilong ol, em olgeta i tok ol i Kristen. Na ol i wok strong long pinisim Baibel bambai ol man i no ken kaunim.
Ol i No Kristen
16, 17. I gat wanem as na yumi ken tok, ol dispela misin ol i no Kristen?
16 Tru tumas, long bipo na i kam inap nau, ol lain na ol dispela misin i tok ol i Kristen, ol i no Kristen tru. Ol i no mekim wok bilong God. Baibel i tok long ol olsem: “Maus bilong ol i save tok olsem, ‘Mi save long God.’ Tasol pasin bilong ol i soim olsem, ol i givim baksait pinis long em. God i no laik tru long ol. Ol i man bilong sakim tok, na ol i no inap tru long mekim wanpela gutpela pasin.”—Taitus 1:16.
17 Jisas i tok, yumi inap lukim pasin ol lotu giaman i mekim na nau yumi inap luksave long ol. Em i tok: “Yupela lukaut long ol giaman profet. Ol i save mekim gutpela tok bilong grisim yupela, tasol tingting tru bilong ol em i bilong paulim yupela na bagarapim yupela. Ol i olsem ol weldok i pasim skin bilong sipsip, bai ol i ken i go klostu long ol sipsip na holimpas ol. . . . Olgeta gutpela diwai i save karim gutpela kaikai. Na diwai nogut i save karim kaikai nogut. . . . Olgeta diwai i no save karim gutpela kaikai, em ol i save katim na tromoi i go long paia. Olsem na yupela i mas lukim pasin bilong ol yet na bai yupela i save long ol giaman profet.”—Matyu 7:15-20.
18. Ol tok na pasin bilong ol dispela misin i mekim na nau wanem samting i kamap?
18 Olsem na tok bilong ol dispela misin na pasin bilong ol i kamapim klia olsem ol i giaman tasol long bilipim tok bilong Baibel na i stap aninit long God na i stap Kristen. Ol i no stap gut long God na Baibel. Dispela pasin bilong ol i mekim na planti milion manmeri ol i les na ol i no bilip moa olsem i gat wanpela Bikpela Man i stap antap.
19. Ol misin i no mekim wok bilong ol, tasol yu ting dispela i makim olsem God na Baibel i pundaun long mekim wok bilong ol?
19 Tasol maski ol pris pasto wantaim ol misin i no mekim wok bilong ol, na maski ol narapela lotu bilong graun tu i olsem, dispela i no makim olsem God na Baibel i pundaun long mekim wok bilong ol. Nogat. Baibel i tokim yumi, i gat wanpela Bikpela Man i stap tru na em i save tingim yumi, na em i tingim i stap bilong yumi long bihain tu. Na Baibel i tok, em bai givim gutpela pe long ol man i gat gutpela bel na ol i laik mekim ol samting i stret na ol i laik lukim stretpela pasin na bel isi i kamap long graun. Na Baibel i kamapim as tru na God i bin larim pasin nogut na pen na hevi i stap, na olsem wanem em bai bagarapim ol man i save mekim nogut long ol narapela man, na em bai bagarapim ol man i tok ol i mekim wok bilong em tasol ol i no mekim.
[Ol Piksa long pes 17]
“Inferno” bilong Dante
God Triwan bilong ol misin
[Kredit Lain]
Doré’s illustration of Barrators—Giampolo for Dante’s Divine Comedy
God triwan bilong ol Hindu
[Kredit Lain]
Courtesy of The British Museum
God triwan bilong ol Isip
[Kredit Lain]
Museo Egizio, Turin
[Ol Piksa long pes 18]
Ol pris pasto i bin helpim ol pait bilong graun, tasol Jisas i no bin skulim ol man long mekim olsem
[Kredit Lain]
U.S. Army photo