Yu Ting God i Laikim Olgeta Lotu?
Olsem wanem? Yu ting God i laikim olgeta lotu? Ating olgeta lotu yu save long en ol i kirapim ol man long bihainim ol gutpela pasin. Tasol yu ting dispela em inap na bai God i ken laikim ol dispela lotu?
SAMPELA i save tok, ‘Sapos man i givim bel tru long lotu, orait God bai amamas. I gat sampela gutpela samting long olgeta lotu.’ Lotu Bahai i gat dispela tingting, olsem na ol i bin kisim sampela bilip bilong ol nainpela bikpela lotu bilong dispela graun. Dispela lotu i bilip olsem God em i as bilong ol dispela lotu na olgeta ol i insait long wanpela tok i tru. Yu ting dispela tok i stret?
Na tu, ating yu laik save olsem wanem God inap laikim wanpela lotu i tokim lain bilong en long putim nev-ges long ol ples ol man i save bung long en, na dispela inap kilim i dai planti manmeri. Ol i bin sutim dispela tok long wanpela liklik lotu long Japan. O yu ting God i laikim lotu i kirapim lain bilong en long kilim i dai skin bilong ol yet? Long sampela yia i go pinis, dispela samting i bin painim lain bilong Jim Jones, em hetman bilong wanpela lotu.
Taim yumi tingting bek long ol samting i bin kamap bipo, ating yumi gat askim olsem: God i laikim ol lotu i kirapim pait, olsem Pait Bilong 30 Yia, em i bin kirap long yia 1618 na i go inap 1648? Wanpela buk (The Universal History of the World) i tok, dispela pait i bin kamap namel long ol Katolik na ol Talatala, em “wanpela pait nogut tru i bin kamap long hap bilong Yurop.”
Ol Pait Bilong Lotu i bin kamap namel long yia 1000 na 1200 samting, i bin kilim i dai planti manmeri. Long namba wan Pait Bilong Lotu, ol soldia i gat nem Kristen ol i bin bagarapim nogut na kilim i dai ol Muslim na ol Juda i stap long Jerusalem.
Tingim tu ol samting i bin kamap long taim bilong Kot Bilong Misin—dispela kot i bin kirap long yia 1200 samting na i stap inap 600 yia. Ol man i bihainim tok bilong ol bikman bilong lotu na ol i bin givim bikpela pen long planti tausen man na kukim ol long paia. Long wanpela buk i stori long ol wok nogut bilong ol pop (Vicars of Christ—The Dark Side of the Papacy), Peter De Rosa i tok: “Long nem bilong pop, [ol man bilong mekim kot long ol man i no wanbel long ol tok bilong misin] ol i bin givim bikpela pen tru long ol man na bagarapim ol nogut tru, na i no gat wanpela taim bipo ol man i bin mekim pasin nogut tru olsem i semim tru nem bilong yumi ol man.” De Rosa i stori long wanpela bruder Katolik long Spen, em i bin mekim dispela wok kot, nem bilong em Tokemade, na em i tok: “Em i kisim wok long yia 1483 na em i stap hatpela bos nogut tru inap 15 yia. Ol man em i bin bagarapim ol na kilim ol i dai ol inap olsem 114,000, na 10,220 bilong ol em i bin kukim ol long paia na kilim ol i dai.”
Tasol i no ol lotu i gat nem Kristen tasol i gat asua long kapsaitim blut bilong ol man, nogat. Wanpela saveman bilong yia 1650 samting, em Blas Paskal bilong Frans, em i tok: “Sapos man i givim bel long lotu na em i tingting long helpim lotu na em i mekim wok i nogut tru, em bai amamas na wok strong moa long mekim dispela wok nogut.”
Pasin Bilong Ol i Kamapim Ol
Long tingting bilong God, i no wanpela samting tasol i mekim na bai em i ken orait long wanpela lotu, nogat. Bilong God i ken orait long wanpela lotu, ol tok na ol wok bilong en i mas stret wantaim ol tok i tru bilong Baibel, em Tok Bilong God. (Song 119:160; Jon 17:17) Ol lotu God i orait long en ol i mas kamapim ol pasin i stret wantaim ol lo bilong God Jehova.
Taim Jisas i mekim Tok Long Maunten, em i makim olsem sampela profet bai giaman na tok ol i wokman bilong God. Jisas i tok: “Yupela lukaut long ol giaman profet. Ol i save mekim gutpela tok bilong grisim yupela, tasol tingting tru bilong ol em i bilong paulim yupela na bagarapim yupela. Ol i olsem ol weldok i pasim skin bilong sipsip, bai ol i ken i go klostu long ol sipsip na holimpas ol. Yupela lukim pasin bilong ol na bai yupela i save, ol i giaman profet, o nogat. . . . Olgeta gutpela diwai i save karim gutpela kaikai. Na diwai nogut i save karim kaikai nogut. Gutpela diwai em i no inap karim kaikai nogut. Na diwai nogut em i no inap karim gutpela kaikai. Olgeta diwai i no save karim gutpela kaikai, em ol i save katim na tromoi i go long paia. Olsem na yupela i mas lukim pasin bilong ol yet na bai yupela i save long ol giaman profet.” (Matyu 7:15-20) Ol dispela tok i kamapim klia olsem yumi mas was gut long ol samting bilong lotu. Ating yumi ting olsem God i orait long wanpela bos bilong lotu o long wanpela lotu, tasol yumi inap popaia long dispela samting.
Yumi Mas Was Gut
Maski wanpela lotu i tok olsem God i orait long en, na ol pris pasto bilong en ol i save kaunim ol tok bilong Baibel, dispela i no makim olsem God i laikim dispela lotu. Na ating ol bos bilong lotu inap mekim ol bikpela wok na i olsem God i mekim wok long rot bilong ol. Tasol sapos dispela lotu i no kamapim ol gutpela kaikai God i orait long en, em i olsem wanpela lotu giaman. Ol pris glasman bilong Isip long taim bilong Moses ol inap mekim ol bikpela wok, tasol God i no orait liklik long ol. Nogat tru.—Kisim Bek 7:8-22.
Long nau, wankain olsem long bipo, planti lotu i kamapim tingting bilong ol man—ol i no bihainim ol tok tru bilong God. Olsem na dispela tok lukaut bilong Baibel em i stret: “Yupela i mas lukaut gut, nogut wanpela man i autim olkain giaman save na toktok nating long yupela na em i mekim yupela i bihainim tingting bilong en. Ol dispela kain man i save kisim tingting bilong ol tumbuna na bilong ol spirit i save bosim ol samting bilong skai na graun. Ol i no save bihainim tingting bilong Krais.”—Kolosi 2:8.
Taim Jisas i stori pinis long ol gutpela kaikai na ol kaikai nogut, em i tok: “Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom. Long de bilong bikpela kot bilong God, planti manmeri bai i tokim mi olsem, ‘Bikpela, Bikpela, mipela i bin mekim wok profet long nem bilong yu. Long nem bilong yu mipela i bin rausim ol spirit nogut. Long nem bilong yu mipela i bin wokim planti mirakel.’ Na long dispela taim mi bai tokaut long ol olsem, ‘Mi no save liklik long yupela. Yupela ol man bilong mekim pasin nogut, yupela klia long mi.’ ”—Matyu 7:21-23.
Skelim Kaikai Ol i Kamapim
Olsem na paslain long yumi ting olsem God i orait long wanpela lotu, em bikpela samting long yumi mas skelim ol kaikai em dispela lotu i save kamapim. Olsem: Dispela lotu i insait long wok politik? Sapos olsem, orait tingim tok bilong Jems 4:4: “Sapos man i laik pren wantaim ol pasin bilong graun, em bai i kamap birua bilong God.” Na Jisas i tok long ol disaipel tru bilong em olsem: “Ol i no bilong dispela graun, olsem mi yet mi no bilong dispela graun.” (Jon 17:16) Lotu i gutpela long ai bilong God em i no save insait long ol wok politik bilong dispela graun “em i stap aninit long strong bilong Satan,” em wanpela spirit yumi no inap lukim. (1 Jon 5:19) Lotu God i orait long en i mas stap gut long helpim Kingdom bilong Em i stap long han bilong Krais Jisas, na autim tok long gutnius bilong dispela gavman long heven.—Mak 13:10.
Sapos wanpela lotu i kirapim ol man long bikhet long gavman, yu ting God i orait long dispela lotu? Bekim bilong dispela askim i kamap ples klia sapos yumi tingim tok bilong aposel Pol, olsem: “Yu mas tokim ol manmeri long ol i mas stap aninit long ol king na ol gavman, na ol i mas bihainim tok bilong ol. Na oltaim ol i mas redi long mekim olgeta kain gutpela wok.” (Taitus 3:1) Na Jisas i givim tok long lain bilong em olsem: “Samting bilong Sisar, em yupela i mas givim long Sisar. Na samting bilong God, em yupela i mas givim long God.”—Mak 12:17.
Yu ting olsem wanem sapos wanpela lotu i kirapim ol man long insait long ol pait bilong dispela graun? Namba wan Pita 3:11 i strong long yumi “bihainim gutpela pasin tasol” na ‘wok long kamap wanbel wantaim ol arapela manmeri, na yumi mas strong long bihainim dispela pasin.’ Sapos ol manmeri bilong wanpela lotu i redi long kilim i dai long pait ol wanlotu bilong ol bilong narapela kantri, olsem wanem God i ken laikim dispela lotu? Bilong God i ken orait long wanpela lotu, ol manmeri bilong en ol i mas bihainim nambawan pasin bilong God—em pasin bilong laikim tru ol man. Na Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Sapos man i bihainim dispela pasin bilong laikim tru ol narapela, orait, em i no ken mekim pasin birua long ol narapela na bagarapim ol, em ol pait bilong dispela graun i save kirapim ol man long mekim.
Trupela lotu i save mekim na ol man bilong pait ol i kamap man bilong laikim bel isi. Baibel i bin tok profet long dispela samting, olsem: “Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.” (Aisaia 2:4) Ol man i lotuim God long pasin i tru, ol i no toktok moa long mekim pasin birua, nogat; ol i save bihainim dispela tok: “Yu mas laikim ol wantok olsem yu laikim yu yet.”—Matyu 22:39.
Ol man i bihainim trupela lotu ol i wok long bihainim ol strongpela lo bilong God Jehova—ol i no save mekim pasin pamuk samting. Tok Bilong God i tok: “Ol man i save mekim pasin nogut, ol bai i no inap i go insait long kingdom bilong God. Ating yupela i no save long dispela, a? Nogut yupela i giamanim bel bilong yupela yet. Ol man i save mekim pasin pamuk, na ol man i save lotu long ol giaman god, na ol man i trabel long ol maritmeri, na ol man i save mekim ol kain kain pasin i gat sem wantaim ol arapela man, na ol stilman, na ol man i save mangal long ol samting bilong ol arapela man, na ol man i save spak, na ol man i save tok bilas long ol arapela man, na ol man i save pulim samting bilong ol arapela man, olgeta dispela kain man bai i no inap i go insait long kingdom bilong God. Na bipo sampela bilong yupela i stap kain man olsem. Tasol God i wasim yupela pinis na mekim yupela i kamap lain manmeri bilong em stret. Yupela i kisim nem stretpela man pinis. Na long nem bilong Bikpela Jisas Krais na long strong bilong Spirit bilong God yet, God i mekim yupela i kamap stretpela manmeri long ai bilong en.”—1 Korin 6:9-11.
Nau Em Taim Bilong Tingim Ol Samting Yu Mas Mekim
Em bikpela samting long yumi mas save, olsem wanem lotu giaman i narapela kain long trupela lotu. Buk Kamapim Tok Hait long Baibel i kamapim klia olsem, “Bikpela taun Babilon” em olgeta lotu giaman bilong graun, na i olsem wanpela pamukmeri na “ol king bilong graun ol i bin mekim planti pasin pamuk wantaim dispela meri.” Em i gat asua long blut na em i holim kap gol long han bilong em “na ol kain kain pasin i sting tru long ai bilong God na ol kain kain doti bilong pasin pamuk bilong dispela meri, em olgeta i pulap long dispela kap.” (KTH 17:1-6) I no gat wanpela samting bilong dispela meri em God i ken orait long en.
Olsem na nau em i taim bilong yumi mas tingim gut ol samting yumi mas mekim. Gutpela Man bilong wokim yumi em i mekim wanpela singaut i go long ol man i gat gutpela bel em ol i stap yet insait long Bikpela Babilon, olsem: “Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin.”—KTH 18:4.
Sapos yu laik bihainim lotu em God i laikim, gutpela sapos yu kisim sampela save moa long ol Witnes Bilong Jehova. Dispela sat i stap klostu i kamapim sampela bilip bilong ol, wantaim sampela tok bilong Baibel i as bilong ol dispela bilip. Lukim Baibel bilong yu na bai yu ken save, ol bilip bilong ol Witnes i stret wantaim Tok Bilong God o nogat. Painimaut olsem, lotu bilong ol i kamapim kaikai bilong trupela lotu o nogat. Sapos lotu bilong ol i mekim olsem, em nau, yu save pinis long lotu God i laikim.
[Blok long pes 5]
SAMPELA BILIP BILONG OL WITNES BILONG JEHOVA
BILIP BAIBEL I TOK WANEM
Nem bilong God em Jehova Kisim Bek 6:3 (NW); Song 83:18 (NW)
Baibel em Tok Bilong God Jon 17:17; 2 Timoti 3:16, 17
Krais Jisas em Pikinini Matyu 3:16, 17; Jon 14:28
bilong God
God i bin wokim man, em Stat 1:27; 2:7
i no kamap nating
Olgeta man i save dai, Rom 5:12
long wanem, namba wan
man i mekim sin
Taim man i dai, em i dai Saveman 9:5, 10; Esekiel 18:4
tru—no gat wanpela hap
bilong em i stap laip yet
Hel em i matmat Jop 14:13; KTH 20:13,Nupela
Testamen na Ol Sam (1980)
Man i dai pinis em inap Jon 5:28, 29; 11:25; Aposel 24:15
kirap bek
Krais i givim laip bilong Matyu 20:28; 1 Pita 2:24; 1 Jon 2:
em bilong baim bek olgeta 1, 2
man i bihainim tok
Mas beten long Jehova tasol Matyu 6:9; Jon 14:6, 13, 14
long rot bilong Krais
Mas bihainim ol lo bilong 1 Korin 6:9, 10
Baibel long ol samting
bilong stretpela pasin
No ken lotuim God long rot Kisim Bek 20:4-6; 1 Korin 10:14
bilong ol piksa samting
Mas klia long wok bilong Lo 18:10-12; Galesia 5:19-21
ol spirit nogut
Man i no ken putim blut i Stat 9:3, 4; Aposel 15:28, 29
go insait long bodi
Ol disaipel tru bilong Jon 15:19; 17:16; Jems 1:27; 4:4
Jisas ol i no save insait
long ol samting bilong
dispela graun
Olgeta Kristen i save Aisaia 43:10-12; Matyu 24:14; 28:
mekim wok witnes—ol i autim 19, 20
gutnius bilong Kingdom
Go insait olgeta long wara Mak 1:9, 10; Jon 3:22; Aposel 19:
na kisim baptais i makim man 4, 5
i dediket long God
Pasin bilong givim bikpela Jop 32:21, 22; Matyu 23:8-12
nem long ol bikman bilong
lotu i no stret wantaim
tok bilong Baibel
Yumi stap long “taim bilong Daniel 12:4; Matyu 24:3-14;
las de” 2 Timoti 3:1-5
Taim Krais i kam bek, yumi Matyu 24:3; Jon 14:19; 1 Pita 3:
no inap lukim em 18
Satan em i bos bilong Jon 12:31; 1 Jon 5:19
dispela graun
God bai pinisim pasin nogut Daniel 2:44; KTH 16:14, 16; 18:
bilong nau 1-8
Kingdom bilong God long Aisaia 9:6, 7; Daniel 7:13, 14;
han bilong Krais bai bosim Matyu 6:10
dispela graun long
stretpela pasin
“Liklik lain” bai wok king Luk 12:32; KTH 14:1-4; 20:4
wantaim Krais long heven
Ol narapela man God i orait Luk 23:43, Nupela Testamen na
long ol, ol bai kisim laip Ol Sam (1978); Jon 3:16
oltaim long Paradais long graun
[Piksa long pes 4]
Long taim bilong Kot Bilong Misin, ol i kilim i dai planti tausen tausen man
[Piksa long pes 6]
Ol Pait Bilong Lotu i mekim na blut bilong planti man i kapsait
[Piksa long pes 7]
Lotu i tru i save kamapim gutpela kaikai
[Piksa Kredit Lain long pes 2]
Cover: Garo Nalbandian